JIOVA mek wi fɔ mek wi lɛk pipul dɛn ɛn fɔ mek dɛnsɛf lɛk wi. So we pɔsin et wi, wi kin rili fil bad, ɛn sɔntɛm wi kin ivin fred. Fɔ ɛgzampul, wan sista we nem Jɔjina, we de na Yurop bin se: “We a bin ol 14 ia, mi mama bin stat fɔ et mi bikɔs a de sav Jiova. A bin rili de fil bad ɛn fil se na mi wangren de. A bigin fɔ tink se sɔntɛm mi nɔto gud pɔsin.” * Wan brɔda we nem Danilo bin rayt se: “We sojaman dɛn bin de wap mi, tɛl mi bad wɔd, ɛn trɛtin mi bikɔs mi na Jiova Witnɛs, a bin de fred, ɛn a bin de shem.” Wi kin rili fil bad we pipul dɛn et wi, bɔt wi nɔ sɔprayz. Jizɔs bin dɔn tɛl wi se dɛn go et wi.—Rid Matyu 24:​9.

2-3. Wetin mek pipul dɛn et di wan dɛn we de fala Jizɔs?

² Pipul dɛn na di wɔl et di wan dɛn we de fala Jizɔs. Wetin mek? Na bikɔs jɔs lɛk Jizɔs, wisɛf “nɔ tan lɛk di pipul dɛn na di wɔl.” (Jɔn 15:​17-19) So pan ɔl we wi rɛspɛkt mɔtalman gɔvmɛnt dɛn, wi nɔ de put an pan pɔlitiks, wi nɔ de salut di flag, ɔ siŋ di nashɔnal antɛm. Na Jiova nɔmɔ wi de wɔship. Wi de sɔpɔt di rayt we Gɔd gɛt fɔ rul mɔtalman, bɔt Setan ɛn in “pikin” nɔ gri se Gɔd gɛt da rayt de. (Jɛn. 3:​1-5, 15) Wi de prich se na Gɔd in Kiŋdɔm nɔmɔ go ebul fɔ sɔlv mɔtalman in prɔblɛm dɛn. Ɛn i nɔ go te igen, i go dɔnawe wit ɔl di wan dɛn we de agens am. (Dan. 2:​44; Rɛv. 19:​19-21) Dis na gud nyuz fɔ di ɔmbul wan dɛn, bɔt na bad nyuz fɔ di wikɛd wan dɛn.—Sam 37:​10, 11.

 ³ Pipul dɛn et wi bak bikɔs wi de obe Gɔd in lɔ dɛn. Wetin Gɔd se rayt ɛn rɔng difrɛn frɔm wetin pipul dɛn na di wɔl tink bɔt wetin rayt ɛn rɔng. Fɔ ɛgzampul, bɔku pipul dɛn naw na di wɔl dɔn gri fɔ du mami ɛn dadi biznɛs di we aw Gɔd nɔ want jɔs lɛk aw di pipul dɛn na Sɔdɔm ɛn Gomɔra bin du, we mek Gɔd bin dɔnawe wit dɛn. (Jud 7) Bikɔs wi de obe Gɔd in lɔ dɛn bɔt mami ɛn dadi biznɛs, pipul dɛn na di wɔl de provok wi ɛn tɛl wi se wi nɔ de gri wit wetin ɔda pipul dɛn biliv.—1 Pit. 4:​3, 4.

4. Us kwaliti dɛn go ɛp wi we pipul dɛn et wi?

⁴ Wetin go ɛp wi fɔ mek wi bia we pipul dɛn et wi ɛn de tɛl wi bad wɔd? Wi nid fɔ gɛt strɔng fet se Jiova go ɛp wi. Wi fet tan lɛk shild we go mek wi ebul fɔ “ɔt ɔl di aro dɛn we gɛt faya we di wikɛd wan de sɛn.” (Ɛfi. 6:​16) Bɔt nɔto fet nɔmɔ wi nid fɔ gɛt. Wi fɔ gɛt bak lɔv. Wetin mek? Na bikɔs lɔv “nɔ de mek pɔsin vɛks kwik.” I de mek pɔsin nɔ giv-ɔp ilɛk wetin apin, ɛn i de mek pɔsin bia ɔl di bad tin dɛn we dɛn de du am. (1 Kɔr. 13:​4-7, 13) Naw, lɛ wi tɔk bɔt aw wi lɔv fɔ Jiova, wi kɔmpin Kristian dɛn, ɛn ivin wi ɛnimi dɛn de ɛp wi fɔ bia we pipul dɛn et wi.

5. Aw di lɛk we Jizɔs lɛk in Papa bin ɛp am?

⁵ Di nɛt bifo Jizɔs in ɛnimi dɛn kil am, i bin tɛl in fetful disaypul dɛn se: “A lɛk di Papa, [so] a de du wetin di Papa dɔn tɛl mi fɔ du lɛk aw i tɛl mi.” (Jɔn 14:​31) Bikɔs Jizɔs lɛk Jiova, i bin ebul fɔ bia di prɔblɛm dɛn we bin mit am. Di lɛk we wisɛf lɛk Jiova kin ɛp wi we wi gɛt prɔblɛm dɛn.

6. Akɔdin to Romans 5:​3-5, aw Jiova in savant dɛn kin fil we pipul dɛn na di wɔl et dɛn?

⁶ Di lɛk we Jiova in savant dɛn lɛk am dɔn de ɛp dɛn fɔ bia ɛnitɛm we pipul dɛn mek dɛn sɔfa. Fɔ ɛgzampul, we di pawaful Ju ay kɔt bin kɔmand di apɔsul dɛn lɛ dɛn stɔp fɔ prich, di lɛk we dɛn lɛk Gɔd bin mek dɛn “obe [Gɔd] as rula, nɔto mɔtalman.” (Akt 5:​29; 1 Jɔn 5:​3) Dis kayn lɔv fɔ Gɔd dɔn ɛp wi brɔda ɛn sista dɛn tide bay we i de mek dɛn tinap tranga wan we pawaful gɔvmɛnt dɛn de mek dɛn sɔfa ɛn du bad tin to dɛn. Bifo wi at pwɛl we pipul dɛn na di wɔl et wi, wi kin gladi.—Akt 5:​41; rid Romans 5:​3-5.

7. Wetin wi fɔ du we wi fambul dɛn de mek wi sɔfa?

⁷ Wan pan di tin dɛn we nɔ rili izi fɔ bia na we wi fambul dɛn de agens wi. We sɔm pan wi fambul dɛn kin si se wi dɔn bigin lan bɔt Jiova, dɛn kin fil se dɛn dɔn ful wi. Ɔda wan dɛn kin tink se wi dɔn kres. (Luk Mak 3:​21.) Sɔntɛm dɛn kin ivin du bad tin to wi. Dis bad we aw dɛn de trit wi nɔ fɔ mek wi sɔprayz. Jizɔs bin se: “Pɔsin in ɛnimi go bi di wan dɛn we de na in yon os.” (Mat. 10:​36) Ilɛk uskayn we wi fambul dɛn si wi, wi nɔ kin trit dɛn lɛk se dɛn na wi ɛnimi. Di mɔ we wi de lɛk Jiova, na di mɔ wi de lɛk ɔda pipul dɛn. (Mat. 22:​37-39) Bɔt wi nɔ go ɛva stɔp fɔ obe di lɔ ɛn prinsipul dɛn na di Baybul jɔs fɔ mek mɔtalman gladi.

8-9. Wetin bin ɛp wan sista fɔ mek i tinap tranga wan pan ɔl we i bin de rili sɔfa?

⁸ Jɔjina, we wi bin dɔn tɔk bɔt, bin ebul fɔ tinap tranga wan we in mama bin de mek i sɔfa bad bad wan. Jɔjina bin tɔk se: “Na mi ɛn mi mama bin bigin fɔ stɔdi di Baybul wit di Witnɛs dɛn. Bɔt siks mɔnt leta we a bin want fɔ atɛnd di mitin dɛn, mi mama bin bigin fɔ mek a sɔfa. A bin  kam fɔ no se i bin de tɔk to pipul dɛn we dɔn lɛf fɔ sav Jiova, ɛn i bin de tɔk dɛn lay lay tichin dɛn we i bin de tɔk to mi. Dɔn bak, i bin de tɛl mi bad wɔd, drɔ mi ia na mi ed, chok mi, ɛn trowe mi buk ɛn magazin dɛn. A baptayz we a ol 15 ia. Mi mama bin tray fɔ stɔp mi fɔ mek a lɛf fɔ sav Jiova bay we i bin kɛr mi go na wan ples usay dɛn kin go wit yɔŋ titi dɛn we nɔ de biev fayn. Ɛn sɔm pan dɛn bin de tek drɔgs ɛn du bad bad tin dɛn. I nɔ kin rili izi we di pɔsin we de agens yu na pɔsin we fɔ lɛk yu ɛn sho se i bisin bɔt yu.”

⁹ Wetin bin ɛp Jɔjina fɔ bia? I bin se: “Di de we mi mama tɔn agens mi, na da de de a dɔn fɔ rid di wan ol Baybul. A bin biliv tranga wan se a dɔn fɛn di tru, ɛn a bin gɛt tayt padi biznɛs wit Jiova. A bin de pre to am ɔltɛm, ɛn i bin de yɛri mi. We a bin de na di ples usay mi mama bin go wit mi, wan sista bin invayt mi na in os, ɛn wi bin stɔdi di Baybul togɛda. Ɔl da tɛm de, di brɔda ɛn sista dɛn na Kiŋdɔm Ɔl bin de rili ɛnkɔrej mi. Dɛn mek a bi pat ɔf dɛn famili. A bin kam fɔ si klia wan se Jiova strɔng pas di wan dɛn we de agens wi, ilɛk udat dɛn bi.”

10. Wetin wi shɔ se Jiova wi Gɔd go du fɔ wi ɔltɛm?

¹⁰ Di apɔsul Pɔl bin rayt se natin nɔ go mek “Gɔd lɛf fɔ lɛk wi tru Krays Jizɔs wi Masta.” (Rom. 8:​38, 39) Pan ɔl we wi go sɔfa fɔ sɔm tɛm, Jiova de wit wi ɔltɛm fɔ ɛnkɔrej ɛn ɛp wi. Ɛn jɔs lɛk wetin bin apin to Jɔjina, Jiova kin yuz wi brɔda ɛn sista dɛn na di kɔngrigeshɔn bak fɔ ɛp wi.

11. Aw di lɔv we Jizɔs bin tɔk bɔt na Jɔn 15:​12, 13 go ɛp in disaypul dɛn? Gi wan ɛgzampul.

¹¹ Di nɛt bifo Jizɔs day, i mɛmba in disaypul dɛn se dɛn fɔ lɛk dɛn kɔmpin dɛn. (Rid Jɔn 15:​12, 13.) I no se if dɛn lɛk dɛn kɔmpin dɛn ɛn nɔ jɔs bisin bɔt dɛnsɛf, dat go ɛp dɛn fɔ kɔntinyu fɔ gɛt wanwɔd ɛn fɔ bia we pipul dɛn et dɛn. Tink bɔt di brɔda ɛn sista dɛn na Tɛsalonayka dɛn ɛgzampul. Frɔm we di kɔngrigeshɔn bigin, pipul dɛn bin de mek dɛn sɔfa. Bɔt di brɔda ɛn sista dɛn bin sɛt fayn ɛgzampul as pipul dɛn we de bia ɛn sho lɔv. (1 Tɛs. 1:​3, 6, 7) Pɔl bin ɛnkɔrej dɛn fɔ mek dɛn kɔntinyu fɔ sho lɔv “mɔ ɛn mɔ.” (1 Tɛs. 4:​9, 10) Lɔv bin ɛp dɛn fɔ mek dɛn tɔk fayn to di wan dɛn  we dɛn at pwɛl ɛn fɔ sɔpɔt di wan dɛn we wik. (1 Tɛs. 5:​14) Dɛn bin fala wetin Pɔl bin tɛl dɛn, bikɔs insay in sɛkɔn lɛta we i bin rayt to dɛn wan ia afta dat, i bin se: “Una ɔl de lɛk una kɔmpin dɛn mɔ ɛn mɔ.” (2 Tɛs. 1:​3-5) Di lɔv we dɛn bin gɛt bin ɛp dɛn fɔ bia we tin tranga ɛn we pipul dɛn bin de mek dɛn sɔfa.

12. Aw di brɔda ɛn sista dɛn bin sho se dɛn lɛk dɛn kɔmpin Kristian dɛn di tɛm we dɛn bin gɛt wɔ na dɛn kɔntri?

¹² Lɛ wi tɔk bɔt di ɛkspiriɛns bɔt Danilo, we wi bin dɔn tɔk bɔt, ɛn in wɛf. We di wɔ na dɛn kɔntri bin rich di tɔŋ we dɛn bin de, dɛn bin kɔntinyu fɔ atɛnd di mitin dɛn, du dɛn bɛst fɔ prich, ɛn sheb di it we dɛn gɛt wit dɛn brɔda ɛn sista dɛn. Dɔn wan de, sojaman dɛn we bin ol gɔn bin kam na Danilo in os. Danilo se: “Dɛn bin want mi fɔ tɔk se mi nɔto Jiova Witnɛs igen. We a nɔ gri, dɛn bin bit mi, ɛn dɛn mek lɛk se dɛn de shut mi bay we dɛn faya di gɔn oba mi ed. Bifo dɛn go, dɛn bin trɛtin mi se dɛn go kam bak fɔ rep mi wɛf. Bɔt kwik kwik wan, di brɔda ɛn sista dɛn put wi na tren fɔ mek wi go na ɔda tɔŋ. A nɔ go ɛva fɔgɛt di kayn lɔv we dɛn brɔda ɛn sista dɛn ya bin sho wi. Ɛn we wi rich na di nyu tɔŋ, di brɔda ɛn sista dɛn bin gi wi tin fɔ it, ɛn dɛn bin ɛp mi fɔ fɛn wok ɛn say fɔ de. Dɔn leta, wi bin ebul mek ɔda brɔda ɛn sista dɛn we kɔmɔt usay di wɔ bin de kam de wit wi.” Dɛn kayn ɛkspiriɛns dɛn de sho se di lɔv we wi gɛt fɔ wi kɔmpin Kristian dɛn kin ɛp wi fɔ bia we pipul dɛn et wi.

13. Aw di oli spirit kin ɛp wi fɔ bia we wi de sav Jiova pan ɔl we pipul dɛn et wi?

¹³ Jizɔs bin tɛl di wan dɛn we de fala am se dɛn fɔ lɛk dɛn ɛnimi dɛn. (Mat. 5:​44, 45) I izi fɔ du dat? Nɔ-o, i nɔ izi. Bɔt wi go ebul fɔ du am bay we Gɔd go ɛp wi wit in oli spirit. Sɔm pan di kwaliti dɛn we Gɔd in spirit de mek pɔsin gɛt na lɔv, peshɛnt, i de mek pɔsin du gud, tek tɛm du tin, ɛn kɔntrol insɛf. (Gal. 5:​22, 23) Dɛn kwaliti dɛn ya de ɛp wi fɔ bia we pipul dɛn et wi. Bɔku pipul dɛn dɔn lɛf fɔ mek wi sɔfa bikɔs dɛn man, dɛn wɛf, dɛn pikin, ɔ dɛn neba dɔn sho dɛn kwaliti dɛn ya. Bɔku pan dɛn wan dɛn ya we de mek wi sɔfa dɔn ivin  bi wi brɔda ɛn sista dɛn. So if i nɔ izi fɔ mek yu lɛk di wan dɛn we et yu fɔ we yu de sav Jiova, na fɔ pre fɔ In oli spirit. (Lyuk 11:​13) Ɛn biliv tranga wan se fɔ obe Gɔd na di bɛst tin fɔ du ɔltɛm.—Prɔv. 3:​5-7.

14-15. Aw Romans 12:​17-21 bin ɛp Yasmin fɔ sho lɔv to in man pan ɔl we in man bin de trit am bad?

¹⁴ Lɛ wi tɔk bɔt Yasmin we de na di Midul Ist in ɛgzampul. We i bi Jiova Witnɛs, in man bin tink se dɛn dɔn ful am, ɛn i tray fɔ stɔp am fɔ sav Jiova. In man bin de tɛl am bad wɔd dɛn, ɛn i tɛl in fambul dɛn, wan bigman pan Gɔd biznɛs, ɛn wan jujuman fɔ trɛtin Yasmin se dɛn go du bad tin to am ɛn lay pan am se i want fɔ skata in famili. In man bin ivin ala pan di brɔda dɛn ɛn tɛl dɛn bad wɔd we dɛn bin de na mitin. Yasmin bin de kray ɔltɛm bikɔs in man nɔ bin de trit am fayn.

¹⁵ We Yasmin bin de go na Kiŋdɔm Ɔl, in brɔda ɛn sista dɛn bin de ɛp ɛn ɛnkɔrej am. Di ɛlda dɛn bin ɛnkɔrej am fɔ du wetin de na Romans 12:​17-21. (Rid.) Yasmin se: “Dis nɔ bin izi. Bɔt a bin aks Jiova fɔ mek i ɛp mi, ɛn a du mi bɛst fɔ fala wetin di Baybul se. So we mi man bin de trowe dɔti na di kichin bay wilful fɔ lɛ a vɛks, a bin de go klin am. We i tɛl mi bad wɔd, a de tɔk to am fayn. Ɛn we i sik, a kin tek kia ɔf am.”

16-17. Wetin yu lan frɔm Yasmin in ɛgzampul?

¹⁶ Yasmin bin bɛnifit fɔ we i de sho lɔv to in man. I bin se: “Mi man bin bigin fɔ biliv mi mɔ bikɔs i no se ɛnitin we a tɛl am na tru. I bigin fɔ lisin to mi fayn fayn wan we wi kin tɔk bɔt rilijɔn, ɛn i gri fɔ mek pis de na os. Naw i kin ɛnkɔrej mi fɔ go na mitin. Wi rili gɛt gladi-at ɛn pis na wi mared-os. A de op se mi man go lan di tru ɛn jɔyn mi fɔ sav Jiova.”

¹⁷ Yasmin in ɛgzampul de sho se lɔv “de mek pɔsin nɔ giv-ɔp ilɛk wetin apin, . . . i de mek pɔsin op fɔ ɔltin, i de mek pɔsin bia ɔltin.” (1 Kɔr. 13:​4, 7) We pipul dɛn et wi, dɛn kin du bad tin dɛn to wi, ɛn dat kin mek wi fil bad. Bɔt if wi sho se wi lɛk dɛn, sɔntɛm dat go mek dɛn stɔp fɔ trit wi bad. Ɛn we wi de kɔntinyu fɔ sho lɔv, i de mek Jiova gladi. Bɔt ilɛksɛf pipul dɛn kɔntinyu fɔ et wi, wi go stil gɛt gladi-at. Aw wi go du dat?

18. Wetin mek wi fɔ gladi we pipul dɛn et wi?

¹⁸ Jizɔs bin se: “Una gɛt gladi-at ɛnitɛm we pipul dɛn et una.” (Lyuk 6:​22) Nɔto wi disayd fɔ mek ɔda pipul dɛn et wi. Wi nɔ kin ɛnjɔy we pipul dɛn kin mek wi sɔfa fɔ wetin wi biliv. So wetin mek wi fɔ gladi we pipul dɛn et wi? Lɛ wi tɔk bɔt tri rizin dɛn. Fɔs, we wi bia, Gɔd de gladi fɔ wi. (1 Pit. 4:​13, 14) Sɛkɔn, wi fet de gɛt mɔ valyu ɛn i de strɔng. (1 Pit. 1:​7) Ɛn tɔd, wi go gɛt blɛsin we wi nɔn nɔ ebul pe fɔ, we na layf we go de sote go.—Rom. 2:​6, 7.

19. Wetin mek di apɔsul dɛn bin gladi afta we dɛn bit dɛn?

¹⁹ Shɔt tɛm afta we Jizɔs bin gɛt layf bak, in apɔsul dɛn bin gɛt di gladi-at we i bin dɔn tɔk bɔt. Afta we dɛn bit dɛn ɛn tɛl dɛn mek dɛn lɛf fɔ prich, dɛn bin gladi. Wetin mek? “Bikɔs na ɔnɔ fɔ sɔfa fɔ [Jizɔs] in nem.” (Akt 5:​40-42) Di lɛk we dɛn lɛk dɛn Masta bin rili strɔng pas di fred we dɛn bin de fred dɛn ɛnimi dɛn. Ɛn dɛn bin sho da lɔv de bay we dɛn “kɔntinyu” fɔ tɔk bɔt di gud nyuz ɛn nɔ taya. Bɔku pan wi brɔda ɛn sista dɛn tide de kɔntinyu fɔ sav Jiova fetful wan pan ɔl we dɛn de gɛt bɔku prɔblɛm dɛn. Dɛn no se Jiova nɔ go fɔgɛt dɛn wok ɛn di we aw dɛn dɔn sho se dɛn lɛk in nem.—Ibru. 6:​10.

20. Wetin wi go tɔk bɔt insay di nɛks atikul?

²⁰ Pipul dɛn na di wɔl go et wi te dis wɔl dɔn. (Jɔn 15:​19) Bɔt wi nɔ nid fɔ fred. As wi go si insay di nɛks atikul, Jiova go ɛp in fetful savant dɛn fɔ “tinap tranga wan, ɛn i go protɛkt” dɛn. (2 Tɛs. 3:​3) So mek wi kɔntinyu fɔ lɛk Jiova, lɛk wi brɔda ɛn sista dɛn, ɛn ivin lɛk wi ɛnimi dɛn. We wi fala dɛn advays dɛn ya, wi go gɛt wanwɔd ɛn wi fet go strɔng mɔ, wi go briŋ ɔnɔ to Jiova, ɛn wi go pruv se lɔv gɛt pawa pas we dɛn et wi.