1. Ti gue oko na Matthieu 24:9, ngbanga ti nyen la li ti e akpe ape so dunia so ake e?

JÉHOVAH acréé e ti ye amba ti e nga ti tene ala ye e. Tongaso, tongana mbeni zo ake e, a yeke sara e nzoni ape nga mbeto alingbi même ti sara e. Na tapande, Georgina, mbeni ita-wali so ayeke na Europe, atene: “Na ngoi so mbi yeke lani na ngu 14, mama ti mbi ake mbi ndali ti so mbi voro Jéhovah. Vundu asara mbi mingi nga mbi bâ so mbi yeke gï mbi oko, nga mbi komanse ti pensé so mbi yeke nzoni zo ape.” * Danylo, mbeni ita-koli, atene: “Na ngoi so aturugu apika mbi, azonga mbi nga ala tene so ala yeke sara sioni na mbi ndali ti so mbi yeke Témoin ti Jéhovah, mbeto nga na kamene asara mbi.” Tongana a ke e tongaso, a yeke son e me li ti e akpe ape. Jésus atene kozo awe so a yeke ke e.—Diko Matthieu 24:9.

2-3. Ngbanga ti nyen la azo ake adisciple ti Jésus?

² Azo ti dunia so ake adisciple ti Jésus. Ngbanga ti nyen? Ngbanga ti so legeoko tongana Jésus, e yeke “ti dunia so pëpe.” (Jean 15:17-19). Atâa so e yeke ne akota zo ti kodro, e yeke voro ala ape, e yeke bara drapeau ape wala e yeke he hymne ape. E yeke voro gï Jéhovah. E yeke fa so Nzapa la ayeke na droit ti komande azo, droit so Satan na ‘ahale’ ti lo ake ni ngangu (Gen. 3:1-5, 15). E yeke fa na azo so Royaume ti Nzapa la ayeke oko ye so ayeke leke ande akpale ti azo nga fafadeso Royaume ni ayeke futi azo kue so ake ni (Dan. 2:44; Apoc. 19:19-21). Tënë so ayeke nzoni tënë ndali ti azo so asara  terê ti ala kete me ayeke sioni tënë ndali ti asioni zo.—Ps. 37:10, 11.

³ Azo ti dunia ake nga e ndali ti so e yeke sara ye alingbi na andia ti Nzapa. Andia so ayeke tâ nde mingi na sarango ye ti azo ti dunia so, so abuba kue. Na tapande azo mingi ayeda polele na mara ti asioni sarango ye so Nzapa afuti lani azo ti Sodome na Gomorrhe ndali ni (Jude 7). Ndali ti so e yeke sara ye alingbi na andia ti Bible so ake aye so, azo mingi ayeke he e nga ala tene so e yeda pëpe na abango ndo so ague nde na ti e.—1 Pi. 4:3, 4.

4. Asarango ye wa la ayeke mû ngangu na e na ngoi so azo ake e?

⁴ Nyen la alingbi ti mû maboko na e ti gbu ngangu na ngoi so azo ake e nga ala zonga e? A lingbi e mä na bê ngangu so Jéhovah ayeke mû ande maboko na e. Legeoko tongana mbeni vala, mabe ti e alingbi ti “mingo wâ ti akokora kue ti Zo ti sioni.” (aÉph. 6:16). Me e bezoin gï mabe ape. E bezoin nga ndoye. Ngbanga ti nyen? Ngbanga ti so ndoye ‘ayeke sara ngonzo hio hio pëpe.’ Lo kanga bê nga lo gbu ngangu na yâ ti aye kue so ason bê ti lo (1 aCor. 13:4-7, 13). Zia e bâ tongana nyen la ti ndoye Jéhovah, amba ti e aChrétien nga même awato ti e ayeke mû maboko na e gbu ngangu na ngoi so azo ake e.

5. Nyen la Jésus awara lege ti sara ndali ti so lo ndoye Babâ ti lo?

⁵ Na bï so na ndade ni awato ti Jésus afâ lo, lo tene na adisciple be-ta-zo ti lo, lo tene: “Mbi ndoye Babâ, [tongaso] mbi yeke sara gï tongana ti so Babâ amû yanga na mbi ti sara.” (Jean 14:31). So Jésus andoye Jéhovah amû ngangu na lo ti gbu ngangu na yâ ti atara so ayeke ku lo. Ndoye ti e ndali ti Jéhovah alingbi ti mû maboko na e ti sara nga tongaso.

6. Ti gue oko na aRomain 5:3-5, awakua ti Jéhovah apensé nyen na ndö ti gbungo ngangu na gbele kengo ndo ti azo ti dunia?

⁶ Ti ndoye Jéhovah Nzapa amû maboko lakue na awakua ti lo ti gbu ngangu na ngoi so azo asara ye ti ngangu na ala. Na tapande, na ngoi so kota da-ngbanga ti aJuif so ayeke ngangu mingi amû yanga na abazengele ti zia ti fa tënë, so ala ndoye Nzapa apusu ala ti “mä yanga ti Nzapa, lo so lo yeke mokonzi, ahon ti mä azo.” (Kus. 5:29; 1 Jean 5:3). Mara ti kpengba ndoye so ayeke mû nga maboko na aita ti e so ayeke dö sese na angangu zo ti gouvernement so ayeke sara ye ti ngangu na ala. Na ngoi so azo ti dunia so ake e, e yeke découragé ape me e yeke na ngia.—Kus. 5:41; diko aRomain 5:3-5.

7. A yeke nzoni e sara ye tongana nyen na ngoi so azo ti sewa ti e ake e?

⁷ Tongana azo ti sewa ti e ake e, a lingbi ti duti ngangu mingi na e ti gbu ngangu dä. Tongana ambeni zo ti sewa ti e abâ so tâ tënë akomanse ti gbu bê ti e, peut-être ala yeke pensé so mbeni zo ahanda e. Ambeni alingbi ti pensé so ye asara li ti e. (Bâ Marc 3:21.) Ala lingbi même ti ke e ngangu. Ye so adoit ti sara si li ti e aga kirikiri ape. Jésus atene: “Awato ti zo ayeke duti ande azo ti da ti lo wani.” (Mat. 10:36). Ye oko, atâa afami ti e abâ e tongana nyen, e yeke bâ ala tongana awato ti e ape. Me so ndoye ti e teti Jéhovah ayeke maï, ndoye ti e teti azo adoit nga ti maï (Mat. 22:37-39). Atâa so kue, e yeke zia lâ oko ape ti sara ye alingbi na andia nga na amama-ndia ti Bible gï ti zia ngia bê ti azo.

8-9. Nyen la amû lani maboko na mbeni ita-wali ti luti ngangu atâa so a sara ye ti ngangu mingi na lo?

⁸ Georgina, so e sara tënë ti lo fade, awara lege ti luti ngangu atâa so mama ti lo asara ye ti ngangu mingi na lo. Georgina atene: “A-Témoin ti Jéhovah akomanse lani ti manda Bible  na mbi na mama ti mbi. Me nze omene na pekoni, na ngoi so mbi ye ti komanse ti gue na abungbi, bango ndo ti mama ti mbi achangé ngangu. Mbi ga ti hinga so lo yeke diko ambeti ti a-apostat, na lo sara kua na atënë ti mvene ti ala na ngoi so lo yeke sara tënë na mbi. Lo yeke zonga nga mbi, lo gboto kuä ti li ti mbi, lo pete go ti mbi nga lo tuku ambeti ti mbi. Na peko ti so mbi wara ngu 15, mbi wara batême. Mama ti mbi agi ti kanga lege na mbi ti sara na Jéhovah na lege so lo zia mbi na mbeni ndo so a zia amaseka so asara kpengbango-li dä, ambeni anyon aye so atourné li ti zo nga ala sara asioni ye. Tongana zo so ake mo ayeke zo so adoit ti ye mo nga ti bâ lege ti mo, a yeke ngangu mingi ti kanga bê dä.”

⁹ Nyen la amû lani maboko na Georgina ti gbu ngangu? Lo tene: “A yeke gï na lango so mbi hunzi ti diko Bible kue la mama ti mbi akomanse ti ke mbi. Mbi hinga lani na bê ti mbi kue so mbi wara tâ tënë awe na mbi bâ so mbi yeke nduru mingi na Jéhovah. Fani mingi mbi sambela lo na lo mä mbi. Na ngoi ni so mbi yeke lani na ndo ni so, mbeni ita-wali atisa mbi na ndo ti lo na mbi na lo e manda Bible ndo oko. Na ngoi ni so, aita ayeke kpengba mbi na Da ti Royaume. Ala sara ye na mbi tongana fami ti ala. Mbi bâ lani polele so Jéhovah ayeke ngangu ahon azo so ake e atâa ala yeke azo wa.”

10. Nyen la e yeke na confiance so Jéhovah Nzapa ti e ayeke sara ni lakue?

¹⁰ Bazengele Paul atene so ye oko alingbi ti “kangbi e na ndoye ti Nzapa pëpe, ndoye so ayeke na yâ ti Christ Jésus Seigneur ti e.” (aRom. 8:38, 39). Atâa so e lingbi ti bâ pasi teti mbeni ngoi, Jéhovah ayeke duti lakue na terê ti e ti dë bê ti e nga ti kpengba e. Nga, tongana ti so ye so asi na Georgina afa, Jéhovah ayeke mû nga maboko na e na lege ti aita ti congrégation.

11. Tongana nyen la ndoye so Jésus asara tënë ni na Jean 15:12, 13 ayeke mû maboko na adisciple ti lo? Fa mbeni tapande ni.

¹¹ Na bï so na ndade ni Jésus akui, lo dabe ti adisciple ti lo ti ndoye mba. (Diko Jean 15:12, 13.) Lo hinga lani so ndoye so agi ye ndali ti nzoni ti lo wani ape ayeke amû maboko na ala ti ngbâ ti duti beoko nga ti gbu ngangu na ngoi so azo ti dunia so ake ala. Bâ tapande ti congrégation ti Thessalonique. Na ngoi so congrégation ni abâ gigi, azo asara aye ti ngangu  na aita ni. Ye oko, ala ga tapande ti azo so agbu ngangu nga so asara ye na ndoye (1 aThes. 1:3, 6, 7). Paul awa lani ala ti ngbâ ti sara ye na ndoye même “mingi mingi ahon ti kozo.” (1 aThes. 4:9, 10). Ndoye ayeke pusu ala ti sara tënë so adë bê ti azo so vundu asara ala mingi nga ti mû maboko na azo so awoko (1 aThes. 5:14). Ala sara ye lani alingbi na awango ti Paul, ndali ti so na yâ ti use lettre so Paul atokua na ala ngu oko tongaso na pekoni, lo tene: “Ndoye so ala oko oko kue ayeke na ni si ala yeke fa na popo ti ala angbâ gï ti maï.” (2 aThes. 1:3-5). Ndoye so ala yeke na ni amû lani maboko na ala ti gbu ngangu na yâ ti angangu kpale nga na aye ti ngangu so a sara na ala.

12. Na ngoi ti mbeni bira, nyen la aita ti mbeni kodro asara ti fa so ala ye terê?

¹² Bâ ye so asi na Danylo, so e sara tënë ti lo fade, lo na wali ti lo. Na ngoi so bira so ayeke na yâ ti kodro ti ala asi na gbata ti ala, ala ngbâ lani ti gue na abungbi, ti sara ngangu ti fa tënë nga ti kangbi kobe so ala yeke na ni na aita. Mbeni lâ, aturugu so ayeke na ngombe aga na da ti Danylo. Danylo atene: “Ala hunda na mbi ti bere mabe ti mbi. Na ngoi so mbi ke, ala pika mbi nga ala sara ye mo bâ mo tene ala ye ti pika mbi na ngombe, ala pika ngombe ni na ndö ti li ti mbi. Kozo ti hon, ala tene ala yeke ga ande ti lango na wali ti mbi na ngangu. Me hio, aita azia e na yâ ti mbeni train so ayeke gue na yâ ti mbeni gbata nde. Mbi yeke girisa lâ oko ape ndoye ti aita so, so e ye ala mingi. Nga na ngoi so e si na fini gbata ni, aita ti kâ amû na e kobe nga ala mû maboko na e ti wara mbeni kua nga na mbeni da. A sara si e lingbi ti yamba na da ti e ambeni Témoin so ayeke kpe ndo so bira ayeke dä.” Aye so asi so afa so ndoye so ayeke na popo ti e aChrétien alingbi ti mû maboko na e ti gbu ngangu tongana azo ake e.

13. Tongana nyen la yingo vulu ayeke mû maboko na e ti gbu ngangu na yâ ti kua ti Jéhovah même tongana azo ake e?

¹³ Jésus atene na adisciple ti lo ti ndoye awato ti ala (Mat. 5:44, 45). Eskê a yeke kete ye ti sara ni? Ên-ën, a yeke kete ye ape. Me yingo vulu ti Nzapa alingbi ti mû maboko na e ti sara ni. Na yâ ti lengo ti yingo ti Nzapa, mo yeke wara: ndoye, kangango bê ti ku, sarango nzoni na zo, sarango ye na ngangu pëpe nga na kangango nzara ti bê (aGal. 5:22, 23).  Asarango ye so ayeke mû maboko na e ti gbu ngangu tongana azo ake e. Azo mingi azia ti ke e ndali ti so koli ti ala, wali ti ala, molenge ti ala wala voizin ti ala ayeke na asarango ye so. Azo mingi so ake e lani aga même aita ti e so e ye ala mingi. Tongaso, tongana a yeke ngangu na mo ti ndoye azo so ake mo gï ndali ti so mo yeke sara na Jéhovah, sambela ti wara yingo vulu (Luc 11:13). Nga hinga na bê ti mo kue so, mango yanga ti Nzapa ayeke lakue nzoni ye ti sarango ni.—aProv. 3:5-7.

14-15. Tongana nyen la aRomain 12:17-21 amû maboko na Yasmeen ti ye koli ti lo atâa so lo kanga lege na lo ngangu?

¹⁴ Bâ tapande ti mbeni ita-wali so iri ti lo ayeke Yasmeen. Na ngoi so lo ga Témoin ti Jéhovah, koli ti lo apensé so a handa lo nga lo gi ti kanga lege na lo. Lo zonga lo nga lo hunda na afami, mbeni kota zo ti nzapa nga na mbeni zo ti yorö ti zia mbeto na yâ ti lo nga ti bi tënë na li ti lo so lo buba yâ ti sewa ti lo. Lo zonga même aita na ngoi ti mbeni bungbi. Fani mingi, Yasmeen ayeke toto ndali ti so koli ti lo asara ye na lo na lege ni ape.

¹⁵ Na Da ti Royaume, aita akpengba Yasmeen nga ala dë bê ti lo. A-ancien awa lo ti sara ye alingbi na aRomain 12:17-21. (Diko ni.) Yasmeen atene: “A yeke lani ngangu na mbi ti sara ni. Me mbi hunda Jéhovah ti mû maboko na mbi, nga mbi sara kue ti sara ye alingbi na aye so Bible afa. Tongaso na ngoi so koli ti mbi atuku sese na mbana na yâ ti cuisine, mbi balê ni. Tongana lo zonga mbi, mbi yeke kiri tënë yeke. Nga tongana terê ti lo ason, mbi yeke bâ lege ti lo.”

16-17. Nyen la mo manda na lege ti tapande ti Yasmeen?

¹⁶ Yasmeen awara lani aye ti nzoni ndali ti so lo ye koli ti lo. Lo tene: “Koli ti mbi akomanse ti sara confiance na mbi mingi ndali ti so lo hinga so mbi yeke tene lakue tâ tënë. Lo komanse ti mä mbi nzoni tongana e yeke sara tënë na ndö ti Nzapa, nga lo yeda ti tene e sara kue ti duti na siriri na yanga-da. Fadeso lo yeke tene na mbi ti gue na abungbi. Mbi na koli ti mbi, e yeke mä terê fadeso nzoni mingi nga siriri ayeke na yâ ti da ti e. Mbi yeke ku kungo ti tene koli ti mbi ayeda na tâ tënë nga mbi na lo e sara na Jéhovah.”

¹⁷ Tapande ti Yasmeen afa so ndoye ‘akanga bê na gbele aye kue, . . . lo zia beku na ndö ti aye kue, lo gbu ngangu na yâ ti aye kue.’ (1 aCor. 13:4, 7). Ndoye ayeke ngangu mingi ahon kengo zo. Tongana e ye azo, a lingbi ti sara si ala zia ti kanga lege na e. Nga tongana  e ngbâ ti ye azo, a yeke zia ngia na bê ti Jéhovah. Même tongana awato ti e angbâ ti ke e, e lingbi ti ngbâ ti duti na ngia. Na lege wa?

18. Ngbanga ti nyen la e lingbi ti duti na ngia atâa azo ake e?

¹⁸ Jésus atene: “Ngia ayeke na ala tongana azo ake ala.” (Luc 6:22). E la e soro ti tene azo ake e ape. A nzere na e ape ti tene azo asara aye ti ngangu na e ndali ti mabe ti e. Tongaso, ngbanga ti nyen la e lingbi ti duti na ngia atâa azo ake e? Ngbanga ti araison ota. Kozo ni, tongana e gbu ngangu e yeke nzere na lê ti Nzapa (1 Pi. 4:13, 14). Use ni, mabe ti e ayeke ga ye ti ngangu ngere nga ayeke kpengba (1 Pi. 1:7). Ota ni, e yeke wara futa so ahon atanga ni kue: fini ti lakue lakue.—aRom. 2:6, 7.

19. Ngbanga ti nyen la abazengele ayeke lani na ngia na peko ti so a pika ala?

¹⁹ Kete na peko ti so a zingo Jésus na kuâ, abazengele awara ngia so lo sara lani tënë ni. Na peko ti so a pika ala nga a mû yanga na ala ti zia ti fa tënë, terê ti ala anzere. Ngbanga ti nyen? “Ngbanga ti so a bâ so ala lingbi ti tene a sara ye ti kamene na ala ndali ti iri ti Jésus.” (Kus. 5:40-42). Ala ndoye Maître ti ala mingi ahon sarango mbeto ti awato ti ala so ake ala. Ala fa ndoye ti ala ni na lege so “ala zia pëpe” ti fa nzoni tënë. Laso, aita ti e mingi angbâ be-ta-zo atâa akpale so ala wara. Ala hinga so Jéhovah ayeke girisa ande ape kua ti ala nga na ndoye so ala fa ndali ti iri ti lo.—aHéb. 6:10.

20. Nyen la e yeke bâ na yâ ti article ti peko?

²⁰ Dunia so ayeke ngbâ ti ke e juska na ngoi so a yeke futi ni (Jean 15:19). Me e bezoin ti sara mbeto ape. Tongana ti so article ti peko ayeke fa, Jéhovah ‘ayeke sara ande si [azo so ayeke be-ta-zo na lo] aluti ngangu nga lo yeke bata ala’. (2 aThes. 3:3). Tongaso, zia e ngbâ ti ye Jéhovah, aita ti e nga même awato ti e. Tongana e sara ye alingbi na wango so, e yeke ngbâ beoko nga mabe ti e ayeke kpengba, e yeke mû gonda na Jéhovah nga e yeke fa so ndoye ayeke ngangu mingi ahon kengo zo.