1. Kala kilondekesa Matesu 24:9, mukonda dyahi kitutokala kusasumuka dingi se omundu utuzemba?

JIHOVA watubhange mu ukexilu wakuzola ni kutuzola we kwa akwetu. Kyenyiki, se kukala muthu watuzembe tudivwa kyayibha, nange tukala we ni wôma. Sayi phange amwixana Sesá, watungu ku Europa, wambe: “Kyoso kingexile ni 14 kya mivu, mametu wangizembele mukonda dya kusidivila Jihova. Ngadivu kwila seku muthu wangizolele. Ngamateka kudibhwidisa: Okwila ngimuthu wambote mwene?” * Phange yamukwa amwixana Ndala, wasoneka: “Kyoso disoladi kyangibeta, kyangisebhulula ni kwamba kwila wanda ngikwama mukonda dya kukala ngi Mbangi ya Jihova, wôma wangikwata, ngadivu kyayibha.” Kumona kwila athu atuzembe, kutubhangesa kudivwa kyayibha, maji kitusasumuka dingi. Jezú wakyambele kya kwila, o athu ejituzemba.—Tanga Matesu 24:9.

2-3. Mukonda dyahi omaxibulu a Jezú a azembe?

² Omundu wazembe omaxibulu a Jezú. Mukonda dyahi? Mukonda kala Jezú, etu we “kitutokala kumundu.” (Nzwá 15:17-19) Kyenyiki, sumbala tuxila ojinguvulu, etu kituxikina ku abheza mba kubheza o ijimbwete ya jinguvulu ni ya ixi. Etu tubheza ngó Jihova. Etu tuxikina kwila, Nzambi mwene ngó wala ni ujitu wakutumina o athu oso, sumbala Satanaji ni “mbutu” yê kakixikina. (Dim. 3:1-5, 15) Etu tuboka kwila, o Utuminu wa Nzambi wene ngó wandazubha o hadi yoso, ni kwila, kwakambe ngó wene wandabwika ojinguma jê joso. (Dan. 2:44; Dij. 19:19-21) Yiyi njimbu yambote phala o athu alenduka, maji njimbu yayibha phala o athu ayibha.—Jisá. 37:10, 11.

 ³ Atuzembe we mukonda twamukayela o itumu yayuka ya Nzambi. O ima yamba Nzambi kwila yayuka mba yayibha, kiyadifu ni kixinganeku kya mundu. Mukifika, athu avulu axinganeka kwila, kikima kyayibha kubhanga o ima ya ufusa yabhangesa Nzambi kubwika ombanza ya Sodoma ni Ngomola! (Juda 7) Etu kituxikina kubhanga o ima yiyi mukonda twamubelesela o itumu ya Bibidya. Kyenyiki avulu atuxongwena, amba kwila, twamuvudisa we kya o ima!—1 Phe. 4:3, 4.

4. Idifwa yebhi yandatukwatekesa kyoso athu kyatuzemba?

⁴ Ihi itena kutukwatekesa kyoso athu kyatuzemba ni kutusebhulula? Twatokala kukolesa okidyelelu kyetu kya kwila, Jihova wandatukwatekesa. Kala ongubu, okixikanu kyetu kitena ‘kujima omifula ya Dyabhu ya wama otubhya.’ (Efe. 6:16) Maji kitubhingi ngó kukala ni kixikanu, twabhingi we kukala ni henda. Mukonda dyahi? Mukonda ohenda “kiyene mufika ima yayibha.” Yene ikolokota mujiphaxi joso. (1 Kol. 13:4-7, 13) Kindala twandamona kyebhi okuzola Jihova, kuzola ojiphange ni kuzola kate mwene ojinguma jetu kutena kutukwatekesa sumbala omundu watuzembe.

5. Ohenda ya Jezú kwa tat’ê yamukolokotesa kyebhi?

⁵ Mu’suku ande dya Jezú kumujibha kujinguma jê, mwene wambela ojipoxolo jê jafiyele: “Eme ngazola Tat’a, [kyenyiki] kyoso kyangitumu mwene kyene kingibhanga.” (Nzwá 14:31) Ohenda ya Jezú kwa Jihova yamubhana nguzu phala kukolokota mu ibhidi yeji kudibhananayu. Ohenda yetu kwa Jihova itena we kutukwatekesa mu ukexilu yú.

6. Kala kilondekesa Loma 5:3-5, kyebhi kidivwa ojiselevende ja Jihova mukumona kwila omundu wa azembe?

⁶ Tunde ukulu, ohenda kwa Nzambi yenemukwatekesa ojiselevende jê kukolokota kyoso kya azukutisa. Mukifika, kyoso ojipoxolo kya afidisa kuboka kwolo afundixi a jijude exile ni kutena kwavulu, ohenda ya kwa Nzambi yene ya abhangesa ku “tumaka Nzambi, kana o athu.” (Ika. 5:29; 1 Nzwá 5:3) Ohenda yiyi, yene we ikolokotesa o jiphange jetu lelu. Avulu enemukolokota sumbala amwatalatala ni undanda kujinguvulu jala ni kutena kwavulu. Kyoso omundu ki utuzemba, etu kituzoza mba tuluwala, maji tusanguluka.—Ika. 5:41; tanga Loma 5:3-5.

7. Ihi itwatokala kubhanga kyoso ojindandu jetu kyatuzukutisa?

⁷ Nange kitubhonza dingi okukulokota se o atuzembe ojindandu jetu mwene. Kyoso kitumateka kuwabhela okidi kyalungu ni Jihova, sayi athu kumwiji wetu atena kubanza kwila amutunganala. Amukwa atena kubanza kwila, kitwala ni kilunji. (Sokesa ni Máluku 3:21.) Kate mwene, ene atena kutuzukutisa ni undanda. O Izukutisu yiyi ki itusasumukisa dingi. Jezú wambe: “Muthu, akwa dibhata dye ene amukala jinguma jê.” (Mat. 10:36) Maji kabasa o ukexulu ututalatala ojindandu jetu, etu kituxikina kwa azemba. Muveji dya kiki, kyoso ohenda yetu kwa Jihova ki iya ni kudibandekesa, ohenda yetu ku athu idibandekesa we. (Mat. 22:37-39) Maji etu twandadyanga jinga kubelesela o itumu ni itendelesu ya Bibidya, muveji dya kusangulukisa o athu.

8-9. Ihi yakwatekesa phange yamuhatu kukolokota sumbala ni izukutisu yavulu?

⁸ Sesá, twamutumbula kudima wasuluka ni kukolokota sumbala manya wamuzukutisa kyavulu. Mwene wambe: “Eme ni mametu twamateka kudilonga o Bibidya ni Jimbangi ja Jihova. Maji mukubhita mbeji jisamanu kyoso kingamatekene kuya muyônge, mametu walunguluka. Eme ngatongina kwila, mwene wexile muzwela ni akwa kulungulula okidi mba abalukila okilunga. Mukuzwela n’eme,  mwene wexile mukayela o ixinganeku yâ. Mwene wamateka kungilokalala, wangisungu mundemba, wangilutula mba wangilundula, yu watexa omadivulu mami. Angibatizala kyoso kingatenesa 15 amivu. Mametu wabhange yoso phala kungifidisa kubheza Jihova. Kate wangitula mubhata dimoxi ni minzangala yamukwa exile munwa jidroga ni kubhanga usweya. Okizukutisu kibhonza dingi se kyamukwijila kumuthu utwazolo, muthu wakulange tunde undenge.”

⁹ Kyebhi phange Sesá kyadibhana ni maka yá? Mwene wambe: “Kyoso mametu kyamateka kungizukutisa, emengazubhile kyá kutanga o Bibidya yoso. Ngejidile ni kidi kyoso kwila, ngasange okidi, kingexile ni phata. Ngazukamene dingi kwa Jihova. Ngexile musamba kyavulu kwa Jihova, omwene wexile mungitambwijila. Mukithangana kingexile mu inzo imoxi ni minzangala inwa ojidroga ni kubhanga o usweya, sayi phange yamuhatu wangixanene phala kuya kubata dyê ni tutokwese kumoxi o Bibidya. Mukithangana kyokyo, ojiphange jangiswinisa kyavulu mu Kididi kya Ubhezelu. Ene angibhangesa kudivwa kwila ngatokala kumwiji. Ngamono ni mesu mami kwila, Jihova wabetakota mukutena, ojinguma jetu ndenge.”

10. Kidyelelu kyebhi kitutena kukalanakyu kwa Jihova Nzambi yetu?

¹⁰ Poxolo Phawulu wasoneka kwila, “kanaku kima kitena kutubatukisa kuhenda ya Nzambi yene mwa Kidistu Jezú.” (Loma 8:38, 39) Ne mwene se tutala hadi mu ithangana yavulu, Jihova wandakala jinga kumbandu yetu phala kutuximbakatesa ni kutukolokotesa. Omusoso wa Sesá ulondekesa kwila, Jihova utukwatekesa we bhukaxi ka jiphange jetu mukilunga.

11. Ohenda yatumbula Jezú mudivulu dya Nzwá 15:12, 13, yeji kwatekesa kyebhi omaxibulu mê? Bhana phangu.

¹¹ Mu usuku ande dya kufwa kwe, Jezú watendelesa maxibulu mê kwila, atokala kudizola mudya. (Tanga Nzwá 15:12, 13.) Mwene wejidile kwila, okudizola mudyawu kweji kwa akwatekesa kukala ni muxima umoxi ni kukolokota sumbala omundu yú weji kwa azemba. Tala yabhiti ni kilunga mumbanza ya Tesalonika. Ojiphange mu kilunga kiki exile mu azukutisa. Ne kiki, ene atuxila phangu yakulondekesa ufiyele ni kudizola. (1 Tes. 1:3, 6, 7) Phawulu wa aswinisa phala kudilondekesa henda, atokalele kukibhanga “jinga.” (1 Tes. 4:9, 10) Ohenda yeji ku abhangesa kukonda  omalamba ayo atolokele omixima ni kukwatekesa azozele. (1 Tes. 5:14) Ene akayela o itendelesu ya Phawulu. Tuzwela kiki mukonda, mumukanda wakayadi wa atumikisa, mukubhita muvu, mwene watenene kuzwela kiki yalungu ni ene: “Ohenda imwadikwatela mudyenu, yavulu dingi.” (2 Tes. 1:3-5) Okudizola mudya kwa akwatekesa kukolokota mu izukutisu ni ibhidi.

12. Kyebhi ojiphange kyadilondekesa henda mu ixi mwabhiti o ita?

¹² Tala yabhiti ni Ndala ni muhatu wê, twa atumbula kudimatekenu. Kyoso ita kiyabaze mumbanza yawu, ene asuluka ni kuya muyônge, asuluka ni kuboka mu ukexilu watenene, ni kuwana o kakudya kexile naku ni akwa. Sayi kizuwa, masoladi akwata omata, abhixila ku inzo yê. Ndala wambe: “Ene angitangela phala kudituna kukala Mbangi ya Jihova. Eme kingaxikina. Kyenyiki, angibeta, angilondekesa uta, edile kala andangiloza. Ande dya kuya, ene ambe kwila, ejivutuka phala kuzangata muhat’wami. Maji ni lusolo lwoso, ojiphange atutula mukomboyo ya atutumikisa mumbanza yengi. Nuka ngandajimba ohenda yatulondekesa ojiphange jiji jakazola. Kyoso kitwabhixila mumbanza mwatutumikisa, ojiphange jitwasangemu atubhana kudya, atukwatekesa kusanga salu ni inzo! Kyenyiki, twatena kukwatekesa we ojiphange jamukwa alengele o ita.” Omisoso kala yiyi, ilondekesa kwila, ohenda bhukaxi ka Jikidistá, itena kutukwatekesa kukolokota kyoso kyatuzemba.

13. Onzumbi ikôla itukwatekesa kyebhi kukolokota ni kusidivila Jihova ne mwene kyoso athu kyatuzemba?

¹³ Jezú watendelesa omaxibulumê phala kuzola ojinguma. (Mat. 5:44, 45) Okwila kibhonza kubhanga kiki? Xé, kibhonza mwene! Maji ni kikwatekesu kya nzumbi ikôla ya Jihova etu tutena kukibhanga. O idifwa kala: Ohenda, omwanyu, okubhanga mbote, kubatama ni kuditumina ojihanji, ibhanga mbandu ku ibundu ima o nzumbi ikôla ya Nzambi. (Nga. 5:22, 23) O idifwa yiyi itukwatekesa kukolokota ne mwene se atuzembe. Avulu exile mutuzukutisa m’ukulu, lelu alungulula omixima yawu, mukonda mwadiwê, mon’ê mba muzukamiwê, wamulondekesa o idifwa yiyi ya Nzambi. Avulu mudya, kate akituka mwene jiphange jetu. Kyenyikiphe, se kyamukubhonza kuzola yó akuzembe, watokala kubhinga okikwatekesu kya Jihova mumusambu, mubhinge onzumbi ikôla. (Luka 11:13) Dyelela ni  muxima woso kwila, kubhanga o ima kala kyamesena Nzambi, mu ithangana yoso wene jinga o ukexilu wabetakota.—Jisa. 3:5-7.

14-15. Omukanda kwa akwa Loma 12:17-21 wakwatekesa kyebhi phange Yasmin kulondekesa henda kwa mwadiwê, sumbala wexile kumuzukutisa?

¹⁴ Tala yabhiti ni phange Yasmin, watungu kumbandu ya Azya. Kyoso kyakituka Mbangi ya Jihova, mwadiwê wexile muxinganeka kwila, amumunganala. Kyenyikiki, wabhange yoso phala kumufidisa kusidivila Nzambi. Wamusebhulula, yu wafunyisa omwiji ni atwameni ajingeleja, phala kumutalatala kyayibha ni kumutatela kwila, wamuwanuna omwiji. Sayi kizuwa, mwadiwê wayi mu Kididi kya Ubhezelu phala kuxongwena ojiphange! Phange Yasmin wexile mudila kyavulu mukonda dyakumutalatala kyayibha.

¹⁵ Ojiphange mukilunga, aximbakatesa ni kuswinisa phange Yasmin. Otufunga amutelendelesa phala kukumbidila o izwelu yala mumukanda kwa akwa Loma 12:17-21. (Tanga.) Phange Yasmin wambe: “Kyangibhonzele, maji ngabhingi kikwatekesu kwa Jihova, ngabhange yoso ingatena phala kukumbidila o izwelu ya Bibidya. Kyenyiki, kyoso mwadiwami kyexile mutakula o ixete mukuzinya, eme ngexile mu ixixila. Kyoso mwene kyaxile mungilokalala, emengexile mutambwijila ni kubatama kwoso. Kyoso kyakatele, eme ngexile mumulanga.”

16-17. Ihi iwadilongo kuphangu ya phange Yasmin?

¹⁶ Phange Yasmin wakatula mbote mukulondekesa henda kwa mwadiwê. Mwene wambe: “Mwadiwami wamateka kungidyelela dingi, mukonda wejidile kwila, mu ithangana yoso eme ngizwela ngó okidi. Mwene wexile kungivwa ni kuxila kwoso kyoso kingexile muzwela maka alungu ni kixikanu kyami. Kindala mwene wawabhela kyoso kingiya muyônge. Lelu, o ukamba ni mwadiwami wala dingi kyambote, twala ni kutululuka kubhata. Eme ngadyelela kwila, kuhadya mwadiwami wandaxikina okidi, twandasidivila kumoxi Jihova.”

¹⁷ Ophangu ya phange Yasmin ulondekesa kwila, “ohenda ki izondo mujiphaxi, . . . idyelela mu ima yoso, ibhalakata.” (1 Kol. 13:4, 7) Ohenda yala dingi ni kutena, okudizemba ndenge. Ohenda itulondekesa kwa akwetu, itena kulungulula o ukexilu wâ wakutala Jihova ni mundu wê. Jihova usanguluka kyoso kitulondekesa ohenda yiyi. Maji ne mwene se ojinguma jisuluka ni kutuzemba, etu tutena kusanguluka. Kiki kibhita kyebhi?

18. Mukonda dyahi tutena kusanguluka ne mwene kyoso kyatuzemba?

¹⁸ Jezú wambe: “Mwazediwa se athu amizembe.” (Luka 6:22) Etu kitukiwabhela kyoso athu kyatuzukutisa mukonda dya kixikanu kyetu. Kyenyikiphe, mukonda dyahi tutena kusanguluka kyoso kyatuzemba? Ima itatu itukwatekesa. Kyadyanga, okukolokota kwetu kusangulukisa Jihova. (1 Phe. 4:13, 14) Kayadi, kixikanu kyetu kidibandekesa dingi anga kikola we dingi. (1 Phe. 1:7) Katatu, twandatambula futu yabetakota, omwenyu wakalelaku.—Loma 2:6, 7.

19. Mukonda dyahi ojipoxolo asangulukile kyoso kya abeta?

¹⁹ Mukubhita tu izuwa kyoso Jezú kyamufukununa, ojipoxolo amono okusanguluka kwazwelele Jezú. Ene asangulukile kyoso kya abeta ya a atumina kupalala osidivisu ya kuboka. Mukonda dyahi? Mukonda “Nzambi wa akiti athu afwama kutambula o malebhu mukonda dya dijina didi dya Jezú.” (Ika. 5:40-42) Ohenda yaxile nayu kwa Mesene yâ yabetele dingi kota, owôma wajinguma jâ ndenge. Kyenyiki, ene “kafulu” dingi kulondekesa ohenda yâ, mukusuluka ni kuboka onjimbu yambote. Jiphange javulu mu izuwa yalelu, amusidivila jinga ni ufiyele woso, sumbala ni ibhidi. Ene ejiya kwila, Jihova kandajimba okikalakalu kyâ, ni henda yalondekesa kudijina dyê.—Jihe. 6:10.

20. Ihi itwandamona mumilongi yakayela?

²⁰ Ojinguma jandasuluka ni kutuzemba kate kudisukilu dya mundu yú. (Nzwá 15:19) Maji kitwabhingi kukala ni wôma. Kala kitwandamona mu mumilongi yakayela, Jihova wanda “swinisa ni kulanga” ojiselevende jê jafiyele. (2 Tes. 3:3) Kyenyikiphe, tusuluke ni kuzola Jihova, kuzola ojiphange jetu, tuzole kate mwene ojinguma jatuzembe. Se tukayela okitendelesu kiki, twandakala jinga ni muxima umoxi, twandakala kyambote munzumbi, twandabhekela kijingu kwa Jihova, twandalondekesa kwila, ohenda yabetakota mukutena, okuzemba ndenge.