1. Mateub 24:9 ǃoagu da ǃhuihe da ga ra o tae-i ǃaroma buru tide?

JEHOVAB ge ge kuru da î da ǀnam tsî ǀnamhe. Tsî i ga khoe-e ga ra ǃhui da o, o da ge kaise ra tsû. Tsî ǀnîsi ǀnî ǁaegu ais tsîna ra ǃao. Aiǁgause Georgina di ǀon hâ ǃgâsas hîna Europi ǃnâ ra hâs ge nēti ra mî. “Ti mamas ge 14 kurixa ta ge io, o ge ǃhui te hâ i. Jehovaba ta ra ǃoaba amaga. Tsî ta ge ǂgao-e tama ta khami gere tsâ. Tsî ge ge ǂâi tsoatsoa ǃgâi khoe tama ta sa.” * Danylo di ǀon hâ ǃgâsab ge ra xoa. “Soldagu ge ǂgaute tsî tita ǃoa ǁgai xūna a mî o. Tita ge Jehovab di ǃoaba-ao i ǃkhais ǃaroma. O da ge kaise ǁgaise tsâ tsî ge ǃao tsoatsoa.” ǁNāti i ǃhuib ge kaise a tsûtsû ǁkhā. Xawe da ge ǁnās xa buru tama hâ. Jesub tsîn ge ge mî ǃhuihe da nî ǃkhaisa.—Khomai re Mateub 24:9 sa.

2-3. Tae-i ǃaroman Jesub di saosabena ǃhuihe hâ?

² Nē ǃhūbaib ge Jesub di saosabena ǃhui hâ. Tae-i ǃaroma? Jesub khami da sida tsîna ‘ǃhūbaiba xu hâ tama’ hâ amaga. (Jhn. 15:17-19) ǃHūbaib di ǂhanuga da ge ra ǁnâuǀnam. Xawe da ge tātsēs tsîna ǁîn ta mâi hâ. Tamas ka io ǁîn kuru hâ xūna ǀgoreǀî tide. Sida ge Jehovab ǀguiba ra ǃoaba. Sida ge Jehovaba ra ǂkhâǃnâ îb ǁîba khoena ǂgaeǂgui. Xawe ǁGâuab tsî ǁîb di “surib” ge Jehovab di ǂgaeǂguisa ra mâǃoa. (Gen. 3:1-5, 15) Sida ge ra aoǁnâ Jehovab di Gaosib ǀguib khoena ǃâubasensa nî māsa. Tsîb nē Gaosiba ǁnān hîna ǁîna ra mâǃoana nî dīkākāsa. (Dan. 2:44; J.ǂHa. 19:19-21) ǁNā ǂhôas ge ǁnān  hîna ǃgamǃgamsenxan ǃaroma a ǃgâi. Xawe ǁnān hîna ǀgapi ǂâixan tawa ǃgâi tama hâ.—Psa. 37:10, 11.

³ Sida ge noxoba ǃhuihe hâ Jehovab di ǂhanuba da ra ǁnâuǀnam amaga. Jehovab ta mî ǀgaub, ǂhanun tsî tsūn ge kaise sida ǃaroma a ǃgâi. Xawe ǃhūbaib ge ǀnî hâ ǀgauba ra ǂgom. Aiǁgause, ǂgui khoen ge ǂgom tama hâ ǀaib a tsūsa. Tsîb Jehovaba ǁnāsa ǃhui hâsa. Sodoms tsî Gomoras tsînab ge ǁnā ǃkhais ǃaroma ge dīkākā. (Jud. 7) Sida Jehovab mā hâ ǂhanuba ra ǁnâuǀnam amagan ge. ǂGui khoena ra mâǃoa da tsî ǁnās ǀkha ra ǃkhāǃkhāda.—1Pet. 4:3, 4.

4. Mâ ǀgauga nî hui da khoen ga ǃhui da o?

⁴ Tae-e a hui da ǁkhā khoen xa da ga ǁgâiǀāhe tsî ga ra ǃhuihe. Tsî ǁgâi xūna ga ra mîhe ǁaeb ai? Kaise da ge ǀgaisa ǂgomsa nî ūhâ Jehovab nî huidasa. Sida di ǁâtanin khami i ge sida di ǂgoms tsîna “ǀaexa ǂāgu ǂkhabab digu hoaga a ǀari ǁkhā.” (Efe. 6:16) Xawe da ge ǀgaisa ǂgomsa ǂhâ hâ. Tsî da ge ǀnammi tsîna ǂhâ hâ. Tae-i ǃaroma? ǀNammi ‘ǂkhaba-i xare-e ǂâi tama hâ’ amaga. ǀNammi ge hoana ra ǃgū-ai tsî hoana ra tani ǀnam. (1Kor. 13:4-7, 13) Xawe hā re î da kō matib ǀnammi. Jehovaba da ūbahâb, ǀnammi sida ǃgâsana da ūbahâb tsî ǀnammi hîna da ǁnān hîna ra mâǃoadana ūbahâba nî hui da sa î da ǃgomsin ǃnâ mâǀgai.

5. Tae-eb ge Jesuba dī ǁkhā i Jehovabab a ǀnam amaga?

⁵ ǀUniga ǃuis hînab ge Jesuba ǁîb di ǁkhāǁkhāsabegu ǀkha hâ-is. Aib ge ǁîba ǁîga ǃoa ge mî. ‘Aboba ta ge a ǀnam tsî Abob ge mîmā te khami ta ge ra dī.’ (Jhn. 14:31) Jesub Jehovaba ūbahâ ǀnammi ge ge huibi îb hānî sī ǃgom ǁaegu ǃnâ mâǃkharu ǁkhā. Sida ǀnammi hîna da ǁîba ūbahâb tsîn ge ǁnāsa a dīǁkhā.

6. Romeǁîn 5:3-5 ǃoagu în mati Jehovab di ǃoaba-aona ra tsâ nē ǃhūbaib xa ǃhuihes xa?

⁶ Jehovab ǃoaba-aon ǁîba ūba hâ ǀnammi ge hoaǁae ra hui nî în ǃgomsin ǃnâ mâǃkharu. Aiǁgause apostel gu ge mîbahe o. Jodeǁî ǁnâuǃgâ ǃkhaib xa î gu aoǁnâ ǀû. Jehovaba gu kaise ǀnam amaga gu ge ge mî. “Elob nî khoen ǃgâ-ai ǁnâuǀnamhe ǃkhaisa.” (ǃNǃkh. 5:29; 1Jhn. 5:3) ǁNāti i khôahe ǁoa ǀnammi ge sida ǃgâsana nētsē ra ǂkhâǃnâ. ǂGui ǃgâsan ge nē ǀnammi xa ǃaromahe hâse ǁaposase, ǁgâiǀāgu ǃnâ ra mâǀgai. ǃHūbaib ge ǃhui da o da ge ǂkhabuǂâi tama hâ. ǂKhî da ge.—ǃNǃkh. 5:41; khomai re Romeǁîn 5:3-5 sa.

7. Mati da nî tanisen sida omaris ǁanin ga mâǃoa da o?

⁷ Sida di omaris di ǁanin ga mâǃoa da o. O i ge nēsa kaise a ǃgom ǁkhā. ǁÎn ga ga ra mû o sida Jehovaba ra ǃoaba ǂgaosa. On ge ǀnîsi nî ǂâi tsoatsoa sida ǂgaeǂhapuhe hâ ti. ǀNîn ge nî ǂâi ǀnîsi da go ǃkhau ti. (Markub 3:21 sa ǀgopeǀnō re.) ǀNîsin ge ǃgâi tama mîdi ǀkha a mâǃoa da ǁkhā. Nē mâǃoas ge tā nî buru kai da. Jesub ge ge mî: “Tsî khoe-i ommi din ge ǁî-i khākhoese nî i.” (Mat. 10:36) Tae-i ǀgui-en ga sida omaris ǁanina dī xawe da ge ǃhui nî tama hâ. Jehovaba da ūba hâ ǀnammi ra kai. Khami i ge nau khoena da ūba hâ ǀnammi tsîna ra kai. (Mat. 22:37-39) Xawe da ge hukas tsîna Elobmîs ǃnâ hâ xūna ǀnâuǀnamoǃnâ tide. Nau khoe-e da ra ǂkhîǂkhî ǂgao amaga.

8-9. Tae-e ǀgui ǃgâsasa ge hui is mâǀgai, kaises gere mâǃoahe xawe?

⁸ Georgina’s ge mamasas xas ge mâǃoahe  xawe ge mâǀgai. ǁÎs ge ra mî: “ǀHûǀguitimî-aon ǀam ge ti ma hama ge ǁkhāǁkhāsen tsoatsoa. Xawe ta ge ǃnani ǁkhân khaoǃgâ ǀhaode ǃoa gere ī ǂgao os ge ti mamasa ge ǃgâibahe tama hâ i. ǁÎs ge amaba xu ǁnāǁgôahâ khoen ǀkha gere ǃhoa. Tsîs ge ǁîn gere mî xūna tita gere mîba. ǁÎs ge ǁgai xūna mîte. Ti ǀûna ǂgae, xaldom te tsî ti ǂkhanina gere axu. Xawe ta ge 15 kurixa ta ge o ge ǁāǁnâhe. Ti mas ge Jehovaba ta nî ǃoabasa ge ǂgao tama hâ i. Tsî ǁnā-amaga ǂkham khoen ǀguiba ra hâ ǃkhaiba ǃoa ge sî te. ǀNî ǀgôan ge drugsna sîsenū tsî ǁgai xūna gere dī. Satsa nî ǀnam tsî nî kōǃgâ khoe-i ga satsa mâǃoa o. O i ge kaise a ǃgom.”

⁹ Tae-e Georginasa ge hui? ǁÎs ge ra mî. “Hoaraga Elobmîsa ta ge khomai toa tsēs ais ge ti masa ge mâǃoa te tsoatsoa. ǁNā ǁaeb ai ta ge ge ǂan i amaba ta ge hōsa. Tsî ta ge Jehovab ǀgūse gere tsâ. ǁÎba ǃoa ta ge gere ǀgore. Tsîb ge gere ǁnâu te. ǁNā ǃkhaib ai ta gere hâ o. Os ge ǃgâsasa ge ǁkhau te î ta ǁîs oms ai Elobmîsa ǁkhāǁkhāsen. ǀHû-ommi tawa ta gere sī o. O ta ge ǃgâsan xa gere ǂkhâǃnâhe. ǁÎn omaris ǃâ ta a khamin ge gere hâ-ū te. Aitsama ta ge ge mû Jehovab mâǃoa da ra khoen xa a ǀgaisasa. Ham-i ǀgui-i ga mâǃoa da xawe.”

10. Mâ ǂgomǃgâsiba da Jehovab ǃnâ a ūhâ ǁkhā?

¹⁰ Apostel Paulub ge ge xoa. Xū-i xare-i “sada Elob ǀnammi, Xristub Jesub sada ǃKhūb ǃnâ hâba xu a ǀgora ǁoa ǃkhaisa.” (Rom. 8:38, 39) ǁAeroba da ga ǃgomsiba hōǃâ xaweb ge Jehovaba nî ǂkhâǃnâ da. Tsî nî ǀgaiǀgai da. Georginas di aiǁgaus ǃnâ da go mû khamib ge Jehovaba ǀhaohâb ǃnâ-ū ǁnāsa ra dī.

11. Matib Johaneb 15:12, 13 ǃnâ ra mîhe ǀnamma Jesub di saosabena ge hui? Aiǁgau-e mā re.

¹¹ ǁŌb nîs aiǃâb ge Jesuba ǁîb ǁkhāǁkhāsabega ge mîba î gu ǀnamgu. (Khomai re Johaneb 15:12, 13 sa.) ǁÎb ge ge ǂan i māsenxase gu ga ǀnamgu o gu ǀguiba nî hâsa. Tsî ǃhūbaib xa gu ga ǃhuihe xawe gu nî mâǀgaisa. Tesalonikas ǃnâ ge hâ i ǀhaohâb di aiǁgausa kō re. ǁNā ǀhaohâb ge tsoatsoasa xūn ge ǁnā ǃgâsana gere mâǃoahe. Xawen ge ǁîna ǂgomǂgomsa tsî kai ǀnamma ge ūhâ i. Tsî ǁnās ǀkha ǃgâi auǁgausa nau ǃgâsana gere  ǁgau. (1Tes. 1:3, 6, 7) Paulub ge ge ǂkhâǃnâ nî în ǀnamma ǃnāsase ǁgaugu. (1Tes. 4:9, 10) ǀNammi ge nî hui nî ǁnān hîna ǂkhabuǂâi hâna ǁgaeǂgao. Tsî ǁnān hîna ǂkhabusana hui. (1Tes. 5:14) ǁÎn ge Paulub ge ǁnâma nî xūna ge dī. ǀGamǁî sîǂkhanis hînab ge kuriba ǃkharu tsî a xoas ǃnâb ge ge mî. “Tsî mâ-i hoa-i di ǀnammi, sadu hoadu ǁaegu du ūhâbagub ra ǃnā xui-ao.” (2Tes. 1:3-5) ǁÎn di ǀnammi ge ge hui nî în ǁgâiǀāgu ǃnâ mâǀgai ǁkhā.

12. Torob di ǁaeb ǃnân ge ǃgâsana mati ǀnamma ǁgaugu?

¹² Danylob tsî ǁîb di kaikhoes di aiǁgausa kō re. ǁÎn di ǃās ge torob xa ǀoa xawen ge ǀhaode ǃoa ī. Aoǁnâ tsî ǂûna nau ǃgâsan ǀkha gere ǀgoragu. ǀGui tsē gu ge soldagu hîna ǃapude ūhâga Danylob oms ai ge sī. “ǁÎgu ge Jehovaba ta nî ǃoaba ǀûsa gere ǂhâba,” dib ge Danyloba ra mî. “Tsî ta ge ǂkhā o, o gu ge ge ǂnaute. Tsî ǂnoa te ra khami hî, tsî ti danas ǀgapiga gere ǂnoa. Ī gu nîs ais ai gu ge ge mî. Oaǀkhī tsî gu ti kaikhoesa nî ǀgaiǃkhō ti. Xawen ge sida ǃgâsana ǀkhara ǃāsa ǃoa ra ī trains ai ge ǃnao mi. ǁNā ǃgâsan ge ǀnam mi i ǀgausam ge hukas tsîna ǀuru tide. Nau ǃās aim ge sīs tsînan ge ǁnā ǃgâsana ǂû-e mā mi. Tsî sîsenni tsî oms tsîna ge ôa hui mi. ǁNā-amagam ge torob hâ ǃkhaiba xu ra ǃkhoe ǃgâsan tsîna hâǃkhai-e ge māǁkhā i.” Nēti ī aiǁgaudi ge ra ǁgau da Xristeǁîn ūbagu hâ ǀnammi. Ra hui dasa î da ǃhuihe da ga xawe mâǀgai.

13. Matib ǃanu gagaba ra hui da î da mâǀgai Jehovaba ǃoabas ǃnâ khoen ga ǃhuida xawes tsîna?

¹³ Jesub ge ǁîb di saosabena ge mîba în ǁîn di kākhoena ǀnam. (Mat. 5:44, 45) Nēsa dīsa supu-e? Hî-î supu tama hâ. Xawe i ge Elob di ǃanu gagab huib ǀkha a ī ǁkhā. Gagab di ǂûb ge nēna ǃkhōǂgā hâ. ǀNammi, ǃnūǃnâxasib, khoexasib, tsamtsiǃnâsib, ǃkhō-oasen tsîna. (Gal. 5:22, 23) Nē ǀgaugu ge ra hui da ī da ǃhuida ga xawe mâǀgai. ǂGui khoen hîna gere mâǃoan ge ǁîn di ǂâiǀgauba ge dawa. ǁÎ-i aob, taras, ǀgôa-i tamas ka io ǁanǁare-ao i nē ǂūga ūhâ amaga. ǂGui hîna gere mâǃoa dan ge nēsisa a sida di ǃgâsa. ǁNān hîna ǃhui du hana ǀnams xa dū ga ǃgombahe o. Jehovaba du ra ǃoaba amaga, o ǃanu  gagaba Jehovab ai ǂgan re. (Luk. 11:13) ǂGomǃgâ re Jehovaba ǁnâuǀnams hoaǁae a ǃgâisa.—ǂKhm. 3:5-7.

14-15. Romeǁîn 12:17-21 ǃnâ hâ ǀapemāsa mati Yasmeensa ge hui, îs ǁîs aoba ǀnam mâǃoahes gere xawe?

¹⁴ Yasmeen di ǀon hâ ǃgâsas di aiǁgausa kō re. Hîna Middle east ǃnâ ra hâsa. Jehovabas ge ǃoaba tsoatsoa o. Ob ge ǁîs di aoba ge ǂâi ǁîs ge ǀhôakaohe ti. Tsîb ge ǁnās ǀkha gere dītsâ îs Jehovaba ǃoaba ǀû. ǁÎb ge ǁîsa ǁgai xūna ge mî tsoatsoa. Tsî omaris ǁanin, pastori tsî ǃgai-ao-i tsîna ge sî is ǃaoǃaohe. Tsî ge ǂari-amsi ǁîs ra omarisa khôa ti. ǁÎs di aob ge ǀhaodi tawas tsîna ǃgâsagu ǃoagu ǁgai xūna gere mî. ǁGaises gere hâ-ūhe amagas ge Yasmeensa gere ā.

¹⁵ ǀHaodi tawa i ge Yasmeens di gagasi omarisa ǁîsa gere ǁkhaeǂgao. Tsî gere ǂkhâǃnâ. ǀHaohâb ǃûi-aogu ge ǁîsa ge mîba îs Romeǁîn 12:17-21 ǃnâ ra hō-e ǀapemāsa sîsenū. (Khomai re.) “Kaise i ge ge ǃgom i” dis ge Yasmeensa ra mî. “Xawe ta ge Jehovaba ge ǂgan îb huite. Î ta Elobmîs ǃnâ ta ra ǁkhāǁkhāsen xūna sîsenū. ǁNā-amaga ta ge ti aob ge ǂanapegas ǃnâ kombuisa gere ǀuriǀuri o, gere ǃanu. Tsî ǁgai xūnab gere mî te o tsaurase gere ǃeream. Tsî ǀaesen-i gere o, o gere kôǃgâbi.”

16-17. Tae-e du Yasmeens di aiǁgausa xu ra ǁkhāǁkhāsen?

¹⁶ Yasmeens ge ǁîs aobas ge ǀnamma ǁgau ǃkhais ǃaroma ge mādawa-amhe. ǁÎs ge ra mî. “Ti aob ge ge ǂgomǃgâ te tsoatsoa. ǁÎb ge ge ǂan i tita hoaǁae amaba nî mîbabi ǃkhaisa. ǁÎb ge ǃgôasib ǃnâ ge ǃgâ tsoatsoa te. Elobmîs xam gere ǁgam o. Tsî ge mî ǂkhîbab nî oms ǃnâ ǀkhī-ūsa. Tsîb ge ra ǂkhâǃnâ te i ta ǀhaode ǃoa ǃgâise ī. Nēsisa i ge tita tsî ti aob tsîna ǃgâi ǀhōsagusisa ūhâ. Tsî i ge sim di omarisa ǂkhîba ūhâ. ǁKhore ta ge ra îb to aob di ǂgaoba ǁkhopamsen amab ǃoagu. Îb ǀgui tsē tita ǀkha Jehovaba ǃoaba ǁkhā.”

¹⁷ Yasmeens di aiǁgaus ge ra ǁgau da. ‘ǀNammi hoana ra ǃgū-ai, hoana ra ǂgom, hoana ra ǃâubasen tsî hoana ra taniǀnamsa.’ (1Kor. 13:4, 7) ǃHuis ge a ǀgaisa tsî a tsûtsû ǁkhā. Xawe ǀnammi ge ǁnās xa kaise ǀgaisa. Tsî ǁnās ǀkha ǂgaoba ra dan. ǂKhîba i ge Jehovab di ǂgaob tawa ra ǀkhī-ū. Xawe mâǃoa da ra khoen ga ǃhui da xawe da ge a ǂkhî ǁkhā. Mâ ǀgaub ǃnâ?

18. Tae-i ǃaroma da nî ǂkhî ǃhuihe da ga o?

¹⁸ Jesub ge ge mî: “ǃGâiǃō hâ du ge sado, khoen ga ǁkhan” du o. (Luk. 6:22) ǃGâibahe tama da ge hâ sida ǂgoms ǃgao da ga mâǃoahe o. O, tae-i ǃaroma da nî ǂkhî ǃhuihe da ga ra o? ǃNona ǃaromade kō re. ǂGurose, mâǀgai da ga o, ob ge Jehovaba sida ǀkha a ǂkhî. (1Pet. 4:13, 14) ǀGamǁîse sida ǂgoms ge ra ǀgaiǀgaihe. (1Pet. 1:7) Tsî ǃnonaǁîse, ǀō-aisa mādawa-amsa da ge ra hō, ǀamo ûiba.—Rom. 2:6, 7.

19. Apostelga tae-i ǃaroma ge ǂkhî i ǂnauhe toa gu ges khaoǃgâ?

¹⁹ Jesub ge khâisa hōtoas khaoǃgâ gu ge apostelga. ǁNā ǂkhîb hîna gere ǃhoaheba ge hōǃâ. ǂNauhe tsî gu ge mîbahe i gu aoǁnâ ǀû. Xawe gu ge gere ǃgâiaǂgao. Tae-i ǃaroma? “Jesub di ǀons ǃaroma ǃharaxūhesa tsâsa gu ge anuǃgôahe ǃkhais ǃaroma.” (ǃNǃkh. 5:40-42) ǁÎgu Jesuba ūba hâ ǀnammi ge kaise ge ǀgaisa i. ǁNān hîna ǁîga ǃhuihan xa. Tsî gu ge ǁîgu ǀnamma gere ǁgau ‘ǀû tamase’ gu ge aoǁnâ sîsen-e gere dī o. ǂGui ǃgâsan ge nētsē ǃgomsinan ga hōǃâ xawe ǂgomǂgomsase ra ǃoaba. ǁÎn ge a ǂan Jehovab dīn ge xūn tsî ǁîb ǀonsan ǀnam ǀgausa ǀūru tidesa.—Heb. 6:10.

20. Tae-e da saora ǁkhāǁkhāǃâs ǃnâ nî ǃhoaǃgao?

²⁰ ǃHūbaib ǃnâ hâ khoen ge nē ǃhūbaib di dīkākāhes kōse nî ǃhui da. (Jhn. 15:19) Xawe da ge tā nî ǃao. Saora ǁkhāǁkhāǃâs ǃnâ da nî mû khamib ge Jehovaba ǁîb di ǂgomǂgomsa ǃoaba-aona ‘ǀgaiǀgai tsî nî sâu.’ (2Tes. 3:3) ǁNā-amaga a da aiǃgû re Jehovab, sida ǃgâsan tsî ǃhui da hân tsîna ǀnamsa. Nē ǀapemāsa da ga sao o da ge nî ǀguiǃnâxa. Tsî Jehovaba koasa nî mā. Tsî da ge nî ǁgau ǀnammi kaise ǀgaisasa ǃhuis xa.