1. Matev 24:9-a pormonnem, sonvsar amcho dves korta mhunn ami kiteak ojap zainant?

AMI dusreancho mog korunk sodhtat. Toxench, dusreamnim amcho mog kel’lo amkam zai. Karonn Jehovan amkam hea toren rochleant. Tor konnui amcho dves korta zalear amkam khub dukh zata ani ghoddie amkam bhirant-ui disonk puro. Udharonnak, Europe-antli Georgina nanvachi bhoinn mhunntta: “Hanv Jehovachi seva korta mhunn mhoji avoi mhozo dves kortali. Tednam hanv 14 vorsanchem aslem. Hanv khub dukhi zaun, eksurem asa oxem mhaka distalem ani hanv ek borem cheddum nhoi mhunn pasun mhaka disonk laglem.” * Toxench, Danylo nanvacho ek bhav mhunntta: “Hanv Jehovacho Sakxi mhunn soinikamnim mhaka marlo, mhozo opman kelo ani dhomkailo tednam hanv khub bhielo ani mhaka loz disli.” Hea toren sonvsar amcho dves korta tednam amkam dukh zata tem khorem. Punn ami ojap zainant, karonn Jezun hea vixim adim fuddench sanglolem.—Matev 24:9 vachat.

2-3. Sonvsar amcho dves kiteak korta?

² Jezucho dves kel’lo toso, sonvsar amcho pasun dves korta. Kiteak? Karonn ami “sonvsarachim nhoi.” (Juanv 15:17-19) Hacho orth, ami munxanchea sorkarank man ditat zalear pasun, tanchi vo tanchea bavtteanchi bhokti korinant. Ami fokot Jehovachich bhokti kortat dekhun ami raxttr-git mhunnonant ani rajkaronnant bhag gheinant. Munxakullacher razvottki cholouncho hok’k fokot Devakuch asa mhunn ami manun ghetat, jem Soitan ani tachi ‘sonsot’ manun gheinant. (Ut. 3:1-5, 15) Tea bhair, fokot Devachem Raz munxanchi somosia kaddunk xokta  ani tachea add voitoleancho tem rokddench nas kortolem mhunn ami porgott’ttat. (Dan. 2:44; Prok. 19:19-21) Hi khalteank bori khobor asa, punn noxtteank vaitt khobor.—St. 37:10, 11.

³ Amcho dves korunk anik ek karonn mhunnttlear ami Devachea noitik dorjeam pormonnem jietat. He dorje sonvsarachea dorjeam poros veglle asat. Udharonnak aiz lok, Jehovan nas kelolea Sodom ani Gomorrachea lokam sarkem jietat! (Judas 7) Ami Bible dorjeam pormonnem jietat dekhun zaite lok amchi fokonnam kortat ani dusreanchi vagnnuk ami sosun gheinant mhunn sangtat!—1 Ped. 4:3, 4.

4. Lokancho dves sosunk amkam khoinche gunn modot korunk xoktat?

⁴ Lokancho dves ani opman sosunk amkam kitem modot korunk xokta? Jehova modot kortolo mhunn amkam ghott bhavarth asonk zai. Karonn, eka ddhale sarko amcho bhavarth, ‘Devcharache soglle zolltte bann palounk xokta.’ (Ef. 6:16) Punn bhavartha sangata amkam mog asop kiteak gorjecho? Karonn mog ‘rag choddounk dina.’ Mog aslear ami soglem vaitt sosun gheunk pavtat. (1 Kor. 13:4-7, 13) Atam ami Jehova pasot, bhav-bhoinnam pasot ani amchea dusmanam pasot aslolo amcho mog, dves sosunk koso modot korta tem polloitolim.

5. Jezu aplea Bapacho mog kortalo dekhun taka koxi modot zali?

⁵ Aplea dusmananchea hatant morchea poilim Jezun aplea pattlanvdarank sanglem: ‘Hanv Bapacho mog kortam mhonn, Bapan mhaka dilea ti adnia hanv sarki pallttam.’ (Juanv 14:31) Jezu Jehovacho mog kortalo dekhun, tacher ailole tras sosunk taka modot zali. Toxench, ami pasun Jehovacho mog kortat zalear amkam dhumallo sosunk modot zatoli.

6. Romkarank 5:3-5-a pormonnem, sonvsar tancho dves korta tednam Jehovachea lokank koxem dista?

⁶ Jehovacho mog aslolean tachea sevokank dhumallo sosunk modot zalea. Udharonnak, Judevanchea Mha-dhormsobhen apostlank porgottnnechem kam bond korunk sanglem tednam, tankam Devacho mog aslo mhunn tannim ‘munxanchi adnia nhoi, punn Devachi adnia pall’lli.’ (Itihas 5:29; 1 Juanv 5:3) Teach bhaxen, aiz pasun amchea bhav-bhoinnank Jehovacho mog asa dekhun, krur ani bollixtt sorkar dhumallo ditat tednam tim visvaxi ravonk pavtat. Tor, sonvsar amcho dves korta tednam nirax zaunchea bodlek, ami khuxal zatat.—Itihas 5:41; Romkarank 5:3-5 vachat.

7. Amchea familintlim amcho virodh kortat tednam ami tanchea sangata koxem vagonk zai?

⁷ Amchea familintlim amkam dhumallo ditat tednam tem sosunk amkam ekdom kotthin zaunk xokta. Ami sot xiktat tednam, amkam konnem tori fottoilam vo ami pixim zaleant mhunn tim chintunk puro. (Marku 3:21 sor korat.) Tim amchea sangata khub vaitt toren pasun vagonk xoktat. Punn ami ojap zainant. Karonn Jezun mhunnttlem: “Monxacho dusman tachoch ghorcho lok.” (Mt. 10:36) Tor tim amchea sangata koxim-i vagum, tim amchim dusman mhunn ami lekhinant. Tachea bodlek, Jehovacho mog vaddtta toso, lokam pasotui amcho mog vaddtta. (Mt. 22:37-39) Punn munxank khuxal korunk ami Bible-antle kaide vo totvam pallop soddun dinant.

8-9. Eke bhoinnik khor dhumalleacho fuddo korunk koxi modot zali?

⁸ Georgina zachea vixim ami poilim uloilolim, taka aplea avoi thaun khub dhumallo soscho poddlo. Tem mhunntta: “Mhojea avoin ani hanvem Jehovachea Sakxeam sangata Bible obheas korunk suru kelo. Punn sov mhoinea uprant, mhaka mittingek vochonk zai aslem tednam mhoji avoi mhaka tras korunk lagli. Tika  dhorm broxttancho sangat aslo ani te uloitat tench ti uloitali. Ti mhozo opman kortali, mhoje kens voddttali, golleak dhortali ani mhojim prokaxonam bhair uddoitali. Hanv 15 vorsanchem aslem tednam hanvem bautizm ghetlo. Punn Jehovachi seva bond korunk mhojea avoin mhaka eka hostel-ant ghatlem. Thoinchim cheddvam gungim vokhdam ghetalim ani vaitt kamam kortalim. Tuzo mog korun tuji kallji gheunk zai aslolim tinch tuzo virodh kortat tednam tem sosunk chodd kotthin zata.”

⁹ Tor Georginan hea dhumalleacho koso fuddo kelo? Tem fuddem mhunntta: “Mhoji avoi mhaka dhumallo diunk lagli tea disa, mhozo Bible vachun somplolo. Tor, hanv xiklam tem sot mhunn mhaka khatri zal’li, ani Jehova lagim mhoji ixttagot ghott zal’li. Hanv zaite pavtti magnnem kortalem, ani Jehova mhaka kan ditalo. Hanv hostel-ant aslem tednam ek bhoinn mhaka tichea ghora apoun mhozo Bible obheas kortali. Sobhentlea bhav-bhoinnamnim pasun mhaka urba dili. Tannim mhaka apleach familintlem koxem lekhlem. Amcho konnui virodh kelear pasun, Jehova sogleam-von bollixtt mhunn mhaka hantuntlean kollon ailem.”

10. Jehova kitem kortolo mhunn ami khatri dovrunk zata?

¹⁰ ‘Jezu Krista amchea Somia udexim aslolea Devachea moga koddsun amkam kitench toddun kaddunk zaunchem na’ mhunn apostl Paulun sanglem. (Rom. 8:38, 39) Tor amkam thoddo vell dhumallo sosunk poddlear pasun, Jehova amchea sangata astolo, ani to amkam buzvonn ani xokti ditolo. Tea bhair, Jehova amkam bhav-bhoinnam udexim modot kortolo mhunn ami Georgina-chea onnbhovantlean xiktat.

11. Jezu jea moga vixim Juanv 15:12, 13-ant uloilo, to mog tachea xisank koso modot korunk xoktalo? Ek udharonn diat.

¹¹ Jezu morchea poilim, aplea xisamnim eka-mekacho mog korunk zai mhunn tannem sanglem. (Juanv 15:12, 13.) Tanchea modem mog aslo zalear tim ekvottan sonvsara thaun ieta to dhumallo sosunk pavtolim mhunn to zannam aslo. Udharonnak, Tesalonikentlea sobhe vixim chintat. Thoinchea bhav-bhoinnank survatek thaun dhumallo soscho poddlo. Tori astana, tim visvaxi ravlim ani eka-mekacho mog korit ravlim. (1 Tes. 1:3, 6, 7) Paulun tankam, tancho mog “odik-odik  vaddot vochum-di” mhunn sanglem. (1 Tes. 4:9, 10) Karonn tanchea modem mog aslo zalear tim nirax zaloleank ani oskotank modot korunk xoktalim. (1 Tes. 5:14) Tannim Paulun dil’lo sol’lo apnnailolean sumar eka vorsa uprant tannem boroilolea dusrea chittient to oso mhunnonk xoklo: “Ekameka thaim tumcho pritimog choddot veta.” (2 Tes. 1:3-5) Tor tankam mog aslolean tim tancher ailolea trasancho ani dhumalleancho fuddo korunk pavlim.

12. Zhuzachea vellar eka desantlea bhav-bhoinnamnim eka-mekak mog koso dakhoilo?

¹² Atam ami Danylo-cho onnbhov polloum-ia, zachea vixim ami poilim uloilolim. To ani tachi bail ravtalim tea xarant zhuz suru zalem tednam pasun tim mittingek voitalim, apleachean zata titli porgottnni kortalim, ani apnna lagim asa tem jevonn bhav-bhoinnank ditalim. Ek dis soinik tachea ghora aile tednam kitem zalem tea vixim Danylo sangta: “Mhaka tannim Jehovachea Sakxeantlo bhair soronk sanglem. Hanvem nakarlem tednam tannim mhaka marlo, ani bondukan mhojer gulleo marlolea bhaxen keleo, punn teo mhojea toklea voilean geleo. Te mhojea bailecho bolotkar kortole mhunn dhomkaun gele. Punn bhav-bhoinnam rokddinch ieun amkam dusrea eka xarant dhaddlem. Tannim dakhoil’lo mog hanv kednanch visorcho na. Ami novea xarant pavlim tednam, thoinchea bhav-bhoinnamnim amkam jevonn dilem, ani kam ani ghor sodhunk pasun modot keli! Hea udexim, zhuz zata tea zagear thaun surokxa mellonk bhav-bhoinnam ietalim tednam tankam ravonk ami modot korunk pavlim.” Tor bhav-bhoinnancho mog dhumallo sosunk modot korta mhunn amkam oslea onnbhovantlean kollon ieta.

13. Lok amkam dita to dhumallo sosunk Devachi povitr xokti koxi modot korta?

¹³ Jezun aplea pattlanvdarank aplea dusmanancho mog korunk sanglem. (Mt. 5:44, 45) Hem korop sompem na tem khorem. Punn Jehovachea povitr xoktechea adaran ami hem korunk xoktat. Tea xokte udexim amkam pasiens, doiallai, dulobai ani ap-domaunni osle gunn vaddounk modot zata. (Gal. 5:22, 23) He gunn amkam dhumallo sosunk modot kortat. Karonn he gunn sakxeamnim dakhoilolean dhumallo ditolea tanchea kazari sangateamnim, avoi-bapaimnim vo xezariamnim aplea sobhavant bodol kela ani zaitim amchim bhav-bhoinnam pasun zaunk pavleant. Tor  tumkam dhumallo ditat tancho mog korunk kotthin zata zalear, Jehova lagim povitr xokti di mhunn magat. (Lukas 11:13) Ani Jehova amkam jem kitem korunk sangta, tem amkam sodanch faideak poddtta mhunn khatri dovrat.—Mho. 3:5-7.

14-15. Romkarank 12:17-21 apnnailolean aplea ghovak mog dakhounk Yasmeen-ak koxi modot zali?

¹⁴ Ami atam Gulf-ant ravpi Yasmeen nanvachea eke bhoinnichem udharonn polloum-ia. Tika ek Jehovachi Sakxi zaunk konnem tori fottoilam mhunn chintun ticho ghov ticho virodh korunk laglo. Tannem ticho opman kelo, tika dhomkailem ani familicho ekvott moddtta mhunn ticher arop ghatlo. Hem korunk tannem aplea soireank, eka padrik ani ghaddiponn kortolea eka munxak uzar kelo. Ek pavtti sobhechi mitting choltana thoim ieun, tannem bhavank bhurxim utram pasun mhunnttlim! Hem soglem sostana Yasmeen khub pavtti roddttali.

¹⁵ Tea vellar sobhentlea bhav-bhoinnamnim Yasmeen-ak mog ani urba dili. Ani vhoddilamnim tika Romkarank 12:17-21-ant (Vachat) sanglolim utram apnnaunk sanglem. Yasmeen mhunntta: “Bible sangta tem apnnaunk mhaka sompem naslem. Punn modoti pasot hanvem Jehova lagim maglem ani mhojean zata tem soglem kelem. Tor mhozo ghov ragan, kujinant chikol haddun uddoitalo tednam, hanv tem saf kortalem. To mhozo opman kortalo tednam hanv tachea lagim mogan uloitalem. Ani to duent poddttalo tednam hanv tachi kallji ghetalem.”

16-17. Yasmeen-achea udharonnantlean tumi kitem xikonk xoktat?

¹⁶ Yasmeen-an aplea ghovak mog dakhoilolean tika zaito faido zalo. Ti mhunntta: “Hanv sodanch sot uloitalem dekhun mhozo ghov mhojer chodd visvas dovrunk pavlo. Hanv dhorma vixim uloitalem tednam to kan diun aikonk laglo. Ani ghorant xantin vagonk pasun toiar zalo. Atam to mhaka mittingek vochonk pasun urba dita. Amcho mog anik vaddla ani ghorant xanti asa. Ani ek dis mhozo ghov sot xiktolo ani mhojea sangata Jehovachi seva kortolo mhunn mhaka khatri asa.”

¹⁷ Mog ‘sosun gheta, bhorvonso dovorta, ani dhiran sogleak fuddo korta,’ mhunn amkam Yasmeen-achea udharonnantlean kollon ieta. (1 Kor. 13:4, 7) Ami amchea dusmanank mog dakhoilear tancho sobhav bodlonk xokta, ani tea udexim ami Jehovak khuxal kortat. Punn tim amkam dhumallo di-it ravlear pasun ami koxim khuxal ravonk xoktat?

18. Dhumallo aslear pasun ami koxim khuxal asonk xoktat?

¹⁸ Jezun sanglem: “Tumcho dves kortit . . . tednam, tumi subhagi.” (Lukas 6:22) Amkam dhumallo sosunk naka, ani to sostana amkam khuxalkai bhogona. Tor tea vellar ami khuxal koxim asonk xoktat? Ami tin karonnam polloum-ia. Ami dhumallo sostat tednam, poilem mhunnttlear amkam Devachi maniotai asta. (1 Ped. 4:13, 14) Dusrem, amcho bhavarth ghott zata. (1 Ped. 1:7) Ani tisrem, amkam sasnik jivitachem moladik dennem melltta.—Rom. 2:6, 7.

19. Apostlank marle tori astana te kiteak khuxal asle?

¹⁹ Jezu sorgar gelea uprant, tannem sanglolim utram khorim mhunn tachea xisank kollon ailem. Karonn te porgott’ttale mhunn thoddeach tempa uprant, tankam marle ani porgottnni korinakat mhunn sanglem. Punn tea vellar, “Jezuchea Nanva pasot beman sosunk apnnank bhag mell’lem mhonn” te khuxal zale. (Itihas 5:40-42) Dusmananchea bhirante poros, Jezu pasot tancho mog chodd aslo. Ani taka lagon te bori khobor “porgottit ravle.” Aiz pasun zaitim bhav-bhoinnam dhumallo aslearui visvaxiponnan Jehovachi seva kortat. Karonn Jehova pasot tannim dakhoil’lo mog ani tanchem kam to visorcho na mhunn tankam khatri asa.—Heb. 6:10.

20. Ami fuddlea lekhant kitem xiktolim?

²⁰ Soitanacho ho sonvsar aso-sor amkam dhumallo soscho poddttoloch. (Juanv 15:19) Punn amkam bhieupachi goroz na. Karonn Jehova aplea visvaxi sevokank “ghottai ditolo ani . . . rakhtolo” mhunn ami fuddlea lekhant xiktolim. (2 Tes. 3:3) Tor ami Jehovacho, amchea bhav-bhoinnancho ani amchea dusmanancho pasun mog korit ravum-ia. Ami oxem kortat tednam ami ekvottan astolim, amcho bhavarth ghott zatolo, ami Jehovak man diunk pavtolim ani dvesa poros mogak chodd xokti asa mhunn dakhoun ditolim.