1. Ɛzɩ Maatiyee 24:9 yɔɔdʋʋ yɔ, ye ɛjaɖɛ ɛpaɖɩɣ-ɖʋ yɔ, ɛbɛ yɔɔ pɩtɩpɔzɩ se pɩɖɩɣzɩ-ɖʋ?

YEHOWA lɩzɩ-ɖʋ lɛ, ɛha-ɖʋ waɖɛ se ɖɩpɩzɩ nɛ ɖɩsɔɔlɩ ɖama. Pʋyɔɔ lɛ, alɩwaatʋ ndʋ nɔɔyʋ paɖɩɣ-ɖʋ yɔ, pɩcɛyɩɣ-ɖʋ siŋŋ nɛ pɩtɩla sɔɔndʋ kpaɣ-ɖʋ. Payaɣ koobu halɩñɩnʋ nɔɔyʋ se Georgina nɛ ɛwɛ Erɔɔpɩ ɛjaɖɛ taa. Ɛyɔɔdaa se: “Alɩwaatʋ ndʋ maawɛnɩ pɩnzɩ 14 yɔ, mon-ɖoo paɖaɣ-m mbʋ pʋyɔɔ yɔ, mɛnsɛɣ Yehowa. Pɩɩcɛyɩ-m siŋŋ nɛ pɩlakaɣ-m ɛzɩ mɛwɛ men-ɖeke yɔ, nɛ piyeba nɛ manpaɣzɩ maɣzʋʋ se pɩtɩla mantɩkɛ ɛyʋ kɩbanʋ.” * Payaɣ koobu abalɩñɩnʋ nɔɔyʋ se Danylo. Ɛmawa se: “Alɩwaatʋ ndʋ sɔɔjanaa mabɩ-m, patʋ-m nɛ palabɩ-m kañatʋ lakasɩ lɛɛsɩ mbʋ pʋyɔɔ yɔ mɛnkɛ Yehowa Aseɣɖe Tʋ yɔ, sɔɔndʋ kpa-m, nɛ pɩlakaɣ-m ɛzɩ paɖʋ-m fɛyɛ yɔ.” Alɩwaatʋ ndʋ ɛyaa paɖɩɣ-ɖʋ yɔ, pɩcɛyɩɣ-ɖʋ siŋŋ ɛlɛ pɩɩɖɩɣzɩɣ-ɖʋ. Yesu kaayɔɔdaa se ɛyaa kaɣ-ɖʋ paɖʋʋ.—Kalɩ Maatiyee 24:9.

2-3. Ɛbɛ yɔɔ ɛyaa paɖɩɣ Yesu wayɩ tɩŋɩyaa?

² Ɛjaɖɛ paɖɩɣ Yesu wayɩ tɩŋɩyaa. Ɛbɛ yɔɔ? Mbʋ pʋyɔɔ yɔ, ɛzɩ Yesu yɔ ɖɩtɩkɛ “ɛjaɖɛ yɔɔ mba.” (Yoh. 15:17-19) Pʋyɔɔ lɛ, paa ɖɩñaŋ ɛyaa kominawaa yɔ, ɖɩɩsɛɣ-wɛ yaa ɖɩɩsɛɣ wondu ndʋ tɩsɩŋnɩ-wɛ yɔ. Yehowa yeke ɖɩsɛɣ. Ðitisiɣ se Ɛsɔ mʋnɩna se ɛtɔɔ kewiyitu ɛyaa yɔɔ nɛ ɖɩtɩnɩɣ e-kewiyitu tɔɔʋ yɔɔ, ɛlɛ Sataŋ nɛ ɛ-pʋlʋlaɣ paatisiɣ se ɛnʋ mʋnɩna. (Kiɖe 3:1-5, 15) Ðisusuu se Ɛsɔ Kewiyaɣ yeke kaɣnɩ yebu nɛ ɛyaa kʋñɔmɩŋ sɩɩ tɩnaɣ, nɛ piileɖiɣ lɛ kakaɣ ɖɔɖɔ ɖɩzʋʋ mba payɩ pakaɖɩɣnɩ-kɛ yɔ. (Dan. 2:44; Natʋ 19:19-21) Tɔm ndʋ tɩkɛ tɔm kɩbandʋ ɛyaa mba poluzuu pa-tɩ yɔ, ɛlɛ tɩkɛ tɔm kɩdɛkɛdɩtʋ ɛyaa kɩdɛkɛdaa.—Keɣa 36:10, 11.

 ³ Ɛyaa paɖɩɣ-ɖʋ ɖɔɖɔ mbʋ pʋyɔɔ yɔ, ɖɩɖɔŋ Ɛsɔ paɣtʋ yɔɔ. Paɣtʋ ndʋ, tɩwɛ ndɩ kpem nɛ lɩmaɣza kɩdɛkɛda wena ɛjaɖɛ wɛnɩ wezuu kɩbaŋʋ caɣʋ yɔɔ yɔ. Kɩɖaʋ nakʋyʋ yɔ: Sɔnɔ, ɛyaa sakɩyɛ yɔɔdʋʋ kaɣlaa se kʋzʋʋ kɩdɛkɛdʋʋ wezuu caɣʋ tɩwɛɛkɩ pʋyʋ. Wezuu ŋgʋ Sodom nɛ Gomɔɔrɩ mba cakaɣ, nɛ pʋyɔɔ Ɛsɔ kaaɖɩzɩ-wɛ. (Yud. 7) Ðɩɖɔŋ Bibl paɣtʋ ndʋ titukuuni kʋzʋʋ kɩdɛkɛdʋʋ wezuu caɣʋ yɔ tɩ-yɔɔ, pʋyɔɔ ɛyaa sakɩyɛ hoŋuu-ɖʋ nɛ pɔyɔɔdʋʋ se ɖɔ-tɔm wɛ kaɖɛ.—1 Pɩy. 4:3, 4.

4. Alɩwaatʋ ndʋ ɛyaa paɖɩɣ-ɖʋ yɔ, wɛtʋ ndʋ sɩɣnɩ-ɖʋ se ɖɩɖɔkɩ ɖa-tɩ?

⁴ Alɩwaatʋ ndʋ ɛyaa paɖɩɣ-ɖʋ nɛ patʋʋ-ɖʋ yɔ, ɛbɛ pɩzɩɣ pɩsɩnɩ-ɖʋ nɛ ɖɩɖɔkɩ ɖa-tɩ? Pɩcɛyaa se ɖɩwɛɛnɩ tisuu sɔsɔm se Yehowa kaɣ-ɖʋ sɩnʋʋ. Ɛzɩ kpayʋʋ yɔ, ɖe-tisuu pɩzɩɣ pɩsɩnɩ-ɖʋ nɛ ɖɩɖɩzɩ “kɩdɛkɛdɩm tʋ tɔʋ ñɩma miŋ ñɩna tɩŋa.” (Efɛz. 6:16) Ɛlɛ pɩtasɩnɩ tisuu lɛ, pɩpɔzʋʋ-ɖʋ nabʋyʋ ɖɔɖɔ. Pɩpɔzʋʋ-ɖʋ sɔɔlɩm. Ɛbɛ yɔɔ? Mbʋ pʋyɔɔ yɔ, sɔɔlɩm “[ɛɛmʋʋ] pana lɛɛ lɛɛ.” Pitisiɣ faaa se papaɖɩ-pʋ nɛ pɩɖɔkʋʋ pɩ-laŋɩyɛ kañatʋ lakasɩ tɩŋa taa. (1 Kɔr. 13:4-7, 13) Lɛɛlɛɛyɔ, iyele nɛ ɖɩna ɛzɩma sɔɔlɩm mbʋ ɖɩwɛnɩ Yehowa, ɖo-koobiya Krɩstʋ ñɩma nɛ halɩ ɖo-koyindinaa yɔɔ yɔ, pɩsɩɣnɩ-ɖʋ se ɖɩɖɔkɩ ɖa-tɩ alɩwaatʋ ndʋ ɛyaa paɖɩɣ-ɖʋ yɔ.

5. Yesu sɔɔlɩ ɛ-Caa nɛ pʋyɔɔ lɛ, pɩsɩnɩ-ɩ nɛ ɛla we?

⁵ Ðoo kɛdɛzaɣ ñɩna wena Yesu caɣ wezuu tɛtʋ yɔɔ yɔ a-taa, pʋcɔ nɛ e-koyindinaa kpa-ɩ se pakʋʋ-ɩ lɛ, eheyi ɛ-wayɩ tɩŋɩyaa siɣsiɣ ñɩma se: “Mɔnsɔɔlɩ Caa [pʋyɔɔ] malakɩ mbʋ ɖeyi ɖeyi Caa ɖʋ-m paɣtʋ se mala yɔ.” (Yoh. 14:31) Yesu sɔɔlɩ Yehowa, pʋyɔɔ ɛpɩzaa nɛ ɛɖɔkɩ ɛ-tɩ takɩm sɔsɔm ndɩ ndɩ taa. Sɔɔlɩm mbʋ ɖɩwɛnɩ Yehowa yɔɔ yɔ, pɩpɩzɩɣ pɩsɩnɩ-ɖʋ nɛ ɖɩla mbʋ ɖɔɖɔ.

6. Ɛzɩ Roma mba 5:3-5 yɔɔdʋʋ yɔ, alɩwaatʋ ndʋ ɛjaɖɛ paɖɩɣ Yehowa sɛyaa yɔ ɛzɩma pɩlakɩ-wɛ?

⁶ Sɔɔlɩm mbʋ Yehowa sɛyaa wɛnɩ ɛ-yɔɔ yɔ, pɩsɩɣnɩ-wɛ paa ɛzɩmtaa se pɔɖɔkɩ pa-tɩ nazɩm taa. Kɩɖaʋ nakʋyʋ yɔ: Alɩwaatʋ ndʋ Yuuda tɔm ɖɩhʋyɛ sɔsɔɖɛ taa ñɩma ɖʋ paɣtʋ apostoloowaa se peyele tɔm susuu yɔ, sɔɔlɩm mbʋ paawɛnɩ Ɛsɔ yɔɔ yɔ piseɣti-wɛ nɛ “paña Ɛsɔ ɛzɩ pa-ñʋʋdʋ yɔ, nɛ pɩtɩkɛ ɛyaa.” (Tʋma 5:29; 1 Yoh. 5:3) Sɔnɔ, sɔɔlɩm sɔsɔm mbʋ ɖo-koobiya wɛnɩ Yehowa yɔɔ yɔ, pɩsɩɣnɩ pa-taa sakɩyɛ se pɔɖɔkɩ pa-tɩ kpam alɩwaatʋ ndʋ kominawaa mba pɛwɛ ɖoŋ nɛ pɛwɛɛ kañatʋ yɔ panazɩɣ-wɛ yɔ. Alɩwaatʋ ndʋ ɛjaɖɛ paɖɩɣ-ɖʋ yɔ, ɖiiyeki se pitibi-ɖʋ yɔɔɔ ɛlɛ ɖa-taa lakɩ leleŋ.—Tʋma 5:41; kalɩ Roma mba 5:3-5.

7. Alɩwaatʋ ndʋ ɖɔ-hɔʋ taa ñɩma kaɖɩɣnɩ-ɖʋ yɔ, ɛzɩma pɩpɔzʋʋ se ɖɩla?

⁷ Alɩwaatʋ ndʋ ɖɔ-hɔʋ taa ñɩma maɣmaɣ kaɖɩɣnɩ-ɖʋ yɔ, pɩpɩzɩɣ nɛ pɩwɛɛ-ɖʋ kaɖɛ siŋŋ se ɖɩɖɔkɩ ɖa-tɩ. Ðɔ-hɔʋ taa ñɩma kɔŋ nɛ peɖiɣzina se ɖɩsɔɔlaa se ɖɩkpɛlɩkɩ Yehowa yɔɔ tɔm lɛ, pa-taa nabɛyɛ pɩzɩɣ nɛ pamaɣzɩ se pɛwɛɛ nɛ pepeɣziɣ-ɖʋ. Lalaa pɩzɩɣ nɛ pamaɣzɩ se ɖa-ñʋʋ taa cɔwa. (Kpaɣ-tʋ nɛ ŋmaɣzɩnɩ Maarkɩ 3:21.) Halɩ papɩzɩɣ nɛ pakaɖɩnɩ-ɖʋ siŋŋ. Alɩwaatʋ ndʋ pakaɖɩɣnɩ-ɖʋ yɔ, pɩtɩpɔzɩ se pɩɖɩɣzɩ-ɖʋ. Yesu kaayɔɔdaa se: “Ɛyʋ koyindinaa kaɣ kɛʋ ɛ-maɣmaɣ ɛ-ɖɩɣa taa mba.” (Mat. 10:36) Toovenim taa lɛ, paa lɩmaɣza wena ɖɔ-hɔʋ taa mba ɩtɩɩwɛnɩ ɖɔ-yɔɔ yɔ, ɖɩɩkpakɩɣ-wɛ ɛzɩ ɖo-koyindinaa yɔ. Sɔɔlɩm mbʋ ɖɩwɛnɩ Yehowa yɔɔ yɔ pɩwɛɣ nɛ pɩpaɣlɩɣ lɛ, sɔɔlɩm mbʋ ɖɩwɛnɩ ɛyaa yɔɔ yɔ pɩpaɣlɩɣ ɖɔɖɔ. (Mat. 22:37-39) Ɛlɛ, ɖɩɩkaɣ yebu Yehowa paɣtʋ nɛ ɛ-paɣtʋ kila wena awɛ Bibl taa yɔ a-yɔɔ ɖɔm kpa se pɩsa nɛ ɖɔ-tɔm kɛdɩnɩ ɛyaa.

8-9. Ɛbɛ sɩnɩ koobu halɩñɩnʋ nɔɔyʋ nɛ ɛɖɔkɩ ɛ-tɩ kpam paa pakaɖɩnɩ-ɩ siŋŋ yɔ?

⁸ Georgina weyi ɛ-tɔm ɖɩyɔɔdaa nɛ pɩɖɛɛ yɔ, ɛpɩzaa nɛ ɛɖɔkɩ ɛ-tɩ kpam paa e-ɖoo ɛkaɖɩnɩ-ɩ yɔ. Georgina yɔɔdaa se: “Ma nɛ mon-ɖoo  Yehowa Aseɣɖe Tɩnaa paɣzɩ Bibl kpɛlɩkɩnʋʋ. Ɛlɛ, pɩlabɩ fenasɩ loɖo nɛ mɔnsɔɔlɩ se manpaɣzɩɣ wobu kediɣzisi lɛ, mon-ɖoo paɣzɩ-m kaɖɩnʋʋ. Mɔnkɔm nɛ menɖiɣzina se ɛ nɛ tisuu yebiyaa pɔyɔɔdʋʋ, nɛ ɛlakɩnɩ tʋmɩyɛ pa-lɩmaɣza alɩwaatʋ ndʋ ɛyɔɔdʋʋnɩ-m yɔ. Ɛtʋwaɣ-m ɖɔɖɔ, ɛhɔŋ mɔ-ñɔsɩ, ɛɖɩkɩ men-feziŋ nɛ ɛkpakɩɣ man-takayɩsɩ nɛ ɛlɔʋ. Mɔnkɔm nɛ mɛwɛɛnɩ pɩnzɩ 15 lɛ, maha man-tɩ nɛ pamɩyɩsɩ-m lɩm. Mon-ɖoo kaañaɣ pana se ɛɖɩɣ-m nʋmɔʋ nɛ meyele Yehowa sɛʋ pʋyɔɔ ewoni-m nɛ ɛsɩɩ man-ɖaɣʋnaa nabɛyɛ cɔlɔ ɖɩɣa nakɛyɛ taa. Pa-taa sakɩyɛ ñɔwaɣ tabakʋʋyaɣ, nɛ palakɩ lakasɩ kɩdɛkɛdɩsɩ lɛɛsɩ. Pɩwɛ kaɖɛ se ɛyʋ ɛɖɔkɩ ɛ-tɩ alɩwaatʋ ndʋ pakaɖɩɣnɩ-ɩ yɔ, kɔzɩ kɔzɩ ye ɛyʋ weyi pɩwɛɛ se ɛsɔɔlɩ-ŋ nɛ ɛcɔnɩ ñɔ-yɔɔ yɔ ɛnʋ ɛkaɖɩɣnɩ-ŋ yɔ.”

⁹ Ɛbɛ sɩnɩ Georgina nɛ ɛɖɔkɩ ɛ-tɩ? Ɛyɔɔdaa se: “Kɩyakʋ ŋgʋ mon-ɖoo paɣzɩ-m kaɖɩnʋʋ yɔ, maatɛm kalʋʋ Bibl tɩŋa pitileɖita. Alɩwaatʋ ndʋ tɩ-taa, man-taa kaatɛm siŋŋ se malɩ toovenim yɔɔ, nɛ taabalɩyɛ kɩbanɖɛ kaawɛ ma nɛ Yehowa ɖɛ-hɛkʋ taa. Mantɩmaɣnɩ-ɩ ɖoŋ ɖoŋ, nɛ ewelisaɣni-m. Maawɛ ɖɩɣa ŋga ka-taa mon-ɖoo woni-m nɛ ɛsɩɩ yɔ ka-taa lɛ, koobu halɩñɩnʋ nɔɔyʋ yaɣaɣ-m nɛ mowoki ɛ-tɛ nɛ ɖɩkpɛndɩɣ nɛ ɖɩkpɛlɩkɩɣ Bibl. Alɩwaatʋ ndʋ tɩ-taa, koobiya kpazaɣ-m ɖoŋ Kewiyaɣ Kpaaŋ taa. Paakpaɣ-m ɛzɩ pɔ-hɔʋ taa tʋ yɔ. Mana kpayɩ kpayɩ se Yehowa wɛ ɖoŋ nɛ pɩkɩlɩ mba pakaɖɩɣnɩ-ɖʋ yɔ, paa ɛyaa mba patɩɩkɛnaa yɔ.”

10. Ða-taa pɩzɩɣ nɛ pɩtɛ se ɛbɛ ɖɛ-Ɛsɔ Yehowa kaɣ labʋ paa ɛzɩmtaa?

¹⁰ Apostoloo Pɔɔlɩ mawa se nabʋyʋ ɛɛpɩzɩɣ nɛ “pɩyasɩ-ɖʋ nɛ Ɛsɔ sɔɔlɩm mbʋ pɩwɛ ɖa-Kɩbaɣlʋ Krɩstʋ Yesu taa yɔ.” (Roma 8:38, 39) Paa pɩpɩzɩɣ nɛ pɩpɔzɩ se ɖɩtɔɔ kʋñɔŋ alɩwaatʋ natʋyʋ yɔ, Yehowa kaɣ wɛʋ ɖɔ-cɔlɔ paa ɛzɩmtaa se ɛhɛzɩ ɖa-laŋɩyɛ nɛ ɛkpazɩ-ɖʋ ɖoŋ. Nɛ ɛzɩ Georgina kɩɖaʋ wɩlʋʋ yɔ, Yehowa tɩŋɩɣnɩ ɖɔɖɔ ɛgbɛyɛ taa koobiya yɔɔ nɛ ɛsɩɣnɩ-ɖʋ.

11. Sɔɔlɩm mbʋ pɩ-tɔm Yesu yɔɔdɩ Yohanɛɛsɩ 15:12, 13 taa yɔ, ɛzɩma pɩsɩɣnɩ ɛ-tɔmkpɛlɩkɩyaa? Ha kɩɖaʋ nakʋyʋ.

¹¹ Ðoo kɛdɛzaɣ ñɩna wena Yesu caɣ wezuu tɛtʋ yɔɔ yɔ a-taa, ɛtɔzɩ ɛ-tɔmkpɛlɩkɩyaa se pɔsɔɔlɩ ɖama. (Kalɩ Yohanɛɛsɩ 15:12, 13.) Eeɖiɣzinaa se ye pɔsɔɔlɩ ɖama nɛ pɛwɛɛnɩ tɩ laʋ lɩmaɣza yɔ, pɩkaɣ-wɛ sɩnʋʋ nɛ nɔɔ kʋɖʋmaɣ wɛɛ pɛ-hɛkʋ taa; nɛ pɩkaɣ-wɛ sɩnʋʋ ɖɔɖɔ nɛ pɔɖɔkɩ pa-tɩ alɩwaatʋ ndʋ ɛjaɖɛ paɖɩɣ-wɛ  yɔ. Iyele nɛ ɖɩna Tesalooniiki ɛgbɛyɛ kɩɖaʋ. Kpaɣnɩ alɩwaatʋ ndʋ ɛgbɛyɛ nɖɩ ɖɩñɔwa yɔ, panazɩ ɖɩ-taa ñɩma siŋŋ. Paa mbʋ yɔ koobiya mba paawɛ peeɖe yɔ, pɔɖɔkɩ pa-cɩŋgɩlɩm wɛtʋ nɛ patilesi sɔɔlɩm mbʋ paawɛna yɔ, nɛ pɛkɛnɩ-ɖʋ kɩɖaʋ. (1 Tes. 1:3, 6, 7) Pɔɔlɩ kaaseɣti-wɛ se powolo pɩ-yɔɔ nɛ pawɩlɩɣ ɖama sɔɔlɩm, nɛ halɩ eeseɣti-wɛ se pala “mbʋ nɛ pɩkɩlɩ.” (1 Tes. 4:9, 10) Sɔɔlɩm kaɣ-wɛ seɣtuu se pɛhɛzɩ mba pa-laŋa wɛɛkaa yɔ pa-laŋa nɛ pasɩnɩ ajamaa. (1 Tes. 5:14) Pɔɖɔm Pɔɔlɩ lɔŋ tasʋʋ yɔɔ mbʋ pʋyɔɔ yɔ, ɛmaɣaɣ ɛ-takayaɣ naalɛ ñɩŋga pɩnaɣ kʋɖʋmaɣ wayɩ mbʋ yɔ lɛ, ɛyɔɔdaa se: “Sɔɔlɩm mbʋ mɩ-tɩŋa ɩsɔɔlɩnɩ ɖama yɔ, pɩwɛɛ nɛ pɩpaɣlɩɣ.” (2 Tes. 1:3-5) Sɔɔlɩm mbʋ paawɛnɩ ɖama yɔɔ yɔ, pɩsɩnɩ-wɛ nɛ pɔɖɔkɩ pa-tɩ nazɩm taa.

12. Alɩwaatʋ ndʋ you labɩ ɛjaɖɛ naɖɩyɛ taa yɔ, ɛzɩma koobiya mba paawɛ peeɖe yɔ pawɩlɩ ɖama sɔɔlɩm?

¹² Iyele nɛ ɖɩna Danylo weyi ɛ-tɔm ɖɩyɔɔdaa nɛ pɩɖɛɛ yɔ nɛ ɛ-halʋ pa-kɩɖaʋ. Alɩwaatʋ ndʋ palakaɣ you nakʋyʋ pɛ-ɛjaɖɛ taa yɔ, paawobi pɩ-yɔɔ nɛ powoki kediɣzisi, palakɩ po-ɖoŋ ɖeɖe nɛ posusuu tɔm, nɛ pa nɛ po-koobiya patayɩɣ tɔɔnaɣ ŋga paawɛna yɔ. Kɩyakʋ nakʋyʋ lɛ, sɔɔjanaa nabɛyɛ sʋʋ Danylo ɖɩɣa taa, paaɖɔkɩ malɩfanaa. Danylo yɔɔdaa se: “Peheyi-m se mɔyɔɔdɩ se maatasɩɣ kɛʋ Aseɣɖe Tʋ. Menkizaa lɛ, pamabɩ-m nɛ halɩ pañɩnaɣ se pɔtɔ-m malɩfa, pɔtɔ-kʋ nɛ kɩɖɛɛnɩ ma-ñʋʋ yɔɔ. Pʋcɔ nɛ pɛɖɛɛ lɛ, peheyi-m se papɩsɩɣ lɛ pakpaɣ ma-halʋ nɛ ɖoŋ nɛ pasʋʋnɩ-ɩ. Ɛlɛ, ɖo-koobiya la lɛɛ lɛɛ nɛ pasʋzɩ-ɖʋ suluku se ɖiwolo tɛtʋ lɛɛtʋ taa. Maakaɣ sɔʋ sɔɔlɩm mbʋ koobiya kʋsɔɔlaa mba pawɩlɩ-ɖʋ yɔ pɩ-yɔɔ kpa. Nɛ ɖɩtalɩ tɛtʋ lɛɛtʋ ndʋ tɩ-taa lɛ, koobiya mba pɛwɛ peeɖe yɔ, paha-ɖʋ tɔɔnaɣ, pasɩnɩ-m nɛ mehiɣ tʋmɩyɛ nɛ ɖɩzʋyɛ! Piyeba nɛ pʋwayɩ, ɖɩpɩzɩ ɖɩmʋ Aseɣɖe Tɩnaa lalaa mba palɩnɩ ɖenɖe you lakaɣ yɔ nɛ pɔkɔɔ yɔ.” Kɩɖaŋ ɛzɩ ɩnɛ yɔ, ɩwɩlɩɣ se sɔɔlɩm mbʋ ɖɩwɛnɩ ɖama yɔɔ yɔ, pɩpɩzɩɣ pɩsɩnɩ-ɖʋ nɛ ɖɩɖɔkɩ ɖa-tɩ alɩwaatʋ ndʋ ɛyaa paɖɩɣ-ɖʋ yɔ.

13. Ɛzɩma fezuu kiɖeɖeu sɩɣnɩ-ɖʋ se ɖɩɖɔkɩ ɖa-tɩ Yehowa sɛtʋ taa paa ɛyaa ɩkaɖɩɣnɩ-ɖʋ yɔ?

¹³ Yesu heyi ɛ-wayɩ tɩŋɩyaa se pɔsɔɔlɩ po-koyindinaa. (Mat. 5:44, 45) Ɛzɩ pɩ-labʋ wɛ kɛlɛʋ na? Aayɩ. Ɛlɛ, Ɛsɔ fezuu kiɖeɖeu pɩzɩɣ kɩsɩnɩ-ɖʋ nɛ ɖɩla mbʋ. Piye nɖɩ Ɛsɔ fezuu lʋlʋʋ yɔ ɖɩ-hɔɔlɩŋ nɩɩyɩ lɛ sɔɔlɩm, suuɖu, camɩyɛ lakasɩ, hɛɛɛ wɛtʋ nɛ tɩ ɖɔkʋʋ. (Gal. 5:22, 23) Wɛtʋ ndʋ tɩsɩɣnɩ-ɖʋ se ɖɩɖɔkɩ ɖa-tɩ alɩwaatʋ ndʋ ɛyaa paɖɩɣ-ɖʋ yɔ. Ɛyaa sakɩyɛ yebi-ɖʋ kaɖɩnʋʋ mbʋ pʋyɔɔ yɔ, pɔkɔm nɛ pana  se pa-walaa, pa-halaa, pe-piya, yaa pɔ-cɔlɔ ñɩma wɛnɩ wɛtʋ ndʋ. Nɛ halɩ pa-taa sakɩyɛ pɩsɩ ɖo-koobiya kʋsɔɔlaa. Pʋyɔɔ lɛ, ye nabɛyɛ ɩpaɖɩɣ-ŋ mbʋ pʋyɔɔ yɔ ŋsɛɣ Yehowa nɛ pɩwɛ-ŋ kaɖɛ se ŋsɔɔlɩ-wɛ yɔ, tɩmɩ nɛ ŋpɔzɩ fezuu kiɖeɖeu. (Luka 11:13) Nɛ ña-taa ɛtɛ se Ɛsɔ nʋmɔʋ kpaɖɩnɩ ɖeu paa ɛzɩmtaa.—Adu. 3:5-7.

14-15. Ɛzɩma Roma mba 12:17-21 taa tɔm sɩnɩ Yasmeen nɛ ɛwɩlɩ sɔɔlɩm ɛ-walʋ paa ɛlɛ ɛkaɖɩnɩ-ɩ siŋŋ yɔ?

¹⁴ Iyele nɛ ɖɩyɔɔdɩ koobu halɩñɩnʋ Yasmeen kɩɖaʋ tɔm. Alɩwaatʋ ndʋ ɛpɩsɩ Yehowa Aseɣɖe Tʋ yɔ, ɛ-walʋ maɣzaɣ se pepeɣzi-i nɛ ɛñaɣ pana se ɛɖɩɣ-ɩ nʋmɔʋ nɛ ɛtaasɛɛ Ɛsɔ. Ɛtʋwaɣ-ɩ nɛ eeseɣti hɔʋ taa mba, Ɛsɔ sɛtʋ ɛgbɛyɛ naɖɩyɛ ñʋʋdʋ, nɛ tɩʋ nɔɔyʋ se paɖʋ-ɩ sɔɔndʋ nɛ pakʋ ɛ-tɔm se ɛwɛɛ nɛ ɛtayɩɣ ɛ-hɔʋ taa ñɩma hɛkʋ taa. Halɩ kɩyakʋ nakʋyʋ, ɛ-walʋ wobi ɛgbɛyɛ taa kediɣzaɣ nakɛyɛ taa nɛ ɛtʋʋ koobiya. Yasmeen wiɣaɣ ɖoŋ ɖoŋ mbʋ pʋyɔɔ yɔ, palakaɣ-ɩ kañatʋ lakasɩ.

¹⁵ Alɩwaatʋ ndʋ Yasmeen wokaɣ Kewiyaɣ Kpaaŋ taa yɔ, koobiya hɛzaɣ ɛ-laŋɩyɛ nɛ pakpazɩɣ-ɩ ɖoŋ. Ɛgbɛyɛ taa ɛzʋtʋyaa seɣti-i se ɛɖɔ tɔm ndʋ tɩwɛ Roma mba 12:17-21 taa yɔ tɩ-yɔɔ. (Kalɩ Roma mba 12:17-21.) Yasmeen yɔɔdaa se: “Pɩɩwɛ-m kaɖɛ se mɔnɖɔ tɔm ndʋ tɩ-yɔɔ. Ɛlɛ, mɔnpɔzɩ Yehowa se ɛsɩnɩ-m, nɛ mañaɣ pana nɛ mɔnɖɔ tɔm ndʋ Bibl yɔɔdʋʋ yɔ tɩ-yɔɔ. Pʋyɔɔ lɛ, alɩwaatʋ ndʋ ma-walʋ naɣ faɖaɖa nɛ ɛlɔ kʋzɔɔtʋ wondu nemeɣa tɛɛ yɔ, mañakɩ pana nɛ mahazɩɣ se pɩwɛɛ cɩɖɩ cɩɖɩ. Alɩwaatʋ ndʋ ɛtʋʋ-m yɔ, moncosuu-i nɛ nɔɔ kɩbaŋa. Nɛ alɩwaatʋ ndʋ ɛhɩnaɣ kʋdɔŋ yɔ mɔncɔŋnaɣ ɛ-yɔɔ.”

16-17. Lɔŋ weyi Yasmeen kɩɖaʋ kpɛlɩkɩɣ-ŋ?

¹⁶ Yasmeen ñaɣ pana nɛ ɛwɩlɩ ɛ-walʋ sɔɔlɩm lɛ, ehiɣ wazasɩ. Ɛyɔɔdaa se: “Ma-walʋ paɣzɩ-m taʋ liu nɛ pɩkpaɖɩɣ mbʋ pʋyɔɔ yɔ, ɛnawa se paa ɛzɩmtaa lɛ, mɔyɔɔdʋʋ toovenim. Ɛpaɣzɩ-m welisinuu nɛ ñamtʋ alɩwaatʋ ndʋ ma nɛ ɩ ɖɩyɔɔdʋʋ Ɛsɔ sɛtʋ tɔm yɔ, nɛ etisaa se eyeki nɛ laŋhɛzɩyɛ wɛɛ ɖɩɣa taa. Lɛɛlɛɛyɔ, eseɣtiɣ-m se mowolo ɛgbɛyɛ taa kediɣzisi. Ma nɛ ma-walʋ ɖa-taabalɩyɛ cɛyɩsaa nɛ pɩkpaɖɩ nɛ laŋhɛzɩyɛ wɛ ɖɔ-hɔʋ taa. Mantaɣ liu se ma-walʋ kaɣ tisuu nɛ ɛmʋ toovenim nɛ ɛkpɛndɩ mɔ-yɔɔ nɛ ɖɩsɛɛ Yehowa.”

¹⁷ Yasmeen kɩɖaʋ wɩlɩɣ se sɔɔlɩm “[katɩɣ] pɩtɩŋa, . . . pɩwɛnɩ lidaʋ pɩtɩŋa pɩ-yɔɔ, pɩɖɔkʋʋ pɩ-laŋɩyɛ pɩtɩŋa pɩ-taa.” (1 Kɔr. 13:4, 7) Paɖɩyɛ pɩzɩɣ nɛ ɖɩwɛɛ ɖoŋ siŋŋ nɛ halɩ pɩha ɛyʋ laŋwɛɛkɩyɛ, ɛlɛ sɔɔlɩm kpaɖɩ ɖoŋ. Ye ɖɩwɩlɩɣ lalaa sɔɔlɩm yɔ, papɩzɩɣ nɛ peyele-ɖʋ kaɖɩnʋʋ. Nɛ piyeki se Yehowa taa ɛla leleŋ. Ɛlɛ, paa mba pakaɖɩɣnɩ-ɖʋ yɔ powobi pɩ-yɔɔ nɛ  papaɖɩɣ-ɖʋ yɔ, ɖɩpɩzɩɣ ɖiwolo pɩ-yɔɔ nɛ ɖɩwɛɛ taa leleŋ taa. Ɛzɩma tɩyɛ?

18. Ɛbɛ yɔɔ ɖa-taa pɩzɩɣ nɛ pɩla leleŋ alɩwaatʋ ndʋ ɛyaa paɖɩɣ-ɖʋ yɔ?

¹⁸ Yesu yɔɔdaa se: “Ɩkɛ koboyaɣ tɩnaa alɩwaatʋ ndʋ ɛyaa paɖɩɣ-mɩ” yɔ. (Luka 6:22) Pɩtɩkɛ ɖalɩzɩɣna se ɛyaa ɩpaɖɩ-ɖʋ. Alɩwaatʋ ndʋ ɛyaa paɖɩɣ-ɖʋ ɖe-tisuu yɔɔ yɔ, pɩɩkɛdɩɣnɩ-ɖʋ. Ye mbʋ, ɛbɛ yɔɔ ɖa-taa pɩzɩɣ nɛ pɩla leleŋ alɩwaatʋ ndʋ ɛyaa paɖɩɣ-ɖʋ yɔ? Iyele nɛ ɖɩna lɩmaɣza naadozo wena a-yɔɔ ɖa-taa pɩzɩɣ nɛ pɩla leleŋ yɔ. Kajalaɣ lɛ, alɩwaatʋ ndʋ ɖɩɖɔkʋʋ ɖa-tɩ yɔ ɖɔ-tɔm kɛdɩɣnɩ Ɛsɔ. (1 Pɩy. 4:13, 14) Nabʋlɛ lɛ, ɖe-tisuu mʋʋ ñɩm nɛ pɩkpaɣ ɖoŋ nɛ pɩkɩlɩ. (1 Pɩy. 1:7) Nɛ nabudozo lɛ, ɖɩkaɣ hiɣu tamtam wezuu; nɛ pɩkɛ kɩhɛyʋʋ ŋgʋ kɩmʋ ñɩm siŋŋ yɔ.—Roma 2:6, 7.

19. Ɛbɛ yɔɔ apostoloowaa taa kaalabɩ leleŋ alɩwaatʋ ndʋ pamabɩ-wɛ nɛ pɩtɛ yɔ?

¹⁹ Pefezi Yesu nɛ pitileɖi lɛ, apostoloowaa hiɣ taa leleŋ weyi ɩ-tɔm ɛɛyɔɔdaa yɔ. Pamabɩ-wɛ nɛ paɖʋ-wɛ paɣtʋ se pataatasɩ tɔm susuu nɛ pɩtɛ lɛ, pa-taa kaalabɩ leleŋ. Ɛbɛ yɔɔ? “Mbʋ pʋyɔɔ yɔ pakpaɣ-wɛ se pamʋnaa se paɖʋ-wɛ fɛyɛ Yesu hɩɖɛ yɔɔ.” (Tʋma 5:40-42) Sɔɔlɩm mbʋ paawɛnɩ pa-ñʋʋdʋ yɔɔ yɔ, pɩɩwɛ ɖoŋ siŋŋ nɛ pɩkpaɖɩ sɔɔndʋ ndʋ peseɣaɣ po-koyindinaa yɔ. Nɛ pawɩlaa se pɛwɛnɩ sɔɔlɩm, pʋyɔɔ “powokaɣ pɩ-yɔɔ” nɛ posusuu tɔm kɩbandʋ. Sɔnɔ, ɖo-koobiya sakɩyɛ woki pɩ-yɔɔ nɛ pɔɖɔkʋʋ pe-siɣsiɣ wɛtʋ Yehowa sɛtʋ taa, paa pakatɩɣ tɩlasɩ yɔ. Panawa se Yehowa ɛɛkaɣ sɔʋ pa-tʋmɩyɛ nɛ sɔɔlɩm mbʋ pawɩlɩ ɛ-hɩɖɛ yɔɔ yɔ pɩ-yɔɔ.—Ebr. 6:10.

20. Ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?

²⁰ Ɛjaɖɛ kaɣ wobu pɩ-yɔɔ nɛ ɖɩpaɖɩɣ-ɖʋ pɩkɔɔ pɩsɩɩnɩ ɛjaɖɛ ɖɩnɛ ɖɩ-tɛm wiye. (Yoh. 15:19) Ɛlɛ, pɩtɩpɔzɩ se sɔɔndʋ ɛkpa-ɖʋ. Ɛzɩ ɖɩkɔŋʋʋ naʋ tɔm ñʋʋ ŋgʋ kɩkɔŋ yɔ kɩ-taa yɔ, Yehowa kaɣ ɛ-sɛyaa siɣsiɣ ñɩma “kpazʋʋ ɖoŋ nɛ ehuuzi [pɔ-yɔɔ].” (2 Tes. 3:3) Pʋyɔɔ lɛ, iyele nɛ ɖiwolo pɩ-yɔɔ nɛ ɖɩsɔɔlʋʋ Yehowa, ɖo-koobiya Krɩstʋ ñɩma nɛ halɩ pɩkpɛndɩnɩ ɖo-koyindinaa. Ye ɖɩɖɔŋ lɔŋ tasʋʋ mbʋ pɩ-yɔɔ yɔ, pɩkaɣ yebu nɛ nɔɔ kʋɖʋmaɣ wɛɛ ɖɛ-hɛkʋ taa nɛ ɖɩwɛɛ ɖoŋ fezuu taa, nɛ pɩkaɣ yebu ɖɔɖɔ nɛ Yehowa hɩɖɛ sɛɛ. Nɛ ɖɩkaɣ wɩlʋʋ se sɔɔlɩm wɛ ɖoŋ siŋŋ nɛ pɩkpaɖɩ paɖɩyɛ.