1. Ль гора Мәтта 24:9, гәрәке әм чьма әʹщебмайи нәминьн һәгәр мәрьв мә нәфрʹәт дькьн?

ЙАҺОԜА әм ӧса хӧльԛандьнә кӧ әм мәрьва һʹьз бькьн у бьхԝазьн кӧ әԝана жи мә һʹьз бькьн. Ләма гава кәсәк мә нәфрʹәт дькә, әм әʹщьз дьбьн у дьбәкә дьтьрсьн жи. Мәсәлә, хушкәкә бь наве Георгина *, йа кӧ ль Әԝропайе дьжи, ӧса дьбежә: «Гава әз 14 сали бум, дийа мьн, әз нәфрʹәт дькьрьм, чьмки мьн Йаһоԝа һʹьз дькьр. Әз гәләк хәмгин бум, у әз дьфькьрим кӧ дьбәкә әз мәрьвәкә баш ниньм». Бьраки бь наве Данило ӧса дьньвисә: «Гава әскәра сәва баԝәрийа мьн ль мьн дьхьстьн, чʹерʹи мьн дькьрьн у әз дьдамә тьрсандьне, әз тьрсийам у безар бум». Бәле, әм сәва нәфрʹәте әʹщьз дьбьн, ле әм әʹщебмайи наминьн, чьмки Иса Мәсиһ пешда готьбу кӧ мәрьв ԝе мә нәфрʹәт бькьн (Мәтта 24:9 бьхунә).

2-3. Мәрьв чьрʹа шагьртед Иса Мәсиһ нәфрʹәт дькьн?

² Әв дьнйа шагьртед Иса Мәсиһ нәфрʹәт дькә. Гәло чьрʹа? Чьмки мина Иса Мәсиһ, әм «нә пʹара дьнйайе нә» (Йуһʹәнна 15:17-19). Ләма, әм чьԛас ԛәдьре һʹӧкӧмәтед дьнйайе дьгьрьн жи, әм ԝана у симболед кӧ һӧрмәте дьдьнә ԝан, наһʹәбиньн. Әм тʹәне Йаһоԝа Хԝәде дьһʹәбиньн, у әм ԛәбул дькьн ԝәки тʹәне изьна Хԝәде һәйә кӧ ль сәр тʹәмамийа дьнйайе сәрԝертийе бькә. Ле Шәйтʹан у «зӧрʹәта» ԝи сәрԝертийа Хԝәде ԛәбул накьн (Дәстпебун 3:1-5, 15). Әм мәрьварʹа дьбежьн кӧ тʹәне Пʹадшатийа Хԝәде дькарә проблемед дьнйайе сафи бькә у кӧ дәмәкә незикда, әв Пʹадшати ԝе һʹәму дьжмьнед хԝә ԛьрʹ бькә (Данийел 2:44; Әʹйанти 19:19-21). Әв хәбәр бона мәрьвед мьлук мьзгин ә, ле бона хьраба шин ә (Зәбур 37:10, 11).

 ³ Ӧса жи, һьнә кәс мә нәфрʹәт дькьн, чьмки әм ль гора ԛанунед Хԝәде дьжин. Әв ԛанун жь ньһерʹандьнед дьнйайе йед ль сәр намусийе гәләк щӧдә нә. Иро, гәләк кәс дьфькьрьн кӧ бенамуси тьштәки нормал ә. Әԝана бир дькьн кӧ Хԝәде бажаред Содом у Гоморайе сәва бенамусийа ӧса ԝеран кьрьбун (Щьһуда 7). Ле әм гӧһ дьдьн Кьтеба Пироз, йа кӧ бенамусийе ԛәдәхә дькә, ләма жи гәләк кәс ԛәрфед хԝә мә дькьн у дьбежьн кӧ әм мәрьвнә пашдамайи нә (1 Пәтрус 4:3, 4).

4. Гава мәрьв мә нәфрʹәт дькьн, кʹижан һʹӧнӧр дькарьн ԛәԝате бьдьн мә?

⁴ Гава мәрьв мә нәфрʹәт дькьн у мә беһӧрмәт дькьн, гәло чь дькарә али мә бькә кӧ әм сәбьр бькьн? Гәрәке әм ԛайим баԝәр бькьн кӧ Йаһоԝа ԝе али мә бькә. Мина мәртʹаләки, баԝәрийа мә дькарә «һʹәму тиред агьрийә кӧ Йе Хьраб давежә» бьтәмьринә (Әфәси 6:16). Ле хенщи баԝәрийе, һʹьзкьрьн жи гәләк фәрз ә. Гәло чьма? Чьмки һʹьзкьрьн «зу һерс накʹәвә», ле ль һьмбәри хьрабийе сәбьр дькә (1 Корьнтʹи 13:4-7, 13). Ньһа әме бьвиньн кӧ һʹьзкьрьна һьндава Йаһоԝа, хушк-бьра у һәла һе һʹьзкьрьна һьндава дьжмьна жи чаԝа дькарә али мә бькә кӧ әм һьмбәри нәфрʹәте сәбьр бькьн.

5. Жь бәр кӧ Иса Мәсиһ Баве хԝә һʹьз дькьр, әԝ һазьр бу кӧ чь бькә?

⁵ Шәва пешийа кӧ Иса Мәсиһ жь алийед дьжмьнед хԝәва һатә кӧштьн, әԝи шагьртед хԝәйә амьнрʹа ӧса гот: «Әз Баве һʹьз дькьм у Баве чаԝа тʹәми ль мьн кьрийә әз ӧса дькьм» (Йуһʹәнна 14:31). Иса Мәсиһ Йаһоԝа һʹьз дькьр, ләма жи әԝ һазьр бу кӧ һьмбәри тәнгасийа сәбьр бькә. Һәгәр әм Йаһоԝа һʹьз дькьн, әме жи һазьр бьн кӧ һьмбәри тәнгасийа сәбьр кьн.

6. Ль гора Рʹомайи 5:3-5, хьзмәткʹаред Хԝәде сәр нәфрʹәта дьнйайе чаԝа дьньһерʹьн?

⁶ Бәле, һʹьзкьрьна Хԝәде һәртʹьм али хьзмәткʹаред Йаһоԝа кьрийә кӧ әԝана һьмбәри зерандьне сәбьр бькьн. Мәсәлә, гава диԝана бьльнд йа Щьһуйа, шандийед Иса Мәсиһрʹа әʹмьр да кӧ әԝана ида мьзгине бәла нәкьн, ԝана гот кӧ гәрәке әԝана «гӧрʹа Хԝәде бькьн, нә кӧ йа мәрьва», чьмки ԝана Хԝәде һʹьз дькьр (Кʹаред Шандийа 5:29; 1 Йуһʹәнна 5:3). Иро жи, һʹьзкьрьна Хԝәде ԛәԝате дьдә хушк-бьред мә. Гава әԝана жь алийе дәԝләтева зерандьне у зӧлме дьвиньн, әԝана мерхасийа хԝә ӧнда накьн; дьнйа чьԛас ԝана нәфрʹәт бькә жи, йәкә әԝана шабуна хԝә ӧнда накьн (Кʹаред Шандийа 5:41; Рʹомайи 5:3-5 бьхунә).

7. Һәгәр мәрьвед мә мьԛабьли мә дәртен, гәрәке әм чь бькьн?

⁷ Гава нәфәред мә мьԛабьли мә дәртен, әԝ йәк гәләк зор ә. Гава әм дьхԝазьн Йаһоԝа нас кьн, һьнә мәрьвед мә дьбәкә дьфькьрьн кӧ әм тен хапандьне йан кӧ мә аԛьле хԝә ӧнда кьрийә (Марԛос 3:21 жи бьньһерʹә). Дьбәкә әԝана ль мә зордарийе жи бькьн. Һәгәр тьштәки ӧса бе сәре мә, гәрәке әм әʹщебмайи наминьн. Иса Мәсиһ ӧса готьбу: «Дьжмьнед мерьв ԝе жь мала ԝи бьн» (Мәтта 10:36). Һәгәр мәрьвед мә ча дьжмьнед хԝә мә һʹәсаб бькьн жи, әм һьлбәт ԝана ча дьжмьнед хԝә һʹәсаб накьн. Чьԛас зедә әм Йаһоԝа һʹьз бькьн, һаԛас зедә әме мәрьва жи һʹьз бькьн (Мәтта 22:37-39). Ле диса жи, әме ԛанун у принсипед Кʹьтеба Пироз тʹӧ щара бона хатре кәсәки пʹепәс нәкьн.

8-9. Чь али Георгинайе дькьр кӧ бәр мьԛабьлибуне амьн бьминә?

⁸ Хушка мә Георгина амьнийа хԝә хԝәй кьр гава дийа ԝе мьԛабьли ԝе рʹабу. Әԝ ӧса дьбежә: «Әз у дийа мьн, мә тʹәвайи дәстпекьр тʹәви Шәʹдед Йаһоԝа Кʹьтеба  Пироз һин бьн. Ле шәш мәһ шунда, гава мьн дьхԝәст һәрʹьм щьвина, дийа мьн фькра хԝә гӧһаст. Мьн тедәрхьст кӧ әԝе тʹәви рʹабәра хәбәр дьда, чьмки әԝе мина ԝан хәбәр дьда. Ӧса жи, әԝе әз беһӧрмәт дькьрьм, пʹорʹе мьн дьрʹучʹьканд, дәст давит ԛьрʹька мьн у әз дьфәтьсандьм, у әʹдәбйәтед мьн давитә гәмаре. Гава әз 15 сали бум, әз һатьмә ньхӧмандьне. Сәва кӧ әз хьзмәта Йаһоԝа бьдьмә сәкьнандьне, дийа мьн әз шандьм маләкә бона щаһьлед нәгӧһдар. Һьнә кәчʹькед кӧ ль ԝедәре дьман наркотик дьданә хәбате у ԛачахти дькьрьн. Мьԛабьлибуна алийе ԝи кәси кӧ гәрәке тә һʹьз бькә у тә хԝәй бькә, бь рʹасти жи тьштәки гәләк зор ә».

⁹ Гәло Георгина чаԝа амьн ма? Әԝ ӧса дьбежә: «Рʹожа кӧ дийа мьн дәстпекьр мьԛабьли мьн рʹабә, мьн хԝәндьна тʹәмамийа Кʹьтеба Пироз тʹәзә хьлаз кьрьбу. Әз ида сәд сәләфи баԝәр бум кӧ рʹийа рʹаст әв ә, у мьн хԝә гәләк незики Йаһоԝа тʹәхмин дькьр. Мьн гәләк щара ԝирʹа дӧа дькьр, у әԝи дӧайед мьн дьбьһистьн. Гава әз ль мала бона щаһьла дьжитьм, хушкәк әз гази мала хԝә дькьрьм, у мә Кʹьтеба Пироз тʹәвайи леколин дькьр. Ӧса жи, хушк-бьред ль Ода щьвате жи мерхаси дьданә мьн. Ԝан әз ча пʹара малбәта хԝә һʹәсаб дькьрьм. Мьн рʹастә-рʹаст дьдит кӧ Йаһоԝа жь нәйаред мә ԛәԝитьр ә».

10. Әм дькарьн баԝәр бьн кӧ Йаһоԝа ԝе чь бькә?

¹⁰ Паԝлосе шанди ньвисибу кӧ тʹӧ тьшт нькарә «һʹьзкьрьна Хԝәде сәр мә сар кә, йа кӧ бь дәсте Хӧдан Мәсиһ Иса» йә (Рʹомайи 8:38, 39). Һәгәр әм тән гасийе бькʹьшиньн жи, Йаһоԝа ԝе һәртʹьм дьлбини у ԛәԝате бьдә мә. Сәрда жи, ча сәрһатийа Георгинайе нишан дькә, Йаһоԝа бь сайа хушк-бьред мәйи дәлал жи али мә дькә.

11. Ль Йуһʹәнна 15:12, 13, Иса Мәсиһ чьма тʹәми да шагьртед хԝә кӧ әԝана һәвдӧ һʹьз бькьн?

¹¹ Шәва пешийа мьрьна хԝә, Иса Мәсиһ шагьртед хԝәрʹа тʹәми да ԝәки әԝана һәвдӧ һʹьз бькьн (Йуһʹәнна 15:12, 13 бьхунә). Әԝи заньбу кӧ һʹьзкьрьна фәдакʹар ԝе али ԝан бькә ԝәки әԝана йәктийа дь нав хԝәда хԝәй кьн у һьмбәри нәфрʹәта дьнйайе сәбьр бькьн. Мәсәлә, сәрһатийа щьвата Тʹесалоники бинә бәр чʹәʹве хԝә. Жь рʹожа кӧ щьват һатьбу сазкьрьне, хушк-бьред ль Тʹесалоники рʹасти зерандьне дьһатьн. Диса жи, әԝана жь  алийе амьнийе у һʹьзкьрьне кәсед дьнрʹа бунә мәсәлә (1 Тʹесалоники 1:3, 6, 7). Паԝлосе шанди әԝ һелан дькьрьн кӧ жь алийе һʹьзкьрьнева «һе пешда һәрʹьн» (1 Тʹесалоники 4:9, 10). Бь сайа һʹьзкьрьне, ԝана ԝе бькарьбуйа дьлбини бьдана кәсед дьлтәнг у аликʹари бьдана кәсед сьст (1 Тʹесалоники 5:14). Әшкәрә йә кӧ ԝана гӧһ да рʹебәрийа Паԝлос, чьмки саләк шунда, әԝи нәʹма хԝә йа дӧдада ԝанрʹа ӧса гот: «Һʹьзкьрьна ԝә һьндава һәвда зедә дьбә» (2 Тʹесалоники 1:3-5). Бәле, һʹьзкьрьна ортʹа ԝанда али ԝан дькьр кӧ әԝана һьмбәри зӧлм у зәʹмәта сәбьр бькьн.

12. Ԝәлатәкида кʹидәре кӧ шәрʹ һәбу, хушк-бьра чаԝа нишан кьрьн кӧ әԝана һәвдӧ һʹьз дькьн?

¹² Сәрһатийа Данило у жьна ԝи диса бинә бәр чʹәʹве хԝә. Гава ԝәлате ԝанда шәрʹ дәстпебу у гьһиштә бажаре ԝан, ԝана диса жи щьват нәдьһиштьн, у чь жь дәсте ԝан дьһат дькьрьн кӧ мьзгине бәла бькьн. Ӧса жи, ԝана хԝарьна кӧ бал ԝан һәбу тʹәви хушк-бьра пʹаравәдькьр. Рʹожәке, әскәр бь чʹәка һатьн бал Данило. Әԝ ӧса дьбежә: «Ԝана дьхԝәст кӧ әз тʹәрка баԝәрийа хԝә бькьм. Гава мьн хԝәстьна ԝан инкʹар кьр, ԝана ль мьн хьст у ԛьрʹмә сәр мьнрʹа гьртьн, ле гӧлә бәри һәԝайе дан. Паше, ԝана гот кӧ әԝе вәгәрʹьн у жьна мьн хьраб кьн. Ле хушк-бьра әм зу ль трене данә рʹуньштандьне у әм шандьн бажарәки дьн. Әзе һʹьзкьрьна ԝан хушк-бьред дәлал тʹӧ щара бир нәкьм. Гава әм гьһиштьнә бажаре дьн, хушк-бьред ԝедәре хԝарьн данә мә у али мьн кьрьн кӧ әз хԝәрʹа хәбатәки у маләке бьвиньм. Бь сайа ве йәке, мә дькарьбу хушк-бьред дьн, йед кӧ жь шәрʹ дьрʹәвийан, мала хԝәда хԝәй кьн». Сәрһатийед ӧса нишан дькьн кӧ һʹьзкьрьна хушк-бьра дькарә али мә бькә кӧ әм һьмбәри нәфрʹәте сәбьр бькьн.

13. Һәгәр мәрьв мә нәфрʹәт бькьн жи, рʹӧһʹе пироз чаԝа али мә дькә кӧ әм Йаһоԝарʹа амьн бьминьн?

¹³ Иса Мәсиһ шагьртед хԝәрʹа гот кӧ бьра әԝана дьжмьнед хԝә һʹьз бькьн (Мәтта 5:44, 45). Гәло һеса йә кӧ мәрьв дьжмьнед хԝә һʹьз бькә? Һьлбәт на! Ле бь аликʹарийа рʹӧһʹе пироз, әв йәк дьбә! Дь нав ‹бәре рʹӧһʹда› һʹӧнӧред ӧса ча һʹьзкьрьн, сәбьр, ԛәнщи, мьлукти у хԝәгьртьн һәнә (Галати 5:22, 23). Әв һʹӧнӧр али мә дькьн кӧ әм һьмбәри нәфрʹәте сәбьр бькьн. Гәләк мәрьв һьндава Шәʹдед Йаһоԝада нәрм бунә, чьмки  мер, жьн, зарʹ йан щинаре ԝан, һʹӧнӧред баш нишан дькьрьн. Ӧса жи гәләк дьжмьнед мә бунә хушк-бьред мә. Ләма, һәгәр ль тә зор те кӧ дьжмьна һʹьз бьки, дӧа бькә кӧ Йаһоԝа рʹӧһʹе пироз бьдә тә (Луԛа 11:13). Жь сәд сәләфи баԝәр бә кӧ рʹийа Хԝәде һәртʹьм рʹийа һәри баш ә (Мәтʹәлок 3:5-7).

14-15. Готьнед Рʹомайи 12:17-21 чаԝа али Йасмине дькьр кӧ әԝ һʹьзкьрьна хԝә мере хԝәрʹа нишан бькә?

¹⁴ Сәрһатийа хушка мә Йасмин, йа кӧ ль Рʹоһьлата Навин дьжи, бинә бәр чʹәʹве хԝә. Гава Йасмин бу Шәʹда Йаһоԝа, мере ԝе дьфькьри кӧ әԝ һатийә хапандьне, у әԝи дьхԝәст рʹийа ԝе бьгьрта, ԝәки Йаһоԝарʹа хьзмәт нәкә. Әԝи ле беһӧрмәт дькьр у мәрьвед хԝәрʹа, кʹәшишәкерʹа у сербазәкирʹа гот, кӧ әԝана ԝе бьдьнә тьрсандьне у бежьн кӧ әԝ бона баԝәрийа хԝә мала хԝә хьраб дькә. Сәрда жи, щарәке мере ԝе ԝәʹде щьвате чʹерʹи хушк-бьра кьр. Йасмин сәва ве йәке гәләк щара дьгьрийа.

¹⁵ Ода щьватеда, хушк-бьра бәр дьле ԝеда дьһатьн у мерхаси дьданә Йасмине. Рʹуспийа әԝ һелан дькьр кӧ әԝ хәбәред жь Рʹомайи 12:17-21 бьдә хәбате (бьхунә). Йасмин ӧса дьбежә: «Гәләк зор бу, ле мьн жь Йаһоԝа аликʹари хԝәст у хирәт дькьр кӧ ль гора Кʹьтеба Пироз бьжим. Ләма, гава мере мьн ԛәсда һʹәрʹи авитә мале, мьн дәнге хԝә нәкьр у әв йәк тʹәмьз кьр. Гава әԝи әз беһӧрмәт дькьрьм, мьн бь нәрми щаба ԝи дьда. У гава әԝ нәхԝәш кʹәт, мьн бона ԝи хәм дькьр».

16-17. Тӧ жь сәрһатийа Йасмине чь һин буйи?

¹⁶ Һʹьзкьрьна кӧ Йасмине мере хԝәрʹа нишан дькьр нә бадиһәԝа бу. Хушка мә ӧса дьбежә: «Мере мьн чьԛас дьчу дьһа зедә итʹбарийа хԝә мьн дьани, чьмки әԝи заньбу кӧ әз тʹӧ щара дәрәԝа накьм. Гава мә дәрһәԛа религийе хәбәр дьда, әԝи ида гӧһ дьда мьн, у ида шәрʹ нәдькьр. Ньһа әԝ изне дьдә кӧ әз һәрʹьм щьвата. Ида әʹдьлайи кʹәтийә мала мә, у әм бь рʹасти бәхтәԝар ьн. Һевийа мьн әв ә кӧ мере мьн ԝе рʹожәке дьле хԝә бона рʹастийе вәкә у тʹәви мьн Йаһоԝарʹа хьзмәт бькә».

¹⁷ Сәрһатийа Йасмине нишан дькә кӧ һʹьзкьрьн думькдьреж ә, «һевийа ԝе жь һәр тьшти һәйә, ль һәр тьшти сәбьр дькә» (1 Корьнтʹи 13:4, 7, ИМ). Бәле, нәфрʹәти дькарә чәтьн у зор бә, ле һʹьзкьрьн дьһа ԛәԝи йә. Һʹьзкьрьн дьле мәрьва нәрм дькә у дьле Йаһоԝа ша дькә. Һәгәр дьжмьн нәфрʹәта хԝә бәрʹнәдьн, әм диса жи дькарьн бәхтәԝар бьн. Гәло чаԝа?

18. Гава мәрьв мә нәфрʹәт дькьн, әм чьма дькарьн диса жи бәхтәԝар бьн?

¹⁸ Иса Мәсиһ готьбу кӧ һәгәр мәрьв мә нәфрʹәт бькьн жи, йәкә әм дькарьн бәхтәԝар бьн (Луԛа 6:22). Әм һьлбәт жь нәфрʹәте шабуне настиньн. Ләма, әм чьрʹа дькарьн бәхтәԝар бьн гава мә нәфрʹәт дькьн? Бона се сәбәба: Йа йәке, гава әм сәбьр дькьн, Хԝәде жь мә рʹази дьбә (1 Пәтрус 4:13, 14). Йа дӧда, баԝәрийа мә дьһа ԛәԝи дьбә (1 Пәтрус 1:7). У йа сьсийа, әме хәлатәкә хԝәш бьстиньн бьстиньн – жийина һʹәтайе! (Рʹомайи 2:6, 7).

19. Паши кӧ шандийед Иса Мәсиһ данә бәр бәр ԛамчийа, әԝана чьрʹа ша дьбун?

¹⁹ Дәмәкә кьн паши кӧ Иса Мәсиһ жь мьрьне рʹабу, готьнед ԝи һатьн сери. Щьһуйа шандийед Иса Мәсиһ данә бәр ԛамчийа у ԝанрʹа готьн, ԝәки бәлакьрьна мьзгине бьдьнә сәкьнандьне. Диса жи, шандийед Иса Мәсиһ ша дьбун, чьмки «бона наве Иса һежайи рʹәзилкьрьне бунә» (Кʹаред Шандийа 5:40-42). Ԝана Иса Мәсиһ һаԛас һʹьз дькьр кӧ жь дьжмьна нәдьтьрсийан. Сәва ве һʹьзкьрьне, ԝана бәлакьрьна мьзгине нәданә сәкьнандьне. Иро жи гәләк хушк-бьред ԝәʹде тәнгасийа бь амьни Йаһоԝарʹа хьзмәт дькьн. Әԝана заньн кӧ Йаһоԝа щәфе ԝан у һʹьзкьрьна кӧ әԝана бона наве ԝи нишан дькьн, бир накә (Ибрани 6:10).

20. Готара дьнда, әме дәрһәԛа чь хәбәр дьн?

²⁰ Һʹәта хьлазийа ве система хьраб, әв дьнйа ԝе мә нәфрʹәт бькә (Йуһʹәнна 15:19). Диса жи, нә лазьм ә кӧ әм бьтьрсьн. Чаԝа кӧ әме готара дьнда бьвиньн, Йаһоԝа ԝе хьзмәткʹаред хԝә йед амьн «бьшьдинә у жь Йе Хьраб хԝәй кә» (2 Тʹесалоники 3:3). Ләма, ԝәрә әм бәрдәԝам кьн Йаһоԝа, хушк-бьра, у һәла һе дьжмьнед хԝә жи һʹьз бькьн. Һәгәр әм гӧһ бьдьн ве ширәте, йәктийа мә ԝе хьраб нәбә у достийа мә тʹәви Йаһоԝа ԝе ԛәԝи бьминә. Ӧса жи, әме һӧрмәт у рʹумәте бьдьн Йаһоԝа, у избат бькьн кӧ һʹьзкьрьн жь нәфрʹәте ԛәԝитьр ә.