1. Dapré Matthieu 24:9, poukisa sa pa divèt étoné nou si monn-an rayi nou ?

JÉOVA fè nou pou nou kontan ròt-ya, é pou ròt-ya kontan nou. A pou sa, lò roun moun rayi nou, sa ka fè nou mal, é sa pouvé menm fè nou pè. Parèkzanp, roun sò yé ka aplé Georgina * ki ka rété an Éròp ka di : « Lò mo té gen 14 an, mo manman koumansé rayi mo paské mo té lé adoré Jéova. Mo té tris toubonnman, é mo té ka santi mo té tousèl ké mo kò. É mo jis koumansé pansé ki pitèt mo pa té sa roun bon moun. » Roun frè yé ka aplé Danylo ékri : « Lò sòlda-ya té ka bat mo, té ka jouré mo épi té ka ménasé mo paské mo té sa roun Témwen Jéova, mo té pè. É yé vréman fè mo ronté. » Lò moun rayi nou konsa, sa ka fè nou lapenn mé sa pa ka étoné nou. Jézi té di ki yé té ké rayi nou (li Matthieu 24:9).

2-3. Poukisa monn-an rayi nou ?

² Poukisa monn-an rayi nou ? Paské, kou Jézi, nou « pa ka fè parti di monn-an » (Jean 15:17-19). Parèkzanp, menm si nou ka rèspèkté gouvèrnman-yan, nou pa ka fè lapolitik, nou pa ka adoré yé drapo, é nou pa ka chanté yé chanté pou péyi-a. A Jéova rounso nou ka adoré. Pou nou, a Bondjé rounso ki gen drwa dirijé tout latè-a. Mé Satan ké so « désandans », ka di ki Bondjé pa gen sa drwa-a (Gen. 3:1-5, 15). Nou ka préché ki rwayonm  Bondjé-a sa sèl èspwar pou tout moun asou latè-a é ki, titalò, i ké krazé tout sa ki pa lé asèpté l’ (Dan. 2:44 ; Rév. 19:19-21). A roun bon nouvèl pou sa-ya ki ka fè yé kò toupiti, mé a roun mové nouvèl pou méchan-yan (Ps. 37:10, 11).

³ Yé rayi nou osi paské nou ka obéyi lalwa Bondjé. Sa lalwa-a pa k’alé pyès toubonnman ké sa monn-an ka di ki bon ouben ki pa bon. Parèkzanp, bokou moun pa ka pansé ki a roun mové bagaj si to ka mennen menm vyé lavi ki sa-ya Bondjé détrwi annan vil Sodòm ké Gomòr ! (Jude 7). Kou nou ka obéyi sa Labib-a ka di asou imoralité sèksyèl-a, bokou moun ka ari nou, é yé ka di ki nou pa ka asèpté moun-yan ki diféran (1 Pierre 4:3, 4).

4. Ki bèl kalité ka idé nou tchenbé lò yé rayi nou é lò yé ka jouré nou ?

⁴ Kisa ki pouvé idé nou tchenbé lò yé rayi nou é lò yé ka jouré nou ? Pou koumansé, lafwa pouvé idé nou : nou divèt sir ki Jéova ké idé nou. Ké boukliyé lafwa-a, nou pouvé « étenn tout flèch difé méchan-an ka voyé » (Éph. 6:16). Mé a pa lafwa sèlman nou bézwen. Nou bézwen lanmou osi. Poukisa ? Paské lanmou « pa ka kouri faché ». I ka sipòrté ké tchenbé anba tout bagaj ki fè l’ lapenn (1 Cor. 13:4-7, 13). Annou wè aprézan kouman nou lanmou pou Jéova, pou nou frè ké nou sò-ya, é pou nou lèlmi, pouvé idé nou tchenbé lò yé rayi nou.

5. Kisa Jézi rivé fè pas i té kontan so Papa ?

⁵ Dèrnyé jou aswè Jézi pasé ké so disip fidèl-ya, i di yé : « Sa Papa-a ka di mo fè, a sa mo ka fè » paské « mo kontan Papa-a » (Jean 14:31). Kou Jézi té kontan Jéova, i rivé tchenbé anba éprèv ki té rèd menm. Menm fason-an, nou lanmou pou Jéova pouvé idé nou.

6. Dapré Romains 5:3-5, kisa nou ka rousanti lò monn-an rayi nou ?

⁶ Lanmou pou Bondjé toujou idé sèrvitèr Jéova-ya tchenbé anba pèrsékisyon. Parèkzanp, a paské apot-ya té kontan Bondjé ki yé désidé, « obéyi [li] pasé [yé] obéyi moun » lò gran tribinal jwif-a défann yé préché (Actes 5:29 ; 1 Jean 5:3). Sa menm kalité lanmou-a ka idé nou frè ké sò-ya jòdla. Yé ka tchenbé rèd menm si gouvèrnman-yan ki méchan ké pwisan ka pèrsékité yé. Pasé yé dékourajé, yé ka pran l’ kou roun lònò (Actes 5:41 ; li Romains 5:3-5).

7. Kouman nou divèt réyaji lò moun annan nou fanmi lé baré nou chimen ?

⁷ Pitèt pi gran éprèv-a, a lò nou fanmi ka éséyé baré nou chimen. Lò yé ka wè ki nou lé anprann konnèt Jéova, sèrten moun annan nou fanmi pouvé pansé ki yé pran nou tèt ouben ki nou tèt pa bon ankò (gadé Marc 3:21). Yé pouvé menm malmennen nou. Sa pa divèt étoné nou. Jézi di : « Lèlmi roun moun, a ké so pròp fanmi » (Mat. 10:36). Kèlkanswa sa yé ka pansé di nou, nou pa ké janmen wè yé kou nou lèlmi. Sa ki ka pasé pito, a ki pi nou lanmou pou Jéova ka vin pi fò, pi nou lanmou pou ròt-ya ka vin pi fò osi (Mat. 22:37-39). Mé nou pa ké janmen arété obéyi lalwa ké prensip annan Labib-a jis pou fè roun moun plézi.

8-9. Kisa ki idé roun sò tchenbé byen dibout magré bon opozisyon ?

⁸ Georgina, sò-a nou ja palé anvan, rivé tchenbé byen dibout magré tousa so manman fè. I ka di : « Mo ké mo manman,  nou koumansé étidyé Labib-a ké Témwen Jéova-ya. Mé sis mwa pita, lò mo té lé alé annan réinyon-yan, mo manman chanjé nèt. Mo konprann ki i té ka palé ké moun ki té apòsta, é i té ka répété manti yé té ka di. I té ka jouré mo, rédi mo chivé, tranglé mo, épi jité mo liv ké mo Labib. Lò mo pran mo 15 an, mo batizé. Pou i té pouvé anpéché mo sèrvi Jéova, mo manman mété mo annan roun fwayé pou tifi. Annan sa fwayé-a, i té gen tifi ki té ka pran ladròg é ki té gen gro problèm ké lalwa. Lò moun-an ki nòrmalman divèt kontan to é pran swen di to ka éséyé anpéché to sèrvi Jéova, sa vréman rèd. »

⁹ Kisa ki idé Georgina tchenbé ? I ka di : « Jou mo manman koumansé ataké mo, mo té fin li tout Labib-a. Mo té sir ki mo té trapé lavérité-a é mo té vréman pròch ké Jéova. Mo té ka priyè souvan, é Jéova té ka tandé mo. Lò mo té ka rété annan sa fwayé-a, roun sò té ka envité mo an so kaz souvan, é nou té ka étidyé Labib-a ansanm. Mo frè ké mo sò-ya annan sal di Rwayonm-an idé mo vin pi fò osi. A kousidiré mo té ka fè parti di yé fanmi. Mo wè ké mo dé wéy ki, kèlkanswa moun-yan ki kont nou, Jéova pi fò pasé yé. »

10. Di kisa nou pouvé sir ?

¹⁰ Apot Pòl ékri ki anyen pa pouvé « séparé nou di lanmou Bondjé gen pou nou é ki annan Kris Jézi nou Sényèr » (Rom. 8:38, 39). Menm si nou ka soufri pou roun tan, Jéova ké toujou la òbò nou pou konsolé nou é pou bay nou fòrs. É kou sa ki rivé Georgina ka montré l’, Jéova ka itilizé nou frè ké nou sò-ya annan asanblé-a pou idé nou.

11. Kouman lanmou Jézi ka palé annan Jean 15:12, 13 idé disip-ya soutni yé konpanyen ?

¹¹ Lannwit anvan i mouri, Jézi fè so disip sonjé ki yé té divèt kontan yé konpanyen (li Jean 15:12, 13). I té savé ki, si yé té kontan yé konpanyen kou li menm té kontan yé, yé té ké pouvé viv byen ansanm é tchenbé rèd lò moun té ké rayi yé. Annou pran èkzanp asanblé ki té Tésalonik. Dipi jou asanblé-a koumansé, frè ké sò-ya trapé pèrsékisyon. Mé magré sa, yé bay roun bèl èkzanp annan zafè tchenbé rèd ké fidélité épi kontan yé konpanyen (1 Thess. 1:3, 6, 7). Pòl ankourajé yé kontinyé montré yé kontan  yé konpanyen, é i jis di yé fè l’ « ankò plis » (1 Thess. 4:9, 10). Lanmou té ké fè yé idé sa-ya ki té fèb ouben ki té dékourajé (1 Thess. 5:14). Krétyen-yan ki té Tésalonik swiv sa konsèy Pòl té bay yé-a. A pou sa, roun lannen pita, Pòl di yé annan so dézyèm lèt : « Lanmou zòt gen pou zòt konpanyen ka vin pi fò » (2 Thess. 1:3-5). Lanmou yé té gen idé yé tchenbé rèd anba pèrsékisyon ké traka yé jwenn.

12. Kouman plizyèr frè ké sò annan roun péyi koté i té gen lagèr montré yé lanmou pou yé konpanyen ?

¹² Annou wè sa ki rivé Danylo, frè-a nou ja palé anvan, ké so madanm. Lagèr pété annan vil yé té fika. Mé magré sa, yé fè tousa yé té pouvé pou kontinyé alé annan réinyon-yan, préché kou yé té pouvé, é partajé manjé yé té gen ké yé frè ké yé sò. Mé roun jou, plizyèr sòlda armé vini koté yé. Danylo ka rakonté : « Yé di mo tiré mo kò annan zafè Témwen Jéova. É kou mo pa té lé fè sa, yé bay mo kou. É pou fè mo pè, yé fè kousidiré yé té k’alé tchwé mo : yé tiré ké yé pistolè laro mo tèt. Anvan yé pati, yé ménasé mo rouvini pou vyolé mo madanm. Mé ké ti kouri, nou frè ké nou sò mété nou annan roun tren pou fè nou alé annan rounòt vil. Mo pa ké janmen bliyé yé lanmou pou nou. Lò nou rivé, frè ké sò-ya bay nou manjé, é yé idé mo trapé roun travay ké roun kaz. Finalman, nou jis rousouvwè annan nou kaz ròt frè ké sò ki té ka chapé akoz di lagèr osi. » Sa kalité istwè-ya ka montré nou ki lanmou nou gen pou nou frè ké nou sò pouvé idé nou ganyen asou rayi.

13. Kouman lèspri sen-an ka idé nou kontinyé adoré Jéova menm lò moun rayi nou ?

¹³ Jézi di so disip-ya ki yé té divèt kontan yé lèlmi (Mat. 5:44, 45). Ès a roun bagaj fasil pou fè ? Non, i pa mòl menm ! Mé gras a lèspri sen Bondjé ka bay, nou pouvé fè l’. Annan frwi lèspri sen Bondjé, i gen lanmou, pasyans, byenvéyans, dousèr ké kontrolé nou kò (Gal. 5:22, 23). Sa bèl kalité-ya ka idé nou tchenbé lò moun-yan méchan ké nou. Bokou moun chanjé paské yé mari, yé madanm, yé timoun, ouben yé vwazen té gen sa bèl kalité-ya. Sèrten annan yé jis divini nou  frè ké nou sò. Donk si sa rèd pou to kontan moun ki rayi to paské to ka sèrvi Jéova, priyè Jéova é doumandé l’ so lèspri (Luc 11:13). É a pou to sir ki obéyi Bondjé, a toujou miyò bagaj pou to fè (Prov. 3:5-7).

14-15. Kouman Romains 12:17-21 idé Yasmeen montré so lanmou pou so mari, menm si i té ka fè li méchansté ?

¹⁴ Annou wè sa ki rivé roun sò yé ka aplé Yasmeen. Lò i divini Témwen Jéova, so mari pansé ki yé té pran so tèt, é i éséyé anpéché l’ adoré Bondjé. I koumansé jouré l’ é i doumandé so fanmi, roun chèf annan so rélijyon ké roun gadò ménasé li fè li méchansté épi akizé li di séparé so fanmi. Pannan roun réinyon asanblé-a, i jis vini pou jouré frè ké sò-ya ki té la. Yasmeen té ka pléré souvan paské i té méchan ké li.

¹⁵ Lò Yasmeen té k’alé annan sal di Rwayonm-an, so frè ké sò-ya té ka konsolé l’ é yé té ka ankourajé l’. Ansyen-yan ankourajé l’ fè sa ki ékri annan Romains 12:17-21 (li). Yasmeen ka di : « Sa té rèd. Mé mo doumandé Jéova idé mo, é mo fè tousa mo té pouvé pou fè sa Labib-a ka di. Détan, mo mari té ka fè èsprè jité malpròpté atè annan lakwizin-an. Alòr mo té ka ranmasé sa i té jité-a. Lò i té ka jouré mo, mo té ka réponn li jantiman. É lò i té malad, mo té ka pran swen di li. »

16-17. Kisa èkzanp Yasmeen ka anprann nou ?

¹⁶ Yasmeen byen aji ké so mari, é i rousouvwè roun bèl rékonpans pou sa. I ka di : « Mo mari koumansé fè mo plis konfyans, paské i té savé ki mo té ké toujou di lavérité. I koumansé kouté mo ké rèspè lò nou té ka palé di rélijyon, é i asèpté fè lapè. Jòdla i jis ka ankourajé mo alé annan réinyon-yan ! Aprézan, mo ké mo mari, nou byen, é tout bagaj trankil lakaz. Mo ka èspéré ki, roun jou, mo mari ké asèpté lavérité é ki i ké sèrvi Jéova ansanm ké mo. »

¹⁷ Èkzanp Yasmeen ka montré ki lanmou « ka sipòrté tout bagaj, [...] ka èspéré tout bagaj, ka andiré tout bagaj » (1 Cor. 13:4, 7). Lanmou pi fò pasé rayi. Si nou ka montré ròt-ya nou kontan yé, yé pouvé chanjé fason yé ka wè nou, é fason yé ka wè Jéova. É sa ka fè tchò Jéova kontan. Mé kouman nou pouvé kontinyé gen tchò kontan menm si nou lèlmi ka kontinyé rayi nou ?

18. Poukisa nou pouvé gen tchò kontan menm si yé rayi nou ?

¹⁸ Jézi di : « Lò moun-yan rayi zòt, zòt tchò kontan » (Luc 6:22). A pa lé nou lé yé rayi nou. Pasé anba pèrsékisyon akoz di nou lafwa, a pa roun plézi pou nou. Donk poukisa nou tchò pouvé kontan lò yé rayi nou ? Annou wè omwen trwa bagaj. Prémyèrman, lò nou ka tchenbé rèd menm si yé rayi nou, nou ka fè Bondjé plézi (1 Pierre 4:13, 14). Dézyèmman, nou lafwa ka divini pi fò é i gen plis valò (1 Pierre 1:7). É trwazyèmman, nou savé ki a pa ti bèl rékonpans nou ké rousouvwè : lavi pou tout-tan (Rom. 2:6, 7).

19. Poukisa tchò apot-ya té kontan menm si yé té fin pran kout fwèt ?

¹⁹ Roun tibi tan apré Jézi résisité, apot-ya rousanti lajwa i té palé yé-a. Roun jou, chèf rélijyé jwif-ya bay yé kout fwèt é bay yé lòrd arété préché. Mé tchò apot-ya té kontan. Poukisa ? Paské « Bondjé té trouvé ki tèlman yé té gen valò, yé té pouvé pran mépri pou non Jézi » (Actes 5:40-42). Yé té pi kontan yé Mèt pasé yé té pè yé lèlmi. Yé montré ki yé té gen sa lanmou-a lò yé té ka préché bon nouvèl-a « toulong ». Jòdla, bokou annan nou frè ké sò-ya ka kontinyé sèrvi Jéova ké fidélité menm si sa pa fasil pou yé. Yé savé ki i pa ké janmen bliyé sa yé fè pou li, ni yé lanmou pou so non (Héb. 6:10).

20. Kisa nou ké wè annan artik ki ka vin dèyè-a ?

²⁰ Tout tan sa monn-an ké la, i ké kontinyé rayi nou (Jean 15:19). Mé nou pa bézwen pè. Kou nou ké wè l’ annan artik ki ka vin dèyè-a, Jéova ké « fè [so sèrvitèr fidèl-ya] vin pi fò é i ké protéjé » yé (2 Thess. 3:3). A pou sa, annou kontinyé kontan Jéova, nou frè ké nou sò-ya é menm nou lèlmi. Konsa, nou ké kontinyé sèrvi Jéova ansanm é nou lafwa ké fò. Nou ké bay Jéova lònò, é nou ké montré ki lanmou lontan pi fò pasé rayi.