1. Guya khu Matewu 24:9, khu ginani hi si hlamaligo litigo la gu hi nyenya?

JEHOVHA a hi vangide gasi hi haladza vambe ni gu bwe hi haladzwa. Khu gighelo gyogyo, si ngu vbisa ngudzu ha gu nyenywa nigu si ngu theya hwanga. Khu giyeyedzo, ndriyathu moyo nya nyamayi nyo pwani khu Georgina, a vbanyago Europa wari khuye: “Tepo nyi nga ba nyi ri ni 14 myaga, mamayi wangu a di gu nyi nyenya kholu nyi nga ba nyi thumeya Jehovha. Isoso si nyi vbiside ngudzu, nyi dzipwa nyonga nigu nyi di pheya gu pimisa gu kheni adzina kha nyiri muthu nya wadi.” * Ndriyathu moyo nyo pwani khu Danylo wari khuye: “Tepo masotshwa ma nga nyi veta, ma nyi valeteya ma bwe ma nyi thurugiseya khu gu ba nyiri Fakazi ya Jehovha, nyi thavide ngudzu nyi bwe nyi dzipwa na nyi siri wa gilo.” Gu nyenywa khu ndziya yeyi, si ngu vbisa, ganiolu kha si hi hlamadzisi. Jesu ganede gu khuye hi na nyenywa. — Leri Matewu 24:9.

2-3. Khu ginani valandreyi va Jesu va nyenywago?

² Khu ginani litigo li nyenyago valandreyi va Jesu? Khu gu, gufana ni Jesu kha “hi lumbi litigo.” (Johane 15:17-19) Ethu hi ngu ninga githawo mifumo nya vathu, ganiolu kha hi yi khozeyi mwendro gu khozeya sifananiso sayo. Ethu ha gu khozeya Jehovha basi. Ethu ha gu seketeya gu khethu Nungungulu khuye basi a gu ni fanelo nya gu fume vathu, ganiolu Sathane ni vaphasedzeyi vaye kha va dzumeyi isoso. (Gen. 3:1-5, 15) Ethu ha gu tshumayela gu khethu Mufumo wa Nungungulu khuwo basi wu na lulamisago sigaradzo nya vathu, nigu nugunugu wu na ta fuvisa ava va wu wugeyago. (Dhan. 2:44; Gutu. 19:19-21) Aya mahungu nya yadi ga vathu nya vadi, ganiolu mahungu nya mba yadi ga vathu nyo vivbe. — Ndzi. 37:10, 11.

 ³ Gimbe gilo gi girago gu hi nyenywa khu gu ethu ha gu vbanya guya khu milayo ya Nungungulu. Ha gu fananisa esi Nungungulu a hevbudzago ni esi litigo li hevbudzago ha gu dzegeya gu si wona gu khethu si hambanide ngudzu. Khu giyeyedzo, Nungungulu fuviside Sodhoma ni Ghomora khu kotani nya wubhayi ni simbe silo nyo vivbe va nga ba va gira, ganiolu muhuno vathu va gu gira silo soso na va tshulegide! (Judha 7) Khu kotani nya olu hi engisago matshina nya milayo nya Bhibhiliya maningano ni sigiro sesi, vathu nya vangi va gu hi hega va bwe khavo hi na ni gihatheya.— 1 Ped. 4:3, 4.

4. Makhalelo muni ma hi phasago gutimiseya ambari na hi gu nyenywa?

⁴ Ginani gi nga hi phasago gutimiseya gu nyenywa ni gu vadwa? Gu vbwetega hi manega ni gukhodwa nyo tiye nyo khethu Jehovha a na hi phasa. Gukhodwa, go fana ni gitshangu gi hi vhikeyago ga “matshari yatshavbo nya nilo wa Sathane.” (Efes. 6:16) Ganiolu, vbavbandze nya gukhodwa, gyomo gimbe gilo gambe hi yedego gu manega nagyo. Hi yede gu manega ni lihaladzo. Khu ginani? Kholu lihaladzo “kha li khali likhulo.” Ilo li ngu rwala satshavbo ni gutimiseya satshavbo ambari sa gu ba si hi pwisa guvbisa. (1 Kor. 13:4-7, 13) Olu, hongoleni hi wona edzi lihaladzo lathu khu Jehovha, lihaladzo lathu khu vandriyathu ni lihaladzo lathu khu valala li hi phasago khidzo gutimiseya ambari na hi gu nyenywa.

5. Lihaladzo eli Jesu a nga ba ari nalo khu Papayi waye, li mu phaside kharini?

⁵ Na gu tshade vbadugwana gasi gu Jesu a songwa khu valala vaye, a embede valandreyi vaye khuye: “Nyi ngu gola Babe, [khu kharato] nyi ngu gira kha nga idzo Babe a nga nyi rumago khidzo.” (Johane 14:31) Lihaladzo eli Jesu a nga ba ari nalo khu Jehovha, li mu phaside gutimiseya sigaradzo si nga hadzi mu dugeleya. Lihaladzo lathu khu Jehovha li nga hi phasa nethu khu ndziya nyo fane.

6. Guya khu Varoma 5:3-5, sithumi sa Jehovha sa gu dzipwa kharini khu gu ba litigo li si nyenya?

⁶ Lihaladzo khu Nungungulu tepo yatshavbo li phaside sithumi sa Jehovha gutimiseya gu wugedwa. Khu giyeyedzo, ga tepo nyo khaguri, tribhunali nya yikhongolo ya Judha yi himbedzede vapostoli gu tshumayela, ganiolu vapostoli va di gu haladza ngudzu Nungungulu, khu kharato va di hatha “gu yingela Nungungulu guvbindra gu yingela vathu.” (Mithumo 5:29; 1 Johane 5:3) Esi khiso si dugeleyago vandriyathu muhuno. Vandriyathu nya vangi va ngu wugedwa khu mifumo nyo vivbe nya tshivba ngudzu. Ganiolu lihaladzo lawe khu Jehovha, li ngu va phasa gutimiseya. Khu kharato, tepo litigo li hi nyenyago ethu kha hi vbeyi tshivba, ganiolu, ha gu si wona kha nga lithomo. — Mithumo 5:41; leri Varoma 5:3-5.

7. Ginani hi yedego gu gira ha gu wugedwa khu valongo?

⁷ Adzina gilingo nya gikhongolo gi ngata khiyo ga valongo vathu kamwe. Tepo hi pheyago gu gola lisine vambe valongo vathu va nga pimisa gu khavo ha gu kanganyiswa. Vambe va nga pimisa khavo ha gu handruga. (Fananisa ni Marko 3:21) Avo va nga hi wugeya khu dzindziya dzatshavbo. Ganiolu isoso kha si yeli gu hi hlamadzisa. Jesu a di khuye: “Valala nya muthu va na dugela muvalongoni gwaye.” (Mat. 10:36) Ambari valongo vathu va gu hi phara khu ndziya nya mba yadi, ethu kha hi va woni kha nga valala. Gu hambana ni isoso, tepo lihaladzo lathu khu Jehovha li dandrago, lihaladzo lathu khu vathu li yede gu dandra nilo. (Mat. 22:37-39) Ganiolu, kha hi yeli gu diga gu engisa milayo ni matshina nya milayo nya Bhibhiliya khu gu vbweta gu engisa vathu.

8-9. Ginani gi phasidego ndriyathu moyo nya nyamayi gu timiseya ambari olu a nga ba a wugedwa?

⁸ Georgina hi ganedego khuye gupheyani a si kodzide gu simama na tiyide ambari olu a nga ba a wugedwa khu mamayi waye. Georgina a gu tshamuseya khuye: “Eni ni mamayi wangu hi phede gu hevbula Bhibhiliya ni Dzifakazi dza Jehovha.  Ganiolu, hwane nya 6 migima, tepo nyi nga vbweta gu pheya gu hongola mitshanganoni, mamayi a di nyi wugeya. Nyi di tugula gu kheni uye, a di gu dzi tshanganisa ni vawugeyi nigu satshavbo esi va nga ba va mu embeya khiso a nga ba a khaleya gu nyi embeya neni. Uye a di gu nyi valeteya, a nyi ndrindra ndzudzu wangu, a nyi gama ngolo a bwe a dzudzuga mabhuku yangu. Tepo nyi nga gira 15 myaga nyi di bhabhatiswa. Gasi gu zama gu nyi digisa gu thumeya Jehovha, mamayi wangu a di nyi yisa ga wulanga wu nga ba gu vegwa vaphya va gu ni sigaradzo nyo khaguri, avbovbo si lombide gu nyi vbanya nyi vaphya va nga ba vari sighevenga ni gu thumisa dzidroga. Adzina si nga garadza gutimiseya wa gu wugedwa khu muthu a nga ba a yede gu gu haladza ni gu gu khathaleya.”

⁹ Ginani gi phasidego Georgina gutimiseya? Uye wari khuye: “Litshigu mamayi wangu a nga pheya gu nyi wugeya, nyi di ngari gu vbedza gu leri Bhibhiliya yatshavbo. Eni nyi di gu tiyisega gu kheni nyi di manide lisine nigu nyi di gu dzipwa vbafuvbi ni Jehovha. Eni nyi di gu gombeya gwaye tepo yatshavbo nigu uye a di gu nyipwa. Tepo nyi nga ba nyi vbanya ga wulanga wule gu nga ba gu vegwa vaphya vale va nga ba vari ni sigaradzo nyo khaguri, ndriyathu moyo nya nyamayi a di gu oloveya gu nyi konvhidhari gaya gwaye hi ya hevbula hatshavbo Bhibhiliya. Ga tepo yeyi, nyi tiyisidwe ngudzu khu vandriyathu libandlani. Avo va di gu nyi wona nga gyanana gya ndrangani. Nyi di dzegeya gu si wona gu kheni Jehovha na ni tshivba ngudzu guvbindra ni wevbini muthu a hi wugeyago.”

10. Tepo yatshavbo, hi nga tiyisega gu khethu Jehovha Nungungulu wathu a na gira ginani?

¹⁰ Mupostoli Pawulo, lovide gu khuye gimwalo gilo gi nga kodzago gu hi “hambanisa ni lihaladzo la Nungungulu hi yeyedzidwego khu Pfhumu yathu Jesu Kristo.” (Rom. 8:38, 39) Ambari ha gu ba hi tshaniseka khu tepo nyo khaguri, Jehovha tepo yatshavbo a na ba ari ni ethu gasi a hi thaveleya ni gu hi tiyisa. Nigu kha nga hi si wonidego avba nya matshangu ya Georgina, Jehovha gambe a na hi phasa khu gu thumisa vandriyathu libandlani.

11. Lihaladzo li khumbugidwego khu Jesu omu ga Johane 15:12, 13 li di hadzi phasa kharini vapizane vaye? Ninga giyeyedzo.

¹¹ Ga wutshigu wule Jesu na si gufi, uye embede vapizane vaye gu khuye va di yede gu haladzana khu gwaye. (Leri Johane 15:12, 13.) Uye a di gu dziti gu khuye lihaladzo lolo li di hadzi va phasa gu simama gu pwana ni gu gutimiseya gu nyenywa khu litigo. Wona giyeyedzo gya libandla la Tesalonika.  Gukhugeya li nga emiswa, vandriyathu va di gu wugedwa. Ambari ulolo, avo va diri giyeyedzo nya gyadi nyo timiseye khu gu tumbega ni lihaladzo. (1 Tes. 1:3, 6, 7) Pawulo kutside vandriyathu va Tesalonika gu yeyedza lihaladzo nigu va di yede gu simama “va andrisa ngudzu” isoso. (1 Tes. 4:9, 10) Lihaladzo li di hadzi gu va kutsa gu thaveleya ava va rerekidego ni gu phasa ava va vbedego tshivba. (1 Tes. 5:14) Vandriyathu va Tesalonika, va landriside sileletelo sa Pawulo nigu avba nya lidangaliya laye nya wuvili a lovidego hwane nya mwaga moyo, Pawulo a di va embeya khuye “lihaladzo lanu li dandride, eli mu girelanago khu gyanu.” (2 Tes. 1:3-5) Lihaladzo li phaside vandriyathu va Tesalonika gutimiseya sigaradzo ni gu wugedwa.

12. Tepo gu nga ba guri ni nyimbi, vandriyathu va litigo nyo khaguri va yeyedzanide kharini lihaladzo?

¹² Wona giyeyedzo gya Danylo ni mwangadzi waye hi ganedego khavo gupheyani. Tepo dhoropani gwawe gu nga pheya nyimbi, avo va di simama gu hongola mitshanganoni, va tshumayela khavba va nga ba va si kodza khavbo va bwe va kabana esi va nga ba vari naso ni vambe vandriyathu. Litshigu limwedo, masotshwa ma nga ba mari ni siphisa ma di yela Danylo gaya gwaye. Danylo wari khuye: “Ayo ma di nyi gurumedza gu diga gu khala Fakazi ya Jehovha. Tepo nyi nga bomba, ayo ma di nyi veta ma bwe ma gira khatshi mo vbweta gu nyi vbophosa avba nya hungo. Na va si hongoli, va di tumbisa khavo va na wuya va ta pfhinya mwangadzi wangu. Ganiolu, nya mba hweya vandriyathu va di hi bedza omu nya gibhomba hi hongola ga limbe lidhoropa. Gima kha nyi na nga divala lihaladzo li yeyedzidwego khu vandriyathu vava. Tepo hi nga vboha ga lidhoropa nya liphya, vandriyathu va dhoropani mule, va di hi ninga guhodza va bwe va hi phasa gu mana thumo ni ndranga! Khu kharato, anethu hi si kodzide gu phasa vambe vandriyathu va nga ba va tutuma khu malanga gu nga ba guri ni nyimbi.” Matshangu nya nga aya, mo yeyedza gu khayo lihaladzo nya wundruye li nga hi phasa gutimiseya ambari na hi gu nyenywa.

13. Liphuvbo nya guage la gu hi phasa kharini gutimiseya thumoni ga Jehovha ambari vathu va gu ba va hi nyenya?

¹³ Jesu a ganede gu khuye valandreyi vaye va yede gu haladza valala vawe. (Mat. 5:44, 45) Ina si ngu vbevbuga gu gira isoso? Ne vbadugwana. Ganiolu khu gu phaswa khu liphuvbo nya guage la Nungungulu, si ngu kodzega. Vbavbandze nya lihaladzo, mithumo nya liphuvbo nya guage la Nungungulu ya gu pata gutimiseya, wuwadi, gudzirudzisa ni gu hunga monyo. (Gal. 5:22, 23)  Yatshavbo makhalelo yaya, ma ngu hi phasa gutimiseya ambari na hi wugedwa. Nya vangi va nga ba vari vawugeyi gale, va vbindrugedzide tepo va nga wona vama vawe, vagadzi vawe, sanana sawe mwendro vavhizinyu na va gu yeyedza makhalelo yaya. Vangi gwawe va khade vandriyathu. Khu kharato, sa gu ba si gu garadzeya gu haladza ava va gu nyenyago khu gu ba u thumeya Jehovha, gombeya u lomba liphuvbo nya guage. (Luka 11:13) Tiyisega gu khuwe ndziya eyi Nungungulu a girago khiyo silo khyadi tepo yatshavbo. — Mav. 3:5-7.

14-15. Libhuku la Varoma 12:17-21 li phaside kharini Yasmeen gu yeyedza lihaladzo mwama waye ambari olu a nga ba a mu wugeya?

¹⁴ Wona giyeyedzo gya Yasmeen a vbanyago Oriente Médio. Tepo a nga khala Fakazi ya Jehovha, mwama waye a di gu pimisa gu khuye a gu sengwa a bwe a zama gu mu himbedzeya gu thumeya Nungungulu. Uye a di mu vala a bwe a lomba khuye valongo, muthangeyi nya tshetshe ni ndroyi va mu thurugiseya va bwe va mu singedza gu khavo o tshungunula ndranga yaye. Mwama wa Yasmeen hongode Salawuni nya Mufumo a ya valeteya vandriyathu mitshanganoni! Dzitepo nya dzingi Yasmeen a di gu liya khedzi a nga ba a pharwa khidzo khu mwama waye.

¹⁵ Mitshanganoni, Yasmeen a di gu thaveledwa ni gu tiyiswa khu vandriyathu. Madhota ma kutside Yasmeen gu thumisa wusingalagadzi wu gu romo omu ga Varoma 12:17-21. (Leri) Yasmeen wari khuye: “Si di gu garadza, ganiolu nyi di gu lomba gu kheni Jehovha a nyi phasa nigu nyi di gu gira satshavbo nyi nga ba nyi si kodza gasi nyi thumisa esi Bhibhiliya yi ganeyago. Khu kharato, tepo mwama wangu a nga ba a thedzeya ndzilo kozinyani khagwenye, nyi di gu agisa. Tepo a nga ba a nyi gozari, nyi di gu mu hakha gwadi. Nigu a gu dwala, eni nyi di gu mu khathaleya.”

16-17. Ginani u gi hevbudego khu giyeyedzo gya Yasmeen?

¹⁶ Yasmeen tshatshazedwe khu gu yeyedza lihaladzo mwama waye. Uye wari khuye: “Mwama wangu a di pheya gu nyi tumba kholu a di gu dziti gu khuye tepo yatshavbo nyi na ganeya lisine. Uye a di pheya gu nyi engiseya khu ndziya nya githawo tepo hi nga ba hi bhula khu wukhongeyi a bwe a dzumeya gu hi vbanya khu gurula ndrangani. Olu, a ngu nyi kutsa gu hongola mitshanganoni. Eni ni mwama wangu hi dzipari nya dzikhongolo ngudzu nigu ha gu vbanya khu gurula ndrangani. Igyo nyi gi vbwetago khu gu mwama wangu a dzumeya lisine hi bwe hi thumeya hatshavbo Jehovha.”

¹⁷ Matshangu ya Yasmeen ma gu yeyedza gu khayo lihaladzo “li ngu rwala satshavbo, li ngu tumba gikhati gyatshavbo ni guhunisela satshavbo.” (1 Kor. 13:4, 7) Khu lisine, gu nyenywa gu na  ni tshivba nigu si nga hi pwisa guvbisa, ganiolu lihaladzo khilo li gu na ni tshivba ngudzu gu vbindra satshavbo. Ha gu yeyedza lihaladzo vambe, avo adzina va nga vbindrugedza esi va pimisago khethu ni Jehovha. Nigu nya gikhongolo ga satshavbo, khu gu isoso si ngu tsakisa Jehovha. Ganiolu, ambari valala vathu va gu simama gu hi wugeya, ethu hi nga simama na hi tsakide. Khu ndziya muni?

18. Khu ginani hi nga si kodzago gu tsaka ambari na hi gu nyenywa?

¹⁸ Jesu a di khuye: “Mu kategide mwa gu vengwa khu vathu.” (Luka 6:22) Ethu khandri ha gu dzina gu nyenywa. Kha hi tsakiswi khu gu tshaniswa khu kotani nya gukhodwa gwathu. Khu kharato, hi nga si kodza kharini gutsaka ambari na hi gu nyenywa? Gu ni sighelo siraru. Nyo pheye, ha gutimiseya sigaradzo, ha gu tsakedwa khu Nungungulu. (1 Ped. 4:13, 14) Nya wuvili, ha gutimiseya, gukhodwa gwathu go engedzeya gu tiya. (1 Ped. 1:7) Nigu nya wuraru, ha gutimiseya, hi na mana lithomo nyo vbanye kala gupindruga. — Rom. 2:6, 7.

19. Khu ginani vapostoli va nga tsaka hwane nyo ba va kwamudwe?

¹⁹ Tepwana hwane nya gu ba Jesu a wusidwe, vapostoli va pwide litsako eli Jesu a nga ba a ganede khilo. Hwane nyo ba va kwamudwe va bwe va emiswa gu tshumayela, avo va di tsaka. Khu ginani? “Kholu Nungungulu a diva ningide wuhigo nya gusaniswe khu kotani nya lina la Jesu.” (Mithumo 5:40-42) Lihaladzo eli vapostoli va nga ba vari nalo khu Pfhumu yawe li diri likhongolo gu vbindra hwanga owu va nga ba vari nawo khu valala vawe. Avo va yeyedzide lihaladzo lolo khu gu tshumayela mahungu nya yadi ‘nya mba garala.’ Vandriyathu nya vangi muhuno, va ngu simama gu thumeya Jehovha khu gu tumbega ambari na va tshangana ni sigaradzo. Avo va ngu dziti gu khavo Jehovha kha na nga divala thumo ni lihaladzo va yeyedzago khu lina laye. — Hebh. 6:10.

20. Ginani hi na gi wonago ga ndrima yi landreyago?

²⁰ Na li si gu fuviswi litigo leli la Sathane, ilo li na simama gu hi nyenya. (Johane 15:19) Ganiolu ethu kha hi yeli gu thava. Kha nga hi na si wonago ga ndrima yi landreyago, Jehovha ‘a na ninga tshivba a bwe a vbulugisa’ ava va tumbegago gwaye. (2 Tes. 3:3) Khu kharato, simama gu haladza Jehovha, vandriyathu ni valala vathu. Ha gu landrisa wusingalagadzi wowu, hi na simama gu pwana, hi tiya khu liphuvboni, hi ninga wuzundzu lina la Jehovha hi bwe hi yeyedza gu khethu lihaladzo li na ni tshivba ngudzu gu vbindra gu nyenywa.