1-2. Nani wulenda sadisa nlonguki wu Kibibila kukonzuka mu kiphevi ayi kubotama?

KHOMBA MUEKA yinkieto bantedilanga Amy wunkalanga ku Fiji wutuba: “Minu yaba zolanga beni mambu yaba longukanga mu ndongukulu’ama yi Kibibila ayi yizaba ti mawu madi makiedika. Vayi yibalula to nzingulu’ama ayi yibaka makani ma kubotama bo yitona kuba nkangulu na zikhomba mu kimvuka.” Mambu Amy katuba, mammonisa ti muingi nlonguki wu Kibibila kabaka makani ma kubotama, vantombuluanga lusadusu lu bankaka mu kimvuka.

² Kadika nsamuni kalenda buela mioko muingi kimvuka kiyonzuka. (Efe. 4:16) Khomba mueka widi ntuami ntuala bantedilanga Leilani wunkalanga ku Vanuatu wutuba: “Vadi ngana mueka yintuba ti vantombuluanga buala bumvimba muingi kukonzula muana. Mu mbuenu’ama, mawu mvandi mammonikanga muingi kukitula batu minlonguki.” Diawu tulenda tubila ti, vantombuluanga kimvuka kioso muingi kusadisa mutu kusadila Yave. Basi dikanda, bakundi ayi minlongisi mi kikola, badi kiyeku ki kusadisa muana kukonzuka ayi kuba diela. Bawu bamvanganga mawu mu kunkindisa ayi kunlongisa malongi mankinza. Bobuawu mvandi, minsamuni balenda vana malongi, kukindisa ayi kuvana kifuani kimboti kuidi minlonguki mi Kbibila. Mu phila ayoyo, bawu balenda kuba sadisa kukonzuka mu kiphevi ayi kubotama.—Zinga. 15:22.

3. Mbi ngie belonguka mu mambu khomba Ana, Dorin, ayi Leilani batuba?

³ Zikhomba zioso mu kimvuka, balenda sadisa nlonguki wu Kibibila. Ayi khomba wunlongukanga, yandi kafueti vutulanga matondo mu mawu. Khomba mueka bantedilanga Ana widi ntuami ntuala wufilu ku Moldavia wutuba: “Phasi beni mutu wumueka  kununga kudukisa zitsatu zi nlonguki wu Kibibila bo kantona kukonzuka mu kiphevi.” Dorin, mvandi widi ntuami ntuala wufilu ku Moldavia wutuba: “Khumbu ziwombo minsamuni mimbasikanga yama mu kisalu ki kusamuna, bawu bantubanga mambu manyikuna ntima wu nlonguki ayi mu minu veka khanu yisa nunga ko kuma vanga.” Leilani tube tubila mu lutangu lu mavioka wubuela: “Bo nlonguki kammona luzolo ayi lukiebu lu zikhomba zinkaka mu kimvuka, nandi wumvisanga mu bukiedika ti befu tuidi mu dikabu di Yave.”—Yoa. 13:35.

4. Mbi tunkuiza mona mu dilongi adidi?

⁴ Ḿba negie wulenda kuyikuvusa: ‘Buidi yilenda sadisila nlonguki wu Kibibila kukonzuka mu kiphevi, boti yisi ko nlongisi’andi wu Kibibila?’ Mu dilongi adidi, tuemmona mbi tulenda vanga boti babe tutumisa muingi tulandakana ndongukulu yi Kibibila. Mvandi, tuemmona mbi tulenda vanga bo nlonguki wu Kibibila kantona kulandakana zikhutukunu. Bosi, tunkuiza mona mbi bakulutu ba kimvuka balenda vanga, muingi kusadisa minlonguki mi Kibibila kukonzuka mu kiphevi ayi kubotama.

5. Boti bama kutumisa muingi wulandakana ndongukulu yi Kibibila, buidi fueti kuyitadila?

⁵ Mu ndongukulu yi Kibibila, mutu widi kiyeku ki kusadisa nlonguki kuvisa Diambu di Nzambi, widi nlongisi. Vayi boti nlongisi be kutumisa muingi wulandakana ndongukulu yi Kibibila kankuiza vana, ngie fueti kuyitadila banga nsadisi. (Mpovi 4:9, 10) Vayi mbi ngie fueti vanga muingi ndongukulu beni yi Kibibila yivangama mu phila yimboti?

6. Dedi buntubila Zingana 20:18, mbi ngie fueti vanga bo bakutumisa muingi wulandakana ndongukulu yi Kibibila?

⁶ Kubama buboti mu ndongukulu beni yi Kibibila. Ditheti, tomba kuzaba matedi nlonguki beni mu kukuvula nlongisi’andi. (Tanga Zingana 20:18.) Ngie wulenda kuvula nlongisi’andi: “Mbi ngie zebi matedi nlonguki’aku? Mambu mbi munkuiza longuka bubu? Makani mbi widi mu dilongi di bubu? Vadi diambu yilenda tuba voti yikhambulu nsua kutuba mu ndongukulu’inu? Mbi bilenda sadisa nlonguki kukonzuka mu kiphevi?” Bukiedika ti nlongisi kalendi ko kuzabikisa mambu ma luzingu ma nlonguki’andi, ngie wukhambulu nsua wu kuzaba. Vayi mambu kankuiza kukamba malenda kusadisa beni. Khomba mueka widi mu kisalu ki minsioni bantedilanga Joy, wumvanganga mawu bo kantumisanga zikhomba zinkaka, bo kamvana ndongukulu yi Kibibila. Nandi wutuba: “Minu yinzolanga kuzabikisa zikhomba bambasikanga yama mu kisalu ki kusamuna matedi nlonguki’ama. Kibila mawu ma kuba sadisanga kuvua nkinza nlonguki’ama ayi kuzaba buidi balenda buedila mioko mu ndongukulu’itu.”

7. Kibila mbi fueti kubimina bo baku tumisa muingi wulandakana ndongukulu yi Kibibila?

⁷ Bo bakutumisa muingi wulandakana ndongukulu yi Kibibila, kubama buboti ava kilumbu ki ndongukulu beni. (Esala 7:10) Dorin,  tube tubila kumbusa wutuba: “Minu yinzolanga beni bo mutu wumbasika yama mu kisalu ki kusamuna kankubika ndongukulu yi Kibibila. Mu phila ayoyo, nandi wunkuiza nunga kuvana lusalusu lufueni.” Mvandi, bo nlongisi ayi ngie mu kubama buboti, mawu mankuiza sadisa nlonguki kukubikanga ndongukulu’andi yi Kibibila. Kheti ngie wisi nkuiza nunga ko kukubika mambu moso, vayi botula thangu muingi wuzaba diyindu di mfunu munkuiza longuka.

8. Buidi wulenda bela lufiatu ti nsambu’aku wunkuiza tuadisa ndandu kuidi nlonguki?

⁸ Nkinza beni kuvanganga nsambu va thonono ayi kutsuka ndongukulu yi Kibibila. Diawu, yindula mambu wunkuiza tuba ava nlongisi kaku dinda muingi kuvanga nsambu. Mu phila ayoyo, wunkuiza zaba mambu mankinza ma kutuba. (Minku. 141:2) Bo Hanae wunkalanga ku Japão kaba longukanga Kibibila, nlongisi’andi waba natanga khomba mueka yinkieto muingi kulandakana ndongukulu’awu. Nati bubu, Hanae wuntebukanga moyo minsambu khomba ayoyo kaba vanganga. Nandi wutuba: “Mu nzila minsambu kabe vanganga, minu yivisa ti nandi kikundi kingolo kaba na Yave ayi mawu minu mvama yaba tomba kuvanga. Ayi khumbu zioso kaba tangunanga dizina diama mu minsambu, minu yaba monanga ti nandi wuku phuanga nkinza.”

9. Dedi bummonisina Yakobi 1:19, mbi ngie wulenda vanga muingi kusadisa nlongisi bo kamvana ndongukulu yi Kibibila?

⁹ Sadisa nlongisi bo kantuadisa ndongukulu yi Kibibila. Omamuyovbi ntuami ntuala wufilu wunkalanga ku Nigeria wutuba: “Mu minu didi diambu dimboti mutu wumbasika yama mu kisalu ki kusamuna kuteka matu bo yimvana ndongukulu yi Kibibila. Mu phila ayoyo, nandi wunkuiza vana lusadusu lumboti. Vayi kayolukanga ko beni kibila zebi ti nlongisi nandi widi kiyeku ki kuvana ndongukulu yi Kibibila.” Vayi buabu, thangu mbi ngie fueti tubila dioso diambu? Ayi mambu mbi fueti tuba? (Zinga. 25:11) Bo nlonguki ayi nlongisi badi mu kukoluka, teka matu mu mambu bantuba. (Tanga Yakobi 1:19.) Mu phila ayoyo to wala nungina kuvana lusadusu mu thangu yifuana. Vayi fueti yindula ava kukoluka. Dedi, ngie wulendi koluka ko beni, kumvunzikisa diyindu di nlongisi voti kutona kukoluka mambu mankaka. Vayi ngie wulenda buela sudikisa diyindu nlongisi kabe tona, mu kuvana kifuani voti kiuvu. Khumbu zinkaka ngie wulenda yindula ti wisimvana ko lusadusu lufuana. Mu thangu beni ngie wulenda nyunga voti kutonda nlonguki ayi kumonisa ti wu kumvuanga nkinza. Ngie kuvanga mawu wulenda sadisa nlonguki kukonzuka mu kiphevi.

10. Buidi mambu wuviokila malenda sadisila nlonguki wu Kibibila?

¹⁰ Nzabikisa mambu wuviokila mu luzingu. Boti kuba, wulenda zabikisa kuidi nlonguki buidi ngie wulongukila kiedika. Mvandi, wulenda kunzabikisa buidi wunungina bikaku mu luzingu voti buidi wumuena lusadusu lu Yave mu  luzingu luaku. (Minku. 78:4, 7) Kukuwa mambu wuviokila mu luzingu, ḿba malenda kindisa kiminu ki nlonguki voti kunsadisa kukonzuka mu kiphevi ayi kubotama. Ayi mawu malenda kunsadisa kununga bikaku kadi mu kuviokila. (1 Pete. 5:9) Khomba mueka widi ntuami ntuala wunkalanga ku Brazil bantedilanga Gabriel, wuntebuka moyo mambu mansadisa bo kaba nlonguki wu Kibibila. Nandi wutuba: “Bo yaba kuwanga mambu zikhomba bamviokilanga mu luzingu, yivisa ti Yave wummonanga bikaku tumviokilanga. Ayi boti bawu banunga bikaku abiobio, buna minu mvama yinnunga.”

11-12. Kibila mbi tufueti yambila buboti nlonguki wu Kibibila wuntona kulandakana zikhutukunu?

¹¹ Muingi nlonguki wu Kibibila kabotama, didi diambu dinkinza nandi kulandakananga zikhutukunu ayi kubaka ndandu mu ziawu. (Ebe. 10:24, 25) Ḿba nlongisi’andi nandi mutu wutheti wunkuiza ntumisa mu lukutukunu. Vayi bo kankuiza mu lukutukunu, befu boso tuidi kiyeku ki kunkindisa muingi katatamana kuvanga mawu. Buidi tulenda vangila mawu?

¹² Yamba buboti nlonguki wu Kibibila. (Loma 15:7) Befu kuyamba buboti nlonguki wu Kibibila mu zikhutukunu, mawu mala kunsadisa kutatamana kulandakana ziawu khumbu zinkaka. Mvana mboti ayi nzabikisa kuidi zikhomba zinkaka. Yoluka yandi, kibila ḿba nlonguki’andi yibuna katukidi’abu ko voti widi mu kukieba biyeku binkaka. Yuwa buboti mambu nlonguki kakukamba ayi monisa ti wu kumvua nkinza. Mambu mbi mankaka malenda monika befu kuyamba buboti nlonguki wu Kibibila? Tala mambu Dmitrii wubotama mu mimvu mima vioka ayi widi nsadisi wu bakulutu ba kimvuka, katuba mu matedi lukutukunu luandi lutheti: “Minu yiba wutelama va khotolo Nzo yi Kintinu ayi yaba kuazuka beni. Kibila yisa fika mona ko nlongisi’ama wu Kibibila. Khomba mueka wumbona, wumfikama ayi wutsadisa kukota ku Nzo yi Kintinu. Minu yiyituka beni, kibila zikhomba ziwombo bayiza muingi kumbila. Minu yiyindula, khanu kadika kilumbu tumbanga lukutukunu. Kibila yimona mambu yikhambu monanga mu kinganga kinkaka.”

13. Buidi kifuani kiaku kilenda sadisila nlonguki wu Kibibila?

¹³ Ba kifuani kimboti. Zikhadulu ziaku zilenda sadisa nlonguki kuvisa ti nandi mabakula kiedika. (Matai 5:16) Vitalii widi ntuami ntuala wunkalanga ku Moldavia, wutuba: “Minu yitsikika mayindu mama muingi kumona phila zikhomba mu kimvuka banzingilanga, banyindudilanga ayi phila bamvangilanga mambu mu luzingu luawu. Mawu matsadisa kuba lufiatu ti Zimbangi zi Yave bansadilanga Nzambi mu bukiedika.”

14. Buidi kifuani kiaku kilenda sadisila nlonguki kutatamana kukonzuka mu kiphevi?

¹⁴ Ava kubotama, nlonguki wu Kibibila kafueti sadila mambu kanlonguka mu luzingu luandi. Bukiedika, disiko diambu diluelu. Vayi bo  nlonguki’aku kammona phila ngie nlongisi wunlandikininanga minsua mi Kibibila ayi ndandu wumbakilanga mu mawu, malenda kunsadisa kuba phuila yi kuvanga mvandi mawu. (1 Koli. 11:1) Hanae, tube tubila kumbusa wutuba: “Zikhomba mu kimvuka baba bifuani bi mambu yaba longuka. Minu yilonguka phila yi kukindisila bankaka, yi kuba monisina luzolo ayi yi kuba lemvukila. Zikhomba baba kolukanga mambu mamboti matedi bankaka. Ayi minu yaba tomba kulandakana kifuani kiawu.”

15. Dedi bummonisina Zingana 27:17, kibila mbi tufueti vangila kikundi na minlonguki mi Kibibila?

¹⁵ Vanga kikundi ayi nlonguki wu Kibibila. Bo nlonguki kantatamana kulandakana zikhutukunu, monisa mu bukiedika ti wu kumvuanga nkinza. (Fili. 2:4) Botulanga thangu muingi kukolukanga na nlonguki wu Kibibila, mu khambu kota mu mambu ma luzingu luandi. Ntonda mu mambu kama nunga kubalula mu luzingu luandi. Ayi boti kuba, wunyumvula matedi ndongukulu’andi yi Kibibila, dikanda diandi ayi kisalu kiandi. Masolo amomo, malenda musadisa kuba kikundi kimboti ayi malenda kunsadisa kubaka makani ma kubotama. (Tanga Zingana 27:17.) Hanae bubu widi ntuami ntuala. Mu kuyindula thangu katona kulandakana zikhutukunu, nandi wutuba: “Bo yitona kuvanga bakundi mu kimvuka, minu yitona kuba phuila yiku landakananga zikhutukunu, kheti bo yaba banga wuvonga. Kibila yaba zolanga kuba va kimueka na bakundi bama bamona. Ayi mawu matsadisa kubika kubue ba nkangulu na batu bakhambu sadilanga Yave. Minu yaba vanga mangolo ma kufikama Yave ayi zikhomba mu kimvuka. Diawu yibakila makani ma kubotama.”

16. Mbi binkaka wulenda vanga muingi kusadisa nlonguki wu Kibibila kumona ti widi luvalu mu kimvuka ki Yave?

¹⁶ Bo nlonguki wu Kibibila kantatamana kukonzuka mu kiphevi ayi kambalula nzingulu’andi, nsadisa kumona ti widi luvalu mu kimvuka. Phila yimueka tulenda vangila mawu yidi mu kunyambanga. (Ebe. 13:2) Bo kantebukanga moyo thangu kaba nlonguki wu Kibibila, Denis wunkalanga ku Moldavia wutuba: “Khumbu ziwombo minu ayi nkazi’ama, baba tutumisanga muingi kuvuvisa mu minkungi va kimueka na zikhomba mu kimvuka. Ayi mu minkungi beni, bawu baba tubanga buidi batambudila lusadusu lu Yave. Ayi mawu maba tukindisanga beni. Befu tuzaba ti Yave tuaba tomba kusadila ayi tuzaba ti befu kuvanga mawu, tuala baka luzingu lu mayangi.” Bo bakulutu ba kimvuka banzabikisa nlonguki ti nandi mafuana kutona kusamuna, buna ngie wulenda kuntumisa muingi mu basika va kimueka. Diego nsamuni wumueka wunkalanga ku Brazil wutuba: “Zikhomba ziwombo bathumisa muingi kusala yawu va kimueka mu kisalu ki kusamuna. Yawu yiba phila yimboti yi kuzabila kadika mutu mu bawu. Minu yilonguka beni mu kifuani kiawu ayi mawu matsadisa kubuela ba kikundi ki fikama na Yave ayi Yesu.”

17. Buidi bakulutu ba kimvuka balenda sadisila minlonguki mi Kibibila?

¹⁷ Viokisanga thangu na minlonguki mi Kibibila. Bakulutu ba kimvuka, benu kuvua nkinza ayi kumonisa luzolo kuidi minlonguki mi Kibibila, munkuiza basadisa kukonzuka mu kiphevi ayi kubotama. Diawu, ava lukutukunu voti bo lukutukunu lummana, botula mua thangu muingi kukoluka na minlonguki mi Kibibila. Ayi mu thangu bamvana mimvutu mu zikhutukunu, wuba tedilanga mu mazina mawu. Mu phila ayoyo, bawu bela mona ti ngie wuba vuanga nkinza. Khumbu zinkaka, botulanga thangu muingi wulandakana ndongukulu’awu yi Kibibila. Mawu malenda basadisa mu phila ngie wukhambu yindudila. Jackie, ntuami ntuala mueka wunkalanga ku Nigeria wutuba: “Minlonguki miwombo mi Kibibila, bankuitukanga bo bambakula ti khomba widi mu kulandakana ndongukulu’awu widi nkulutu wu kimvuka. Wumueka mu minlonguki miama wukhamba: ‘Mfumu kinganga kitu kalendi mavanga ko. Nandi wunkuendanga to mu zinzo zi batu badi beni zimbongo, vayi theti bafueti mfuta!’” Nlonguki awowo bubu mana landakana zikhutukunu.

18. Dedi buntubila Mavanga 20:28, buidi bakulutu ba kimvuka balenda kiebila kiyeku Nzambi kaba vana?

¹⁸ Kubika ayi kindisa minlongisi voti minsamuni. Bakulutu ba kimvuka, benu muidi kiyeku kinneni ki kusadisa minsamuni kubuela pisuka mu kusamuna ayi mu kulonga. (Tanga Mavanga 20:28.) Ḿba nsamuni kalenda mona zitsoni kuvana ndongukulu yi Kibibila vantual’aku. Maku monika, ngie wulenda kukivana muingi kuvana ndongukulu beni. Jackie tube tubila mu matangu mabe vioka, wutuba: “Bakulutu ba kimvuka bakukhuvulanga matedi minlonguki miama. Bo yimmona nkaku wu kutuadisa ndongukulu mueka yi Kibibila, bawu baku phananga malongi maku tsadisanga.” Bakulutu ba kimvuka badi kiyeku kinkinza ki kukindisa minlongisi ayi kuba sadisa kubika vonga. (1 Tesa. 5:11) Jackie wubuela: “Minu yinzolanga beni bo bakulutu ba kimvuka baku khindisa ayi baku khamba ti kisalu kiama kidi luvalu va meso mawu. Mambu ma phila ayoyo, ma kumbombanga dedi nlangu wukiozi mu kilumbu kinteka beni muinya. Mambu baku khambanga, mambuelanga lufiatu ayi mayangi yidi mu kutuadisa ndongukulu yi Kibibila.”—Zinga. 25:25.

19. Mayangi mbi befu boso tuala baka?

¹⁹ Kheti bubu wisi ko mutu wuku vana ndongukulu yi Kibibila, ngie wulenda sadisa nlonguki wu Kibibila kubaka makani ma kubotama. Bo baku tumisa muingi wulandakana ndongukulu yi Kibibila, kubama muingi wutuba mambu malenda sadisa nlonguki. Vayi ba keba keba muingi wubika koluka beni. Vanga kikundi na minlonguki bantona kulandakana zikhutukunu ayi ba kifuani kimboti kuidi bawu. Ayi boti widi nkulutu wu kimvuka, botula thangu muingi wukindisa minlonguki mi Kibibila. Ngie kuvanga mawu, wala baka mayangi ma kusadisa mutu kuzola ayi kusadila Yave.