1. Ukulingana na Mateo 24:9, u mulandu ci uno tutalinzile ukuzungukila ndi cakuti amu nsi yatupata?

YEOVA watuumvile ukuti twatemwa antu yauze nu kulonda ukuti nayo yatutemwe. Fwandi ndi cakuti umwi watupata, tukauvwa sana uyi nupya limwi tukasakamala nu kusakamala. Nkazi Georgina aakaikala uku Ulaya walanzile ukuti: “Lino nali ni myaka 14 ya mayo yampasile sana pa mulandu nu kuombela Yeova. Nuvwanga sana uyi nu kuzukilwa, natandike nu kwelenganya ukuti limwi asi nene muntu musuma.” * Umwina Danylo walemvile ukuti: “Lino asilika yangumile, iyantuka nu kuntinya ukuti yamancisa pa mulandu wakuti nene Nte Yakwe Yeova, nuvwile intete nupya nuvwile uyi.” Tukauvwa sana uyi ndi cakuti antu yatupata, nomba cico cisituzungusya. Yesu wasoowile ukuti antu yalatupata.—Belengini Mateo 24:9.

2-3. U mulandu ci uno antu yapatila alondezi yakwe Yesu?

² Amu nsi yapata alondezi yakwe Yesu. U mulandu ci? A pa mulandu wakuti asi sweswe ya mu nsi wakwe vino na Yesu ataali uwa mu nsi. (Yoa. 15:17-19) Fwandi nanti cakuti twacindika ya kateeka antunze, tukakana ukuyapepa nanti ukupepa ivinkolanya ivikaimililako ya kateeka kwene yayo. Tukapepa sile Yeova wenga mpo. Tukatungilila icisinka icakuti Leza u wakwata insambu zya kuteeka antunze, nomba Satana nu mwanakwe yakakana ukuti Leza atakwata insambu zizyo. (Utan. 3:1-5, 15) Tukasimikila pa Wene Wakwe Leza ukuti uulafumyapo intanzi zyonsi zino antu yakakwata nu kuti wasya onone yonsi aakakana ukuutungilila. (Dan. 2:44; Umbw. 19:19-21) Ilyasi lii i lisuma uku antu afuuke nomba i liipe uku antu aakacita iviipe.—Masa. 37:10, 11.

 ³ Nupya antu yatupata pa mulandu wakuti tukauvwila masunde yakwe Leza. Masunde yakwe Leza yapusana sana na vino antu amu nsi ii yamanya. Wakwe, antu aingi yasielenganya ukuti caipa ukucita uzelele wa misango yonsi uwalenzile ukuti Leza aonone Aina Sodoma na Gomola. (Yuda 7) Pa mulandu wakuti tukalondela masunde aya muli Baibo aakalesya imiyele iyo, antu aingi yakatusaalula nu kutulola ukuti tukaipaatula uku yantu yauze.—1 Pet. 4:3, 4.

4. I miyele ci iikatukomya ndi cakuti antu yatupata?

⁴ I cani cingatwazwa ukuzizimizya ndi cakuti antu yatupata nanti yakututuka? Tulinzile ukutaila sana ukuti Yeova alatwazwa. Utailo witu ulaya wa “cisyangu, mwakusiika mivwi yamoto kufuma ku Mwipe wilya.” (Efes. 6:16) Nomba tulinzile ukukwata sana utailo. Nupya tulinzile ukuya nu kutemwa. U mulandu ci? Pano ukutemwa “kusyasepukilwa.” Kusyanenuka nupya kukazizimizya iviipe vyonsi. (1 Kol. 13:4-7, 13) Lekini lyene tulole vino ukutemwa Yeova, kutemwa Aina Klistu yanji nu kutemwa alwani itu kungatwazwa ukutwalilila ukuombela Yeova na lino amu nsi yatupata.

5. I vyani vino Yesu wacisile pa mulandu wakuti watemilwe Isi?

⁵ Pa wanda wa kusyalikizyako usiku lino Yesu atatala wafwa, wanenyile alondezi yakwe acisinka ukuti: “Natemwa Tata. Uli mulandu uno nkacita vyonsi vino wampeela ilamulo kuti ncite.” (Yoa. 14:31) Pa mulandu wakuti Yesu watemilwe Yeova, calenzile azizimizye intazi zyonsi zino wakweti. Naswe kwene ukutemwa Yeova kungatwazwa umu nzila ili imwi.

6. Ukulingana na Loma 5:3-5, uzye aomvi yakwe Yeova yakauvwa uli ndi cakuti amu nsi yayapata?

⁶ Ukutemwa Leza lyonsi kukaavwa aomvi yakwe Yeova ukuzizimizya lino yakuyacuzya. Kutemwa Leza kwalenzile atumwa “ukuyela Leza, kuluta kuyela antu” lino amu cilye icikalamba ica Ayuda yayalesizye ukusimikila. (Mili. 5:29; 1 Yoa. 5:3) Kutemwa kwene kuu kukaazwa aina itu ukutwalilila ukuya nu utailo ukome lino mauteeko ya maka yakuyacuzya. Lino antu amu nsi yatupata, tusitoovoka lelo tukaya ni nsansa.—Mili. 5:41; belengini Loma 5:3-5.

7. Uzye tulinzile ukucita uli ndi cakuti ya lupwa itu yakutukanya?

⁷ Ndi cakuti amu lupwa lwitu aakutukanya, cingatutalila sana ukuzizimizya. Ndi cakuti ya lupwa itu yamwi yalola ukuti twatandika ukusambilila pali Yeova, yangaelenganya ukuti kuli akutuponzya. Yauze yangatandika ukwelenganya ukuti itupena. (Loliniko na Mako 3:21.) Yangatandika nu kutucuzya sana. Ukucuziwa kuu, kutalinzile ukutuzungusya. Yesu watiile: “Amu ng’anda ya muntu yalaya ali anisi yakwe aipisye.” (Mate. 10:36) Nomba asi mulandu na vino ya lupwa itu yangatucitila, tutalinzile ukuyapata. Lino tukuya tukutemelwako Yeova, tukaya tukutemelwako na antu yanji. (Mate. 22:37-39) Nomba tutalatala tute ukulondela masunde ni visinte ivyaya muli Baibo pakuti sile tuzanzye antu yauze.

8-9. I cani cavwile nkazi Georgina ukutwalilila ukuya nu utailo ukome asi mulandu nu kucuziwa?

⁸ Nkazi Georgina wino itulandapo mpiti watwalilile ukuya nu utailo ukome nanti cakuti ya nyina yamucuzyanga. Nkazi Georgina walondolwile ukuti: “Ya mayo nani twatandike ukusambilila Baibo na ya Nte. Nomba pa cisila ca myezi 6 lino nalondanga ukutandika ukuya umu kulongana, ya mayo yatandike ukunkanya. Nizile imanya ukuti ya mayo yalanzyanyanga na asangu, nupya yaomvyanga ufi uli umwi kwene uno asangu yalandanga pali ya Nte ndi cakuti yakulanda nani.  Nupya yantukanga, ukuntinta inyele, ukumfena pa nsingo alino nu kunsumbila impapulo. Pa cisila ca kukumanya imyaka 15, nabatiziwe. Ya mayo yantwazile kuno yakasungila akazyana aaya ni miyele iipe, pano yalondanga inte ukuombela Yeova. Cikatala sana ukuzizimizya ukucuziwa sana sana ndi cakuti ku kufuma uku muntu wino alinzile ukukutemwa nu kukusakamala.”

⁹ I cani cavwile nkazi Georgina ukuzizimizya? Watiile: “Uwanda uno ya mayo yatandike ukuncuzya ali wanda uno namazile ukubelenga Baibo yonsi. Lyene nasininkizye ukuti inzana icumi nupya nayuvwile ukuti impalama sana kuli Yeova. Ilingi napepanga kuli aliwe nupya wanguvwanga. Lino nali kuku, nkazi umwi wangamile uku ng’anda ukwakwe, twabelengiile pamwi Baibo, ukulondelezya ivyeo nu kulola vino tungaomvya ivyeo vivyo. Pa nsita iya, nga naya uku Ng’anda ya Wene aina na ya nkazi yankomelezyanga. Yalenganga nayuvwa ukuti nene lupwa lwao. Nasininkizye ukuti Yeova wakwata sana maka ukucila aakatukanya asi mulandu na vino antu yayo yangaya.”

10. I vyani vino tungasininkizya ukuti Yeova Leza witu angacita?

¹⁰ Mutumwa Paulo walemvile ukuti kusi icili consi “icingatupaatukanya ku kutemwa kwakwe Leza muli Klistu Yesu Mwene witu.” (Loma 8:38, 39) Nanti icakuti tungacula pa nsita iitali, Yeova alatwalilila ukutwazwa nu kutukomelezya. Nupya wakwe vino cali kuli nkazi Georgina, naswe kwene Yeova akatwazwa ukuomvya aina itu na ya nkazi umu cilongano.

11. Uzye ukutemwa kuno Yesu walondolwile pali Yoane 15:12, 13 kwali nu kwazwa uli asambi yakwe? Langililini.

¹¹ Lino Yesu atatala wafwa, wanenyile asambi yakwe ukuti yatemwana. (Belengini Yoane 15:12, 13.) Wamanyile ukuti ukutemwana ukufuma pansi ya mwenzo kwali nu kuyavwa ukutwalilila ukulemana alino nu kuzizimizya ulupato lwa yantu amu nsi ii. Elenganyini ivyacitikile amu cilongano ca mu Tesalonika. Ukufuma lino icilongano cii capanzilwe, amu cilongano yayacuzyanga sana. Nomba aina na ya nkazi yalangilile ukuti yazizimizye nupya yali nu kutemwa. (1 Tesa. 1:3, 6, 7) Paulo wayakomelizye ukutwalilila ukulanga ukutemwa nu kucita cii nu kuluta. (1 Tesa. 4:9, 10) Kutemwa kwali nu kuyazwa ukusansamusya  aali nu ulanda nu kwazwa atonte. (1 Tesa. 5:14) Yalondiile vino Paulo wayanenyile muli kalata wakwe ciili uno wayalembiile pa cisila ca mwaka onga, muno wayanenyile ukuti: “Kutemwana pakasi kinu kukukulilako.” (2 Tesa. 1:3-5) Kutemwa kwalenzile yazizimizye intazi nu kucuziwa.

12. Lino kwali inkondo uku mpanga imwi, uzye aina na ya nkazi yalangilile uli ukuti yatemwana?

¹² Uvwini ivyacitikiile umwina Danylo wino itulandapo mpiti na mamakwe. Lino inkondo iyacitikanga umu mpanga yao yafisile uku ncende kuno ikalanga, yatwalilile ukuzanwa umu kulongana, ukwezya na maka ukusimikila nu kwankanyako aina na ya nkazi ivyakulya. Lyene wanda umwi asilika aali ni vyanzo yaile pa ng’anda yakwe ya Danylo. Ya Danylo yatiile: “Yanenyile ukuti ndande ukuti nata ukuya Nte. Lino nakanyile, yangumile nu kucita kwati yakulonda ukumpika umu mutwe. Lino yatatala yapita yanenyile ukuti yali nu kuwela nu kwizalala na mamane uku maka. Nomba zuwa zuwa aina yatukwezizye isitima pakuti tuye uku ncende yuze. Ntalatala nilile vino aina yaya yatulanzile ukutemwa. Nupya lino twafisile uku ncende iya, aina yatupeezile ivyakulya nupya yangazwile ukuzana incito ni ng’anda. Nupya pa mulandu na vii calenzile naswe twazwe aina yauze autwike ukufuma uku ncende ukwali inkondo.” Amalyasi ya musango uu yakalangilila ukuti ukutemwana kuno twatemwana kungatwazwa ukuzizimizya lino yauze yatupata.

13. Uzye umupasi wa muzilo ukatwazwa uli ukuzizimizya lino tukuombela Yeova nanti i cakuti antu yatupata?

¹³ Yesu wanenyile alondezi yakwe ukulatemwa alwani yao. (Mate. 5:44, 45) Uzye i canguke ukucita vivyo? Awe foo. Nomba tungakwanisya ukucita vivyo ndi cakuti umupasi wa muzilo wakwe Leza watwazwa. Pa miyele ino umupasi wa muzilo wakwe Leza ukatupeela paya nu kutemwa, ukuteeka umwenzo, icikuuku, ufuuke nu kuikanya. (Gala. 5:22, 23) Miyele ii ikatwazwa ukuzizimizya lino amu nsi yatupata. Antu aingi yata ukutukaanya pa mulandu wakuti ya iya, aci, umwana nanti ainamupalamano yayalanzile imiyele kwene ii. Nupya aingi pali yayo, ndakai a ina itu na ya nkazi. Fwandi ndi cakuti cikamutalila ukutemwa yayo amupata pa mulandu wakuti mukaombela Yeova, mwamulenga ukuti amupeele umupasi wa muzilo. (Luka 11:13)  Nupya mwataila ukuti ukuvwila Leza aali cintu ca mpomvu cino mulinzile ukucita lyonsi.—Mapi. 3:5-7.

14-15. Uzye ilembelo lyakwe Loma 12:17-21, lyavwile uli nkazi Yasmeen ukulanga ukutemwa kuli ya iya nanti cakuti yamucuzyanga?

¹⁴ Uvwini ivyacitikiile nkazi Yasmeen aakaikala uku Middle East. Lino wizile aya Inte Yakwe Yeova, ya iya yatandike ukwelenganya ukuti watabepwa nupya yezyanga ukumulesya ukuombela Leza. Yamutukanga nupya yanenyile ya lupwa, simapepo na aakacita ivya ulozi ukuti yamutiinye nu kumunena ukuti vino wacitanga vyaletanga icimvulunganya umu lupwa. Nupya ya iya yatusile aina ala yali pa kulongana. Ilingi nkazi Yasmeen walilanga sana pa mulandu na vino ya iya yamucuzyanga.

¹⁵ Ndi cakuti nkazi Yasmeen waya uku Ng’anda ya Wene, aina na ya nkazi yamuteekezyanga nu kumukomelezya. Ya eluda yamukomelizye ukulacita vino ilembelo lyakwe Loma 12:17-21 likalanda. (Belengini.) Nkazi Yasmeen watiile: “Citangwike. Nomba nalenzile Yeova ukuti angazwe, nupya nezizye na maka ukucita vino Baibo ikalanda. Fwandi ndi cakuti ya wane yasumba ivikona umu cikini, nazifyanga sile. Ndi cakuti yantuka, nasukanga ni cikuuku. Ndi cakuti yalwala, nayasakamalanga.”

16-17. I vyani vino mwasambilila kuli vino vyacitikiile nkazi Yasmeen?

¹⁶ Nkazi Yasmeen wapaazilwe pali vino walanganga ukutemwa kuli ya iya. Watiile: “Ya wane yatandike ukuntaila sana pano yamanyile ukuti lyonsi nalandanga icisinka. Yatandike ukukutika ndi cakuti tukulanda pa mipepele nupya yazumile ukuti tupange umutende. Ndakai lyene yakankomelezya ukuya umu kulongana. Lyene tukauvwana sana na ya wane nupya pa ng’anda paya umutende. Nkapalila ukuti wanda umwi ya wane yalazumila ukusambilila icumi nu kutandika ukuombela Yeova pamwi nani.”

¹⁷ Ivyacitikiile nkazi Yasmeen vikalanga ukuti kutemwa “kusyanenuka, . . . kukapaalila nga nu kuteeka mwenzo.” (1 Kol. 13:4, 7) Ndi cakuti tukulanga ukutemwa kuli yauze, yalasenuka muli vino yakayuvwa pali sweswe na pali Yeova nupya yalata ukutucuzya. Nupya ukucita vivyo kukalenga Yeova ukuya ni nsansa. Nomba nanti cakuti yano yakutukaanya yatwalilila ukutupata, tungatwalilila ukuya ni nsansa. Tungacita uli vivyo?

18. U mulandu ci uno tungayela ni nsansa ndi cakuti yatupata?

¹⁸ Yesu watiile: “Mwemwe ya nsansa ndi cakuti antu yamupata.” (Luka 6:22, NWT.) Tusilonda ukuti antu yatupate. Tusiuvwa ningo ndi cakuti yakutucuzya pa mulandu nu utailo witu. Nomba u mulandu ci uno tungayela ni nsansa ndi cakuti yatupata? Lekini tulande pa vintu vitatu. Ca kutandikilako ndi cakuti twazizimizya tulazanzya Yeova. (1 Pet. 4:13, 14) Cakwe ciili, utailo witu ulazipilako nupya ulakomelako. (1 Pet. 1:7) Na cakwe citatu, tulapokelela umi wa pe.—Loma 2:6, 7.

19. U mulandu ci uno atumwa yayeliile ni nsansa pa cisila ca kuyanyambola?

¹⁹ Pa cisila sile lino Yesu watuutululwa, atumwa yakwe yakweti nsansa zino wayanenyile ukuti yalaya nazyo. Pa cisila ca kuyanyambola nu kuyalesya ukusimikila, yali nu luzango. U mulandu ci? “Pano Leza wayapendile kuya alinge kusulwa pamulandu wi zina lyakwe Yesu.” (Mili. 5:40-42) Yatemilwe sana Umwene wao ukucila vino yatiinanga alwani yao. Nupya yalangilile vino yatemilwe Umwene wao lino yatwalilile ukusimikila ilandwe lisuma ukwaula ukuta. Aina itu aingi ndakai yatwalilila ukuombela Yeova na ucisinka asi mulandu ni ntazi zino yakakwata. Yamanya ukuti Yeova atalilila imilimo yao na vino yatemwa izina lyakwe.—Ayeb. 6:10.

20. I vyani vino tulasambilila umu cipande icilondeliilepo?

²⁰ Amu nsi yalatwalilila ukutupata mpaka insi ii ikafumiziwepo. (Yoa. 15:19) Nomba tutalinzile ukutiina. Wakwe vino tulasambilila umu cipande icilondeliilepo, Yeova ‘alakomelezya nu kucingilila’ antu yakwe aacisinka. (2 Tesa. 3:3) Fwandi lekini tutwalilile ukutemwa Yeova, ukutemwa aina itu na ya nkazi kwikako sile na alwani itu. Ndi cakuti twacita vii, tulatwalilila ukuya alemane nu kuya nu utailo ukome, tulalenga Yeova alumbanyiziwe nupya tulalanga ukuti ukutemwa kwakwata amaka ukucila ulupato.