1. Segun Mateo 24:9, dikon no ta sorprendé nos ku mundu ta odia nos?

YEHOVA a krea nos pa stima i ser stimá. P’esei ora un hende odia nos, esei ta hasi nos doló i asta nos por haña miedu. Un ruman ku yama Georgina, * ku ta biba na Europa, a bisa: “Ku mi 14 aña, mi mama a kuminsá odia mi pasobra mi tabata sirbi Yehova. M’a sinti mi tristu i so. M’a kuminsá pensa ku mi ta un mal hende.” Un ruman ku yama Danylo a skirbi: “Ora e sòldánan tabata dal mi, insultá mi i menasá mi pasobra mi ta un Testigu di Yehova, m’a sinti hopi miedu i tambe humiá.” Aunke e echo ku mundu ta odia nos ta hùrt nos, esei no ta sorprendé nos pasobra Hesus mes a bisa ku esei lo pasa.—Lesa Mateo 24:9.

2-3. Dikon mundu ta odia nos?

² Mundu ta odia nos, komo sirbidónan di Kristu, pasobra nos “no ta parti di mundu.” (Huan 15:17-19) P’esei aunke nos ta respetá gobièrnu humano, nos ta nenga di mete den polítika, saludá bandera i kanta himno. Nos ta adorá Yehova so. Nos ta apoyá i defendé su derecho di goberná, pero Satanas i su “simia” ta kuestioná e derecho ei. (Gén. 3:1-5, 15) Nos ta prediká ku ta e Reino di Dios so por resolvé e problemanan ku tin den mundu, anto ku pronto lo e destruí tur su enemigunan. (Dan. 2:44; Rev. 19:19-21) Esei ta bon notisia pa e humildenan, pero mal notisia pa e malbadonan.—Sal. 37:10, 11.

 ³ Un otro motibu mas dikon mundu ta odia nos ta pasobra nos ta sigui Yehova su normanan. E normanan ei ta hopi diferente for di e normanan baho di e mundu akí. Por ehèmpel, awe niun hende no ta mira nada malu den praktiká e mesun tipo di inmoralidat seksual ku a pone Dios destruí Sódoma i Gomora. (Hudas 7) Debí ku nos ta tene nos mes na e normanan ku tin den Beibel, hende ta hasi chèrchi di nos i ta bisa ku nos ta fanátiko.—1 Ped. 4:3, 4.

4. Ki kualidat lo yuda nos soportá odio?

⁴ Kiko por yuda nos soportá odio i insulto? Nos mester tin fe fuerte ku Yehova lo yuda nos. Nos fe ta manera un eskudo ku ta yuda nos “paga tur e flechanan sendí di e Malbado.” (Efe. 6:16) Pero aparte di fe nos mester di algu mas: amor. Dikon? Pasobra amor “no ta rabia lihé,” e ta wanta i soportá tur kos ku por hasi nos doló. (1 Kor. 13:4-7, 13) Awor laga nos wak kon amor pa Yehova, amor pa nos rumannan i asta amor pa nos enemigunan ta yuda nos soportá odio.

5. Kiko Hesus por a hasi debí ku e tabatin amor pa su Tata?

⁵ Riba e anochi promé ku Hesus a ser matá, el a bisa su siguidónan leal: “Mi ta hasi presis manera e Tata a manda mi hasi, . . . [pasobra] mi ta stima e Tata.” (Huan 14:31) E amor ku Hesus tabatin pa su Tata a yud’é enfrentá e pruebanan su dilanti. Nos amor pa Yehova por hasi meskos.

6. Segun Romanonan 5:3-5, kon Yehova su sirbidónan ta sinti ora mundu ta odia nan?

⁶ Amor pa Yehova semper a yuda su sirbidónan soportá persekushon. Wak kiko a pasa ora e korte supremo hudiu a ordená e apòstelnan pa stòp di prediká. Nan amor pa Dios a yuda nan “obedesé Dios na promé lugá, i no hende.” (Echo. 5:29; 1 Huan 5:3) E mesun amor ei ta fortalesé nos rumannan awe. Hopi di nan ta keda fiel apesar ku nan ta soportá persekushon na man di gobièrnunan kruel i peligroso. Pero, nos no ta desanimá ora mundu odia nos; mas bien nos ta mir’é komo un privilegio.—Echo. 5:41; lesa Romanonan 5:3-5.

7. Kiko nos tin ku hasi ora nos famia oponé nos?

⁷ Kisas un di e kosnan di mas duru ku nos tin ku trata kuné ta ora nos famia oponé nos. Kisas ora nos kuminsá mustra interes den e bèrdat, nan por pensa ku nos a ser engañá òf ku nos a bira di kabes. (Kompará ku Marko 3:21.) Podisé nan por asta maltratá nos físikamente òf verbalmente. Pero, e kosnan ei no mester sorprendé nos. Hesus mes a bisa: “E enemigunan di un hende lo ta su mes hendenan di kas.” (Mat. 10:36) Sin duda, sin importá kiko nos famia ta pensa di nos, nos no ta odia nan. Mas bien, segun ku nos amor pa Yehova ta oumentá nos amor pa hende tambe lo krese. (Mat. 22:37-39) Pero un kos sí, nos no ta bai stòp di obedesé ni ignorá prinsipionan di Beibel djis pa komplasé hende.

8-9. Kiko a yuda Georgina keda firme apesar di oposishon severo?

⁸ Georgina, menshoná anteriormente, a logra keda firme aunke su mama tabata opon’é. El a splika: “Ami ku mi mama a kuminsá studia Beibel ku Testigunan di Yehova. Pero despues di seis luna, ora ku mi kier a kuminsá bai Salòn, diripiente mi mama a kuminsá oponé mi. M’a haña sa ku e tabata den kontakto ku apóstata,  i e tabata purba di konvensé mi ku nan argumentonan. E tabata insultá mi, ranka mi kabei, choka mi i benta mi literatura afó. Ku mi 15 aña m’a batisá. Pa purba di stòp mi di sirbi Yehova mi mama a hinka mi den un instituto pa hóben problemátiko. Algun di e muchanan ei den tabata usa droga i kometé krímen. Oposishon ta bira asta mas duru pa trata kuné si e ta bini di un hende ku ta supose di stima bo i kuida bo.”

⁹ Kiko a yuda Georgina dil ku e situashon? El a bisa: “E dia ku mi mama a bira kontra mi, m’a kaba di lesa henter Beibel. E momento ei, mi tabata kompletamente konvensí ku m’a haña e bèrdat i m’a sinti ku m’a hala mas serka di Yehova. Tur ora bai mi tabata papia ku Yehova, i e tabata skucha mi. Tempu ku ainda mi tabata biba den e instituto, un ruman tabata invitá mi na su kas i nos tabata studia Beibel huntu. Anto durante e tempu ei, e rumannan di kongregashon tabata fortalesé mi. Nan a hasi mi parti di nan famia, i mi por a mira ku Yehova ta mas fuerte ku nos opositornan sin importá ken nan ta.”

10. Kiko nos tin sigur ku Yehova semper lo hasi?

¹⁰ Apòstel  Pablo a skirbi ku nada por “separá nos for di e amor di Dios ekspresá mediante Kristu Hesus, nos Señor.” (Rom. 8:38, 39) Aunke nos por sufri pa un tempu, Yehova semper lo t’ei banda di nos pa konsolá i fortalesé nos. I manera nos a mira den kaso di Georgina, Yehova ta usa e rumannan den nos kongregashon tambe pa yuda nos.

11. Kon e amor ku Hesus a deskribí na Huan 15:12 i 13 lo a yuda su disipelnan? Duna un ehèmpel.

¹¹ Riba e anochi promé ku Hesus su morto, el a kòrda su disipelnan ku nan mester stima otro. (Lesa Huan 15:12, 13.) E tabata sa ku e amor ei lo a yuda nan keda uní i sigui soportá e odio di mundu. Wak kiko a pasa den e kongregashon na Tesalónika. For di dia ku el a ser formá, e rumannan einan a haña nan ku persekushon. Apesar di tur esei, nan a keda fiel i a sigui stima otro i a bira un ehèmpel pa otro kristian imitá. (1 Tes. 1:3, 6, 7) Pablo a animá nan pa sigui demostrá amor “mas plenamente.” (1 Tes. 4:9, 10) Amor lo a motivá nan konsolá  esnan deprimí i yuda esnan débil. (1 Tes. 5:14) I nan a hasi loke Pablo a bisa nan pasobra den su di dos karta, ku el a skirbi mas o ménos un aña despues, el a bisa nan: “E amor ku kada un di boso tin pa otro ta birando mas profundo.” (2 Tes. 1:3-5) Sí, nan amor a yuda nan soportá difikultat i persekushon.

12. Kon e rumannan den un pais a demostrá amor pa otro durante tempu di guera?

¹² Wak kiko a sosodé ku Danylo menshoná anteriormente. Ora guera den su pais a plama bini su stat, e ku su esposa a sigui bai reunion, sigui prediká lo mihó ku nan tabata por anto kompartí kuminda ku nan tabatin ku nan rumannan. Un dia, algun sòldá armá a yega na Danylo su kas. Danylo a bisa: “Nan a eksigí ku mi tin ku bandoná mi fe. Ora mi a nenga, nan a bati mi i a hasi manera nan tabata bai tira mi. Nan a mek i tira over di mi kabes. Promé ku nan a bai, nan a menasá ku nan lo bini bèk i violá mi esposa. Mesora e rumannan a regla pa nos bai un otro stat ku trein. Nunka lo mi lubidá e amor ku e rumannan ei a demostrá. I ora nos a yega n’e stat nobo, e rumannan a duna nos kuminda, yuda mi haña un trabou i un lugá di biba. I komo resultado, nos tambe por a habri nos kas pa otro rumannan ku tambe tabata hui pa e guera.” Eksperensia asina ta mustra ku e amor ku nos tin pa otro lo yuda nos soportá odio.

13. Kon spiritu santu ta yuda nos sigui sirbi Yehova asta ora hende odia nos?

¹³ Hesus a bisa su siguidónan ku nan tin ku stima nan enemigunan. (Mat. 5:44, 45) Bo ta kere ku esei ta algu fásil? Apsolutamente ku nò! Pero, bo por logra esei ku yudansa di Dios su spiritu santu. E fruta di Dios su spiritu santu ta inkluí amor, pas, bondat, suavedat i dominio propio. (Gal. 5:22, 23) E kualidatnan ei ta yuda nos soportá odio. Debí ku algun ruman a demostrá e kualidatnan ei na nan kasá, mayor òf bisiña, nan no ta oponé nan mas. I despues, hopi di nan a bira nos rumannan. Pues, si bo ta haña ku ainda ta difísil pa stima esnan ku ta odia bo debí ku bo ta sirbi Yehova, pidié spiritu santu. (Luk. 11:13) I konfia ku loke Dios pidi bo hasi semper ta mihó.—Pro. 3:5-7.

14-15. Kon Romanonan 12:17-21 a yuda Yasmeen pa sigui demostrá amor na su esposo ku tabata opon’é?

 ¹⁴ Ora ku Yasmeen, kende ta biba na Medio Oriente, a bira Testigu di Yehova, su esposo a purba di stòp e pasobra el a pensa ku el a ser engañá. El a insultá Yasmeen i a pidi otro hende den famia, lidernan religioso i asta un hende ku ta praktiká magia pa menas’é i akus’é di ta kibrando nan famia. Durante un reunion, su esposo a asta insultá e rumannan! Debí na e manera ku su esposo tabata trat’é, hopi biaha Yasmeen tabata yora.

¹⁵ Na Salòn di Reino, e rumannan tabata konsol’é i fortales’é. E ansianonan a anim’é pa sigui loke tin skirbí na Romanonan 12:17-21. (Les’é.) Yasmeen a bisa: “Tabata hopi difísil pa mi hasi esei. Pero m’a pidi Yehova yuda mi, i m’a hasi mi bèst pa hasi loke Beibel a bisa. Pues, ora mi esposo tabata benta tera den kushina, mi tabata hasié limpi. I ora e tabata insultá mi, mi tabata kontest’é na un manera suave. Anto ora e tabata malu, mi tabata kuid’é.”

16-17. Kiko bo ta siña for di Yasmeen su eksperensia?

¹⁶ Yasmeen su esfuerso pa sigui demostrá amor na su esposo tabatin bon resultado. El a bisa: “Mi esposo a kuminsá konfia mi mas, pasobra e tabata sa ku semper mi tabata papia bèrdat. El a kuminsá skucha mi ora nos tabata papia di religion, i e tabata di akuerdo ku na kas mester tabatin pas. Awor e ta asta bisa mi pa disfrutá di mi reunionnan. Nos bida di famia ta hopi mas mihó awor i e ambiente na kas ta hopi mas trankil. Mi deseo ta pa un dia mi esposo tambe aseptá e bèrdat i ku nos por sirbi Yehova huntu.”

¹⁷ Yasmeen su eksperensia ta mustra nos ku amor “ta wanta tur kos, . . . spera tur kos [i] soportá tur kos.” (1 Kor. 13:4, 7) Sí, amor semper ta mas fuerte ku odio. Ora nos mustra otro hende amor, nan punto di bista tokante nos i Yehova por kambia. I segun ku nos ta sigui demostrá amor, esei lo hasi Yehova su kurason kontentu. Pero asta si opositornan no stòp di odia nos, nos por ta kontentu. Kon asina?

18. Dikon nos por ta felis ora hende ta odia nos?

¹⁸ Hesus a bisa: “Felis boso ta ora hende ta odia boso.” (Luk. 6:22) Nos no ta disfrutá ora hende odia nos ni tampoko ora nan persiguí nos debí na nos fe. Pues, den ki sentido nos ta felis ora hende ta odia nos? Pa di promé, ora nos soportá odio nos ta haña Dios su aprobashon. (1 Ped. 4:13, 14) Di dos, nos fe ta ser refiná i ta bira mas fuerte. (1 Ped. 1:7) I di tres, nos lo haña un rekompensa impagabel—bida eterno.—Rom. 2:6, 7.

19. Dikon e apòstelnan tabata kontentu despues ku nan a haña un halá di sota?

¹⁹ Un poko despues di Hesus su resurekshon e apòstelnan a sinti e felisidat ku el a papia di dje. Despues ku nan a haña un hala di sota i òrdu pa stòp di prediká, nan tabata kontentu. Dikon? “Pasobra Dios a konsiderá nan digno di ser desonrá pa kousa di Hesus su nòmber.” (Echo. 5:40-42) E amor ku nan tabatin pa nan Doño tabata mas grandi ku nan miedu pa nan enemigunan. Nan a demostrá amor ora nan a prediká e bon notisia “sin stòp.” Hopi di nos rumannan awe tambe ta sigui sirbi Yehova fielmente apesar di difikultat. Nan sa ku Yehova no ta lubidá nan trabou i e amor ku nan a mustra pa su nòmber.—Heb. 6:10.

20. Kiko nos ta bai studia den e siguiente artíkulo?

²⁰ Miéntras ku e mundu akí ta sigui eksistí nos lo tin ku soportá su odio. Pero, nos no mester tin miedu. Manera nos lo mira den e siguiente artíkulo, Yehova lo “fortalesé . . . i protehá” su siguidónan fiel. (2 Tes. 3:3) Pues, laga nos sigui stima Yehova, nos rumannan i asta nos enemigunan. Ora nos hasi esei, nos lo keda uní i nos fe lo bira mas fuerte. Nos lo onra Yehova i nos lo proba ku amor ta mas fuerte ku odio.