1. Матфеййи 24:9 ци финст ес, уомӕ гӕсгӕ ни аци дуйне е ’сӕфт ке уинуй, е нӕмӕ дессаг цӕмӕннӕ кӕсуй?

АЛКЕДӔР ни фӕндуй уарзун, удта нӕ цӕмӕй уарзонцӕ, уомӕн ӕма нӕ конд уотӕ ’й. Ӕма ни еске е ’сӕфт ку фӕууинуй, уӕд нин хъӕбӕр зин фӕууй, хатгай ба ма ни тас дӕр бацӕуй. Европӕй еу хуӕрӕ Джорджинӕ * загъта: «Йеговӕн лӕггадӕ кӕнун мӕ ке бафӕндадтӕй, уой туххӕй ми мӕ мадӕ е ’сӕфт фӕууидта. Мӕхемӕ хъӕбӕр ӕнӕгъӕугӕ кастӕн, удта ми хуарзӕй ести ке ес, уобӕл дӕр гурусхӕ кӕнун райдӕдтон. Уӕд мӕбӕл 14 анземӕй ӕндӕр нӕма цудӕй». Ӕнсувӕр Данел ба зӕгъуй: «Ӕфсӕддонтӕ мӕ фӕннадтонцӕ Йегови Ӕвдесӕн ке дӕн, уой туххӕй, удта мин ӕфхуӕрӕн дзубандитӕ фӕккодтонцӕ. Мӕхемӕ хъӕбӕр ӕгадӕ ’ркастӕн ӕма ми тас бацудӕй». Адӕн ни се ’сӕфт ке уинунцӕ, е нӕмӕ дессаг гъӕуама ма кӕса. Йесо дӕр дзурдта, уотӕ ке уодзӕй. (Бакӕсӕ Матфеййи 24:9.)

2, 3. Аци дуйне Киристей фӕдбӕлдзӕугутӕй е ’сӕфт цӕмӕн уинуй?

² Аци дуйне Йесой фӕдбӕлдзӕугутӕй е ’сӕфт уинуй. Цума цӕмӕн? Уомӕн ӕма мах дӕр Йесой хузӕн аци дуйнейӕй нӕ ан (Иоан. 15:17–19). Хецауадӕ нимайӕн, фал турусайӕн ба нӕ табу кӕнӕн, удта гимн дӕр нӕ фӕззарӕн. Мах ӕрмӕстдӕр Йегови нимайӕн нӕ Хуцаубӕл, удта ’й федарӕй зонӕн, адӕнӕн разамунд дӕттуни барӕ ӕрмӕстдӕр Хуцауӕн ке ес. Сайтан ӕма ӕ зундбӕл ка рандӕ ’й, етӕ ба уобӕл нӕ арази кӕнунцӕ, ӕма ӕ нихмӕ, сӕ бон куд ӕй, уотӕ архайунцӕ (Райд. 3:1–5, 15). Уомӕй уӕлдай ма игъосун кӕнӕн, ӕрмӕстдӕр Хуцауи Паддзахадӕ ке фӕййервӕзун кӕндзӕй адӕни сӕ гъезӕмӕрттӕй, ӕ нихмӕ ка цӕуй, уони ба ке фесафдзӕй (Дан. 2:44; Рарг. 19:19–21). Еци хабар сӕрниллӕг адӕнӕн хуарз хабар ӕй, фудгӕнгутӕн ба – сӕ адзал (Пс. 37:10, 11).

³ Аци дуйней адӕн ма ни се ’сӕфт уинунцӕ, Хуцауи раст уагӕвӕрдтӕмӕ гӕсгӕ ке цӕрӕн ӕма уони хузӕн ке нӕ ан, уой туххӕй. Зӕгъӕн, абони адӕн, Хуцау Содом ӕма Гоморрӕ ке туххӕй фесафта, еци гъуддӕгти ӕд сӕр рандӕ ’нцӕ (Иуди 7). Махбӕл ба ходгӕ фӕккӕнунцӕ, фанатиктӕ дӕр ма нӕ фӕххонунцӕ (1 Пет. 4:3, 4).

4. Адӕн ни се ’сӕфт ку уинонцӕ, уӕддӕр нин ци банхус кӕндзӕй Йеговӕбӕл еузӕрдонӕй байзайун?

⁴ Мадта нин ци банхус кӕндзӕй Йеговӕбӕл еузӕрдонӕй байзайун, адӕн ни се ’сӕфт ку уинонцӕ ӕма нӕ нихмӕ ку дзоронцӕ, уӕд? Гъӕуама федарӕй ӕууӕндӕн, Йеговӕ нин ке ӕнхус кӕндзӕй, уобӕл. Не ’ууӕндундзийнадӕ ӕнгъезуй рабарун уарти хӕццӕ, уомӕн ӕма ӕ бон ӕй «Фидбилизи содзгӕ фӕттӕ се ’гасейдӕр ниххуссун кӕнун» (Еф. 6:16). Фал ма нин ӕууӕндундзийнадӕй уӕлдай банхус кӕндзӕй уарзондзийнадӕ дӕр. Цӕмӕн? Уомӕн ӕма уарзондзийнадӕ «уайтагъд нӕ рамӕстгун уй», удта алцӕмӕндӕр бухсуй ӕма алцӕмӕндӕр федар лӕууй (1 Кор. 13:4–7, 13). Гъӕйдӕ ӕркӕсӕн, Йегови, нӕ хуӕртӕ ӕма ӕнсувӕрти, удта ма сауӕнгӕ не знӕгти дӕр ку уарзӕн, уӕд нин е куд банхус кӕндзӕй федар фӕллӕуун, адӕн ни се ’сӕфт ку уинонцӕ, уӕддӕр.

5. Йесо ӕ Фиди ке уарзта, уой фӕрци ӕ бон ци иссӕй?

⁵ Ӕ мӕлӕти размӕ, еци изӕр Йесо ӕ фӕдбӕлдзӕугутӕн загъта: «Ӕз мӕ Фиди ке уарзун, уой туххӕй кӕнун, мӕ Фидӕ мин куд бафӕдзахста, уотӕ» (Иоан. 14:31). Йесо Йегови ке уарзта, уой фӕрци ӕ бон иссӕй еци уӕззау фӕлварӕнти федар фӕллӕуун. Ӕма е мах бон дӕр исуодзӕй, Йегови ку уарзӕн, уӕд.

6. Ромӕгтӕмӕ 5:3–5 куд финст ӕй, уомӕ гӕсгӕ Йегови лӕггадгӕнгутӕ цӕхуӕн цӕстӕй кӕсунцӕ, дуйне си е ’сӕфт ке уинуй, уомӕ?

⁶ Хуцауи лӕггадгӕнгутӕ ӕфхуӕрд ку ӕййафиуонцӕ, уӕд син федар фӕллӕуунмӕ ӕнхус кодта, Йегови ке уарзтонцӕ, е. Еухатт дзиуиттӕгти сӕйраг тӕрхондони лӕгтӕ апостолтӕн загътонцӕ, цӕмӕй мабал игъосун кодтайуонцӕ. Фал етӕ Хуцауи ке уарзтонцӕ, уомӕ гӕсгӕ син федарӕй загътонцӕ: «Хуцау ӕй нӕ хецау, ӕма фиццагидӕр гъӕуама уомӕ игъосӕн, адӕнмӕ нӕ, фал» (Гъуд. 5:29; 1 Иоан. 5:3). Абони дӕр не ’нсувӕртӕ Хуцауи берӕ ке уарзунцӕ, уой фӕрци еузӕрдонӕй байзайунцӕ, хецауадӕ сӕ карзӕй ку фефхуӕруй, уӕд. Аци дуйне ни е ’сӕфт ке уинуй, уой туххӕй нӕ нифс нӕ сӕттуй. Хуцауи туххӕй ӕфхуӕрд ке ӕййафӕн, уой ма нӕхецӕн устур кадӕбӕл дӕр нимайӕн (Гъуд. 5:41; бакӕсӕ Ромӕгтӕмӕ 5:3–5).

7. Нӕ бийнонтӕ нӕ нихмӕ ке цӕунцӕ, уомӕ цӕхуӕн цӕстӕй гъӕуама кӕсӕн?

⁷ Алли киристонӕн дӕр, ӕвӕдзи, тӕккӕ зиндӕр фӕлварӕн фӕууй, ӕ бийнонтӕ ӕ нихмӕ ке рацӕунцӕ, е. Рӕстдзийнади туххӕй нӕ фулдӕр базонун ку фӕффӕндуй, уӕд нӕ бийнонтӕмӕ арӕх уотӕ фӕккӕсуй, ӕма нӕ сайгӕ кӕнунцӕ. Кадӕртӕ ба ма уотӕ дӕр расагъӕс кӕнунцӕ, ӕма сӕрӕй фӕккуддӕр ан. (Рабарӕ Марки 3:21.) Ӕфхуӕрун нӕ райдайунцӕ, хатгай ба ма сӕ къох дӕр исесунцӕ. Фал уобӕл дес гъӕуама ма кӕнӕн, уомӕн ӕма Йесо уотӕ загъта: «Адӕймагӕн е знӕгтӕ уодзӕнцӕ ӕхе бийнонтӕ» (Матф. 10:36). Фал нӕ хеуӕнттӕ нӕ нихмӕ кудфӕнди ма цӕуонцӕ, уӕддӕр сӕмӕ знаги цӕстӕй нӕ кӕсдзиан. Йегови куд фулдӕр уарзӕн, уотӕ адӕни дӕр фулдӕр уарздзиан (Матф. 22:37–39). Фал еске ӕфсӕрмӕй ба Библий закъӕнттӕ ӕма уагӕвӕрдти сӕрти некӕд рахездзиан.

8, 9. Джорджинӕ Йеговӕбӕл еузӕрдонӕй цӕй фӕрци байзадӕй, кӕд карз ӕфхуӕрд ӕййафта, уӕддӕр?

⁸ Уӕлдӕр ке кой кодтан, еци хуӕрӕ Джорджинӕ Йеговӕбӕл еузӕрдонӕй байзадӕй, кӕд ӕ мадӕ ӕ нихмӕ хъӕбӕр цудӕй, уӕддӕр. Джорджинӕ радзурдта: «Библи ахур кӕнун мӕ мади хӕццӕ еумӕ райдӕдтан. Фал мӕ анзи ’рдӕги фӕсте ӕмбурдтӕмӕ цӕун ку бафӕндадтӕй, уӕд ӕвваст мӕ нихмӕ цӕун райдӕдта. Уой фӕсте ӕй базудтон, раст дин ка ниууагъта, уонӕмӕ ке фегъосидӕ. Мӕнӕн дӕр ма райдаидӕ, етӕ ин ци дзурдтонцӕ, уони дзорун. Уой фӕсте ба мӕ ӕфхуӕрун райдӕдта, мӕ дзиккотӕй мӕ ралас-балас кодта, мӕ хорхбӕл мин бахуӕцидӕ, удта мин мӕ литературӕ дӕр ракалидӕ. 15 анзи мӕбӕл ку исӕнхӕст ӕй, уӕд донаргъуд райстон. Ӕма гъе уӕд дӕр мӕ мадӕ архайдта, цӕмӕй Йеговӕн мабал лӕггадӕ кодтайнӕ, ӕма мӕ зиндарӕн сувӕллӕнтти интернатмӕ бакодта. Еци интернати еуӕй-еу кизгуттӕ наркотиктӕбӕл ӕхцул адтӕнцӕ ӕма аллихузи фудракӕндтӕ кодтонцӕ. Уарзгӕ ӕма дӕбӕл тухсгӕ ка гъӕуама кӕна, еци адӕймаг дӕ нихмӕ ку цӕуа, уӕд е уӕлдай зин ӕй».

⁹ Цума Джорджинӕ федар цӕй фӕрци фӕллӕудтӕй? Е зӕгъуй: «Мӕ мадӕ мӕ нихмӕ ци бон рацудӕй, еци бон Библи кӕронмӕ каст фӕдтӕн, ӕма ’й федарӕй зудтон, рӕстдзийнадӕ ке иссирдтон. Удта ’й лӕдӕрдтӕн, Йеговӕ дӕр мӕ хӕццӕ ке ӕй. Хъӕбӕр арӕх имӕ кувтон ӕма мин мӕ кувдтитӕ игъосидӕ. Интернати ку цардтӕн, уӕд мӕ еу хуӕрӕ сӕхемӕ арӕх ӕрбахонидӕ ӕма еумӕ Библи ӕртастан. Еци рӕстӕги мин хуӕртӕ ӕма ӕнсувӕртӕ хъӕбӕр ӕнхус кодтонцӕ. Ӕцӕг бийнонти хузӕн мин иссӕнцӕ. Мӕхе цӕститӕй ӕй уидтон, Йеговӕ не знӕгтӕй берӕ хъаурӕгиндӕр ке ӕй, кафӕнди ма уонцӕ, уӕддӕр».

10. Федарӕй ци гъӕуама зонӕн?

¹⁰ Апостол Павел куд загъта, уомӕ гӕсгӕ нӕ некӕд неци рахецӕн кӕндзӕй, «Хуцау нӕмӕ нӕ Хецау Йесо Киристей фӕрци ци уарзондзийнадӕ бавдиста, уомӕй» (Ром. 8:38, 39). Зин уавӕри ку уӕн, уӕд Йеговӕ нӕ фарсмӕ уодзӕй ӕма нин уодӕнцойнӕ ӕма хъауритӕ дӕтдзӕй. Удта ма нин ӕмбурди хуӕртӕ ӕма ӕнсувӕрти фӕрци дӕр ӕнхус кӕндзӕй.

11. Иоанни 15:12, 13 ци уарзондзийнади кой цӕуй, е киристӕнттӕн куд банхус кодта?

¹¹ Ӕ мӕлӕти размӕ, еци изӕр Йесо ӕ ахуркӕнуйнӕгтӕн сӕ зӕрдӕбӕл ӕрлӕуун кодта, кӕрӕдзей уарзун куд ӕхсидзгӕ ӕй, уой. (Бакӕсӕ Иоанни 15:12, 13.) Е ӕй зудта, кӕрӕдзей ку уарзонцӕ, уӕд сӕ астӕу еудзийнадӕ ке уодзӕй, удта си дуйне е ’сӕфт ку уина, уӕддӕр Йеговӕбӕл еузӕрдонӕй ке байзайдзӕнцӕ. Ӕркӕсӕн, Фессалоникти ка цардӕй, еци киристӕнтти хабармӕ. Еци горӕти ӕмбурд куддӕр фӕззиндтӕй, уотӕ сӕ ӕфхуӕрун райдӕдтонцӕ. Фал уӕддӕр хуӕртӕ ӕма ӕнсувӕртӕ Хуцаубӕл еузӕрдон адтӕнцӕ ӕма кӕрӕдзей уарзтонцӕ (1 Фес. 1:3, 6, 7). Павел сӕ разӕнгард кодта, цӕмӕй кӕрӕдзей никки хъӕбӕрдӕр уарзтайуонцӕ (1 Фес. 4:9, 10). Уой фӕрци сӕ бон адтайдӕ, нифссаст ка ӕй, уони, удта лӕмӕгъти федар кӕнун (1 Фес. 5:14). Фессалоникти киристӕнттӕ Павели унаффӕмӕ байгъустонцӕ. Кӕцӕй ӕй зонӕн? Еу анзи фӕсте сӕмӕ ӕ дуккаг финстӕги ниффинста: «Уе ’гасдӕр кӕрӕдзей ци уарзтӕй уарзетӕ, е кӕнуй хъӕбӕрӕй-хъӕбӕрдӕр» (2 Фес. 1:3–5). Уарзондзийнадӕ син банхус кодта фӕлварӕнти рӕстӕг федар фӕллӕуун.

12. Еу горӕти змӕнститӕ ку райдӕдтонцӕ, уӕд хуӕртӕ ӕма ӕнсувӕртӕ уарзондзийнадӕ куд бавдистонцӕ?

¹² Уӕлдӕр ке кой кодтан, еци Данелӕн сӕ горӕти змӕнститӕ ку райдӕдтонцӕ, уӕддӕр ӕ бийнойнаги хӕццӕ идарддӕр дӕр ӕмбурдтӕмӕ цудӕнцӕ, удта хуарз хабар игъосун кӕнунмӕ дӕр алли фадуатӕй пайда кодтонцӕ ӕма хуӕртӕ ӕма ӕнсувӕртӕн дӕр ӕнхус кодтонцӕ. Еухатт сӕмӕ хӕдзарӕмӕ гӕрзефтонг ӕфсӕддонтӕ ӕрбалӕбурдтонцӕ. Данел зӕгъуй: «Уотӕ сӕ фӕндадтӕй, цӕмӕй мӕ дин ниууагътайнӕ. Ку син не ’сарази дӕн, уӕдта мӕ фӕннадтонцӕ ӕма мин уотӕ, нуртӕккӕ, дан, дин дӕ сӕр багӕрах кӕндзиан, фал уӕлӕмӕ фехстонцӕ. Цӕугӕ ку кодтонцӕ, уӕдта мин загътонцӕ, иннӕ цуди ба, дан, дин дӕ уосӕн тухмиуӕ бакӕндзиан. Ци нӕбӕл ӕрцудӕй, уой ӕмбурди хуӕртӕ ӕма ӕнсувӕртӕ ку базудтонцӕ, уӕд нӕ еци фӕдбӕл поезди рабадун кодтонцӕ ӕма нӕ ӕндӕр горӕтмӕ рарвистонцӕ. Некӕд ӕй байронх уодзӕн, куд нӕбӕл батухстӕнцӕ, уой. Нӕуӕг бунати ба нин ӕнсувӕртӕ хуӕруйнаг ӕрбахастонцӕ, удта нин куст ӕма цӕрӕнбунат иссерунмӕ дӕр банхус кодтонцӕ. Уой фӕсте мах бон дӕр иссӕй баиуазӕг кӕнун, змӕнстити туххӕй ледзун ке багъудӕй, уӕхӕн Ӕвдесӕнти». Уӕхӕн хабӕрттӕй бӕрӕг ӕй, уарзондзийнадӕ нин ке ӕнхус кӕнуй идарддӕр дӕр Йеговӕн лӕггадӕ кӕнун, кӕд ни аци дуйне е ’сӕфт уинуй, уӕддӕр.

13. Сугъдӕг хъаурӕ нин куд ӕнхус кӕндзӕй, Йеговӕн лӕггадӕ кӕнун, адӕн ни се ’сӕфт ку уинонцӕ, уӕддӕр?

¹³ Йесо ӕ фӕдбӕлдзӕугутӕн бафӕдзахста, цӕмӕй се знӕгти уарзонцӕ (Матф. 5:44, 45). Е ӕнцон нӕй, фал нин Хуцауи сугъдӕг хъаури фӕрци бантӕсдзӕй. Сугъдӕг хъаурӕй ка цӕуй, еци менеугутӕмӕ хаунцӕ уарзондзийнадӕ, фӕразондзийнадӕ, хӕларзӕрдӕдзийнадӕ, сӕрниллӕгдзийнадӕ ӕма хебӕл хуӕцун (Гал. 5:22, 23). Еци менеугути фӕрци нӕ бон исуодзӕй Йеговӕн идарддӕр дӕр лӕггадӕ кӕнун. Раздӕр нӕ нихмӕ ка цудӕй, уонӕй нӕмӕ беретӕ сӕ цӕстингас раййивтонцӕ, уомӕн ӕма нӕмӕ еци менеугутӕ уидтонцӕ, кадӕртӕ ба си нӕ хуӕртӕ ӕма ӕнсувӕртӕ дӕр иссӕнцӕ. Мадта нин не знӕгти уарзун зин ку уа, уӕд гъӕуама Йеговӕй сугъдӕг хъаурӕ корӕн (Лук. 11:13). Удта гъӕуама ӕппундӕр ма дузӕрдуг кӕнӕн, Йеговӕ нин ци зӕгъуй, уой ку кӕнӕн, уӕд нин е алкӕддӕр пайда ке хӕсдзӕй (Ӕмб. 3:5–7).

14, 15. Ясминӕн Ромӕгтӕмӕ 12:17–21 финст унаффитӕ куд банхус кодтонцӕ, ӕ лӕг ӕ нихмӕ ку цудӕй, уӕд?

¹⁴ Ӕркӕсӕн Ясмини хабармӕ. Ясмин Йегови Ӕвдесӕн ку иссӕй, уӕд ӕ лӕгмӕ уотӕ кастӕй ӕма ’й сайгӕ кӕнунцӕ, ӕма ’й хъор кӕнун райдӕдта. Дзурдӕй ӕй ӕфхуардта, удта ма ибӕл хеуӕнтти, бунӕттон дини разамонӕги ӕма хингӕнӕги дӕр исардудта, цӕмӕй ӕй фӕттӕрсун кодтайуонцӕ, ӕма ин загътайуонцӕ бийнонтӕ ихалӕг ке ӕй. Еухатт ба ӕ лӕг ӕмбурдмӕ дӕр ӕрбацудӕй ӕма ӕнсувӕртӕн алли фудтӕ никкалдта. Ӕ миутӕй арӕх Ясмини кӕуни уӕнгӕ дӕр бакӕнидӕ.

¹⁵ Ӕмбурди хуӕртӕ ӕма ӕнсувӕртӕ Ясмини федар кодтонцӕ. Хестӕр нӕлгоймӕгтӕ ба ’й разӕнгард кодтонцӕ Ромӕгтӕмӕ 12:17–21 финст унаффитӕмӕ гӕсгӕ архайун. (Ба сӕ кӕсӕ.) «Е ӕнцон н’ адтӕй,– зӕгъуй Ясмин,– фал Йеговӕмӕ кувтон ӕма мӕ бон ци адтӕй, уой кодтон. Зӕгъӕн, мӕ сӕрихецау къухни барӕй ку низмӕнтидӕ, уӕд ӕ фӕсте бафснайинӕ. Дзурдӕй ӕфхуӕрун мӕ ку райдаидӕ, уӕд ӕз ба мӕхе нигъгъос кӕнинӕ кенӕ ин фӕлмӕнӕй дзуапп раттинӕ. Сӕйгӕ ку кӕнидӕ, уӕдта имӕ базелинӕ».

16, 17. Ясмини хабарӕй цӕбӕл ахур кӕнӕн?

¹⁶ Ясмин ӕ уарзондзийнадӕ гъуддагӕй ӕвдиста, ӕма е дзӕгъӕли нӕ фӕцӕй. Ясмин зӕгъуй: «Мӕ сӕрихецау мӕбӕл фулдӕр ӕууӕндун райдӕдта, уомӕн ӕма ’й зонуй, сайгӕ ке некӕд фӕккӕнун. Дини туххӕй ку фӕдздзорун, уӕддӕр мӕмӕ лӕмбунӕг байгъосуй. Удта ма ’й балӕдӕрдтӕй, нӕ бийнонти фарнӕ уомӕй дӕр кӕнгӕ ке ӕй. Нӕ цард куд фӕххуӕздӕр ӕй, уомӕ кӕсгӕй мӕ цийнӕн кӕрон дӕр нӕ фӕууй. Нур нӕ хӕдзари ес фарнӕ. Мӕ сӕрихецау ма мӕ ӕхуӕдӕг дӕр фӕрразӕнгард кӕнуй, цӕмӕй ӕмбурдтӕмӕ цӕуон. Мӕ зӕрдӕ хъӕбӕр дарун, е дӕр еу афони рӕстдзийнадӕ ӕ зӕрдӕмӕ ке райсдзӕй ӕма Йеговӕн еумӕ ке лӕггадӕ кӕндзиан».

¹⁷ Ясмини хабар дӕр ӕй хуарз ӕвдесуй уарзондзийнадӕ алцӕмӕндӕр ке бухсуй, алцӕбӕлдӕр ке ӕууӕндуй, алцӕбӕлдӕр ӕ нифс ке даруй ӕма алцӕмӕндӕр федар ке лӕууй (1 Кор. 13:4, 7). Ӕнӕуинондзийнадӕ ба берӕ маст ӕма бӕллӕхтӕ ӕрхӕссуй. Фал уарзондзийнадӕн дзӕвгарӕ фулдӕр хъаурӕ ес. Уарзондзийнадӕ гъуддагӕй ку ’вдесӕн, уӕд Йегови зӕрдӕ дӕр рохс кӕндзиан, удта, ка ’й зонуй, нӕ нихмӕ ка цӕуй, уони зӕрдитӕ дӕр ӕрфӕлмӕн уодзӕнцӕ. Фал не знӕгтӕ ку нӕ сабур кӕнонцӕ ӕма идарддӕр дӕр нӕ нихмӕ ку цӕуонцӕ, уӕддӕр нӕ бон ӕй цийнӕ кӕнун. Цума цӕмӕн?

18. Адӕн ни се ’сӕфт ку фӕууинунцӕ, уӕддӕр амондгун цӕмӕн фӕууӕн?

¹⁸ Йесо загъта: «Амондгун уодзиайтӕ, адӕн уи се ’сӕфт ку уинонцӕ» (Лук. 6:22). Мах нӕ фӕндуй, цӕмӕй ни адӕн се ’сӕфт уинонцӕ. Удта ӕфхуӕрд ку феййафӕн, уӕддӕр нин ӕхцӕуӕн нӕ фӕууй. Мадта уӕд амондгун цӕмӕн гъӕуама уӕн? Фиццаг: Йеговӕбӕл еузӕрдонӕй ку байзайӕн, уӕд ин ӕ зӕрдӕ барохс кӕнӕн (1 Пет. 4:13, 14). Дуккаг: фӕлварӕнти не ’ууӕндундзийнадӕ никки федардӕр исуй (1 Пет. 1:7). Ӕма ӕртиккаг: федӕни нӕмӕ дессаги хуӕрзеуӕг ӕнгъӕлмӕ кӕсуй – ӕносон цард (Ром. 2:6, 7).

19. Апостолти ку фӕннадтонцӕ, уӕддӕр цийнӕ цӕмӕн кодтонцӕ?

¹⁹ Йесо ку райгас ӕй, уой фӕсте апостолти ӕфхуӕрун райдӕдтонцӕ. Нӕмгӕ дӕр ма сӕ фӕккодтонцӕ, фал уӕддӕр цийнӕ кодтонцӕ. Цума цӕбӕл? «Йесой номи туххӕй ӕфхуӕрд баййафуни аккаг ке разиндтӕнцӕ, уобӕл» (Гъуд. 5:40–42). Се знӕгтӕй куд нӕ тарстӕнцӕ, фал уомӕй хъӕбӕрдӕр ба Йесой уарзтонцӕ. Е бӕрӕг ӕй, сӕ игъосун кӕнуни гъуддаг ке нӕ ниууагътонцӕ, уомӕй. Абони дӕр берӕ хуӕртӕ ӕма ӕнсувӕртӕ Йеговӕн еузӕрдонӕй лӕггадӕ кӕнунцӕ, кӕд берӕ зинтӕ ӕвзарунцӕ, уӕддӕр. Етӕ ’й зонунцӕ, Йеговӕ син сӕ хъиамӕт ӕма сӕ уарзондзийнадӕ ке нӕ байронх уодзӕй, уой (Дзиуит. 6:10).

20. Иннӕ статьяй цӕбӕл радзордзиан?

²⁰ Цалинмӕ дуйне Сайтани къохи ӕй, уӕдмӕ ни адӕн се ’сӕфт уиндзӕнцӕ (Иоан. 15:19). Фал тӕрсун нӕ гъӕуй. Иннӕ статьяй радзордзиан, Йеговӕ ӕ еузӕрдон лӕггадгӕнгути куд бафедар кӕндзӕй ӕма сӕ куд багъӕуай кӕндзӕй, уобӕл (2 Фес. 3:3). Гъӕйдӕ мадта идарддӕр дӕр Йегови, хуӕртӕ ӕма ӕнсувӕрти, удта не знӕгти дӕр уарзӕн. Уотемӕй нӕ еудзийнадӕ багъӕуай кӕндзиан, не ’ууӕндундзийнадӕ бафедар кӕндзиан, Йегови ном искадгин кӕндзиан, удта ’й бавдесдзиан, уарзондзийнадӕн ӕнӕуинондзийнадӕй дзӕвгарӕ фулдӕр хъаурӕ ке ес, уой.