1. Toko cinthoonyeraaya Matewus 24:9, kontha isiyani khanintepa ukhala ootikhinihiya atthu o ntuninyani yanithanyaka?

YEHOVA numpile wiira naafente akhwiihu ni wiira nifentiye. Phimaana ntthu anithanyaka, hiiva ninaakhala ooriipiya nrima ni owoova. Wootakihera, nrokorihu Georgina nokhala u Europa, neera: “Ukati waarinaaka myaakha 14, amaama yaanaakithanya nlattu miiva wonswalela Yehova. Mi kaakhalaka ooriipiya nrima ni kiicoonaka ukhala veekha, mpaka kahancera uhaamini wiira ki ntthu ooloka.” * Munna mmoca neehaniya Danylo hantikha co: “Anatoropa yahokaattakaca, yahokiruwanakaca ni yahokoopopihaca nlattu miiva wookhala Saahiti a Yehova. Uyo ukatyuuyo, mi kahotuthuwa ni wahokuula muru.” Iyo inanna yoothanyiyeeyo inaaniriipiha nrima, masi khanintikhina. Yesu ahohimya wiira hiiva nanhala uthanyiya.—Nsome Matewus 24:9. *

2-3. Nlattuni atthari a Yesu anthanyiyaaya?

² Atthu o ntuninyani anawaathanya atthari a Yesu. Nlattuni? Kontha, ayo ‘khampanka mphantte wotuninya’ khampa Yesu cahaapankilyaawe. (Joau 15:17-19) Hiiva ninawaahisimu akhulupale anhoolela ilapo cinkhaleehu, masi khaninaaswalela awula khaninswalela citthu caya. Hiiva ninonswalela Yehova paahi. Hiiva ninkupali wiira Nluku paahi phirina isariya yo waahoolela apinaatamu, masi Sotwani nuucuulwaawe anaakhottha wiira Nluku haana isariya yoohoolela. (Upha. 3:1-5, 15) Hiiva ninlalyeera wiira Umwene wa Nluku paahi phinhala ukhitiri umaliha masakha aapinaatamu, ni uyo umwennyooyo unaahala waamalamaliha otheene ale anonrukunuwela Nluku. (Dan. 2:44; Apoka. 19:19-21) Atthu ooreera nrima anoonela ukhala ihapari comaana ayo moolumwaayo, masi atthu oohiloka  anwehera ukhala ihapari coohinamaana.—Isaa. 37:10, 11.

³ Itthu ikhwaawe inniiriha uthanyiya, ukhalaka wiira nintthara meettelo osariya a Nluku. Nalattanihaka meettelo anoncivela Nluku ni meettelo aatthu o ntuninyani, ninawoona wiira anaavirikana cinene. Wootakihera, Nluku ahomalamaliha isittatti yo Sotoma ni yo Komora khalayi, kontha atthu yaakhala nnyo isittattinnyo yaapanka citthu coohiirya ni coohinamaana. Nnyo phi citthu cimocaaru cimpankaaya atthu ntuninyani mahukwaala! (Yuda 7) Ukhala wiira hiiva nintthara malamulo o mbiiblyani ni ninaakhotta upanka nnyo citthunnyo, atthu enci anaanitarawaca ni anaanootheriha wiira ninawaathanya!—1 Pet. 4:3, 4.

4. Isiyani innivaha ikuru wiira nikhitiri uvilela nathanyiyaka naatthu?

⁴ Isiyani inhala unikavihera uvilela uthanyiya ni uruwaniya naatthu? Nihaana naaminiki venci wiira Yehova naahala unikavihera. Waamini uri toko nikula nowaakihera ninnikavihera ‘uttipihaca mavaka otheene oopharela a Ntakhali.’ (Efesu 6:16) Masi uhiya waamini, ihaavo itthu ikhwaawe inhala unikavihera. Nihaana nikhalanaka nifento. Kontha isiyani? Kontha ntthu nokhalana nifento khanaakuva urusiya. Uyo naapisera nrima citthu cotheene ni naavilela citthu cotheene, hataa cikhalaka citthu cooriipiha nrima. (1 Akor. 13:4-7, 13) Vano, nttwee noone manannani unfenta Yehova, waafenta akhwiihu, ni hataa waafenta awananiihu cinnikaviheraaya uvilela uthanyiya.

5. Manannani Yesu caalipilyaawe nlattu wo waafenta Athumwaane?

⁵ Unahanle vakaani uphiya ukati Yesu waahalaawe wiiviya naalupatthyaawe, uyo ahowiirela attharyaawe ookhuluvelya: “Mi kinawaafenta Apaapa, [phimaana] kinaapanka khampa cikirumilyaaya.” (Joau 14:31) Unfenta Yehova wahomphwanyiha Yesu ikuru caahala unkhitiriha uvilela marikariko yaahala umphwanya. Unfenta wihu Yehova unaahala unikavihera niinanna imocaaru.

6. Toko cinthoonyeraaya Arooma 5:3-5, atthu anonswalela Yehova ankhala cani yathanyiyaka naatthu ontuninyani?

⁶ Ukhuma nenne no khalayi, unfenta Yehova unawaakavihera atthu anonswalela uvilela ulupatthiya. Wootakihera, ikwaha imoca itripunali yuulupale ya ayuuta yahaakhottihera maapostolu ulalyeera. Masi maapostolu yaananfenta cinene Nluku. Phimaana, ayo yaholakela “umwiiwelela Nluku khampa nhooleli waahiya apinaatamu.” (Mite. 5:29; 1 Jo. 5:3) Iyo phi itthu imocaaru impankaaya mayamunneehu ilelo. Mayamunna enci anaalupatthiya cinene naakhulupale ookuvernu oolupale ni oohinamaana, masi unfenta Yehova unawaavaha ikuru wiira avilele. Phimaana, atthu o ntuninyani yanithanyaka, hi khaninkhala oovololaca, masi ninaakhala ootteeliya.—Mite. 5:41; nsome Arooma 5:3-5. *

7. Isiyani inlamuliyeehu upanka amuciihu yanilupatthaka?

⁷ Hiivano pooti utepa unirika uvilela wakhalaka wiira amuciihu phinnilupattha. Amuciihu akiina yanoonaka wiira nihancera wiitthuca ikhweeli ca Yehova, ayo pooti wancera wuupuwela wiira ninaathepiya. Akhwaawe pooti wuupuwela wiira nihoovahuwa. (Nwehe ciicammo Markus 3:21.) Ayo mpaka pooti unaatta, unuulumacera awula unipanka citthu coohiloka. Yanikhumelelaka iyo, hiiva khanintepa ukhala ootikhinihiya. Yesu aheera: “Alupatthi a pinaatamu anhala ukhala atthu o wapuwani wawe.” (Mat. 10:36) Hiiva ninaacuwela wiira hataa amuciihu yanipankaka isiyani, khaninhala waawehera khampa awananiihu. Masi, ukati unvireehu nitepaka unfenta Yehova, nihaana ciicammo nitepaka waafenta akhunanihu. (Mat. 22:37-39) Unookhalaru commo, khaninlamuliya uhiya weettela malamulo ni mattharelelo o mbiiblyani wiira paahi naatteelihe nrima apinaatamu akhwiihu.

8-9. Isiyani yankavihenre nrokorihu uvilela hataa alupatthiyaka cinene?

 ⁸ Nrokorihu Georgina, romoliye wiipaceroni, ahokhitiri uvilela hataa alupatthiyaka venci naanumwaane. Georgina neera: “Mi naamaama nancere nkhayi usomihiya Ibiiblya ni Masaahiti a Yehova. Waavinryaaya myeeri siita, mi kahopheela urwaa umikutthaanoni, masi amaama yahokirukunuwela. Kahoonenela wiira ayo yanwiiwelelaka atthu anwuuluma pusya Masaahiti a Yehova, ni yaanaakulumelaka citthu cowoothiya ceewelelaaya. Ayo ciicammo yankiruwanakacaka, yankicottaka ikharari, yankisokota nsikoni ni yanrihakacaka ilivuru caka. Ukati waapiihilyaaka myaakha 15, mi kahopattisiya. Wiira amaama amananihe ukihiiha unswalela Yehova, ayo yahokirwaana inupa yaarweehiya amirawo oohunya maaru wiira kakhale wonwo. Nno nipuronno, mi kaakhala naamirawo yaalyaalyaaca citthu coohapala ni yaapanka ikhirini. Unaatepa urika uvilela wakhalaka wiira ntthu nnilupattha, khanle ntthu aalamuliya unifenta ni uniwacera saana.”

⁹ Isiyani yankavihenre Georgina uvilela? Uyo neera: “Nihuku naakirukunuwenlyaaya amaama, naari nihuku naamalihaaka usoma Ibiiblya yotheene. Mi kankupaleeha wiira kahophwanya ikhweeli, ni kaaneecoona ukhala mpatthani a Yehova. Khula ukati, mi kaananlompa ni uyo aanaakiviriyana. Ukati waakhalaka nipuro naamirawo naakirwannyaaya amaama, nuunu mmoca o wanlokoni ankilattulaka uwannyawe wiira nasomace Ibiiblya nkhayi. Uyo ukatyuuyo, mayamunna ni mayanuunu o wanlokoni yahokilipiha venci. Ayo yaakoona ukhala mmucyaaya. Mi kihooneeha wiira Yehova khanle nakuru unvikana khula ntthu nonirukunuwela.”

10. Isiyani ninlamuliyeehu ukupali wiira Yehova naahala upanka?

¹⁰ Apostolu Paulu hantikha wiira khiivo itthu inhala ukhitiri “unimwalaniha nnifentoni na Nluku, niri iriyari wa Yesu Kristu, Apwiiyeehu.” (Aroo. 8:38, 39) Hataa uviraka ukati mwinci nilupatthiyaka, pooti wankupaliihu wiira Yehova khanhala uhiya ukhala wamoca ni hiiva, ni naahala univaha ikuru ni naahala unimaaliha. Ni toko cinthoonyeraaya itthu yankhumelenle nrokorihu Georgina, Yehova ciicammo naahala waakurumica mayamunneehu ni asirokorihu o wanlokoni wiira anikavihere.

11. Nifento Yesu romonlyaawe nhina Joau 15:12, 13, naahala waakavihera cani attharyaawe? Nttonkace ntakihero.

¹¹ Uhiyu woomalela Yesu hinaaya wiiviya, uyo ahowiirela attharyaawe wiira ayo yaalamuliya ufentana. (Nsome Joau 15:12, 13. *) Uyo ancuwela  wiira ufentana wanhala waakavihera uhihiya wiiwanana ni uvilela yathanyiyaka naatthu o ntuniyani. Moone itthu yaakhumelenle wanlokoni no Tesalonika. Ukhuma ukati waatthenkaciyaaya nloko no Tesalonika, mayamunna o nno nlokonno yanlupatthiya venci. Waahookhalaru commo, ayo yahovilela ni khayaahiile uthoonyera nifento. (1 Atesal. 1:3, 6, 7) Paulu ahaakurumica mayamunna o Tesalonika wiira ahihiye uthoonyera nifento, ni ahowiirela wiira ‘ahihiye uvira yatepaka upanka iyo.’ (1 Atesal. 4:9, 10) Nifento nanhala waakurumica wiira yaamaalihe ale yaari ni masukhuli ni yaakavihere ale yahaakhomanle. (1 Atesal. 5:14) Mayamunna o Tesalonika khweeliini yahotthara malakihero yaavahiyaaya ni Paulu. Phimaana, nhina iwarakha yonayeeli Paulu yaawantikhenlyaawe uviraya waya mwaakha mmoca, uyo ahowiirela co: “Ufentana winyu otheene cinyu, unvira wuncereryaaka.” (2 Atesal. 1:3-5) Nifento naathoonyeraaya mayamunna o Tesalonika nahaakavihera uvilela ulupatthiya.

12. Ukati ilapo imoca waalavaniyaaya ikhotto, mayamunna yaathoonyenre cani ufentana?

¹² Moone itthu yankhumelenle munna Danylo, romoliye wiipaceroni, wamoca naamwaarawe. Isittatti yaakhalaaya yahokhumelela ikhotto. Hataa ukhalaka commo, Danylo naamwaarawe khayaahiile urwaa umikutthaanoni, wiikurumica ulalyeera niinanna yaakhitiryaaya, ni waameela mayamunnaaya iyoolya yaarinaaya. Nihuku nimoca, anatoropa niikaputthi caya yahonvara munna Danylo. Uyo neera: “Anatoropa yahokikhanyereriha wiira kihiye ukhala Saahiti a Yehova. Waakhottilyaaka, ayo yahokaattakaca ni yahokhala toko wiira ampheela ukoopela, yoopelaka uculu murwaaka. Ahinaaya urwaa, ayo yahonoopopihaca, yiiraka wiira yanhala uturuwela wiira yowaarupanace amwaaraka. Masi wowaakuvya, mayamunna yahonipakheriha nkompoyuni wiira nirwee isittatti ikhwaawe. Mi akinhala uliyala mananna caanifentilyaaya ale mayamunnaale. Uphiya wihu isittatti ikiineeyo, mayamunna yahonivaha iyoolya ni yahonikavihera uphwanya nteko ni inupa. Nlattu wo iyo, hiiva ciicammo nahokhitiri waakavihera mayamunna akhwaawe yaawile yatthawaka ikhotto.” Citthu cowiirannya toko iyo cinthoonyera wiira ufentana wihu unaanikavihera uvilela uthanyiya.

13. Nnepa wowaarya unnikavihera cani uhihiya unswalela Yehova, hataa nilupatthiyaka?

¹³ Yesu ahowiirela attharyaawe wiira yahaana yaafentaka awanannyaaya. (Mat. 5:44, 45) Niireke upanka iyo khunrika? Khweeliini unaarika! Masi nlattu wookaviheriya ni nnepa wowaarya wa Nluku, hiiva ninaakhitiri upanka iyo. Uhiya paahi ufenta, ahaavo-tho makhalelo onnepa wowaarya wa Nluku, toko uvilela, maana, umaala ni wiivaraca. (Akalas. 5:22, 23) Makhalelo  otheene ayo anaanikavihera uvilela uthanyiya. Atthu enci yaanilupattha khalayi, yahorukunusa moopuwelelwaaya ukati waawonnyaaya awannyaya, amwaaraya, mwanaya awula aattamanannyaaya yathoonyeraka ayo makhalelwaayo. Ni enci nna co ahokhala mayamunneehu. Phimaana, woorikani waafenta ale anoothanyani nlattu wonswalela Yehova, nlompe munlepelaka Yehova nnepaawe wowaarya. (Luka 11:13) Ni nkupali wiira khula ukati, umwiiwelela Yehova phiri itthu yooreera upanka.—Miru. 3:5-7.

14-15. Itthu inhimyaaya Arooma 12:17-21, yankavihenre cani Yasmeen waafenta awannyawe, hataa yanlupatthaka?

¹⁴ Moone itthu yankhumelenle nrokorihu neehaniya Yasmeen, nokhala ncoko wo Oriente Médio. Ukhala wawe Saahiti a Yehova, awannyawe yoopuwenle wiira uyo ahancera uthepiya ni yahomananiha unhiiha unswalela Nluku. Ayo yahonruwanakaca nrokorihu ni yahowuulumana amuci, nhooleli ottiini mmoca, ni yahomuulumana nkhwiri mmoca wiira amootherihace nrokorihu umwalaniha itthoko. Ikwaha imoca, awannyawe nrokorihu Yasmeen yahorwaa mpaka Usalau yo Umwene ni yahaaveehaca mayamunna ulavaniyakoono nkutthaano! Ikwaha cinci, nrokorihu Yasmeen aakhalaka onlaka nlattu wo mananna caahuvihiyaawe naawannyawe.

¹⁵ Nrokorihu Yasmeen arwaaka Usalau yo Umwene, uyo ammaalihiya ni anvahiya ikuru ni mayamunnaawe o wanlokoni. Mahumu yahonkurumica weettela ikano iri nhina Arooma 12:17-21. (Nsome. *) Yasmeen neera: “Mi wahokirika, masi akaahiya unlepela Yehova wiira akikavihere, ni kaaneekurumica weettela itthu inhimyaaya Ibiiblya. Phimaana, awannyaka yarihelaka ikokhola nkusinya imweeni wiira akinyoonyihe, mi kankweca. Yakiveehaka, mi kanwaakhula saana. Ni yawerennyaka, mi kaanaawacera sana-saana.”

16-17. Ntakihero na Yasmeen niwiitthucihileni isiyani?

¹⁶ Nrokorihu Yasmeen hocaalihiya nlattu wowaafenta awannyawe. Uyo neera: “Awannyaka yahancera utepa ukikhuluvela kontha yancuwela wiira akaahala waathepya. Ayo ahancera ukiviriyana niihisima noopelaka mwaha ittiini, ni ayo ahaamini ukhalakhala ninnema wapuwani. Nna co, awannyaka anaakikurumica wiira kihilove umikutthaanoni. Itthokweehu ihokhala yomaana nna co, ni ihokhala nipuro khweeliini nonnema. Mi kinweherera wiira wanihukuni awannyaka apheele wiitthuca  ikhweeli ni yancere unswalela Yehova nkhayi ni miiva.”

¹⁷ Itthu yankhumelenle Yasmeen inthoonyera wiira nifento “ninaapisera nrima citthu cotheene, . . . ninaaweherera citthu cotheene, ninaavilela citthu cotheene.” (1 Akor. 13:4, 7) Khweeliini, uthanyiya unaawerya ni pooti uniriipiha nrima, masi nifento phitepile ukhalana ikuru. Naafentaka akhunanihu, ayo pooti urukunusa mananna cinniweheraaya ni uhiya unithanya. Ni itthu yuulupale cinene, ukhalaka wiira nifento, ninantteeliha nrima Yehova. Masi hataa ukhalaka wiira ale annilupattha khanhiya unithanya, hiiva ninaatteeliya nrima. Manannani?

18. Nlattuni ninlamuliyeehu utteeliya nrima hataa nithanyiyaka?

¹⁸ Yesu aheera: “Ootteeliya nnohala ukhala nyuuva khula ukati unhaleenyu uthanyiya ni apinaatamu.” (Luka 6:22) Hiiva khaninlakela wiira nithanyiye. Khunnicivela uhuvihiya nlattu wonswalela Yehova. Vano, nlattuni untteeliyeehu nrima nathanyiyaka? Nlattu wo citthu tthaaru. Yoopacera, navilelaka uthanyiya, Yehova naaciveliya ni hiiva. (1 Pet. 4:13, 14) Yonayeeli, waamini wihu unaakhala wofayita ni woolipa cinene. (1 Pet. 1:7) Ni yoneeraru, ninaaweherera waakhela iparakha yooreera: ukumi woohimala.—Aroo. 2:6, 7.

19. Nlattuni maapostolu waakhanlyaaya ootteeliya wuufulaciya waya?

¹⁹ Uvira waya ukati vakaani Yesu nonwelelihiye, maapostolu wahaatteela nrima toko Yesu caahimilyaawe. Ukati wuufulaciyaaya ni waakhottihiyaaya ulalyera, ayo yahokhala ootteeliya. Nlattu wosiyani? “Nlattu wowuupuwela wiira ayo waanaaphwanela woonihaciya ihaaya mwaha woncina [na Yesu].” (Mite. 5:40-42) Maapostolu yaananfenta venci Pwiiyaaya uvikana mananna caawoovaaya ale yaalupattha. Ni maapostolu yahothoonyera nno nifentonno nlattu woolalyeera ihapari comaana “wooheemelela.” Mahukweehaala, mayamunneehu enci khanhiya unswalela Yehova hataa yakhalanaka masankiho. Ayo anaacuwela wiira Yehova khanhala uliyala nteko uvanryaaya ni inanna cifentilyaaya ncina nawe.—Mabere. 6:10.

20. Isiyani inhaleehu wiitthuca nhina mwaha nkiina unhaleehu ukela?

²⁰ Hi ninaahala uthanyiya mpaka wanhalaaya umalamalihiya ila ituninyeela. (Joau 15:19) Masi khaninlamuliya woova. Toko cinhaleehu woona nhina mwaha woosomihiya unhaleehu ukela, Yehova ‘naahala waalipiha ni waakhikicera’ atthu ookhuluvelya anonswalela. (2 Atesal. 3:3) Phimaana, nhihiye unfenta Yehova, waafenta mayamunneenyu o wanlokoni ni hataa ciicammo waafenta awananiinyu. Neettelaka iyo ikannweeyo, ninaahala ukhala owiiwanana ni waamini wihu unaahala ukhala woolipa, ninaahala uttitthimiha ncina na Yehova ni ninaahala uthoonyera wiira nifento phitepile ukhalana ikuru, uvikana uthanyiya.