1. U ya nga Mateo 24:9, ndi ngani zwi songo tea u ri mangadza musi shango ḽi tshi ri vhenga?

YEHOVA o ri sika uri ri fune vhaṅwe vhathu nahone ri ṱoḓa na vhone vha tshi ri funa. Nga zwenezwo, ri a vhaisala kana ra ofha musi muṅwe a tshi ri vhenga. Sa tsumbo, muṅwe wahashu wa tshifumakadzini ane a pfi Georgina ane a dzula Yuropa u ri: “Musi ndi na miṅwaha ya 14, mme anga vho vha vha tshi mmbenga nge nda vha ndi tshi shumela Yehova. Ndo ṱungufhala vhukuma na u pfa ndo xela nahone nda thoma u humbula uri khamusi nṋe ndi muthu muvhi.” * Wahashu wa tshinnani ane a pfi Danylo u ri: “Musi maswole vha tshi nthwa, vha tshi ntsema, na u mmbudza uri vha ḓo nkhuvhadza ngauri ndi Ṱhanzi ya Yehova, ndo vha ndo tshuwa nahone ndo shona.” Ri pfa u vhavha musi vhathu vha tshi ri vhenga, fhedzi a zwi ri mangadzi. Yesu o dzula o zwi amba uri ri ḓo vhengwa.—Vhalani Mateo 24:9.

2-3. Ndi ngani vhatevheli vha Yesu vha tshi vhengiwa?

² Ndi ngani shango ḽi tshi vhenga vhatevheli vha Yesu? Ndi ngauri “a [ri] tshipiḓa tsha shango” u fana na Yesu. (Yoh. 15:17-19) Nga zwenezwo, naho ri tshi ṱhonifha mivhuso ya shango, a ri i gwadameli kana u gwadamela zwiga zwine zwa i imela. Ri gwadamela Yehova fhedzi. Ri tikedza ndugelo ya Mudzimu ya u vhusa vhathu, fhedzi Saṱhane na “vhana” vhawe vha a hanedza uri u na yeneyi ndugelo. (Gen. 3:1-5, 15) Ri ḓivhadza uri Muvhuso wa Mudzimu ndi wone une wa ḓo piringulula thaidzo dza vhathu nahone hu si kale u ḓo fhelisa vhoṱhe vhane vha u pikisa. (Dan. 2:44; Nzumb. 19:19-21) Wonoyo mulaedza ndi mafhungo maḓifha  kha vhathu vhavhuya, fhedzi ndi mafhungo a si avhuḓi kha vhavhi.—Ps. 37:10, 11.

³ Ri dovha ra vhengelwa u tevhedza milayo ya Mudzimu. Zwine Mudzimu a ri zwo luga na uri zwo khakhea, a zwi fani na nḓila ine shango ḽa zwi dzhia ngayo. Sa tsumbo, vhathu vhanzhi a vha vhoni zwo khakhea u ḓifara luvhi nga zwa vhudzekani he ha ita uri Mudzimu a fhelise vhathu vha Sodoma na Gomora. (Yuda 7) Vha a ri sema na u amba uri ri kokodzela thungo nga nṱhani ha uri ri tevhedza milayo ya Bivhili i hanaho mikhwa yavho yo raloho.—1 Pet. 4:3, 4.

4. Ndi mini zwine zwa nga ri khwaṱhisa musi vhathu vha tshi ri vhenga?

⁴ Ri nga thusiwa nga mini uri ri konḓelele musi vhathu vha tshi ri vhenga na u ri sema? Ri tea u vha na lutendo lwo khwaṱhaho lwa uri Yehova u ḓo ri thusa. Lutendo lwashu lu fana na tshiṱangu, lu nga ‘dzima misevhe yoṱhe i dugaho ya muvhi.’ (Vhaef. 6:16) Fhedzi hu na zwiṅwe zwine zwa ṱoḓea nga nnḓa ha lutendo. Ri ṱoḓa na lufuno. Ndi ngani? Ndi ngauri lufuno “a lu sinyuwi.” Lu fukedza na u konḓelela zwithu zwoṱhe zwi vhaisaho. (1 Vhakor. 13:4-7, 13) Zwino kha ri vhone uri u funa hashu Yehova, vhahashu, na maswina ashu zwi nga ri thusa hani uri ri konḓelele musi ri tshi vhengiwa.

5. Yesu o kona u ita mini nge a vha tshi funa Khotsi awe?

⁵ Vhusiku ha musi Yesu a sa athu u vhulawa nga maswina awe, o vhudza vhatevheli vhawe vha fhulufhedzeaho a ri: ‘Ndi khou ita zwe Khotsi a mmbudza ngauri Khotsi ndi a mu funa.’ (Yoh. 14:31) Yesu o konḓelela milingo i vhavhaho ngauri o vha a tshi funa Yehova. Na riṋe ri nga kona u konḓelela arali ri tshi funa Yehova.

6. U ya nga Vharoma 5:3-5, vhashumeli vha Yehova vha ḓipfa hani musi vha tshi konḓelela u vhengwa nga shango?

⁶ Vhashumeli vha Mudzimu vho kona u konḓelela u tovholwa ngauri vho vha vha tshi mu funa. Sa tsumbo, musi vhaapostola vha tshi vhudzwa nga khothe khulwane ya Vhayuda i re na maanḓa uri vha litshe u huwelela, u funa havho Mudzimu zwo ita uri vha “[thetshelese] Mudzimu ane a vha muvhusi nṱhani ha vhathu.” (Mish. 5:29; 1 Yoh. 5:3) Lwonolwo lutendo lwo khwaṱhaho lu thusa na vhahashu vhane vha khou tovholwa nga mivhuso i re na tshiṱuhu na i re na maanḓa uri vha dzule vha tshi fhulufhedzea. Musi shango ḽi tshi ri vhenga, a ri kulei nungo, fhedzi ri a takala.—Mish. 5:41; vhalani Vharoma 5:3-5.

7. Ri fanela u ita mini musi ri tshi pikiswa nga vha muṱani washu?

⁷ Khamusi mulingo une wa vhavhesa u u konḓelela ndi musi ri tshi pikiswa nga vha muṱani washu. Musi vhaṅwe muṱani washu vha tshi vhona ri tshi takalela u guda nga ha Yehova, vha nga vhona u nga ri khou fhuriwa. Vhaṅwe vha nga humbula uri ro ṱangana ṱhoho. (Vhambedzani Marko 3:21.) Vha nga ita na u ri tambudza. Zwenezwi a zwo ngo tea u ri mangadza. Yesu o ri: “Maswina a muthu a ḓo vha vha muṱa wawe.” (Mat. 10:36) Naho mashaka ashu a tshi nga ri dzhia nga iṅwe nḓila, a ri vha vhengi. Nṱhani hazwo, musi ri tshi funa Yehova nga ho engedzeaho, zwi ita uri na vhathu ri vha fune nga ho engedzeaho. (Mat. 22:37-39) Fhedzi a ri vhuyi ra litsha u thetshelesa milayo na milayotewa i re Bivhilini ri tshi itela u takadza muṅwe muthu.

8-9. Muṅwe wahashu wa tshifumakadzini o thuswa nga mini uri a ime o khwaṱha naho a tshi khou pikiswa?

⁸ Georgina we ra amba nga hae, o kona u ima o khwaṱha naho a tshi khou pikiswa nga mme awe. U ri: “Nṋe na mme anga ro vha ri tshi khou guda Bivhili na Ṱhanzi dza Yehova. Fhedzi nga murahu ha miṅwedzi ya rathi ndi tshi ṱoḓa u ya miṱanganoni, mme anga vha ntshandukela. Nda zwi wanulusa uri vho vha vha tshi amba na vhagunei nahone musi vha tshi amba na nṋe vho vha vha tshi bula  yeneyo mihumbulo ya vhagunei. Vho vha vha tshi ntsema, vha tshi nkokodza nga mavhudzi, vha tshi ntzhipa mukulo na u laṱa bugu dzanga. Ndo lovhedzwa musi ndi na miṅwaha ya 15. Mme anga vha lingedza u nnditshisa u shumela Yehova nga u mmbea fhethu hune ha dzudzwa vhasidzana vha sa pfi, vho itaho milandu na vha shumisaho zwidzidzivhadzi. Zwi a konḓa vhukuma musi u tshi pikiswa nga muthu ane a tea u u funa na u u ṱhogomela.”

⁹ Georgina o thuswa nga mini uri a konḓelele? U ri: “Ndo vha ndi kha ḓi bva u vhala Bivhili yoṱhe nga ḓuvha ḽe mme anga vha ntshandukela. Ndo vha ndi na vhungoho ha uri ndo wana ngoho, nda ḓipfa ndi tsini-tsini na Yehova. Ndo vha ndi tshi anzela u amba nae nga thabelo nahone a mpfa. Musi ndi tshi khou dzula he nda iswa hone nga mme anga, muṅwe wahashu wa tshifumakadzini o nthambela muḓini wawe nahone ra guda Bivhili roṱhe. Nga tshenetsho tshifhinga, ndo khwaṱhiswa nga vhahashu Holoni. Vho ita uri ndi pfe ndi muraḓo wa muṱa wavho. Ndo zwi vhona uri Yehova u fhira vha ri pikisaho hu sa londwi uri ndi vhonnyi.”

10. Ri nga fhulufhela uri Yehova Mudzimu washu u ḓo dzula a tshi ita mini?

¹⁰ Muapostola Paulo o ṅwala uri a hu na zwine zwa nga ita uri “Mudzimu na Kristo Yesu Murena washu, vha si ri fune.” (Vharoma 8:38, 39) Naho ri tshi nga tambula lwa tshifhinganyana, Yehova u ḓo dzula a tshi ima na riṋe uri a ri khuthadze na u ri khwaṱhisa. Samusi tshenzhelo ya Georgina i tshi zwi sumbedza, Yehova u dovha a ri thusa a tshi shumisa vhahashu vha re tshivhidzoni.

11. Lufuno lwe Yesu a lu ṱalusa kha Yohane 15:12, 13 lwo vha lu tshi ḓo thusa hani vhafunziwa vhawe? Ṋeani tsumbo.

¹¹ Vhusiku ha musi Yesu a sa athu fa, o humbudza vhafunziwa vhawe uri vha funane. (Vhalani Yohane 15:12, 13.) O vha a tshi zwi ḓivha uri lufuno lu sa ḓiṱoḓeli zwalwo, lu ḓo vha thusa uri vha dzule vhe na vhuthihi na uri vha konḓelele musi shango ḽi tshi vha vhenga. Kha ri ambe nga tsumbo ya tshivhidzo tsha Thesalonika. Miraḓo yatsho yo tovholwa u tou bva musi tshi tshi thoma u vha hone. Fhedzi vhahashu vha tshenetsho tshivhidzo vho ri vhetshela tsumbo ya u konḓelela na lufuno. (1 Vhathes. 1:3, 6, 7) Paulo o vha ṱuṱuwedza uri vha bvele phanḓa vha tshi sumbedza lufuno “nga vhuḓalo.” (1 Vhathes. 4:9, 10) Lufuno lwo vha lu tshi ḓo ita uri vha khuthadze vho tsikeledzeaho na u tikedza vha shayaho nungo. (1 Vhathes. 5:14)  Vho tevhedza zwe Paulo a vha vhudza ngauri kha vhurifhi hawe ha vhuvhili he a vhu ṅwala nga murahu ha tshifhinga tshi ṱoḓaho u vha ṅwaha, o amba navho a ri: “Ni khou funana nga ho engedzeaho.” (2 Vhathes. 1:3-5) Lufuno lwe vha vha vhe nalwo lwo vha thusa u konḓelela vhuleme na u tovholwa.

12. Vhahashu kha ḽiṅwe shango vho sumbedza hani uri vha a funana nga tshifhinga tsha nndwa?

¹² Kha ri ambe nga ha tshenzhelo ya Danylo we ra amba nga hae. Musi nndwa kha ḽeneḽo shango i tshi swika ḓoroboni ya havho, ene na mufumakadzi wawe vho bvela phanḓa vha tshi ya miṱanganoni, vha tshi huwelela nga hune vha nga kona na u kovhelana zwiḽiwa na vhahavho vha Vhakriste. Ḽiṅwe ḓuvha a ḓelwa nga maswole vho faraho zwigidi hayani hawe. Danylo u ri: “Vho nkombetshedza uri ndi litshe u vha Ṱhanzi. Musi ndi tshi hana, vha nthwa nahone vha ita u nga vha khou ṱoḓa u nthuntsha nga u thuntshela muyani. Musi vha sa athu u ṱuwa vha ri vha ḓo vhuya vha tzhipa mufumakadzi wanga. Fhedzi vhahashu vha ṱavhanyedza vha ri ṋamedza tshidimela tshi yaho kha iṅwe ḓorobo. Ndi nga si vhuye nda hangwa lufuno lwa vhenevha vhahashu. Musi ri tshi swika kha yeneyo ḓorobo, vhahashu vha henefho vha ri fha zwiḽiwa nahone vha nthusa uri ndi wane mushumo na vhudzulo. Nga murahu ra kona u thusa dziṅwe Ṱhanzi nga vhudzulo dze dza vha dzi tshi khou shavha nndwa.” Tshenzhelo dzo raloho dzi sumbedza uri u funana hashu zwi nga ri thusa u konḓelela musi ri tshi vhengiwa.

13. Muya mukhethwa u ri thusa hani u konḓelela u shumela Yehova naho vhathu vha tshi ri vhenga?

¹³ Yesu o vhudza vhatevheli vhawe uri vha fune maswina avho. (Mat. 5:44, 45) Zwenezwo a zwo ngo leluwa na luthihi. Fhedzi zwi a konadzea arali ri tshi thusiwa nga muya mukhethwa wa Mudzimu. Zwi aṋwiwaho nga muya wa Mudzimu zwi katela lufuno khathihi na u sa fhela mbilu, vhuthu, u vuḓa na u ḓifara. (Vhagal. 5:22, 23) Zwenezwi zwithu zwi ri thusa uri ri konḓelele musi ri tshi vhengiwa. Vhathu vhanzhi vho litsha u ri pikisa nge munna, mufumakadzi, ṅwana kana muhura wavho a sumbedza zwenezwo zwiaṋwiwa. Vhunzhi ha vhenevho vhapikisi vho no vha vhahashu vha Vhakriste. Ngauralo, arali ni tshi vhona zwi tshi ni konḓela u funa vhane vha ni vhengela u shumela Yehova, humbelani muya mukhethwa. (Luka 11:13) Nahone ni fhulufhele uri u thetshelesa Mudzimu ndi zwone zwa khwine tshifhinga tshoṱhe.—Mir. 3:5-7.

14-15. Vharoma 12:17-21 yo thusa hani Yasmeen u sumbedza munna wawe lufuno naho o vha a tshi mu pikisa?

 ¹⁴ Kha ri ambe nga ha Yasmeen ane a dzula Vhubvaḓuvhakati. Musi a tshi vha Ṱhanzi ya Yehova, munna wawe o vhona u nga u khou fhuriwa nahone a lingedza u mu litshisa u shumela Mudzimu. A mu sema na u rumeledza mashaka khathihi na mufunzi na muloi uri vha mu shushedze na u mu hwesa mulandu wa u ḓithuthela muḓi. Munna wawe o ita na u sema vhahashu musi vhe miṱanganoni ya tshivhidzo. Yasmeen o vha a tshi dzula a tshi lila ngauri o vha a sa ḽi lu ḓifhaho.

¹⁵ Musi Yasmeen e Holoni, vhahawe vha Vhakriste vho vha vha tshi mu khuthadza na u mu khwaṱhisa. Vhahulwane vho mu ṱuṱuwedza uri a shumise maipfi a re kha Vharoma 12:17-21. (Vhalani.) Yasmeen u ri: “Zwo vha zwi tshi konḓa. Fhedzi nda humbela Yehova uri a nthuse nahone nda ita zwoṱhe zwine nda nga kona uri ndi shumise zwine Bivhili ya amba. Ngauralo, musi munna wanga a tshi shela mashika khishini u itela u mpfisa vhuṱungu, ndo vha ndi tshi kunakisa. Musi a tshi ntsema, ndo vha ndi tshi mu fhindula zwavhuḓi. Musi a tshi lwala ndo vha ndi tshi mu ṱhogomela.”

16-17. Ni guda mini kha tsumbo ya Yasmeen?

¹⁶ Ho vha na mbuyelo dzavhuḓi nge Yasmeen a sumbedza uri u funa munna wawe. U ri: “Ndo thoma u fhulufheliwa nga ho engedzeaho nga munna wanga nge a vha a tshi ḓivha uri ndi dzula ndi tshi amba ngoho. O thoma u nthetshelesa nga ṱhonifho musi ri tshi amba nga zwa vhurereli nahone a tenda uri u ḓo ita uri henefho hayani ḽi lale. Zwino u vho tou ri ndi tshimbile zwavhuḓi musi ndi tshi ya miṱanganoni ya tshivhidzo. Zwazwino vhushaka hanga na munna wanga ho no vha khwine vhukuma nahone muḓini washu hu na mulalo. Ndi fhulufhela uri munna wanga u ḓo ṱanganedza ngoho nahone ra shumela Yehova roṱhe.”

¹⁷ Tsumbo ya Yasmeen i sumbedza uri lufuno ‘lu fukedza zwoṱhe, lwa fhulufhela zwoṱhe, lwa konḓelela zwoṱhe.’ (1 Vhakor. 13:4, 7) Vengo ḽi nga vha na maanḓa, ḽa dovha ḽa vhaisa, fhedzi lufuno lu na maanḓa u ḽi fhira. Lufuno lu na maanḓa a u ita uri vhathu vha litshe u ri pikisa. Yehova u a takala arali ri tshi dzula ri tshi sumbedza lufuno. Fhedzi ri nga dzula ro takala naho vha ri pikisaho vha tshi bvela phanḓa vha tshi ri vhenga. Nga nḓila ḓe?

18. Ndi ngani ri tshi takala musi vhathu vha tshi ri vhenga?

¹⁸ Yesu o ri: “Ni takale musi vhathu vha tshi ni vhenga.” (Luka 6:22) A ri ḓikhetheli u vhengiwa.  A ri ḓiphiṋi musi vhathu vha tshi ri tovhola nga nṱhani ha lutendo lwashu. Zwino ndi ngani ri tshi takala musi vhathu vha tshi ri vhenga? Kha ri sedze zwiitisi zwiraru. Tsha u thoma, Mudzimu u a ri takalela musi ri tshi konḓelela. (1 Pet. 4:13, 14) Tsha vhuvhili, lutendo lwashu lu vha lwa ndeme nahone lwa khwaṱha. (1 Pet. 1:7) Tsha vhuraru, ri ḓo wana malamba a sa vhambedzwi na tshithu ane a vha vhutshilo vhu sa fheli.—Vharoma 2:6, 7.

19. Ndi ngani vhaapostola vho takala musi vho rwiwa?

¹⁹ Musi Yesu a tshi kha ḓi bva u vuswa vhafuni, vhaapostola vho wana dakalo ḽe a amba nga haḽo. Musi vho no rwiwa na u vhudzwa uri vha litshe u huwelela, vho takala. Ndi ngani? “Ngauri Mudzimu o tenda vha tshi nyadziwa nga nṱhani ha dzina ḽa Yesu.” (Mish. 5:40-42) Vho vha vha tshi funa Muṋe wavho u fhira u ofha maswina avho. Nahone vho sumbedza u funa Muṋe wavho nga u ḓivhadza mafhungo maḓifha “vha sa litshi.” Vhunzhi ha vhahashu ṋamusi vha bvela phanḓa vha tshi shumela Yehova nga u fhulufhedzea naho zwi tshi konḓa. Vha a zwi ḓivha uri Yehova a nga si hangwe mishumo yavho na nḓila ine vha funa ngayo dzina ḽawe.—Vhahev. 6:10.

20. Ri ḓo amba nga ha mini kha thero i tevhelaho?

²⁰ Vhathu vha ḽino shango vha ḓo ḓi ri vhenga u swika ḽino shango ḽi tshi fheliswa. (Yoh. 15:19) Fhedzi ri songo ofha. Yehova ‘u ḓo khwaṱhisa na u tsireledza’ vhathu vhawe vha fhulufhedzeaho samusi ri tshi ḓo zwi vhona kha thero i tevhelaho. (2 Vhathes. 3:3) Nga zwenezwo, kha ri bvele phanḓa ri tshi funa Yehova, ri tshi funa vhahashu na u funa vhane vha ri vhenga. Arali ra tevhela yeneyi nyeletshedzo, ri ḓo dzula ri na vhuthihi nahone lutendo lwashu lu ḓo khwaṱha. Ri ḓo rendisa Yehova nahone ri ḓo sumbedza uri lufuno lu na maanḓa u fhira vengo.