1. Thenge la Mataio 24:9, pine nemene matre tha sesëkötre kö së laka, kola methinë së enehila?

 HNEI Iehova hna xupi së memine la aja troa ihnimikeu. Celë hi matre, easa akötr me xou ngöne la kola methinë së hnei itre xan. Öni Georgina, ketre trejin qa Europe: “Ame la kola 14 lao macatreng, hna methinë ni hnei nenë ke, eni a ajane troa nyihlue i Iehova. Kösë eahlo a nuetriji ni. Matre ame koi ni, ka ngazo la hnenge hna kuca.” * Ketre, öni Danylo: “Hna lepi ni me qaqa ni hnene la itre sooc pine laka, ketre hlue i Iehova ni. Celë hi matre, eni a xou me hmahma.” Eje hi, ame la kola methinë së, easa akötr. Ngo tha sesëkötre kö së ke, ase hë Iesu qaja ekö ka hape, troa methinë së.—E jë la Mataio 24:9.

2-3. Pine nemene matre kola methinëne la itre ka xötrethenge Iesu?

² Hnauëne laka, kola methinë së hnene la fen? Pine laka, tui Iesu, itre ‘trenyiwa së kowe la fen.’ (Ioane 15:17-19) Easa metrötrëne la itre mus, ngo tha easë kö a sine la kuci politik, me sali koi darapo, me nyimane la nyima ne nöj. Ame koi easë, Iehova hi la nyine atrun, nge Nyidrëti hi la ka ijij troa musi e celë fen. Ngo tha Satana kö me “matra i angeic” ka icilekeu me Nyidrë. (Gen. 3:1-5, 15) Ketre, easa cainöj ka hape, Baselaia i Akötresieti la ka troa amelene la itre atr, me apatrene la itre ka icilekeu memine la musi Nyidrë. (Dan. 2:44; Hna ama. 19:19-21) Celë hi maca ne iamele kowe la itre ka hetre hni ne ipië, nge maca ne iameköti kowe la itre ka ngazo.—Sal. 37:10, 11.

³ Ketre, kola methinë së pine laka, easa trongëne la itre  trepene meköti Iehova, ka isazikeu memine la itre mekun ne la fene celë. Ame enehila, nyimutre la itre atr ka kuca la itre huliwa ka sis, tune lo itre hna majemin ekö e Sodroma me Gomora, lue traon hna apatrene hnei Iehova. (Iudra 7) Matre, ame la easa trongëne la itre hna qaja hnei Tusi Hmitrötr, kola hnyimasai së me jelengazo së.—1 Pet. 4:3, 4.

4. Nemene la lue thiina ka xatua së troa xomihni ngöne la kola methinë së?

⁴ Nemene la ka troa xatua së troa xomihni ngöne la kola methinë së me iqaqa? Loi e xecie koi së laka, tro kö Iehova a xatua së. Jëne la petr ka tru ne la lapaun, ijije hi tro sa ‘thupë së qa ngöne la itre ewekë hna hna koi së.’ (Efe. 6:16) Eje hi, nyipiewekë tro sa lapaun, ngo loi e tro fe sa ihnim. Pine nemen? Pine laka, “tha ka canga elëhni kö la ihnim,” ngo ka xomihnin me cile hut ngöne la nöjei ewekë asë. (1 Kor. 13:4-7, 13) Tro pena sa ce wang la aqane tro la ihnimi së koi Iehova, kowe la itre trejin, me kowe la itre ka akötrë së, a xatua së ngöne la kola methinë së.

5. Nemene la hna upi Iesu troa kuca hnene la ihnimi nyidrëti koi Iehova?

⁵ Ame lo jidri tixenuë i Iesu, ce nyidrëti memine la itretre drei nyidrë. Öni nyidrëti koi angatr: “Eni hë a kuca la hnei Kakati hna amekötine koi ni” ke, “ka hnimi Kakati ni.” (Ioane 14:31) Nyipici, hnene la ihnimi Iesu koi Iehova, matre hnei nyidrëti hna atreine cile kowe la itre jol. Haawe, maine tro sa acatrene la ihnimi së koi Iehova, tro hë sa atreine cile catr.

6. Thenge la Roma 5:3-5, nemene la mekuna ne la itre hlue i Iehova ngöne la kola methinë angatr?

⁶ Hnene la ihnimi së koi Iehova, matre atreine së troa xomihni me cile catr ngöne la icilekeu. Celë hi hna melën hnene la itre aposetolo, ngöne la kola wathebone la huliwa ne cainöj, hnene la hnaakotr ka tru i angetre Iudra. Tru la ihnimi angatr koi Iehova, matre hnei angatr hna “drengethenge Akötresie hune la atr.” (Itre hu. 5:29; 1 Ioane 5:3) Ame fe enehila, hnene la ihnimi ne la itre trejin hna hamë trengecatre i angatr, matre troa xomihni ngöne la kola icilekeu me qanangazo angatr hnene la itre mus. Eje hi, tha angatre kö a xou. Angatre pe a madrin ngöne la kola methinë angatr hnene la fene celë.—Itre hu. 5:41; e jë la Roma 5:3-5.

7. Nemene la nyine tro sa kuca ngöne la kola icilekeu hnene la sipu fami së?

⁷ Eje hi, hace catre koi së ngöne la kola icilekeu hnene la sipu fami së. Ame lo easa nyiqane ini tus, maine jë hnei angatr hna mekun laka, hna iaö së, nge angatre fe a jele hmo së. (Wange ju fe la Mareko 3:21.) Maine pena, angatr a elëhni koi së. Ngo tha tro kö sa sesëkötr. Öni Iesu: “Ame la ithupëjia memine la atr, tre, cili kö ngöne la hnepe lapa i angeic.” (Mat. 10:36) Ame pe, tha easë kö a goeë angatr ceitu me itre ithupëjia. Maine ka tru la ihnimi së koi Iehova, tro fe hë sa hnime catrëne la itre atr. (Mat. 22:37-39) Nyipici, tha easë kö a ajane troa ena la ketre wathebo i Iehova, matre troa amadrinë la ketre atr.

8-9. Nemene la ka xatua Georgina troa xomihni ngöne la icilekeu?

⁸ Hnei Georgina hna cile catr ngöne la kola icilekeu hnene la thine i angeic. Öni angeic: “Hnenge me nenë hna ce nyiqane inine la Tusi Hmitrötr. Thupene la sikisi lao treu, hnenge hna nyiqane sine la itre icasikeu. Ngo hnei nenë hna qanangazo ni ke, hna ajojezi eahlo hnene la itre ka iamenumenu. Hnei eahlo hna qaqa ni, me  hule la ihnaiheng, me öje la nyinawang, me trije la itre itusing. Ngo ame la kola 15 lao macatreng, hnenge hna xomi bapataiso. Thupene lai, hnei nenë hna ami ni ngöne la ketre uma thatraqane la itre jajiny. Alanyimu la itre jajinyi ka xomi dorog me kuca la itre ewekë ka ngazo. Eje hi, hace catre koi ni ke, sipu thineng. Maine ju, tro eahlo a hnimi ni me nyihnyawane la meleng.”

⁹ Nemene la ka xatua Georgina troa xomihni? Öni angeic: “Ame la nenë a nyiqane qanangazo ni ke, eni a ase e asë la Tusi Hmitrötr. Xecie hë koi ni laka, celë hi la nyipici nge catrecatre la aqane imelekeung me Iehova. Hnenge hna thithi koi Iehova, nge hnei Nyidrëti hna drei ni. Ketre, ame lo eni ngöne lai iuma, hnene la ketre trejine föe hna könë ni kowe la hnalapa i angeic, matre troa ce ini tus. Nge hnene la itre trejin hna ithuecatre koi ni ngöne la Uma Ne Baselaia, matre kösë ketre fami hë së. Mama hnyawa koi ni laka, pëkö sai Iehova, tune la itre ka icilekeu.”

10. Nemene la ka xecie koi së?

¹⁰ Öni Paulo aposetolo ka hape, thatreine kö la ketre ewekë troa “thepe së qa ngöne la ihnimi Akötresie ka mama jëne Iesu Keriso Joxu së.” (Rom. 8:38, 39) Ngacama easa akötr e itre xaa ijin, ngo xecie koi së laka, tro palahi Iehova a ceme easë, me akeukawanyi së, me aegöcatrenyi së. Nge tui Georgina, tro Iehova a xatua së jëne la itre trejin ne la ekalesia.

11. Thenge la Ioane 15:12, 13, nemene la aqane xatuane la itretre drei Iesu hnene la ihnim?

¹¹ Ame ngöne la jidr qëmekene troa humuthi Iesu, hnei nyidrëti hna qaja kowe la itretre dreng troa ihnimikeu. (E jë la Ioane 15:12, 13.) Atre hi Iesu laka, maine tro angatr a ihnimi tui nyidrë, tro hë angatr a caas me atreine thipetrije la imethinë. Hanawang la tulu ne la ekalesia ne Thesalonika. Ame ngöne lo xötrei, hna icilekeu memine la itre trejin. Ngo hnei angatr hna catre mele nyipici me ihnim. (1 Thes. 1:3, 6, 7) Hnei Paulo hna iele angatr troa ihnimikeu. (1 Thes. 4:9, 10) Celë hi matre hnei angatr hna xatuane la itre ka kucakuca me hace hni. (1 Thes. 5:14) Eje hi, hnei angatr hna drengethenge Paulo. Celë hi matre, thupene la caa macatre, hnei Paulo hna cinyihane ngöne la hnaaluene tusi nyidrë, ka hape: “Kolo pala hi a kökötre la lapaune  i nyipunie, me ihnimikeu i nyipunie.” (2 Thes. 1:3-5) Hnene la ihnimi ne la itre Keresiano hna aijijë angatr troa cile kowe la nöjei pengöne jol.

12. Ame ngöne la ijine isi, nemene la aqane amamane la itre trejin la ihnimi angatr?

¹² Tro pena sa ce wang la ka traqa koi Danylo me föe i angeic. Ngacama kola isi ngöne la nöj, ngo hnei nyidroti palahi hna sine la itre icasikeu, me cainöj, me hamë xen kowe la itre trejin. Ngo ame la ketre ijin, hnene la itre sooc hna traqa kowe la hnalapa i nyidro. Öni Danylo: “Hnei angatr hna iele ni troa nuetrije la nyipici. Ngo hnenge hna thipën, matre hnei angatr hna lepi ni, me huji kuqa hune la heng, matre troa axouenyi ni. Nge öni angatr ka hape, tro hmaca angatr a bëek troa qanangazone la föeng. Eloine pe, hnene la itre trejin hna canga xatua nyio troa kötr. Thatreine kö ni troa thëthëhmine la aqane hnimi nyio hnei angatr. E cili, hnene la itre xaa trejin hna tro fë xen koi nyio, me xatua nyio troa öhnyi huliwa me hnalapa. Thupene lai, hnei nyio hna hane xatuane la itre xaa trejin ka kötrene la isi.” Kolo lai a amamane laka, jëne la ihnimi ne la itre trejin, ijije hi tro sa thipetrije la imethinë.

13. Nemene la aqane tro la uati hmitrötr a xatua së troa nyihlue i Iehova, ngacama kola methinë së?

¹³ Hnei Iesu hna upe la itretre dreng troa hnime la itre ithupëjia me angatr. (Mat. 5:44, 45) Hapeu, ka hmaloi kö? Waea. Ngo ijije hi troa xatua së hnene la uati hmitrötre i Akötresie. Ame la wene ne la ua, tre, ihnim, me atreine itreqe, me loi hni, me menyik, me xomehnöth. (Gal. 5:22, 23) Itre thiina lai ka xatua së troa xomihni ngacama kola methinë së. Hnei itre xan hna saze pine laka, hnene la itre föi angatr, me itre nekö i angatr, me itre ka lapa ezi angatr, hna amamane la itre thiina cili. Nge itre hlue i Iehova hë angatr enehila. Celë hi matre, maine jole koi së troa hnime la itre ka methinë së, loi e tro sa thith me sipo Iehova la uati hmitrötre i Nyidrë. (Luka 11:13) Ketre, loi e xecie koi së laka, sisitria catre kö troa drengethenge Akötresie.—Ite Edomë 3:5-7.

14-15. Nemene la aqane xatua Yasmeen hnene la hna qaja ngöne Roma 12:17-21?

¹⁴ Hanawang la hna melën hnei Yasmeen. Thupene la hnei Yasmeen hna xomi  bapataiso, hnene la föi angeic hna mekun laka, hna iaö angeic. Celë hi matre, hnei nyidrëti hna sewe angeic troa nyihlue i Iehova. Hnei nyidrëti hna qaqa Yasmeen me upe la itre sinee i nyidro, me ketre hene ne hmi, me ketre ka kuci iöni troa axouenyi angeic. Nge hnei angatr hna upezö angeic troa thë la fami. Ame la ketre ijin, hnei nyidrëti hna qaqane la itre trejin e hnine la Uma Ne Baselaia. Hace catre Yasmeen pine la aqane ujë i nyidrë.

¹⁵ Ngo hnene la itre trejin hna akeukawane la hni Yasmeen. Hnene la itre qatre thup hna ithuecatre koi angeic troa trongëne la hna qaja ngöne Roma 12:17-21. (E jë.) Öni Yasmeen: “Tha ka hmaloi kö, ngo hnenge hna sipo ixatua koi Iehova ngöne la thith, me thele troa trongëne la hna qaja hnei Tusi Hmitrötr. Ame itre xaa ijin, hnene la föeng hna adrone la kecen, ngo hnenge palahi hna nyidrawan e thupen. Ame la nyidrëti a qaqa ni, eni a sa menyiken. Nge ame la nyidrëti a wezipo, eni a thupë nyidrë.”

16-17. Nemene la ini hne së hna xom qa ngöne la tulu i Yasmeen?

¹⁶ Hna amanathithi Yasmeen ke, hnei angeic hna loi thiina kowe la föi angeic. Öni Yasmeen: “Hnenge palahi hna qaja la nyipici, matre hnei nyidrëti hna mejiune koi ni. Ketre, nyidrëti a metrötrë ni me drei ni hnyawa ngöne la eni a qeje hmi. Nyidrëti fe a ithuecatre koi ni troa sine la itre icasikeu. Tingetinge hë me madrine la mele i nyio. Eni a mejiun laka, tro la föeng a hane kapa la nyipici, matre tro nyio a ce nyihlue i Iehova.

¹⁷ Kola mama ngöne la hna melën hnei Yasmeen laka, ihnimi a “xomihnine la nöjei ewekë asë, . . . me mejiune la nöjei ewekë asë, me cile huti ngöne la nöjei ewekë asë.” (1 Kor. 13:4, 7) Eje hi, ame la easa methinëne la ketre atr ke, hace me hleuhleu la mele i angeic. Ngo loi e tro pe sa ihnim matre tro angeic a saze. E cili, tro hë sa amadrinë Iehova. Ngo nemene la nyine tro sa kuca matre troa madrin ngacama kola methinë së?

18. Hnauëne laka, easa madrin ngacama kola methinë së?

¹⁸ Öni Iesu: “Madrine nyipunie la kola methinë nyipunie.” (Luka 6:22) Eje hi, tha easë kö a ajane troa qanangazo së me  humuthi së. Ngo hnauëne laka, easa madrin ngacama kola methinë së? Hane hi la köni kepin. Ame la hnapan ke, ngacama kola methinë së, ngo easa catre huliwa koi Iehova, matre Nyidrëti a kepe së. (1 Pet. 4:13, 14) Ame la hnaaluen ke, kola acatrene la lapaune së. (1 Pet. 1:7) Nge ame la hnaakönin ke, xecie koi së laka, tro sa kapa la ketre manathith ka tru, ene la mel ka pë pun.—Rom. 2:6, 7.

19. Pine nemene matre itre aposetolo a madrin ngacama hna thaucë angatr?

¹⁹ Tru la madrinene la itre aposetolo thupene la melehmaca i Iesu. Eje hi, ame la ketre ijin, hnene la itre hene ne hmi hna thaucë angatr me wathebo angatr troa cainöj. Ngo madrine palahi la itre aposetolo. Pine nemen? Pine laka, ame koi angatr, ahnahna la “troa ahmahmanyi angatr pine la ëje i [Iesu].” (Itre hu. 5:40-42) Hnene laka, tru la ihnimi angatr kowe la Maseta i angatr, matre tha xou kö angatr e troa methinë angatr. Ketre, hnei angatr hna amamane la ihnimi angatr ngöne la angatr a “catre cainöjëne la maca ka loi.” Ame enehila, nyimutre la itre trejin ka catre nyihlue i Iehova, ngacama angatr a cile kowe la itre jol. Xecie koi angatr laka, thatreine kö Iehova troa thëthëhmine la itre huliwa me ihnimi hnei angatr hna amamane kowe la ëje i Nyidrë.—Heb. 6:10.

20. Nemene la hne së hna troa ce wang ngöne la ketre tane mekun?

²⁰ Nyipici laka, tro palahi a methinë së ngöne la fene celë. (Ioane 15:19) Ngo tha tro pi kö sa xou. Tune la hne së hna troa ce wang ngone la ketre tane mekun, ‘tro kö [Iehova] a aegöcatren me thupëne’ la itre hlue i Nyidrë ka mele nyipici. (2 Thes. 3:3) Haawe, catre jë së hnimi Iehova, me itre trejin, me itre ka akötrë së. E cili, tro hë sa caas, me catre lapaun, me atrunyi Iehova. Ketre, tro fe sa amamane laka, sisitria catre kö la ihnim hune la imethinë.