1. Ma lubbe ki Matayo 24:9, pingo pe omyero wabed ki ur ka jo me lobo-ni gidagwa?

JEHOVAH ocweyowa ki miti me nyuto mar bot jo mukene kun bene wamito ni gumarwa. Pi meno, ka ngat mo dagwa, wawinyo marac adada dok waromo bene bedo ki lworo. Me labolle, laminwa ma nyinge Georgina, ma bedo i lobo Ulaya owaco ni: “I kare ma onongo atye ki mwaka 14, mamana onongo daga adada pi tic pi Jehovah. Cwinya ocwer, awinyo calo atye kena, dok acako tamo ni gwok pe abedo dano maber.” * Omego mo ma nyinge Danylo ocoyo ni: “I kare ma lumony gugoya, guyeta, dok gumina bwura pien abedo Lacaden pa Jehovah, abedo ki lworo dok lewic omaka matek.” Adage ma kit meno weko wawinyo marac adada ento pe weko wabedo ki ur. Yecu owaco wa con ni dano gibidagowa.​—Kwan Matayo 24:9.

2-3. Pingo dano dag lulub kor Yecu?

² Jo me lobo-ni gidag lulub kor Yecu. Pingo? Pien calo Yecu, wan bene ‘pe wabedo jo me lobo.’ (Jon 15:17-19) Macalo adwogine, kadi bed waworo gamente pa dano, pe wadonyo i tim me wibye, wagoyo calut i nyim bandera, nyo wawero wer lubaro. Waworo Jehovah keken. Wacwako twero pa Lubanga me loyo dano, ento Catan ki ‘likwaye’ gikwero woko ni Lubanga tye ki twero meno. (Acak. 3:1-5, 15) Watito kwena ni Ker pa Lubanga keken aye bicobo peko pa dano ducu, dok ni ma pe otero kare malac Ker man bityeko jo ducu ma gijemo i kome. (Dan. 2:44; Yabo  19:19-21) Meno obedo kwena maber bot jo mamwol ento obedo kwena marac bot jo maraco.​—Jab. 37:10, 11.

³ Dano bene gidagwa pien wakwo ma lubbe ki cik pa Lubanga. Gin ma Lubanga waco ni ber nyo rac pat adada ki gin ma jo me lobo-ni giye ni ber nyo rac. Me labolle, jo mapol i kare-ni gineno ni pe rac me donyo i kodi tim tarwang malik ma oweko Lubanga ojwero Codom ki Gomora-ni! (Juda 7) Dong pien wan walubo cik me Baibul ma kwako tim magi, jo mapol gicayowa dok giwaco ni wabedo lugingi!​—1 Pet. 4:3, 4.

4. Kit mene ma twero jingowa ka jo mukene gidagwa?

⁴ Ngo ma romo konyowa me kanyone ka dano gidagwa dok giyetowa? Mitte ni wabed ki niye matek ni Jehovah bikonyowa. Calo kwot, niye bikonyowa me “neko mac ki i kom atero ma Larac bayo.” (Ep. 6:16) Ento wamito gin mo mukene mapat ki niye keken. Wamito mar bene. Pingo? Pien mar “pe bedo ki keccwiny.” Diyo cwinye dok kanyo jami maraco ducu. (1 Kor. 13:4-7, 13) Kong dong wanenu kit ma mar pi Jehovah, mar pi luye luwotwa, kadi wa mar pi lumonewa konyowa me kanyo adegadega.

5. Yecu obedo ki kero me timo gin ango pien en onongo maro Wonne?

⁵ I dyewor ma lumone pa Yecu peya guneke, en owaco ki lulub kore ma lugen ni: “An amaro Won, atiyo macalo Won ocika.” (Jon 14:31) Pien Yecu onongo maro Jehovah, en obedo ki kero me kanyo atematema madongo. Marwa pi Jehovah twero konyowa me timo meno bene.

6. Ma lubbe ki Jo Roma 5:3-5, jo pa Jehovah giwinyo nining ka odok i kom kanyo adegadega me lobo man?

⁶ Mar pi Lubanga kare ducu konyo jo pa Jehovah me kanyo aunauna. Me labolle, i kare ma lukiko madit pa Lujudaya gumiyo rukca ki lukwena ni guwek tito kwena woko, margi pi Lubanga okonyogi me “winyo Lubanga makato dano.” (Tic 5:29; 1 Jon 5:3) Mar matek kit meno pi Lubanga bene konyo omegiwa i kare-ni me gwoko gennegi ka gamente matego dok maraco tye ka unogi. Ka jo me lobo-ni gidagwa, man pe weko cwinywa tur, ento weko cwinywa bedo yom.​—Tic 5:41; kwan Jo Roma 5:3-5.

7. Myero wadok iye nining ka jo gangwa giunowa?

⁷ Ka lupacowa kikome aye giunowa, man twero bedo gin matek adada me kanyone. Ka guniang ni wamito pwonyo lok i kom Jehovah, jo mogo me gangwa giromo tamo ni kibwolowa woko. Mukene giromo tamo ni wapo woko. (Por ki Marako 3:21.) Giromo bene doko ger adada i komwa. Aunauna ma kit man myero pe owek wabed ki ur. Yecu owaco ni: “Lukwor pa dano bibedo jo ma i pacone.” (Mat. 10:36) Ngene kene ni, kadi bed wadiwa giterowa marac, wan pe wadaggi. Ki tungcel, ka marwa pi Jehovah woto ki dongo, marwa pi jo mukene bene dongo. (Mat. 22:37-39) Ento pe wabijuko lubo cik ma igi lac me Baibul wek wayom cwiny jo mukene.

8-9. Gin ango ma okonyo laminwa acel me cung matek kadi bed okato ki i aunauna magwar?

⁸ Georgina, ma kiloko i kome con-ni, obedo ki kero me kanyo aunauna magwar ma oa ki bot mine. Georgina otito ni: “Wan ki mamana wacako kwano Baibul kacel ki Lucaden. Ento i nge dwe abicel ma onongo amito cako cito i cokke,  kit mamana olokke woko atura. Aniang ni en tye ka kubbe ki jo mungak, dok onongo nwoyo lok gobagi ka tye ka lok kweda. En onongo yeta, putu yer wiya, deya, dok bayo jami akwanana woko. I kare ma mwakana oromo 15, anongo batija. Mamana otemo genga ki tic pi Jehovah ki cwala i buc pa lutino, ma lutino mogo i kingi onongo gitiyo ki yadi calo jayi dok gitimo bene bal mapol. Kanyo aunauna tek adada tutwalle ka tye ka a ki bot ngat ma myero omari dok ogwoki.”

⁹ Ngo ma okonyo Georgina me kanyo aunauna man? En owaco ni: “I nino ma mamana ocako keto aunauna i koma, onongo pud atyeko kwano Baibulla atyeka. Onongo dong amoko woko ka maleng ni atyeko nongo ada, dok awinyo ni atye cok adada ki Jehovah. Onongo alego bote kare ducu, dok en winyo legana. I kare ma onongo atye ka kwo i gang buc pa lutino-ni, lamego mo olwonga me cito ka lime i gange, dok wakwano Baibul kun watimo kwed kacel. I kare meno, anongo kero ki bot omege ki lumege i Ot me Ker. Gin gujola calo atye dano me ganggi. Onen ka maleng bota ni Jehovah tek loyo jo ma dagwa, kadi bed gubedo anga.”

10. Gen ango ma watwero bedo kwede i kom Jehovah Lubangawa?

¹⁰ Lakwena Paulo ocoyo ni pe tye gin mo ma “bibedo ki twero mo me pokowa woko ki i kom mar pa Lubanga ma tye i Kricito Yecu Rwotwa.” (Rom. 8:38, 39) Kadi bed waden can pi kare mo, Jehovah kare ducu bibedo kwedwa me kweyo cwinywa ki jingowa. Dok kit ma labol pa Georgina nyuto kwede, Jehovah bene konyowa kun tiyo ki omege ki lumege me kacokke.

11. Mar ma Yecu otito pire i Jon 15:12, 13 onongo twero konyo lupwonnyene nining? Mi labol.

¹¹ I dyewor ma en peya oto, Yecu opoyo wi lupwonnyene me maro luwotgi. (Kwan Jon 15:12, 13.) En onongo ngeyo ni mar ma weko ijalle piri keni bikonyogi me bedo ma guribbe ki me kanyo aunauna pa jo me lobo-ni. Nen kong labol pa jo ma i kacokke me Tecalonika. Nicakke i kare ma kicako kacokke man, kibedo ka uno jo magi. Kadi bed kit meno, omege ki lumege me kacokke man guwekiwa lanen maber me gwoko genne ki mar. (1 Tec. 1:3,  6, 7) Paulo ocuko cwinygi me medde ki nyuto mar “kit meno nakanaka.” (1 Tec. 4:9, 10) Mar onongo bikonyogi me cuko cwiny jo ma cwinygi otur ki me konyo jo magoro. (1 Tec. 5:14) Gin gulubo tira pa Paulo man, mumiyo i waragane me aryo ma en ocoyo mwaka acel i nge waragane mukwongo, Paulo onongo twero waccigi ni: “Mar ma dano acel acel maro ki lawote bene tye ka medde.” (2 Tec. 1:3-5) Mar ma onongo gitye kwede okonyogi me kanyo kwo matek kacel ki aunauna.

12. I kare me lweny mo, omege ki lumege ma i lobo mo gunyuto mar i kingi nining?

¹² Nen kong gin mutimme i kom Danylo, ma kiloko i kome con-ni, kacel ki dakone. I kare ma lweny ma i lobogi oo wa i taun ma gibedo iye, gin gumedde ki cito i cokke, tito kwena kit ma gitwero kwede, ki nywako cam ma gitye kwede ki omege ki lumege. Ci i nino mo acel, lumony ma gitye ki muduku gubino i gang pa Danylo. Danylo owaco ni, “Gumina rukca ni akwer bedo Lacaden woko. I kare ma akwero lokgi, gugoya dok gutimme calo gitye ka cela, kun gibayo ricac ka wiya. Ma peya gucito, guwaco ni gibidwogo ka buto ki dakona tektek. Ento oyotoyot omege guketowa i gar wek wacit i taun mukene. Wiya pe biwil i kom mar ma omege magi gunyutiwa. Dok i kare ma wao i taun manyen-ni, omege ma kunnu gumiyowa cam dok gukonya me nongo tic ki ot! Macalo adwogine, wabedo ki kare me miyo kabedo bot Lucaden mukene ma guringo lweny.” Labol ma kit man nyutiwa ni mar pi luye luwotwa konyowa me kanyo adage.

13. Cwiny maleng konyowa nining me medde ki tic pi Jehovah kadi bed dano gidagwa?

¹³ Yecu owaco bot lulub kore ni omyero gumar jo ma daggi. (Mat. 5:44, 45) Tika man obedo gin ma timone yot? Pe yot kulu! Ento twere pi kony pa cwiny maleng pa Lubanga. Nyig ma nyak pi cwiny maleng pa Lubanga tye iye mar, kacel ki diyo cwiny, kica, mwolo, ki jukke ken. (Gal. 5:22, 23) Kit magi gikonyowa me kanyo adegadega. Lumonewa mapol gujuko keto aunauna i komwa pien coggi, mongi, latingi, nyo jiranigi onyuto kit magi mabeco-ni. Dok jo mapol i kingi gudoko omegiwa ki lumegiwa ma wamarogi  matek. Pi meno, ka inongo ni tek me maro jo ma gidagi pien itiyo pi Jehovah, leg pi cwiny maleng. (Luka 11:13) Dok ibed ki gen ni bedo lawiny bot Lubanga ber kare ducu.​—Car. 3:5-7.

14-15. Keto i tic Jo Roma 12:17-21 okonyo Yasmeen nining me nyuto mar bot cware kadi bed cware onongo une matek?

¹⁴ Nen kong labol pa Yasmeen, ma bedo i lobo pa Luarab. I kare ma en odoko Lacaden pa Jehovah, cware otamo ni kibwolo dakone woko, dok en otute matek me genge ki tic pi Lubanga. En oyete, dok olwongo wadine, latela dini, ki ajwaka me bino ka miyo ki dakone bwura kun gikok i kome ni mito keto nyomme woko. Cware bene ocito oyeto omege i kare ma gitye i cokke! Yasmeen onongo pol kare kok pien kitere marac.

¹⁵ I Ot me Ker, omege ki lumege onongo gikweyo cwiny Yasmeen dok gimine teko. Luelda gucuko cwinye me keto i tic lok ma tye i Jo Roma 12:17-21. (Kwan.) Yasmeen owaco ni: “Obedo tek adada. Ento alego bot Jehovah ni okonya, dok atute matek me keto i tic gin ma Baibul waco. Dong i kare mogo ma cwara onongo onyo yugi akaka i jokon, ayweyo woko maleng. Ka en oyeta, agamo ki mwolo. Dok i kare ma kome lit, agwoke maber.”

16-17. Ngo ma ipwonyo ki i lanen pa Yasmeen?

¹⁶ Yasmeen onongo adwogi maber pi nyuto mar bot cware. En owaco ni: “Cwara ocako bedo ki gen i koma pien en onongo ngeyo ni awaco lok ada kare ducu. En ocako winya ki mwolo ka watye ka nyamo lok i kom dini, dok oye gwoko kuc i pacowa. I kare-ni dong en cuko cwinya me cito i cokke. Kwo me otwa oyubbe adada i kare-ni, dok kuc tye i pacowa. Genna tye ni i kare mo cwara bijolo ada dok biribbe kacel kweda i tic pi Jehovah.”

¹⁷ Labol pa Yasmeen nyuto ni mar “diyo cwinye i kom jami ducu, . . . bedo ki gen i kare ducu, keto tek bene me ciro jami ducu.” (1 Kor. 13:4, 7) Adegadega twero bedo tek dok lit adada, ento mar tek loyo jami ducu. Ka wanyuto mar bot jo mukene, gitwero loko kit ma ginenowa kwede, ki kit ma gineno kwede Jehovah. Dok ka wamedde ki nyuto mar, man yomo cwiny Jehovah. Dok kadi bed jo ma gidagwa gimedde ki keto aunauna i komwa, pud watwero bedo ki yomcwiny. Man twere nining?

18. Pingo watwero bedo ki yomcwiny ka dano dagwa?

¹⁸ Yecu owaco ni: “Wutye ki gum [yomcwiny] ka dano dagwu.” (Luka 6:22) Wan aye pe wayero ni kidagwa. Cwinywa pe bedo yom ka kiunowa pi niyewa. Dong pingo watwero bedo ki yomcwiny ka dano dagwa? Nen kong tyen lok adek. Mukwongo, ka waciro can, wanongo cwak ki bot Lubanga. (1 Pet. 4:13, 14) Me aryo, niyewa pire doko tek dok jing bedo matek. (1 Pet. 1:7) Ki me adek, wabinongo mot ma welle dit kato ducu​—kwo ma pe tum.​—Rom. 2:6, 7.

19. Pingo lukwena cwinygi obedo yom i kare ma kigoyogi?

¹⁹ Ma pe orii i nge cer pa Yecu, lukwena gunongo yomcwiny ma Yecu oloko pire-ni. I kare ma kigoyogi dok kicikogi matek ni guwek tito kwena, gin gubedo ki yomcwiny. Pingo? “Pien Lubanga otamo ni gimyero pi dit man me nongo lewic pi nying Yecu.” (Tic 5:40-42) Margi pi Laditgi onongo tek loyo lworo ma gitye kwede i kom lumonegi. Dok gunyuto margi ki medde ki tito kwena maber-ri ma ‘pe giweko.’ Utmegiwa mapol i kare-ni bene gitye ka medde ki tic pi Jehovah ki gen kadi bed gitye ka kato ki i aunauna. Gingeyo ni Jehovah wiye pe biwil i kom tic ma gutiyo pire kacel ki mar ma ginyuto pi nyinge.​—Ibru 6:10.

20. Ngo ma wabinyamo i pwony ma lubo man?

²⁰ Jo me lobo-ni pud gibimedde ki dagowa teke Catan aye pud tye ka loyo lobo. (Jon 15:19) Ento pe mitte ni wabed ki lworo. Kit ma wabineno kwede i pwony ma lubo man, Jehovah ‘bimiyo teko, dok bigwoko’ jone ma lugen. (2 Tec. 3:3) Dong wamedde wunu ki maro Jehovah, maro omegiwa ki lumegiwa, ki maro kadi wa lumonewa. Ka walubo tira man, wabibedo ma wanote, niyewa bijing matek, wabikelo deyo bot Jehovah, dok wabinyuto ni mar tek loyo adage.