1. Ika tein kijtoua Mateo 24:9, ¿keyej tikmattoyajya ke taltikpakneminij techtajyouiltiskiaj?

JIOVA techchijchiuak kemej uelis tikintasojtaskej oksekin uan no tiknekij maj yejuan techtasojtakan. Yejua ika techyolkokoua keman oksekin techtauelitaj uan xa hasta timouij. Kemej neskayot, se tokniuj siuat akin monotsa Georgina uan nemi Europa kijtoua: “Keman nikpiaya 14 xiujmej nomomaj peuak nechtauelita porin niktekitilia Jiova. Semi nimotayokoltiaya uan nikmachiliaya ke noselti nietoya, uan peuak niknemilia ke xa amo katka niyolkuali”. * Se tokniuj takat akin monotsa Danilo kijkuiloj: “Keman tateuianij nechmakej, nechuijuikaltijkej uan nechiluijkej ke nechchiuiliskiaj tein amo kuali porin niitaixpantijkauj Jiova, nimouik uan semi nimopinaujmatik”. Maski techyolkokoua maj techtauelitakan, tikmattoyajya ke panoskia nejon, porin Jesús ijkon kijtojka (xikonixtajtolti Mateo 24:9).

2, 3. ¿Keyej techtauelitaj akin amo kitekitiliaj Dios?

² Akin amo kitekitiliaj Jiova techtauelitaj porin ijkon kemej Jesús, ‘amo tipoujtinemijok iuan in taltikpakuaniʼ (Juan 15:17-19). Yejua ika, maski tikinpoujkaitaj tekiuanij amo tikinpaleuiaj, amo tiktajpalouaj bandera nion timokuikatiaj himno nacional. Tejuan sayoj tikueyichiuaj Jiova. Tiknextiaj ke Dios kinamiki kinixyekanas taltikpakneminij, sayoj ke Satanás uan akin kinixyekana kiixnamikij (Gén. 3:1-5, 15). Tikteixmatiltiaj ke sayoj iTekiuajyo Dios kiajchiuas ouijkayomej tein kipiaj taltikpakneminij, uan ke amo uejkaua, ika iTekiuajyo, Dios kinixpolos nochin akin kiixnamikij (Dan. 2:44; Apoc. 19:19-21). Nejin kinextia ke akin yolkualmej  kuali nemiskej satepan, sayoj ke akin amo yolkualmej amo kuali kinyas (Sal. 37:10, 11).

³ Akin amo kitekitiliaj Dios no techtauelitaj porin tejuan tiktakamatij itanauatiluan. Yejuan amo kiitaj tein kuali uan tein amo kuali kemej Dios kiita. Kemej neskayot, axkan miakej amo kiitaj ke amo kuali yetok tataman auilnemilis tein kichiuaj taltikpakneminij, maski yejua nejon kichiuak maj Dios kinixpolouani akin nemiaj Sodoma uan Gomorra (Jud. 7). Kemej tejuan tiktakamatij itanauatiluan Dios itech nejin taman, miakej techpijpinaujtiaj uan kijtouaj ke amo teyi tikuelitaj (1 Ped. 4:3, 4).

4. ¿Katiyejua kualneskayomej techpaleuiaj maj titaxikokan keman taltikpakneminij techtauelitaj?

⁴ ¿Katiyejua kualneskayomej techpaleuiskej maj titaxikokan keman taltikpakneminij techtauelitaj uan techuijuikaltiaj? Moneki titakuaujtamatiskej ke Jiova techpaleuis. Takuaujtamatilis kemej yeskia se escudo tein semi techpaleuia, porin “uelis tikxijxikojtiyaske nochi tataman kuejmololis tenika in Satanás kineki techyolxokolis” (Efes. 6:16). Sayoj ke no moneki tikpiaskej netasojtalis. ¿Keyej? Porin netasojtalis techpaleuia maj amo niman tikualanikan uan maj tikxikokan nochi tein techtajyouiltia (1 Cor. 13:4-7, 13). Maj tikitakan keniuj netasojtalis tein tikpialiaj Jiova, netasojtalis tein tikinpialiaj tokniuan uan hasta akin techixnamikij techpaleuia maj titaxikokan keman techtauelitaj.

5. ¿Keniuj kipaleuij Jesús netasojtalis tein kipialiaya iTajtsin?

⁵ Youak achto ke akin kitauelitayaj Jesús kimiktiskiaj, kiniluij itatojtokakauan akin amo kikaujkej: “Ijkon keme Notajtsin Dios nechnauatilij ya ma nikchiua, [...] ijkon nikchiutinemis para ma ijkon ma kimatikan in taltikpakuani ke Nejuatsin niktasojta Notajtsin Dios” (Juan 14:31). Netasojtalis tein Jesús kipialiaya Jiova kipaleuij maj kixikouani ouijkayomej tein kipiak. No ijkon, netasojtalis tein tikpialiaj Jiova uelis techpaleuis maj titaxikokan.

6. Kemej kijtoua Romanos 5:3-5, ¿keniuj timomachiliaj tiitekitikauan Jiova keman akin amo kitekitiliaj techtauelitaj?

⁶ Netasojtalis tein itekitikauan Jiova kipialiaj, nochipa kinpaleuiani maj taxikokan keman kintajyouiltiaj. Kemej neskayot, keman tamelauanij judíos kinnauatijkej tatitanilmej maj amo tanojnotsanijok, netasojtalis tein kipialiayaj Dios kinolinij maj kiixtalianij nejin: “Moneki ke ma tiktakamatikan Totajtsin Dios uan ma amo achto tikintakamatikan in tagayot” (Hech. 5:29; 1 Juan 5:3). Itech seki altepemej, tekiuanij akin kipiaj miak chikaualis kintajyouiltijtokej tokniuan, sayoj ke netasojtalis tein nejon tokniuan kipialiaj Dios kinpaleuia maj kisentokakan kitekitilikan. Keman akin amo kitekitiliaj Dios techtauelitaj amo timotayokoltiaj, ta tiyolpakij (Hech. 5:41; xikonixtajtolti Romanos 5:3-5).

7. ¿Keniuj moneki tikinitaskej tochankauan maski techixnamikij?

⁷ Keman tochankauan techixnamikij xa yejua okachi ueyi ouijkayot tein tikpanouaj. Keman seki tochankauan kiitaj ke tiknekij tikixmatiskej Jiova, xa kinemiliskej ke techkajkayaujkej oso ke tikuatapolojkejya (no xikonita Marcos 3:21). Xa hasta techiluiskej oso techchiuiliskej tein amo kuali. Sayoj ke tikmattokejya ke uelis panos nejon, porin Jesús kijtoj: “Kuak se tagat takuautamatis nouan, ijkuakon yejua kitauelitaske ichankauan” (Mat. 10:36). Melauj ke maski tein yeski techiluiaj oso techchiuiliaj tochankauan, amo keman tikintauelitaj, ta keman okachi tiktasojtaj Jiova okachi tikintasojtaj oksekin (Mat. 22:37-39). Sayoj ke, amo keman tiktapanauiliskej itanauatiluan Dios sayoj porin tiknekij tikyolpaktiskej se taltikpaknenkej.

8, 9. ¿Toni kipaleuij se tokniuj siuat maj taxiko maski semi kiixnamikiaj?

⁸ Georgina, akin ika titajtojkej itech párrafo 1, taxikoj maski imomaj semi kiixnamikia.  Georgina kijtoua: “Nomomaj uan nejua peuak timomachtiaj Biblia iniuan itaixpantijkauan Jiova. Sayoj ke chikuasen metsti satepan, keman niknekiaya nias nechikolmej, nomomaj senkis mopatak. Nikmatik ke kiixtajtoltiaya tein kiteixmatiltiaj akin kikaujkej uan kiixnamikij tamachtilis tein melauak, uan keman nouan tajtouaya nechiluiaya tein yejuan kijtouaj. Uan no, nechuijuikaltiaya, nechtsontilanaya, chikauak nechkitskiaya nokechko uan nechtamotiliaya noamaixuan itech tajsol. Keman nikajxitij 15 xiujmej, nimoauij. Kemej amo kinekia maj niktekitiliok Jiova, nechkauato itech se kali kampa nemiaj okseki ichpochmej. Sekin kikuiaj drogas uan kichiuayaj miak taman tein amo kuali. Okachi ouij tekisa se taxikos keman akin teixnamiki yejua akin monekiskia tetasojtas uan teyekpias”.

⁹ Georgina kijtoua toni kipaleuij maj taxiko: “Itech tonal keman nomomaj peuak nechixnamiki, ijkuak niktamiixtajtoltijka Biblia. Nikneltokaya ke tein nimomachtijtoya katka tein melauak uan nikmachiliaya ke semi kuali nimouikaya iuan Jiova. Nochipa niktataujtiaya uan yejuatsin nechkakia. Keman ninemia itech kali kampa nechkauato nomomaj, se tokniuj siuat nechyoleuak maj niani ichan, uan ompa timosenmachtiayaj Biblia. Itech nochi nejon tonalmej, tokniuan nechyolchikaujkej. Kichiujkej maj nikmachiliani ke kemej yeskia nietoya iniuan nochankauan. Uelik nikitak ke Jiova kipia okachi chikaualis, maski akin yeski techixnamikis”.

10. ¿Toni uelis titakuaujtamatiskej ke nochipa kichiuas Jiova?

¹⁰ Tatitanil Pablo kijkuiloj ke nion teyi “uelis techtsinkixtis itech in tetasojtalistsin de Totajtsin Dios” (Rom. 8:38, 39). Maski kemansa titajyouiskej, Jiova amo keman techkauas. Nochipa techyolseuis uan techyolchikauas. Uan kemej kipanok Georgina, no kichiuas maj tokniuan techpaleuikan.

11. ¿Keniuj itatojtokakauan Jesús kinpaleuiskia netasojtalis tein Jesús ika tajtoj itech Juan 15:12, 13? Xikonijto se neskayot.

¹¹ Youak achto ke kimiktiskiaj, Jesús kinelnamiktij itatojtokakauan ke monekia motasojtaskej (xikonixtajtolti Juan 15:12, 13). Yejua kimatia ke nejon kinpaleuiskia maj kisentokanij kuali mouikanij, uan maj taxikouanij keman taltikpakneminij kintauelitaskiaj. Maj itech titanemilikan nechikol tein moajsia Tesalónica, keman peuak moajsi nejon nechikol, niman peuak kintajyouiltiaj tokniuan. Nejon tokniuan kikaujkej se kuali neskayot porin kinextijkej netasojtalis uan taxikojkej (1 Tes. 1:3, 6, 7). Pablo kinyolchikauak maj  kichiuanij nejin: “Kachi ok ma moueyiltijtiu namotetasojtalis” (1 Tes. 4:9, 10). Netasojtalis kinoliniskia maj kinyolseuianij akin tayokoxtoyaj uan maj kinpaleuianij “ten amo kipiaj ueyi takuautamatilis” (1 Tes. 5:14). Uan yejuan kichiujkej tein Pablo kiniluijka, porin se xiuit satepan kiniluij nejin itech ojpatika amat tein kintitanilij: “Namotetasojtalis ueyixtok tenika nanmotasojtatinemij se uan okse” (2 Tes. 1:3-5). Netasojtalis kinpaleuij maj taxikouanij keman kipiakej ouijkayomej uan keman kintajyouiltijkej.

12. ¿Keniuj kinextijkej netasojtalis seki tokniuan akin nemiaj itech se altepet kampa onkaya neteuilis?

¹² Maj tikitakan tein kipanok Danilo, akin ika titajtojkej itech párrafo 1, uan inamik. Keman se neteuilis tein mochiujtoya itech altepet kampa kayomej ajsik itech xolal kampa nemiaj, kisentokakej monechikojkej, mochikaujkej kisentokaskej tanojnotsaskej uan kinuantiaj okseki tokniuan takual tein kipiayaj. Se tonal, ajsikej ichan seki tateuianij akin kiuikayaj teposmej tein ika tetatoponiliaj. Danilo kijtoua: “Nechnauatijkej maj nikijtouani ke amo niyeskiaok itaixpantijkauj Jiova. Kemej amo niknekik nikijtos, nechmakej. Uan kichiujkej kemej yeskia yaya nechtatoponilitij, sayoj ke nechtatoponilijkej nokuapan. Achto ke yaskej kijtojkej ke mokepaskiaj uan ika mauiltiskiaj nonamik. Tokniuan niman techtitankej okse xolal itech tren. Amo keman nikelkauas netasojtalis tein technextilijkej. Keman tiajsikej nejon xolal, tokniuan techmakakej tein tikuaskiaj uan nechpaleuijkej maj nikajsini tekit uan kani tinemiskej. Tein kichiujkej techpaleuij maj satepan no uelini tikinselianij okseki tokniuan akin cholouayaj porin kampa nemiaj onkaya neteuilis”. Nejin neskayomej kinextia ke netasojtalis tein timopialiaj iniuan tokniuan uelis techpaleuis maj titaxikokan keman techtauelitaj.

13. ¿Keniuj yektikatsin espíritu techpaleuia maj tiksentokakan tiktekitilikan Jiova keman taltikpakneminij techtauelitaj?

¹³ Jesús kijtoj ke moneki tikintasojtaskej akin techtauelitaj (Mat. 5:44, 45). Maski ouij techkisa tikchiuaskej nejin, iyektikatsin espíritu Dios techpaleuia maj ueli tikintasojtakan. Itakilo espíritu kipia kualneskayomej tein techpaleuiaj maj titaxikokan keman techtauelitaj, kemej netasojtalis, kualtakayot, yolnejmachkayot, amo se yolijsiuis uan se motsakuilis (Gál. 5:22, 23). Miakej akin achto kintauelitayaj itaixpantijkauan Jiova mopatakej, porin ininnamik, ininkoneuj oso se tokniuj akin nemi kampa ika yejuan nemij kinextij nejin kualneskayomej. Miakej hasta  mochiujkej itaixpantijkauan Jiova. Yejua ika, komo semi ouij techkisa tikintasojtaskej akin techtauelitaj porin tiitaixpantijkauan Jiova, maj tiktajtanikan yejuatsin maj techmaka iyektikatsin espíritu (Luc. 11:13). Maj titakuaujtamatikan ke tiktakamatiskej Dios nochipa yejua tein okachi kuali (Prov. 3:5-7).

14, 15. ¿Keniuj Romanos 12:17-21 kipaleuij se tokniuj siuat maj kinextiliani netasojtalis inamik maski semi kiixnamikia?

¹⁴ Maj tikitakan tein kipanok Yasmín, akin nemi Oriente Medio. Keman mochiuak itaixpantijkauj Jiova, inamik kinemilij ke kikajkayaujkej uan kitemoj kichiuas maj amo kitekitilianiok Dios. Kiuijuikaltij uan kiniluij seki ininchankauan, se taixyekankej itech taneltokalis uan se naual maj kiluianij ke kichiuiliskiaj tein amo kuali, uan maj kipantianij ke kinxelojtoya ichankauan. Inamik hasta yajka keman mochiujtoya se nechikol uan kintsatsajtsilij tokniuan. Yasmín semi chokaya porin inamik kichiuiliaya tein amo kuali.

¹⁵ Itech nechikolmej tokniuan kiyolseuijkej uan kiyolchikaujkej. Tokniuan tayekananij kiyolmajxitijkej maj kichiuani tein kijtoua Romanos 12:17-21 (xikonixtajtolti). Yasmín kijtoua: “Ouij nechkisak nikchiuas tein Biblia kijtoua, sayoj ke niktajtanij Jiova maj nechpaleui uan nimochikauak nikchiuas. Yejua ika, keman nonamik kiualkuia tal uan kitemaya itech piso kampa nitakualchiuaya, nikchipauaya, keman nechuijuikaltiaya, amo nikualania uan keman mokokouaya, nikyekpiaya”.

16, 17. ¿Toni mitsonmachtia tein kichiuak Yasmín?

¹⁶ Netasojtalis tein Yasmín kinextilij inamik tapaleuij. Yejua kijtoua: “Nonamik peuak okachi takuaujtamati nouan porin kimatia ke amo keman nitakajkayaua. Peuak nechkaki ika poujkaitalis keman ika titajtouayaj taneltokalis, uan kijtoj ke tapaleuiskia maj tikpianij yolseuilis kalijtik. Axkan, hasta nechyolchikaua maj niouj nechikolmej. Okachi kuali timouikaj uan tikpiaj yolseuilis. Nikchia maj se tonal kineki kiixmatis tein Biblia tamachtia uan maj ueli tiksentekitilikan Jiova”.

¹⁷ Tein kipanok Yasmín kinextia ke netasojtalis “kixikojtiu nochi miak tataman tajyouilisme”, “kiyolikachixtinemi Dios itanejnekilis, uan nachipa kijyouijtinemi tataman ouijkayome” (1 Cor. 13:4, 7). Maski netauelitalis kipia chikaualis, netasojtalis okachi chikauak. Komo tikinnextiliaj netasojtalis akin techtauelitaj uelis mopataskej uan amo techixnamikiskejok. Keman titetasojtaj tikyolpaktiaj Jiova. Sayoj ke maski taltikpakneminij kisentokaskej techtauelitaskej, tejuan uelis tiksentokaskej tiyolpakiskej. Maj tikitakan toni techpaleuis.

18. ¿Keyej uelis tiyolpakiskej maski techtauelitaj?

¹⁸ Jesús kijtoj: “Nantatiochiualme de Dios namejuan kuak in tagayot namechtauelitstinemiske” (Luc. 6:22). Melauj ke amo tiktemouaj maj techtauelitakan nion techyolpaktia maj techtajyouiltikan porin tiktekitiliaj Jiova. Komo ijkon, ¿keyej uelis tiyolpakiskej maski techtauelitaj? Maj tikitakan eyi taman. Yekinika, porin keman titaxikouaj, tikyolpaktiaj Dios (1 Ped. 4:13, 14). Ojpatika, porin totakuaujtamatilis okachi mochikaua uan okachi kipia ipatiuj (1 Ped. 1:7). Uan expatika, porin tikseliskej se netetayokolil tein semi kipia ipatiuj: uelis tinemiskej nochipaya (Rom. 2:6, 7).

19. ¿Keyej tatitanilmej yolpakiaj maski kinuijuitekkaj?

¹⁹ Tepitsin satepan ke Jesús oksepa nemik, itatitaniluan kimachilijkej yolpakilis tein yejua ika tajtojka. Maski kinuijuitekkaj uan kinnauatijkaj maj amo tanojnotsanijok, yejuan yolpakiaj “porin Totajtsin kinkauak ke ma ijkon kijyouikan uan ma kinpinautikan porin yejuan ay tanojnotstinemij ika ne tokaytsin de Jesús” (Hech. 5:40-42). Maski kimouiliayaj tein ueliskia kinchiuiliskej akin kintauelitayaj, netasojtalis tein kipialiayaj ininTeko okachi ueyi katka. Uan kinextijkej nejon netasojtalis keman “amo keman mokauke ke ma amo tamachtikan uan tanojnotsakan”. Itech nejin tonalmej, miakej tokniuan kisentokaj kitekitiliaj Jiova maski kipiaj ouijkayomej. Kimatij ke Jiova amo kielkauas tein kichiuaj nion netasojtalis tein kinextiliaj (Heb. 6:10).

20. ¿Toni tikitaskej itech okse tamachtilis?

²⁰ Kemej ayamo ixpoliui tein amo kuali, taltikpakneminij kisentokaskej techtauelitaskej (Juan 15:19). Sayoj ke amo moneki timouiskej, porin kemej tikitaskej itech okse tamachtilis, Jiova kinyolchikauas uan kinyekpias itekitikauan akin amo kikauaj (2 Tes. 3:3). Yejua ika, maj tiksentokakan tiktasojtakan Jiova, maj tiksentokakan tikintasojtakan tokniuan uan hasta akin techtauelitaj. Komo tikchiuaj, tiksentokaskej kuali timouikaskej iniuan tokniuan uan totakuaujtamatilis kisentokas chikauak, tikueyitaliskej Jiova uan tiknextiskej ke netasojtalis okachi chikauak ke netauelitalis.