1. ¿Ima nirgantaj Jesús Mateo 24:9 textucho runacuna imano ricamänanchipaj?

IMAYPIS cuyanacuycarla cawacunapämi Jehovaga camamashcanchi, chaymi pipis chiquimaptinchiga manchacurmi laquinärishwan. Caypita Georgina jutiyoj pani wilacamun, nin: “14 watayoj caycaptëmi Jehovata sirvishgaläpita mamänëga alapa chiquimargan. Shongüga nanärishgarämi ‘¿rasunpachuraj mana ali wamra cä?’ nirmi tapucurgä”. * Danilo jutiyoj wawguipis cayno nin: “Jehovapa testigun cashgäpitami soldaducuna alapa magapäcamargan, ashlipäcamargan, chaypitami manchacash y laquishga caycargä”. Chiquicoj runacunaga contranchichomi sharcuycanga, chaypitaga maynami Jesús parlamurgan (leiriy Mateo 24:9).

2, 3. ¿Imanirtaj cay mundo runacunaga chiquimanchi?

² Cay munduwan mana talucashganchiraycurmi runacunaga alapa chiquimanchi (Juan 15:17-19). Waquincunaga himno naciunalta cantarmi banderacunapa nawpancho carcaycan, noganchicunaga manami chayta ruranchichu. Autoridäcunataga respetanchimi, pero politicamanga jaticunchichu. Shongunchi y umanchiga Jehovalapämi caycan, paylatami adurananchi. Diablupis y maquincho caycajcunapis Diospa Gobiernunpa contrancho caycan, pero noganchicunaga Jehovapa Gobiernuntami chasquicunchi (Gén. 3:1-5, 15). Runacunatami wilapanchi Diospa Gobiernunla imayca mana alicunata ushacächinanpaj (Dan. 2:44; Apoc. 19:19-21). Cushicurcunchimi cayta rurarga, chiquicojcuna ichanga mana (Sal. 37:10, 11).

³ Cay mundo runacunaga munashgalanta ruracärin,  noganchicunaga Dios mandamashganchinola cawacunchi, chayraycurpis paycuna chiquimanchi. Runacunaga yarpachacärinchu imanir unay Sodoma y Gomorra marcacunata Dios ushacächishganta, canan tiempunolami mana ali ruraynincuna cargan (Jud. 7). Awmi, ali cajta ruranapaj acrashganchilapitami runacunaga chiquimanchi (1 Ped. 4:3, 4).

4. ¿Imataj yanapämäshun pï maypis chiquimaptinchi aguantanapaj?

⁴ ¿Imataj yanapämäshun waquincuna chiquimaptinchipis aguantanapaj? Yaracoj cashganchimi yanapämäshun. Yaracuyninchiga imayca escudo japuymi caycan. Cayshi “chapämanchi dyablu mana allicunaman chayachimänanchïta” (Efes. 6:16). ¿Ima mastaj yanapämäshun? Cuyacoj cashganchimi yanapämäshun. Cuyacoj carga imayca nacachimashganchitami aguantashun (1 Cor. 13:4-7, 13). Canan sí ricarishun imanotaj Jehovata, hermanunchicunata y contranchicho caycajcunata cuyashganchi yanapämänchi pïmaypis chiquiycämaptinchi aguantanapaj.

5. ¿Imatataj rurargan Jesús Taytanta cuyashganraycur?

⁵ Wanunanpaj ichiclana pishiycaptinmi, gatejnincunata Jesús cayno nirgan: “Tsayno kaptinpis Taytä nimashqanta rurarmi wanutsimänanpaq kachapäshaq. Tsaynöpami runakuna musyanqa Taytäta kuyashqäta” (Juan 14:31). Taytan Jehovata cuyashganmi Jesustaga calpata gorgan imaycacunata aguantananpaj. Chaynolami canga noganchicunapis Jehovata cuyashpanchiga.

6. Pï runacuna chiquimaptinchipis, ¿imamantaj yarpächimanchi Romanos 5:3-5 textucuna?

⁶ Unaypitana runacunaga chiquimanchi aguantanapäga Diosta cuyashganchimi yanapämashcanchi. ¿Imataj apostulcuna rurargan Diospita yachachicuycanganta autoridäcuna michäcuptin? Diosta cuyaptinmi cayno nipäcurgan: “Runakunata cäsukunäpa trukanqa Tayta Diostami cäsukärishaq” (Hech. 5:29; 1 Juan 5:3). Chaynolami canan wichanpis waquin hermanunchicunaga carcelcho wichgarpaycan, y aguantapäcunanpäga Diosta cuyashganmi yanapaycan. Imatapis ruramashwanmi, maymanpis apamashwanmi, pero Diosninchipitaga manami pipis raquimäshunchu, cushi cushila payta sirviycäshun (Hech. 5:41; leiriy Romanos 5:3-5).

7. Castanchicunaga imatapis nimashwanmi, ¿imatataj rurashwan chay hora?

⁷ Öraga laquinaypämi canman, Diosta sirvishganchipita familianchi rurincho pipis chiquimaptinchi (Marcos 3:21 textuwan tincuchiy). Caynopis nimashwanmi ‘lutanpa aywaycanqui, ¿imanirtaj paycunata gatinqui?, ¡locutacushcanqui imachi!’ Magarpis magamashwanmi, chaychi Jesús cayno nirgan: “Runacunapa contranga canga jinan wasicho goyajcunami” (Mat. 10:36). Imano captinpis castanchicunataga manami chiquinchichu, Jehovata alapa cuyashganchimi yanapämanchi paycunatapis cuyanapaj (Mat. 22:37-39). Waquincunaga castancunapa ricaynincho ali cayta munarmi Diosta casucunchu, chaytaga noganchicuna imaypis rurashunchu.

8, 9. Imaycata aguantananpäga, ¿imataj yanapargan Georgina paninchita?

⁸ Georgina paninchita mamänin alapa nacachiptinpis, payga manami Diosta jaguirganchu: “Bibliata estudiaytaga ishcäcunami galaycärirgä. Sojta quillacuna  pasariptinga, reuniunman aywanäpaj nirgä. Chay hora cuentata gocurgä shonguncho ima cashganta, reuniunman aywanäpaj munarganchu. Apóstatas nishgancunawanmi juntacaycargan, mana chaylachu insultamajmi, ajchatapis chutamajmi, cuncäpita chariycamarmi sajtamayta munaj, publicaciunnëcunatapis may chaypa jitarej. 15 watayoj caycaptëmi bautizacurirgä y Diosta mana sirvinäraycurmi mamänëga juc wasiman apamargan, chaycho waquin estudiaj masëcunaga drogatami charaj y imayca mana alicunatami rurapäcoj. Imanomi shongunchi nanaycun, quiquin familianchi contranchicho captin”.

⁹ Aguantananpaj ima yanapashganpita Georgina cayno nin: “Mamänë imaycata nishgan junajga Bibliatami lapanta leiyta ushargä. Cuentata gocurgä rasunpa cajta tarishgäta y Jehová chararaycämashganta. Taytalä Diostaga cutin cutinmi mañacurgä, chay pasaycashga tiempuchomi Bibliata estudiapäcunäpaj juc nana invitamargan wasinman. Hermanucunapis manami jaguimarganchu, familiantanomi ricamargan. Jina cuentata gocurgä Jehovawan caycarga manami pipis guepaman cutichimashwanchu”.

10. ¿Imapis raquichimashwanchuraj cuyacoj Diosninchipita?

¹⁰ Cuyacoj Diosninchipitaga manami imapis raquimashwanchu, chaymi apóstol Pablupis cayno nirgan: “Mana imapis maquinpita jurgamäshunchu. Tayta Diosninchi mana caćharimäshunchu” (Rom. 8:38, 39, Biblia Panao). Canan hora may chaycho nacaycar imarga Taytalanchi Jehovaga noganchiwanmi caycan. Georgina pasashgancho ricashganchinopis hermanunchicunapis noganchiwanmi caycan, yanapämäshunmi.

11. Juan 15:12, 13 textucho Jesús parlamurgan imano cuyanacunapaj, ¿imanotaj cayga yanapargan Tesalónica marcacho caycaj cristianucunata?

¹¹ Wanunanpaj ichicla pishiycaptinmi, gatejnincunata Jesús nirgan jucnin jucnincuna cuyanacärinanpaj (leiriy Juan 15:12, 13). Chaytaga nirgan pïmaypis chiquipäcuptin aguantapäcunanpaj. Tesalónica marcacho cawaj cristianucunaga galaycunanlapitami imaycata aguantapäcurgan, chayno captinpis cuyapäcoj y yaracojmi capäcurgan (1 Tes. 1:3, 6, 7). Pabluga yarpachirganmi masraj cuyacoj  capäcunanpaj (1 Tes. 4:9, 10). Chayno cuyacoj carga yanaparganchi laquishga caycajcunata y calpaynaj caycajcunatapis (1 Tes. 5:14). Pablo consejacushgantaga casucärirganshi, chaymi yapay escribipashgancho Pablo cayno nirgan: “Tayta Diosninchita agradecicurcämi [...] jucniqui jucniquipis waquincunata mas cuyapäcungayquipita” (2 Tes. 1:3-5, Ambo-Pasco). Shumaj aw, cuyacoj cashgancunawanmi aguantargan imayca pruebacunata.

12. Guerra cashgan wichan, ¿imanotaj hermanunchicuna jucnin jucninpis yanapacärirgan?

¹² Yapay parlarishun Danilo wawgui warminwan imacunapa pasashganpita. Marcancho guerra caycaptinpis, reuniunmanga aywar caycarganshi, predicapäcurganshi y micunapaj ima charashgantapis hermanuncunawanshi micupäcurej. Juc cutichomi Danilupa wasinman soldaducuna chayaycamurgan, ima pasashganta pay wilacun: “Soldaducunaga Diosta jaguinäpaj nimargan, mana niptëmi magaycamargan. Yangalami armanwan apuntamargan, balanga umä jananlapami pasargan. Manaraj aywacärir jurapämarganraj cutiycamur warmïta violananpaj. Jinan horami, cuyapäcoj cashpan hermanuläcuna juc marcapa mandapäcamargan. Chay marcaman chayarirga, waquin hermanucunana chasquipäcamargan. Cawanapäga lapantami taripäcurgä, päquila paycunata. Tiempuwanga nogacunapis yanapäcurirgämi juc marcapita gueshpiypa shacamoj hermanucunata”. Cayno wilacuycunaga yarpächimanchi imanomi jucninchi jucninchi cuyacoj carga imaycatami aguantashwan.

13. Runacuna chiquiycämaptinchipis, ¿imanotaj Diospa espiritun yanapämäshun?

¹³ Chiquimajninchicunata cuyanapämi Jesusga nirgan (Mat. 5:44, 45). Chayno cananpäga Diospa espiritunmi yanapämäshun, ¿imano?, cuyacoj cananchipaj, jucla mana piñacunapaj, pitapis cuyapaylapa tratanapaj y alilatana imaypis ruranapaj (Gál. 5:22, 23). Dios munashganno ali runaman ticrashganchita ricarmi waquincunapis Diosta sirvir galaycushga. Yaracuyninchiraycur pipis chiquiycämaptinchiga Diosta ruwacushun espíritu santunta gomänanchipaj (Luc. 11:13). Cayta ama gongashunchu: Dios nimashganchita imaypis rurarga alimi cawacushun (Prov. 3:5-7).

14, 15. ¿Imanotaj Romanos 12:17-21 textucuna Yasmín panita yanapargan?

 ¹⁴ Canan parlarishun Yasmín jutiyoj panipita, Jehovapa testigunman ticrarishganlachomi runanga alapa piñacurgan y imaycata rurargan Diosta manana sirvinanpaj. Pasaypa ashlirmi y coleralawanmi, familiancunaman, juc pushacoj religiosuman y brujumanpis aywargan imaycapitapis warminta tumpananpaj. Runanga reuniunman aywaycurshi hermanucunata gaparayparaj insultargan. Cay lapanpitami panilanchi Yasmín alapa wagaj.

¹⁵ Congregaciuncho hermanucunami shogargan y waylupargan. Ancianucunapis tantiachirgan Romanos 12:17-21 (leiriy) texto ima nishganta. Chaypita Yasmín cayta nin: “Biblia nishganta ruranäpäga sasami o ajami cargan, chaymi Jehovata ruwacurgä yanapämänanpaj. Öraga adredimi runä wasïta ganrataj nogaga pichapacurejmi cä, insultamaptinpis upalacojmi cä y gueshyarcuptinpis jampilanta rurapajmi cä”.

16, 17. ¿Imataj yachacunqui Yasmín imapa pasashganpita?

¹⁶ Yasmín paniga runanta cuyaycashgalami, ¿imataj pasargan nircur? Paninchi cayno nin: “Rurashgäcunata ricarmi runäga respitamarganna, religiunpita parlarpis manana rabiacojnachu, jauca jaucalana cawapäcurgä. Cananga reuniunnïman aywanäpäpis yarpächimanrämi. Cushi cushilanami cawapäcö, imaylapis chayaramungachi juc junaj ishcäcuna Diosta sirvipäcunäpaj, chaymanmi yarpachacö”.

¹⁷ Yasmín imapa pasashganta ricarmi cuyanacuypita yachacunchi, cuyacoj carga imaycatami aguantanchi (1 Cor. 13:4, 7). Cuyacuywanga ushacächishwanmi chiquinacuyta. Piwanpis cuyanacurga alimi goyäcushun, ichanga piwanpis chiquinacurga laquesalamanmi apamäshun. Contranchicho caycajcunaga chiquiycämäshunmi, chayno captinpis noganchicunaga cushi cushila cawacuycäshun, ¿imano? Ricarishun.

18. ¿Imanirtaj cushi cushila caycashwan waquincuna chiquimaptinchipis?

¹⁸ Jesús cayno nirgan: “Cushishami cawanquipaj [...] runacuna chiquishuptiquipis” (Luc. 6:22). Manami munanchichu  runacuna chiquimänanchita. Chaurasga, ¿imanirtaj cushi cushila caycanchi waquincuna chiquiycämaptinchipis? Tantiarcunapaj quimsa caycan. Juc caj, pï chiquimashganchicunata aguantarga Jehovaga ali nawilanwanmi ricamäshun (1 Ped. 4:13, 14). Ishcay caj, yaracuyninchiga miranga y jatunyangami (1 Ped. 1:7). Y, quimsa caj, Diosta sirvishpanchiraycurmi shamoj tiempucho ali cawayta chasquishun (Rom. 2:6, 7).

19. May jinanpa magashga carpis, ¿imanirtaj apostulcunaga cushi cushila carcaycargan?

¹⁹ Jesuspa gatejnincunaga alapami cushicärergan Diosta sirvipäcushganpita. Paycunataga magapäcurganshi y Diospita mana yachachipäcunanpaj autoridäcuna nipäcorgan, y cushishgaga carcaycargan Jesuspa jutinraycur nacapacurmi (Hech. 5:40-42). Manchacuyninpis, laquicuyninpis aywacurgan Jehovata y Jesusta cuyapäcushganraycurmi, chayga ricacämurgan may chaypa ali wilacuyta aparmi. Canan wichanpis hermanunchicunaga may chaycho imaycapa pasarpis predicarcaycan. Musyapäcunmi paycunata Jehová imaypis mana jaguirinanpaj ni gongarinanpaj (Heb. 6:10).

20. ¿Imapitataj gatejnin cajcho yachacushun?

²⁰ Cay mundupa ushacaynin manaraj chayamuptinga, runacuna chiquiycämanganchicunataga aguantaycäshunmi (Juan 15:19). Chaypita manchacur imarga Jehovata ruwacushun yanapämänanchipaj. Chaypitaga gatejnin cajchona yachacushun (2 Tes. 3:3). Alapa alimi canga, Jehovata, hermanunchicunata y contranchicho caycajcunata cuyaycarla caycaptinchiga. Chayno carga lapanchipis juc shongula juc yarpayla caycäshun, Jehovapa jutin más alabashga canga y pï maypis musyanga alapa cuyacoj captinchi chiquinacuy ilacänanpaj cajta.