1-2. Mini’ e piin nrayog ni ngar ayuweged be’ ni be fil e Bible ni nge mon’og nge un ko taufe?

AMY ni be’ nib pin ni ma par u Fiji e yog ni gaar: “Rug baadag e n’en ni ug fil u Bible, ma gu manang ni ireray e tin riyul’. Machane nap’an nug tabab i chag ngak e pi walag u lan e ulung, ma aram e n’en ni ayuwegeg ni nggu thilyeg boch ban’en u rarogog, mug mon’og nggu un ko taufe.” Bay ban’en nib ga’ fan nrayog ni ngad filed ko re n’ey: Ba mom rogon ni nge mon’og be’ ni be fil e Bible nge un ko taufe ni faanra pi’ e pi walag u lan e ulung e ayuw ngak.

² Gubin e tamachib nrayog ni ngar ayuweged e piin kafin nra uned ko muulung ni ngar manged bang ko ulung rodad. (Efe. 4:16) Leilani nreb e pioneer ni ma par u Vanuatu e yog ni gaar: “Bay ba thin ni yima yog ni yima gaar, gubin e girdi’ u lan binaw nib t’uf ni ngar pied e ayuw u rogon ni ngan chuguliy reb e bitir. Gu be lemnag ni ku aray rogon e bin ni ngan pingeg be’ ni nge mang reb i gachalpen Jesus. Ba ga’ ni urngin e walag u lan e ulung nib t’uf ni ngar ayuweged be’ ni nge yib ko tin riyul’.” Ra ngan ayuweg reb e bitir ni nge ilal mab t’uf e ayuw rok girdien e tabinaw, nge pi fager ko fare tabinaw, nge pi sensey ko fare tir. Rayog ni ngar rin’ed e re n’ey u nap’an ni yad ra pi’ e athamgil nga laniyan’, mi yad fil boch ban’en ngak nib ga’ fan. Ere ku arrogon e pi walag u lan e ulung nrayog ni ngar pied e fonow ngak e piin yad be fil e Bible mar pied e athamgil nga lanin’rad, mar ayuweged yad ni ngar mon’oggad ngar uned ko taufe.​—Prov. 15:22.

3. Mang e kam fil ko n’en ni yog Ana, nge Dorin, nge Leilani?

³ Mang fan nsusun e nge felfelan’ reb e walag u nap’an nra pi’ yugu reb e walag e ayuw ngak e en yow be fil e Bible? Am tay fanam i yan ko n’en ni yog Ana nreb e special pioneer ko fare nam nu Moldova. I gaar, “Boor ban’en nib t’uf ni ngan ayuweg be’ ni be fil e Bible riy, mab mo’maw’ ni faanra kemus ni yigoo facha’ ni yow be fil e Bible e nge ayuweg ko tin nib t’uf rok.” Dorin ni ku reb e special pioneer ni  ma pigpig ko re nam nem e yog ni gaar, “Yu ngiyal’ e ma yog boch e walag ban’en ni ma taw nga gum’irchaen e en gu be fil e Bible ngak, ni ban’en ndawor gu lemnag.” Ki yog Leilani reb i fan nsusun e ngad felfelan’gad u nap’an nra ayuwegdad yugu boch e walag. I gaar, “Nap’an nra guy facha’ ni be fil e Bible rogon ni yibe dag e t’ufeg ngak ma yibe lemnag, ma re n’ey e ra ayuweg ni nge nang nriyul’ ni gadad e girdi’ rok Jehovah.”​—John 13:35.

4. Mang e gad ra weliy ko re article ney?

⁴ Machane sana rayog ni nge lungum u wan’um, ‘Mang e rayog ni nggu rin’ ya nge yag nug ayuweg be’ ni be fil e Bible ni nge mon’og ni yugu aram rogon ni gathi gag e gu be fil e Bible ngak?’ Ngad weliyed e n’en nrayog ni ngad rin’ed ni faanra ke yog reb e walag ngodad ni ngad uned ngak nga darod da guyed be’ ni yow ma fil e Bible, nge n’en nrayog ni ngad rin’ed u nap’an nra tabab be’ ni be fil e Bible ni nge un ko muulung. Ku gad ra weliy rogon nrayog ni nge ayuweg e piin piilal e piin yad ma fil e Bible ni ngar mon’oggad ngar uned ko taufe.

5. Mang e susun ni ngam rin’ u nap’an nra piningem reb e walag ni ngam un ngak ko fol Bible ni ngar tew be’?

⁵ Faen be fil e Bible ngak be’ e ir e ba milfan ngak ni nge ayuweg facha’ ni nge tamilang e Thin rok Got u wan’ u nap’an e fol Bible ni yow be tay. Machane, nap’an nra piningem reb e walag ni ngam un ngak ngam marow mu guyew be’ ni yow ma fil e Bible, ma susun e ngam un ngak ni ngam ayuweg. (Ekl. 4:9, 10) Ere mang e rayog ni ngam rin’ ya nge yag nim ayuweg u nap’an ni gimew be fil e Bible ngak facha’?

6. Faanra ngam un ngak reb e walag ko fol Bible ni ngar tew be’, ma uw rogon ni ngam fol ko fare kenggin e motochiyel ni bay ko Proverbs 20:18?

⁶ Mu fal’eg rogom ni fan ko fol Bible ni gimed ra tay. Som’on e nga mog ngak fare walag ni nge yog boch ban’en ngom u murung’agen facha’ ni yow ma fil e Bible. (Mu beeg e Proverbs 20:18.) Rayog ni ngam fith ni nge lungum: “Mang e ga manang u murung’agen e cha’ney ni gimew ma fil e Bible? Mang e gimew ra fil? Mang e ga baadag ni nge fil u nap’an e fol Bible ni gimew ra tay? Bay ban’en nsusun e nggu rin’ ara dab gu rin’, fa nggog ara dab gog u nap’an e fol Bible ni gad ra tay, fa? Uw rogon nrayog ni nggu pi’ e athamgil nga laniyan’ ya nge yag ni mon’og?” Bin riyul’ riy e, dabi yog fare walag ngom boch ban’en u murung’agen facha’ nsusun e nge par nib mith. Machane tin ra yog ngom e susun nra ayuwegem ni ngam nang rogon ni ngam ayuweg facha’. Bay reb e missionary ni ka nog Joy ngak ni ma weliy e pi n’ey ngak e piin yad ra un ngak ko fol Bible ni yow be tay be’. I gaar: “Tin gu ma yog ko en nra un ngog e ma ayuweg ni nge adag ni nge ayuweg facha’ ni gu be fil e Bible ngak, miki nang e n’en nge yog u nap’an e fol Bible ni gamad ra tay.”

7. Faanra ngam un ngak reb e walag ko fol Bible ni ngar tew be’, ma mang fan nib t’uf ni ngam fal’eg rogom u m’on riy?

⁷ Faanra ke piningem reb e walag ni ngam un ngak ko fol Bible ni ngar tew be’, mab fel’ ni ngam fil u m’on e n’en ni gimed ra weliy murung’agen u nap’an e fol Bible ni gimed ra tay. (Ezra 7:10) Baaray e n’en ni yog Dorin ni kan weliy murung’agen kafram. I gaar: “Gu ma felfelan’ ni faanra ke fal’eg fare walag ni ke un ngog rogon ko fol Bible ni  gamow ra tay be’ u m’on riy. Ya faanra rin’, ma aram e rayog ni nge weliy boch ban’en nra ayuweg faen ni gamow ma fil e Bible.” Maku reb e, ra nang faen ni yibe fil e Bible ngak ni gimew l’agruw ni kam fal’egew rogomew u m’on riy, mab fel’ e n’en ni gimew be rin’ nrayog ni nge folwok riy. Yugu aram rogon nde yag ni ngam fal’eg i fil e n’en ni ngam weliyed nib fel’ rogon, machane rayog ni ngam tay e tayim ni ngam fil e tin nib ga’ fan riy.

8. Nap’an fare fol Bible, ma uw rogon nrayog ni ngam meybil u reb e kanawo’ nib tamilang?

⁸ Ba ga’ fan e meybil ni yima tay u nap’an e fol Bible. Ere mu fal’eg i lemnag u m’on riy e n’en ni ga ra yog u lan e meybil rom ni faanra ka nog ngom ni ngam fek e meybil romed. Faan ga ra rin’ e re n’ey, ma aram e rayog ni ngam meybil u reb e kanawo’ nib tamilang. (Ps. 141:2) I yib ngan’ Hanae ni ma par u Sapan rogon e meybil ni tay reb e walag nib pin ni un ngak e en ma fil e Bible ngak. I yog ni gaar: “Rayog ni nggu nang nib chugur e tha’ u thilrow Jehovah ma gu baadag ni nggu bod ir. Kug thamiy gelngin ni gub t’uf rok u nap’an ni uneg fithingag u lan e meybil rok.”

9. Mang e rayog ni ngam rin’ ya nge yag nim ayuweg e en kam un ngak u nap’an ni be fil e Bible ngak be’ nrogon ni bay ko James 1:19?

⁹ Mu ayuweg fare walag u nap’an ni be fil e Bible ngak be’. Omamuyovbi nreb e special pioneer u Nigeria e yog ni gaar: “En ke un ngom ni nge ayuwegem u nap’an e fol Bible romew be’ e susun ni nge motoyil nib fel’ rogon u nap’an ni ga be fil e Bible ngak facha’. Rayog ni nge yog boch ban’en nra taw nga gum’irchaen facha’, machane yugu dabi pag urngin ban’en ni nge weliy ni bochan e manang ni fare walag ni ke un ngak e ir e ba milfan ngak ni nge fil e Bible ngak facha’.” Ere uw rogon ni ngam nang e ngiyal’ ni ngam non riy u nap’an fare fol Bible nge n’en nrayog ni ngam weliy? (Prov. 15:23) Mmotoyil nib fel’ rogon u nap’an ni be non fare walag nge facha’ ni yibe fil e Bible ngak. (Mu beeg e James 1:19.) Ga ra rin’ e re n’ey, ma aram e rayog ni nge bung rogom ni ngam pi’ e ayuw ko ngiyal’ nib puluw ni ngam rin’ riy. Bin riyul’ e, ba t’uf ni ngam lem u m’on ni ngam non. Bod nde fel’ ni nge pag urngin ban’en ni ngam weliy, ara ngam th’ab e thin ko fare walag ni be fil e Bible ngak facha’ u nap’an ni be weliy fan ban’en. Ku de fel’ ni ngam weliy yugu ban’en nib thil ko n’en ni ir e gimed be weliy murung’agen. Machane rayog ni ngam weliy buchuuw ban’en, ara mu weliy reb e fanathin, ara mu fith reb e deer ya nge yag ni ngari tamilang e n’en ni gimed be weliy murung’agen. Bay yu ngiyal’ nsana ga ra lemnag ndakuriy ban’en ni ngam weliy u murung’agen e n’en ni gimed be fil. Machane faan ga ra yog boch ban’en nib manigil ni be rin’ facha’ ni yibe fil e Bible ngak, ma ga be dag ngak ni ga be lemnag, ma aram e rayog ni ngam ayuweg ni nge mon’og.

10. Uw rogon ni pi n’en ke buch rom e rayog ni nge ayuweg faen be fil e Bible?

¹⁰ Mu weliy boch ban’en ni ke buch rom. Faanra ba puluw ni ngam rin’, ma rayog ni ngam weliy ngak faen be fil e Bible rogon nim nang e tin riyul’, ara rogon ni kam gel nga reb e magawon ni um mada’nag, ara rogon ni ke ayuwegem Jehovah. (Ps. 78:4, 7) N’en ni buch rom e rayog ni aram e n’en nib t’uf ni nge rung’ag facha’ ya nge gel e michan’ rok, ara pi’ e athamgil nga laniyan’ ni nge ulul ni nge mon’og nge un ko taufe. Ku rayog ni nge ayuweg ni  nge nang rogon ni nge gel ko magawon ni be mada’nag. (1 Pet. 5:9) Gabriel ni ma par u Brazil ni be pigpig e chiney ni ir reb e pioneer e yib ngan’ e n’en ni ayuweg u nap’an ni un fil e Bible ngak. I gaar: “Nap’an nug rung’ag boch ban’en ni i buch rok boch e walag, ma aram mug fil riy ni manang Jehovah e magawon ni gad ma mada’nag. Ma faanra ke yag ko pi walag nem ni ngar gelgad ko magawon rorad, me ere arrogog ni ku rayog rog.”

11-12. Mang fan nsusun e nga darod da nonad ngak be’ ni ma fil e Bible u nap’an nra yib ko muulung?

¹¹ Faanra nge mon’og be’ ni ma fil e Bible nge un ko taufe, mab t’uf ni nge un ko muulung ni gubin ngiyal’ me yib angin ngak. (Heb. 10:24, 25) Ba mudugil ni fare walag ni yow be fil e Bible e ir e som’on nra pining ni nge un ko muulung. Machane nap’an nra yib facha’ ko muulung, ma gad gubin nrayog ni ngad pied e athamgil nga laniyan’ ni nge ulul nga i yib nga Tagil’ e Liyor rodad. Ere mang boch e kanawo’ nrayog ni ngad rin’ed e re n’ey riy?

¹² Mman mu non ngak facha’ ni ma fil e Bible. (Rom. 15:7) Faan gad ra yan nda nonad ngak facha’ u nap’an ni keb ko muulung, ma rayog ni ngki adag ni nge ulul nga i yib nga Tagil’ e Liyor rodad. Rayog ni ngam pining e magar ngak, mag pining ni nge un ngom ngam marow mu mada’nagew yugu boch e walag, machane dab mu k’aring ni nge magagawon. Nap’an nra yib ko muulung ma dab mu lemnag ni bay be’ ni be ayuweg, ya sana rayog ndawori taw e en yow ma fil e Bible ko muulung, fa reb e bay e maruwel nib milfan ngak ni nge rin’ u lan e ulung. Mu fal’eg e motoyil ko n’en be yog facha’ mag dag ngak ni ga be lemnag. Mang angin nra yib ni faanra mu non ngak facha’? Am tay fanam i yan ko n’en ni buch rok reb e walag ni pumoon ni ka nog Dmitrii ngak ni ka fini yan in e duw ni kan taufenag, ma chiney e ke mang reb e ministerial servant. Nap’an ni lemnag e yay nsom’on ni un ko muulung, me yog ni gaar: “Bay reb e walag ni pumoon ni guyeg ni gu be son u wuru’ e Tagil’ e Liyor ya gu be magagawon ni nggu wan nga naun. Ere yib i piningeg nggu warow nga naun. Boor e girdi’ nra bad ra nonad ngog. Rug gin ko re n’ey. Rug baadag rogon e t’ufeg ni kan dag gog, mu ug finey ni manga yugu un tay e muulung ni gubin e rran. Dariy bayay ni ke buch ban’en rog ni aray rogon.”

13. Mang e rayog ni nge rin’ e ngongol rom ngak be’ ni ma fil e Bible?

¹³ Mu dag e kanawo’ nib fel’ ni ngan folwok riy. Rogon e ngongol rom e rayog ni nge ayuweg facha’ ni be fil e Bible ni nge nang ni ke pirieg e tin riyul’. (Matt. 5:16) Vitalii ni ma pigpig e chiney u Moldova ni ir reb e pioneer e yog ni gaar: “Ug guy rogon e par rok e pi walag u lan e ulung, nge rogon ni yad ma lemnag boch ban’en, nge rogon e ngongol rodad. Re n’ey e micheg ngog ni teliw ko Pi Mich Rok Jehovah e aram e baan riyul’ e teliw.”

14. Uw rogon ni ngongol nib fel’ ni ga be rin’ e rayog ni nge ayuweg be’ ni nga i mon’og i yan?

¹⁴ Ba t’uf ni nge fol facha’ ni be fil e Bible ko pi n’en be fil ya nge bung rogon ni nge un ko taufe. Gathi gubin ngiyal’ nib mom ni ngan rin’ e re n’ey. Machane nap’an nra guy facha’ ni be fil e Bible rogon ni be yib angin ngom e pi kenggin e motochiyel u Bible ni ga be fol riy, ma ra adag ni nge folwok  rom. (1 Kor. 11:1) Am lemnag e n’en ni buch rok Hanae ni faen kan weliy murung’agen. I yog ni gaar: “Pi n’en nug be fil rogon ni nggu rin’ e aram e pi n’en ni be rin’ e pi walag. Gu fil rorad rogon ni nggu pi’ e athamgil nga laniyan’ yugu boch e girdi’, mu ug n’ag fan e kireb ni kan rin’ ngog, nge rogon ni nggu dag e t’ufeg. Gubin ngiyal’ ni yad ma yog fel’ngin yugu boch e girdi’. Ere gu baadag ni nggu folwok rorad.”

15. Uw rogon ni be ayuwegdad e Proverbs 27:17 ni ngad nanged feni ga’ fan ni ngad manged fager rok be’ ni be fil e Bible u nap’an nra ulul nga i un ko muulung?

¹⁵ Ngam mang fager rok faen be fil e Bible. Nap’an nra ulul faen be fil e Bible ni nga i un ko muulung, mab t’uf ni ngam dag ngak ni ga be lemnag. (Fil. 2:4) Rayog ni ngam guy rogon ni ngam nang boch ban’en u rarogon. Rayog ni nga mog ngak ni ga be felfelan’ nga rogon ni be mon’og. Ku rayog ni ngam fith murung’agen e fol Bible ni be tay, nge tabinaw rok, nge maruwel rok, machane dab mu fith boch e deer nra k’aring e tamra’ ngak. Ga ra rin’ e pi n’ey, ma rayog ni nge chugur e tha’ u thilmew. Nap’an ni ga ra guy rogon ni ngam mang fager rok, ma aram e ga be ayuweg ni nge mon’og ya nge yag ni un ko taufe. (Mu beeg e Proverbs 27:17.) Chiney e be pigpig Hanae ni ir reb e regular pioneer. Nap’an ni be lemnag e ngiyal’ ni tabab ni nge un ko muulung, me yog ni gaar: “Nap’an ni tabab ni nge yag boch e fager ngog u lan e ulung, ma aram mug adag ni ngaug un ko muulung. Ere gu ma athamgil nggu un ko muulung ni yugu aram rogon ni ke aw parawog. Rug ma felfelan’ ni nggu chag ngak e pi fager rog u lan e ulung. Bochan e re n’ey me mom ngog ni nggu tal ndab kug m’ag fager ngak e piin ndarur pigpiggad ngak Jehovah. Gu baadag ni nge chugur e tha’ u thilmow Jehovah nge pi walag. Ere gu dugliy ni nggu un ko taufe.”

16. Ku mang reb e ban’en nrayog ni ngam rin’ ni ngam ayuweg be’ ni be fil e Bible ni nge nang ni ir bang ko ulung?

¹⁶ Nap’an nra ulul faen be fil e Bible ni nge mon’og i yan miki thilyeg boch ban’en u rarogon, ma ngam ayuweg ni nge nang ni ir bang ko ulung. Rayog ni ngam rin’ e re n’ey ni aram e ngam gol ngak. (Heb. 13:2) Denis ni be pigpig u Moldova e sul nge lemnag e ngiyal’ ni i fil e Bible riy, me yog ni gaar: “Boor yay ni ma yib e pi walag ngan piningmow e ppin rog ni nggu chaggow ngorad. Ur weliyed ngomow rogon ni ke ayuwegrad Jehovah, ma re n’ey e pi’ e athamgil nga lanin’mow. Bochan e re n’ey, me yag ni nggu dugliyew u wan’mow ni nggu pigpiggow ngak Jehovah, mu kug nangew ni faan gamow ra rin’ ma ra fel’ e yafos romow.” Nap’an nra bung rogon be’ ni ma fil e Bible ni nge un ko machib, ma rayog ni ngam pining ni nge un ngom ko machib. Diego nreb e tamachib u Brazil e yog ni gaar: “Boor e walag ni ur pininged gag ni nggu un ngorad ko machib. Ireray e bin th’abi fel’ e kanawo’ ni nggu nang boch ban’en u murung’agrad. Nap’an nug rin’ e re n’ey, mug fil boor ban’en rorad, me chugur e tha’ u thilmad Jehovah nge Jesus.”

17. Uw rogon nrayog ni nge pi’ e piin piilal e ayuw ngak e piin yad be fil e Bible?

¹⁷ Mu tay e tayim ni fan ko piin yad be fil e Bible. Gimed e piin piilal e rayog ni ngam ayuweged e piin yad be fil e Bible ni ngar mon’oggad ngar uned ko  taufe ni faan gimed ra dag e t’ufeg ngorad ma gimed be lemnagrad. Rayog ni ngaum non ngorad u nap’an ni kar bad ko muulung, fa? Faan gimed ra rin’ e re n’ey, ma rayog ni ngar nanged ni gimed be lemnagrad, nib ga’ ni faanra dab mu paged talin fithingrad u nap’an ni yad ra tabab i pi’ e fulweg u nap’an e muulung. Rayog ni ngam yarmiy e schedule rom ya nge yag nim un ngak reb e walag ko fol Bible ni yow ra tay be’, fa? Ba ga’ angin e re n’ey nra yib ngak faen be fil e Bible nib thil nga rogon ni ga be lemnag. Baaray e n’en ni yog Jackie nreb e pioneer u Nigeria. I gaar: “Boor e piin gu ma fil e Bible ngorad ni yad ma gin u nap’an ni yad ra nang ni fare walag ni un ngog e ir reb e piilal. I yog be’ ni gamow ma fil e Bible ni gaar: ‘Dariy ba ngiyal’ nra rin’ e pastor rog ban’en ni aray rogon. Kemus ni yigoo piin nib fel’ rogorad e ma yan i guyrad ni faan yira pi’ puluwon!’” Chiney e ma un e cha’ney ko muulung.

18. Uw rogon ni nge rin’ e piin piilal e maruwel ni kan pag fan ngorad nrogon ni be yog e Acts 20:28?

¹⁸ Mu skulnag e piin yad be fil e Bible ngak be’ mag pi’ e athamgil nga lanin’rad. Gimed e piin piilal e ba ga’ fan e maruwel romed ni ngam ayuweged e pi tamachib ni ngar salapgad ko machib nge rogon ni ngar filed e Bible ngak e girdi’. (Mu beeg e Acts 20:28.) Faanra be magagawon be’ ni nge mang ir e fil e Bible ngak be’ u nap’an ni kam un ngak, ma gog ngak nrayog ni gur e ngam fil e Bible ngak facha’. Jackie ni kan weliy murung’agen kafram e yog ni gaar: “Ba ga’ ni ma fith e piin piilal murung’agen e piin gu ma fil e Bible ngorad. Nap’an nug ra mada’nag e magawon u rogon ni nggu fil e Bible ngak be’, ma yad ma pi’ e fonow nib manigil ngog.” Boor ban’en nrayog ni nge rin’ e piin piilal ni ngar pied e athamgil nga laniyan’ e piin yad ma fil e Bible ngak e girdi’. (1 Thess. 5:11) Ki yog Jackie ni gaar: “Gu ma felfelan’ u nap’an nra pi’ e piin piilal e athamgil nga lanin’ug ma rogned ngog nib ga’ fan u wan’rad e maruwel ni gu be rin’. Thin rorad e ma baudeg lanin’ug ni bod ba kap i ran ni kug unum u reb e rran nib gel e gowel. Rogon e athamgil ni yad ma pi’ ngog e ma ayuwegeg ni nggu nang nib fel’ e maruwel ni gu be rin’ nug be ayuweg e piin gu be fil e Bible ngorad, maku ma gelnag e felfelan’ rog.”​—Prov. 25:25.

19. Mang e rayog ni nge k’aring e felfelan’ ngodad ni gad gubin?

¹⁹ Yugu aram rogon ndariy be’ ni gad be fil e Bible ngak e chiney, machane rayog ni ngad ayuweged be’ ni nge mon’og ko tirok Got ban’en. Rayog ni ngad rin’ed e re n’ey ni aram e ngad weliyed ban’en nra ayuweg fare walag ni kad uned ngak, machane dab da weliyed ban’en ni boor. Rayog ni ngad manged fager rok e piin yad be fil e Bible u nap’an ni yad ra tabab ni ngar uned ko muulung, ma gad dag e kanawo’ nib fel’ nrayog ni ngar folwokgad riy. Ku rayog ni nge pi’ e piin piilal e athamgil nga laniyan’ e piin yad be fil e Bible ni aram e ngar ted e tayim ni fan ngorad. Ku rayog ni ngar pied e athamgil nga laniyan’ e piin yad be fil e Bible ngak e girdi’ ni aram e ngar skulnaged yad ma rogned fel’ngin e tin yad be rin’. Bin riyul’ riy e, yugu aram rogon ni kemus ni buchuuw e n’en ni kad rin’ed ni ngad ayuweged be’ ni nge t’uf Jehovah rok miki pigpig ngak, machane ra yibnag e felfelan’ ngodad!