1. Sima sta na Mateus 24:9, pamodi ki nu ka debe fika spantadu óras ki mundu ta odia-nu?

JEOVÁ kria-nu pa nu ama i pa nu resebe amor. Pur isu, óras ki algen ta odia-nu nu ta xinti maguadu i talvês ti ku medu. Pur izénplu, un irman ki ta mora na Europa, ki txoma Georgina, fla: “Kantu N tinha 14 anu, nha mai kumesa ta odia-m pamodi N staba ta sirbi Jeová. N xinti txeu tristi i mi sô. I N kumesa ta pensa ma talvês N ka éra un bon algen.” * Un irmon ki txoma Danylo skrebe: “Kantu trópas sota-m, insulta-m i es amiasa-m pamodi ami é un Tistimunha di Jeová, N xinti medu i rabaxadu.” Kel tipu di ódiu li ta magua-nu. Má nu ka debe fika spantadu. Jizus dja flaba ma otus algen ta odiaba nos. — Lé Mateus 24:9.

2-3. Pamodi ki sigidoris di Jizus ta odiadu?

² Mundu ta ôdia sigidoris di Jizus. Pamodi? Pamodi sima Jizus, nu ‘ka ta faze párti di mundu’. (João 15:17-19) Nbóra nu ta ruspeta govérnus di ómis, nu ka ta adora-s i nen nu ka ta adora ses sinblu. Nu ta adora sô Jeová. Nu ta apoia direitu ki Deus ten di governa tudu algen, ki é un direitu ki Satanás i se ‘disendentis’ ta fla ma el ka ten. (Gén. 3:1-5, 15) Nu ta prega ma Reinu di Deus é úniku speransa pa tudu algen i ma ka ta dura Reinu ta ben kaba ku tudu kes ki é kóntra el. (Dan. 2:44; Apo. 19:19-21) Kel mensaji li é bon notísia pa kes algen ki é mansu, má é un mau notísia pa kes algen ki é mau. — Sal. 37:10, 11.

³ Nu ta odiadu tanbê pamodi nu ta vive di akordu ku kes  lei di Deus ki é justu. Óras ki nu ta konpara kel ki Deus ta fla ma é dretu ô mariadu ku kel ki mundu ta fla ma é dretu ô mariadu, nu ta odja diferénsa klaru. Pur izénplu, na ténpu antigu Deus distrui Sudoma ku Gumora pamodi kes algen di la ta fazeba kuzas ki Deus ta ôdia i konportamentu seksual mariadu. (Judas 7) Má oji mundu ta insentiva pesoas pa faze kes kuza li. Dja ki nos nu ta sigi kel ki Bíblia ta fla ma é dretu, txeu algen ta faze-nu trósa i es ta fla ma nos é kóntra kes algen ki ta faze kuzas ki Bíblia ta kondena. — 1 Ped. 4:3, 4.

4. Ki kualidadis ta da-nu forsa pa nu aguenta ódiu?

⁴ Kuzê ki pode djuda-nu aguenta firmi óras ki algen ta odia-nu i insulta-nu? Nu meste ten un fé fórti ma Jeová ta djuda-nu. Fé é sima un skudu ki ta djuda-nu ‘paga tudu flexas di lumi di kel Malvadu.’ (Efé. 6:16) Má nu meste ten más ki sô fé. Tanbê nu meste ten amor. Pamodi? Pamodi amor ‘ka ta xatia faxi.’ El ta aguenta tudu kes kuza ki ta magua-nu. (1 Cor. 13:4-7, 13) Nton, gósi nu sta ben odja modi ki amor pa Jeová, amor di nos irmon i ti mésmu amor pa nos inimigus pode djuda-nu aguenta ódiu.

5. Modi ki amor ki Jizus ta xintiba pa se Pai da-l forsa?

⁵ Un poku antis di se inimigus mata-l, Jizus fla se sigidoris fiel: ‘N ta ama nha Pai, [pur isu] N ta faze tudu sima nha Pai manda-m pa N faze.’ (João 14:31) Amor ki Jizus ta xintiba pa Jeová, da-l forsa ki el mesteba pa el aguenta kes prubléma ki el pasa pa el. Nos amor pa Jeová, pode djuda-nu faze mésmu kuza.

6. Sima sta na Romanos 5:3-5, modi ki sérvus di Jeová ta xinti óras ki mundu ta odia-s?

⁶ Amor pa Jeová sénpri djuda se sérvus aguenta pirsigison. Pur izénplu, kel Tribunal más altu di judeus manda apóstlus pa para di prega. Má kes apóstlu tinha txeu amor pa Deus. Pur isu, es disidi ‘obi ku Deus antis di es obi ku ómis, pamodi é El ki ta manda.’ (Atos 5:29; 1 João 5:3) Mésmu kuza ta kontise ku nos irmons oji. Txeu di es sta ta sufri opozison di govérnus ki ten txeu puder i ki é mau. Má kel grandi amor ki nos irmons ten pa Jeová, sta da-s forsa pa es aguenta firmi. Pur isu, óras ki mundu ta odia-nu, nu ka ta fika dizanimadu, má nu ta atxa ma é un priviléjiu. — Atos 5:41; lé Romanos 5:3-5.

7. Modi ki nu debe reaji óras ki algen di nos família ta fika kóntra nos?

⁷ Talvês un di kes próva más difísil di aguenta, é óras ki algen di nos família ta fika kóntra nos. Óras ki es repara ma nu krê prende verdadi sobri Jeová, alguns algen di nos família pode atxa ma nu sta ta ser nganadu. Otus pode atxa ma nu sta dodu. (Konpara ku Marcos 3:21.) Es pode ti fika kóntra nos i aji ku violénsia. Kel tipu di reason li ka debe spanta-nu. Jizus fla: ‘Inimigus di un ómi ta ser kes algen di se própi kaza.’ (Mat. 10:36) Ka ta nporta modi ki nos famílias trata-nu, nunka nu ka ta fika kóntra es. Má, sima nos amor pa Jeová ta ba ta fika más fórti tanbê nos amor pa otus algen debe fika más fórti. (Mat. 22:37-39) Má nunka nu ka ta para di obi ku leis i prinsípius di Bíblia sô pa agrada otus algen.

8-9. Kuzê ki djuda un irman aguenta firmi sikrê ku txeu opozison?

⁸ Georgina, ki dja nu papiaba di el antis, konsigi aguenta firmi sikrê se mai  kontinua ta faze-l opozison. Georgina konta: “Mi ku nha mai nu kumesa ta studa Bíblia djuntu ku Tistimunhas di Jeová. Má 6 mês dipôs, kantu N krê sistiba runion, nha mai kumesa ta fika kóntra mi. N diskubri ma el staba ta lé informasons di kes algen ki é kóntra Tistimunhas di Jeová. I el ta uzaba ses ideias óras ki el ta papiaba ku mi. Tanbê el ta insultaba mi, el ta puxaba nha kabélu, el ta fogaba mi i el ta botaba nhas publikason. Kantu N faze 15 anu, N batiza. Nha mai tenta inpidi-m di sirbi Jeová. Pur isu, el pô-m na un kaza ki ta podu kes adulesenti rebéldi. La, N tevi ki vive na meiu di jóvens ki ta uzaba dróga i ki ta fazeba krimi. Pode ser txeu difísil lida ku opozison prinsipalmenti óras ki el ta ben di algen ki debe ama-u i kuida di bo.”

⁹ Modi ki Georgina lida ku kel situason? El fla: “Na kel dia ki nha mai fika kóntra mi, dja N tirminaba di lé Bíblia interu. N ka tinha ninhun dúvida ma dja N atxaba verdadi i N sta xintiba txeu amigu di Jeová. Sénpri N ta fazeba orason i el ta obiba mi. Na kel ténpu ki N staba ta mora na kel kaza pa adulesenti, un irman ta kustuma konvidaba mi pa se kaza pa nu ba studa Bíblia djuntu. Duránti tudu kel ténpu, irmons di kongregason da-m txeu forsa. N ta xintiba ma N ta fazeba párti di ses família. I N konsigi odja klaru ma Jeová é más fórti ki kalker algen ki fika kóntra nos.

10. Di kuzê ki nu ten sertéza ma Jeová ta faze?

¹⁰ Apóstlu Polu skrebe ma nada ‘ka ta konsigi sipara-nu di amor di Deus, ki sta na Kristu Jizus, nos Sinhor.’ (Rom. 8:38, 39) Mésmu ki dja nu ten algun ténpu ta sufri, nu pode ten sertéza ma Jeová sénpri ta sta ku nos i el ta da-nu forsa i konsolu ki nu meste. I sima spiriénsa di Georgina ta mostra, Jeová tanbê ta uza nos irmons ku irmans pa djuda-nu.

11. Modi ki kel amor ki Jizus pâpia di el na João 15:12, 13, pode djuda se disiplus? Da un izénplu.

¹¹ Na kel noti antis di Jizus móre, el fla se disiplus ma es devia amaba kunpanheru. (Lé João 15:12, 13.) El sabia ma kel tipu di amor li ta djudaba es kontinua unidu i aguenta ódiu di mundu. Odja izénplu di kongregason na Tesalónika. Désdi kantu kel kongregason formadu, irmons di la sénpri ta sufreba pirsigison. Má simé, es  bira izénplu di lialdadi i amor. (1 Tes. 1:3, 6, 7) Polu insentiva irmons di Tesalónika pa es mostra amor i es devia fazeba kel-li ‘kada bês más.’ (1 Tes. 4:9, 10) Amor ta poba es ta konsola kes diprimidu i ta djuda kes fraku. (1 Tes. 5:14) Kes irmon di Tesalónika sigi kes orientason di apóstlu Polu. Na se sugundu karta ki el skrebe un anu dipôs, Polu fla-s: ‘Amor ki tudu nhos ten pa kunpanheru, sta ta omenta.’ (2 Tes. 1:3-5) Amor di kes irmon na Tesalónika djuda-s aguenta kes difikuldadi i kes pirsigison.

12. Duránti un ténpu di géra, modi ki nos irmons na un país mostra amor pa kunpanheru?

¹² Odja spiriénsa di Danylo ki dja nu papiaba di el antis i di se mudjer. Kontise un géra na kel sidadi ki es ta viveba. Má simé, Danylo ku se mudjer kontinua ta sisti runion i ta prega di midjór manera ki es ta podeba i ta dividiba ses kumida ku otus irmon. Un dia, trópas armadu bai na Danylo. El konta: “Kes trópa iziji pa N nega nha fé. Má, N nega faze kel-li. Pur isu, es sota-m i es finji ma es sta ba daba mi tiru, i es bira ta da tiru pa riba nha kabésa. Antis di es bai, es amiasa ma es ta torna binha i ma es ta violaba nha mudjer. Má irmons djuda-nu faxi i es pô-nu na un konboiu i nu bai pa otu sidadi. Nunka N ka ta skese di amor di kes irmon ki nu krê txeu. Kantu nu txiga na kel novu sidadi, irmons di la da-nu kumida i es djuda-nu atxa un trabadju i un kaza. Pur isu, nu konsigi djuda otus irmon ki tanbê staba ta fuji di kel zóna di géra.” Spiriénsa sima kel-li, ta mostra ma amor ki irmons ten pa kunpanheru ta djuda-nu aguenta firmi óras ki nu ta odiadu.

13. Modi ki spritu santu ta djuda-nu aguenta firmi na nos sirvisu pa Jeová mésmu óras ki algen ta odia-nu?

¹³ Jizus fla ma se sigidoris debe ama ses inimigu. (Mat. 5:44, 45) Má é fásil faze kel-li? Klaru ki nau! Má nu ta konsigi ku ajuda di spritu santu di Deus. Alén di amor, frutu di spritu santu di Deus, ta inklui paxénxa, bondadi, brandura i kapasidadi di kontrola nos kabésa. (Gál. 5:22, 23) Tudu kes kualidadi li ta djuda-nu aguenta firmi óras ki nu ta odiadu. Txeu di kes algen ki antis éra kóntra nos, muda di ideia kantu es odja ses maridu, mudjer, fidju ô vizinhu ta mostra kes  kualidadi li. Txeu di es ti mésmu bira nos irmons ki nu krê txeu. Pur isu, si bu atxa ma é difísil ama kes algen ki ta odia-u sô pamodi bu ta sirbi Jeová, faze orason ta pidi spritu santu. (Luc. 11:13) I bu pode ten sertéza ma obi ku Deus sénpri é midjór kuza ki bu pode faze. — Pro. 3:5-7.

14-15. Modi ki Romanos 12:17-21, djuda Yasmeen mostra amor pa se maridu sikrê el ta fazeba el opozison?

¹⁴ Odja izénplu di un irman ki txoma Yasmeen. Kantu el torna Tistimunha di Jeová, se maridu atxa ma el staba ta ser nganadu i el tenta inpidi-l di sirbi Jeová. El insulta-l i el pidi se família, un xéfi di relijion i un fitiseru pa amiasa-l. Tanbê, el pidi-s pa fla ma Yasmeen staba ta dividi família. Un bês, se maridu ti mésmu ba insulta irmons na Salon di Reinu duránti un runion! Yasmeen txeu bês ta txoraba pamodi se maridu ta maltrataba el.

¹⁵ Na Salon di Reinu, irmons ku irmans ta konsolaba Yasmeen i ta daba el forsa. Ansions insentiva-l pa el aplika kel konsedju ki sta na Romanos 12:17-21. (Lé.) Yasmeen fla: “Foi txeu difísil. Má N ta pidiba Jeová pa djudaba mi i N ta fazeba nha midjór pa N sigiba kel ki Bíblia ta fla. Pur isu, óras ki nha maridu ta sujaba kuzinha di maldadi, N ta linpaba, óras ki el ta insultaba mi, N ta respondeba ku brandura i óras ki el ta fikaba duenti, N ta kuidaba di el.”

16-17. Kuzê ki bu prende ku izénplu di Yasmeen ?

¹⁶ Yasmeen tevi bons rezultadu pamodi el mostra amor pa se maridu. El fla: “Nha maridu kumesa ta kunfia na mi más txeu pamodi el sabia ma sénpri ma N ta flaba verdadi. El kumesa ta obi-m ku ruspetu óras ki nu ta papiaba sobri relijion i el konkorda pa nu mante pas déntu kaza. Tanbê, ti el ta insentiva-m pa N bai runion. Gósi mi ku nha maridu nu ten un bon relason i nu ten pas na nos kaza. Nha speransa é pa nha maridu mostra interesi na verdadi i kumesa ta sirbi Jeová djuntu ku mi.”

¹⁷ Izénplu di Yasmeen ta mostra ma amor ta ‘suporta tudu kuza, ta spéra tudu kuza, ta aguenta firmi na tudu kuza.’ (1 Cor. 13:4, 7) Ódiu pode ten txeu puder i el pode magua-nu. Má amor é mutu más fórti. El ta muda korason. I más inportanti inda, Jeová ta fika txeu kontenti. Má mésmu ki kes algen ki é kóntra nos ka para di odia-nu, nu pode kontinua ta ser filís. Modi?

18. Pamodi ki nu pode ser filís mésmu óras ki nu ta odiadu?

¹⁸ Jizus fla: “Filís nhos ta ser óki gentis ka gosta di nhos.” (Lúkas 6:22, Bíblia Na Prugrésu Di Traduson Pa Lingua Kabuverdianu.) Nu ka ta krê pa nu odiadu. Nu ka gosta di sufri pamodi nos fé. Nton, pamodi ki nu pode ser filís óras ki nu ta odiadu? Pamodi três motivu. Primeru, óras ki nu ta aguenta firmi, Deus ta fika kontenti ku nos. (1 Ped. 4:13, 14) Sugundu, nos fé ta bira ta ten más valor i ta fika más fórti. (1 Ped. 1:7) I tirseru, nu ta ten oportunidadi di resebe un rekonpénsa rei di sábi: vida pa tudu ténpu. — Rom. 2:6, 7.

19. Pamodi ki apóstlus xinti kontenti dipôs ki es sotadu?

¹⁹ Poku ténpu dipôs ki Jizus resusitadu, kes apóstlu xinti kel filisidadi ki Jizus dja flaba es. Dipôs ki es sotadu i es mandadu pa es para di prega, es fika txeu kontenti. Pamodi? “Pamódi es atxadu meresedor di pasa burgónha pamódi nómi di Jizus.” (Atus 5:40-42, BPK) Kel amor ki apóstlus tinha pa ses Sinhor, éra más fórti di ki medu di ses inimigu. I es mostra kel amor li pamodi es prega notísias sábi ‘sen para’. I oji txeu di nos irmons sta kontinua fiel ta sirbi Jeová, sikrê ku difikuldadi. Es sabe ma Jeová ka ta skese di ses óbra i di amor ki es mostra pa se nómi. — Heb. 6:10.

20. Kuzê ki nu ta ben odja na kel otu studu?

²⁰ Timenti ka txiga fin di kel sistéma li, mundu ta kontinua ta odia-nu. (João 15:19) Má nu ka meste ten medu. Na kel otu studu, nu ta ben odja ma Jeová ‘ta da forsa i el ta proteje’ se sérvus lial. (2 Tes. 3:3) Pur isu, kontinua ta ama Jeová, ta ama bus irmons ku irmans i ta ama ti mésmu bus inimigu. Óras ki nu ta sigi kel konsedju li, nu ta kontinua unidu i ku un fé fórti. Tanbê, nu ta da glória pa nómi di Jeová, i nu ta prova ma amor é mutu más fórti di ki ódiu.