1. Tëm noo Matheus 24:9, warom sole mer uns net ferxreke wën ti welt uns hast?

YEEHOOWA hot uns erxaft fer se liipe un keliipt wëre. Tes weeche, wën yemant uns hast, tas macht unser hërts wee un fiilaycht kriin mer soo kaar pang. Tsum payxpiil, Georgina, een xwester woo in Europa leept, saat: “Wii ich 14 yoore alt waar, hot mayn mama aan kefang mich hase wayl ich Yeehoowa ketiint hon. Ich hon mich aarich traurich un aleen kexpiirt un hon aan kefang se tenke tas ich waar net een kuut persoon kewees.” * Eene pruuter, woo Danylo heest, xraypt: “Ti soltaate hon mich keklopt, mich ferxënt un hon mich kesaat tas se teete mich wee mache wayl ich Yeehoowa sayn Tsayer sin. Wën tas pasiirt is, hon ich pang kriit un mich aarich kleen kefun.” Tiise has macht uns wee, awer ferxrekt uns net — Yeesus hot xon foer heyer kesaat tas mer kehast weyere. (Lees Matheus 24:9.) *

2-3. Warom sin Yeesus sayn nookeener kehast?

² Ti welt hast Yeesus sayn nookeener. Warom? Wayl, soo wii Yeesus, sin mer “khee teel fon te welt”. (Yoo. 15:17-19) Opwool mer ti mënxliche rechiirunge respektiire, tuun mer uns net in te politik rin mexe, ti faan loope orer tas natsyonaalix liit singe. Meyer tuun ploos Yeehoowa aan peete. Meyer xtitse tas ploos Kot tas recht hot fer ti mënxe rechiire — een recht woo Satanaas un sayn “nookhomer” mit ale kewalt ap xtose. (Xee. 3:1-5, 15) Meyer preetiche tas ti mënxheet hot  ploos een hofnung: Kot sayn Raych; un tas tiise Raych tuut ale woo tekeeche sin klaych fernichte. (Tan. 2:44; Apo. 19:19-21) Tas sin kuute notisye fer ti tsaamer, awer xrekliche notisye fer ti xlechter. (Psal. 37:10, 11)

³ Meyer sin aach kehast wayl mer Kot sayn kesetse aan heere. Was ti layt fon te welt mëne is kans anerste fon was Yeehoowa saat richtich orer ferkheert is. Tsum payxpiil, friier, Kot hot Sotooma un Komoora fernicht weeche tëne sayn trekich imoraalix aanxtelung. (Yuu. 7) Awer hayt tsu taach, fiile layt fon te welt tuun ti selwich aanxtelung uf rechne. Wayl mer ti piiplixe kesetse iwer tiise sache aan heere, tuun fiile mënxe uns xpote un saan tas mer intolerant sin. (1 Phe. 4:3, 4)

4. Was fer kwaliteete ferxtërke uns wën ti layt uns hase?

⁴ Was khan uns helfe aus se hale wën ti layt uns hase un xëne? Meyer prayche een xtarke klaape hon tas Yeehoowa uns helfe tuut. Soo wii een kroose xits xilt, unser klaape khan “ale fayer fletxe woo te Xlechter xiist, aus mache”. (Ëfe. 6:16) Awer es is neetich mee wii klaape hon — meyer prayche liip hon. Weeche was? Wayl ti liip “kept net klaych wuutich”; tii phakt un halt aus ales was uns wee macht. (1 Kor. 13:4-7, 13) Wole mer yets siin wii ti liip tsu Yeehoowa, tsu unser priiter un xwestere, un soo kaar tsu unser faynte heleft uns te has aus hale.

5. Wii hot Yeesus sayn liip tsu sayn Fater tëm ferxtërkt?

⁵ Ti nacht eep Yeesus sayn faynte tëm um keprung hon, hot eyer fer sayn nookeener kesaat: ‘Ich liipe te Fater, tan mache ich kraat soo wii te Fater mich kexikt hot.’ (Yoo. 14:31) Yeesus sayn liip tsu Yeehoowa hot tëm ferxtërkt fer ti proope woo noch khemte. Unser liip tsu Yeehoowa khan tas selwiche fer uns mache.

6. Tëm noo Romaaner 5:3-5, wii fine sich Yeehoowa sayn tiiner wën se fon te welt kehast sin?

⁶ Ti liip tsu Kot hot xon lang heyer sayn tiiner keholef ti yachtung aus hale. Tsum payxpiil, een mool tas yiitixe heechste kericht — woo fiil macht hat — hot ti aphostele kexikt noo lose se preetiche. Awer tëne sayn liip tsu Yeehoowa hot tëne uf kerechent “Kot als rechiirente aan heere xtats ti mënxe”. (Aph. 5:29; 1 Yo. 5:3) Fiile fon unser priiter hayt tsu taach sin aach keyacht fon krope un mechtiche rechiirente, awer tii kriin tas aus hale weeche sayn xtark liip tsu Yeehoowa. Wën ti welt uns hast, xtats uns oone muut xpiire, fine mer uns froo. (Aph. 5:41; lees Romaaner 5:3-5.) *

7. Was sole mer mache wën unser familye sich keeche uns xtelt?

⁷ Eene fon te xlimste proope fer aus se hale, is wën unser aychne familye sich keeche uns xtelt. Wën se mërke tas mer wole iwer Yeehoowa lërne, welche fon unser familye khene fiilaycht tenke tas mer waare hinerkang. Anere khene im xtant tenke tas mer sin ferikt kep. (Kuk aach Markus 3:21.) Tii khene soo kaar krop mit uns sin. Awer soo een sort yachtung thërft uns net ferxreke. Yeesus hat xon kesaat: “Ti faynte fon eene mënx wëre fon sayn aychne haus sin.” (Mat. 10:36) Kewis, ekaal wii unser parente uns aan siin, tuun mer tëne nii mools wii faynte pehantele. Kans anerste, woo kreeser unser liip tsu Yeehoowa, woo kreeser unser liip fer ti layt. (Mat. 22:37-39) Awer mer tuun nii net noo lose ti kesetse un ti printsiipye fon te Piipel noo keen ploos fer een mënx kefale.

8-9. Was hot een xwester keholef fest plaype forich krop yachtung?

 ⁸ Georgina, iwer weem mer foner traan kexproch hon, hot es hin kriit fest plaype opwool sayn mama hot sich krop keeche tëne kextelt. Georgina leet aus: “Ich un mayn mama hon aan kefang ti Piipel mit Yeehoowa sayn Tsayer xtutiire. Awer 6 moonate xpeeter, wën ich wolt in te fersamlunge keen, mayn mama sayn aanxtelung hot sich kans keënert. Ich hon raus kefun tas tii waar mit te aphostate am fertseele; tii hot tëne sayn mënunge penutst wii se mit mich kexproch hot. Tii hot mich aach kexënt, mayn hoer ketsoo, mayn hals ketrikt, mayn puplikatsyoone wech kexmis... Wii ich 15 yoore alt waar, hon ich mich taafe kelos. Fer se fersuuche mich um hale Yeehoowa tiine, mayn mama hot mich kexikt fer een haus woo repëlixe meetche uf kephast hot. Welche tat hon trooke in kenom un kriime kemacht. Wën ti yachtung khomt fon yemant woo thërft tich aan sich liipe un uf phase, is tas hauptseechlich xweyer aus se hale.”

⁹ Was hot Georgina keholef aus se hale? Tii saat: “Te taach woo mayn mama hot aan kefang sich keeche mich xtele, waar ich kraat fërtich mit te leesung fon te kans Piipel. Ich waar mich kans sicher tas ich hat ti woerheet kefun un ich hon mich aarich ticht pay Yeehoowa kexpiirt. Ich hon tsu tëm eftas kepeet un tee hot mich keheert. Wën ich in tëm haus fer repëlixe meetche keleept hon, een xwester hot mich in kelaat tsu tëne sayn haus keen un tat hon mer paysamer ti Piipel xtutiirt. Torich tiise tsayt, ti priiter un ti xwestere hon mich ferxtërkt. Ich hon kexpiirt tas ich wërklich teel fon sayn familye waar! Ich khont taytlich siin tas, een tuun weer unser keechner sin, Yeehoowa is xtërker wii tëne.”

10. Was fer sicherheet khene mer iwer Yeehoowa hon?

¹⁰ Te aphostel Phaul hot kexrip tas niks khan “uns fon Kot sayn liip aus naner mache, woo in Yeesus Kristus, unser Hër, is”. (Rom. 8:38, 39) Opwool mer een tsayt layte khene, Yeehoowa tuut imer pay uns sin fer uns treeste un ferxtërke. Un, wii Georgina sayn speryens tsaycht, Yeehoowa tuut uns aach helfe torich unser kiltiche priiter un xwestere in te kemaynt.

11. Wii teet ti liip, woo Yeesus in Yoohan 15:12, 13 pexrip hot, sayn tisipele helfe? Kep een payxpiil.

¹¹ Ti nacht eep Yeesus kextorep is, hot eyer sayn tisipele erinert fer sich naner liipe. (Lees  Yoohan 15:12, 13.) * Tee wust tas tiise sort liip teet tëne helfe eenich plaype un ti welt sayn has aus hale. Kuk mool tas payxpiil fon te kemaynt in Thesaloonika. Xon fon aanfang aan, waare ti priiter tat keyacht. Noch soo, sin se een payxpiil fon troyheet un liip kep. (1 The. 1:3, 6, 7) Phaul hot tëne uf kemuut wayter liip tsayche un tas “imer mee mache”. (1 The. 4:9, 10) Ti liip teet tëne uf rechne ti tiifsinicher treeste un ti xwacher xtitse. (1 The. 5:14) Meechte se Phaul sayn aanreete noo kang sin? Yawool, wayl in sayn tsweete priif — woo waar unkefeer een yoer xpeeter kexrip — Phaul khont tëne saan: “Ayre liip eene tsu te anere tuut sich ferkreese.” (2 The. 1:3-5) Ti liip hot tëne keholef ti xwiirichkheete un ti yachtung aus hale.

12. Torich een kriich, wii hon ti priiter un xwestere fon een lant sich naner liip ketsaycht?

¹² Kuk mool tas payxpiil fon Danylo, iwer weem mer eente fertseelt hon, un sayn fraa. Es waar een kriich in tëne sayn lant kewees un, tsum xlus, is te kriich pis tëne sayn xtat khom. Soo wii soo, hon se net noo kelos in te fersamlunge keen, preetiche wiis meechlich waar, un tas ese woo se hate mit te priiter un xwestere teele. Tan, eene taach, sin soltaate mit wafe pis Danylo sayn haus khom. “Tii hon mich kexikt mayn klaape uf kepe — saat Danylo. — Wën ich ‘nee’ kesaat hon, hon se mich keklopt un owich mayn khop kexus, fer aus siin mache tas se teete mich xiise. Eep se fat kang sin, hon se kesaat tas se retuer khemte fer mayn fraa iwerfale. Awer unser priiter hon uns xnel fer een aner xtat torich een aysepaan kexikt. Ich tuun nii net ferkese ti liip woo tiise kiltiche priiter ketsaycht hon! Un wii mer pis ti naye xtat khom sin, ti priiter woo tat kewoont hon, hon uns ese kep un mich keholef een naye aarwayt un haus fine. Weeche tas, khonte mer anere Yeehoowa sayn Tsayer helfe woo waare aach fom kriich am aus rayse.” Soo sorte speryense tsayche tas ti kristlich liip khan uns helfe te has aus hale.

13. Wii heleft uns te hayliche kayst wayter Yeehoowa tiine soo kaar wën ti layt uns hase?

¹³ Yeesus hot fer sayn nookeener kesaat fer sayn faynte liipe. (Mat. 5:44, 45) Meecht tas  laycht sin se mache? Kewis net! Awer tas is meechlich mit te hilef fon Kot sayn hayliche kayst. Tiise kayst xaft in uns kwaliteete woo helfe uns te has aus hale, wii liip, ketult, froyntlichkheet, tsaamheet un selepst kontrol. (Kal. 5:22, 23) Fiile layt hon noo kelos sich keeche uns xtele wayl tëne sayn man, fraa, khint orer nochper hot tiise kwaliteete ketsaycht. Fiile fon tëne sin soo kaar unser liipe priiter un xwestere kep. Tan, was khanst tuu mache wëns tuu es xweyer finst se liipe ti layt woo tich hase wayls tuu Yeehoowa tiinst? Ferlang hayliche kayst im kepeet. (Luk. 11:13) Un say tich sicher: Yeehoowa sayn aat fer ti tinge se mache, is imer ti pest! (Xpr. 3:5-7)

14-15. Wii hot Romaaner 12:17-21 Yasmeen keholef liip fer sayn man tsayche opwool eyer tekeeche waar?

¹⁴ Kuk mool tas payxpiil fon Yasmeen, woo in te Mitel Oryent leept. Wën se Yeehoowa sayn Tsayer kep is, sayn man hot ketenkt tas se hinerkang waar, un hot fersuucht tëne um hale Kot tiine. Tee hot tëne kexënt un aach sayn parente, een relichyeese fiirer un een hekser uf kerechent soo sorte tinge tëne saan: ‘Meyer tuun etwas xlechtes mit tich mache; tuu host tayn familye keteelt!’ Yasmeen sayn man hot soo kaar kexraayt un ti priiter kexënt in een fersamlung. Weeche tiise kropheet, hot Yasmeen eftas keprilt.

¹⁵ Im Raych Saal, ti priiter un xwestere hon Yasmeen ketreest uns ferxtërkt. Ti elteste hon tëne uf kemuut ti wërter fon Romaaner 12:17-21 * aan wëne. (Lees.) “Es waar xweyer kewees — saat Yasmeen. — Awer ich hon Yeehoowa sayn hilef ferlangt un mayn pestes kemacht fer se aan wëne was ti Piipel saat. Tan, wën mayn man hot ferkërn trek in te khich kexmis, hon ich se sauwer kemacht. Wën eyer mich kexënt hot, hon ich tsaam keantwort. Un wën eyer krank waar, hon ich tëm uf kephast.”

16-17. Was host tuu mit Yasmeen sayn payxpiil kelërnt?

¹⁶ Yasmeen waar peloont weeche ti liip woo se hot fer sayn man ketsaycht. “Mayn man hot aan kefang mee aan mich traue — saat se —, wayl eyer wust tas ich teet imer ti woerheet saan. Tee hot aan kefang mich mit respekt  heere wën mer iwer relichyoon fertseelt hon un yets heleft eyer te friit tehëm hale. Hayt tuut eyer mich uf muute aan te fersamlunge keen. Unser leepe wii familye hot sich fiil ferpesert un yets fine mer uns in ruu tehëm. Ich hofe tas eene taach, mayn man tuut sayn hërts fer ti woerheet uf mache un aan fange Yeehoowa mit mich tiine.”

¹⁷ Yasmeen sayn payxpiil tsaycht tas ti liip ‘phakt ales, hoft uf ales, halt ales aus’. (1 Kor. 13:4, 7) Te has khan wee mache un xtark sin, awer ti liip is fiil xtërker — tii khan hërtse kriin. Un noch: liip tsayche lost Yeehoowa sayn hërts froo. Awer soo kaar wën ti keechner lose net noo uns hase, kriin mer uns noch froo hale. Wii soo?

18. Warom khene mer froo wëre wën mer kehast sin?

¹⁸ ‘Froo sayt teyer wën ti layt aych hase’ — hot Yeesus kesaat. (Luk. 6:22) Meyer suuche net raus kehast wëre un mer fine es net kuut wën mer keyacht weeche unser klaape sin. Tan, warom khene mer froo wëre wën mer kehast sin? Kuk mool tray uersache. Eyerst: wën mer aus hale, kefale mer Kot. (1 Phe. 4:13, 14) Tsweet: unser klaape wërt ferpesert un ferxtërkt. (1 Phe. 1:7) Un trit: kriin mer een wunerlich peloonung — tas eewiche leepe. (Rom. 2:6, 7)

19. Warom sin ti aphostele froo kep noo tas se kepaytxt waare?

¹⁹ Klaych noo Yeesus sayn ufxtaye, ti aphostele hon ti frooheet kexpiirt woo Yeesus kexproch hat. Tii waare kepaytxt un kexikt noo lose se preetiche, awer tii hon sich kefrayt. Warom? “Wayl, forich Kot, waare se kuut kenuuch kewees fer weeche Yeesus sayn naame kexeemt wëre.” (Aph. 5:40-42) Tëne sayn liip tsu sayn Hër, Yeesus, waar xtërker kewees wii tëne sayn pang fon te faynte. Un tii hon sayn liip ketsaycht wii se ti kuute notisye “oone noo lose” kepreeticht hon. Hayt tsu taach, fiile priiter un xwestere tuun wayter Yeehoowa troy tiine opwool ti xwiirichkheete woo se hon. Tii wise tas Yeehoowa tuut nii mools ferkese ti aarwayt un ti liip woo se weeche Sayn naame tsayche. (Hep. 6:10)

20. Was tuun mer im neekste artikel lërne?

²⁰ Pis tas ën fon tiise sisteem, ti welt tuut uns hase. (Yoo. 15:19) Awer mer prayche khee pang hon. Wii mer im neekste artikel lërne tuun, Yeehoowa tuut sayn troye tiiner ‘ferxtërke un xitse’. (2 The. 3:3) Tan, wole mer wayter Yeehoowa, unser priiter un xwestere, un soo kaar unser faynte liipe! Wën mer tas mache, hale mer uns eenich un kaystlich xtark, pringe mer eer tsu Yeehoowa, un pewayse mer tas ti liip is fiil xtërker wii te has.