1. Sumala ha Mateo 24:9, kay ano nga diri kita angay mahipausa kon nangangalas ha aton an kalibotan?

GINLARANG kita ni Jehova basi higugmaon an iba ngan higugmaon liwat kita nira. Salit kon may nangangalas ha aton, nasasakitan gud kita ngan bangin nahahadlok pa ngani. Pananglitan, an sister nga hi Georgina nga taga-Europa, nagsiring: “Han 14 anyos ako, nangalas ha akon hi Nanay tungod kay nag-aalagad ako kan Jehova. Nasubo gud ako ngan inabat ko nga nag-uusahan la ako, ngan nagtikang ako pagruhaduha kon maopay ba ako nga tawo.” * An brother nga hi Danylo nagsurat: “Han ginkastigo ako han mga sundalo, gin-insulto, ngan gintarhog tungod kay Saksi ako ni Jehova, nahadlok ako ngan naalohan gud.” Masakit gud kon ginkakangalasan kita, pero diri kita hito nahipapausa. Nagtagna hi Jesus nga kangangalasan kita.​—Basaha an Mateo 24:9.

2-3. Kay ano nga ginkakangalasan an mga sumurunod ni Jesus?

² An kalibotan nangangalas ha mga sumurunod ni Jesus. Kay ano? Kay pariho kan Jesus, “diri [kita] bahin han kalibotan.” (Juan 15:17-19) Salit bisan kon ginrirespeto naton an mga gobyerno han tawo, diri naton hira ginsisingba o an mga simbolo nga nagrirepresentar ha ira. Ginhahatag naton kan Jehova an aton eksklusibo nga debosyon. Ginsusuportaran naton an katungod han Dios nga magmando ha katawohan​—usa nga katungod nga ginkukwestyon gud ni Satanas ngan han iya “tulin.” (Gen. 3:1-5, 15) Iginsasangyaw naton nga an Ginhadian han Dios gud la an paglaom han katawohan ngan diri na mag-iiha, bubungkagon han Ginhadian an ngatanan nga nakontra  hito. (Dan. 2:44; Pah. 19:19-21) Ito nga mensahe maopay nga sumat para ha mga maaghop, pero maraot ito nga sumat para ha mga magraot.​—Sal. 37:10, 11.

³ Ginkakangalasan liwat kita tungod kay nagkikinabuhi kita uyon ha matadong nga mga suruklan han Dios. Ini nga mga suruklan kabaliktaran gud ha hamubo nga mga suruklan ha moral han kalibotan. Pananglitan, gin-aakseptar na han damu nga tawo yana an imoral gud nga mga buhat nga pariho han ginbubuhat han mga tawo ha Sodoma ngan Gomorra nga ginbungkag han Dios! (Jud. 7) Tungod kay ginsusunod naton an mga suruklan ha Biblia may kalabotan hito nga mga buhat, damu nga tawo an nagtatamay ha aton ngan nasiring nga panatiko kita.​—1 Ped. 4:3, 4.

4. Ano nga mga kalidad an magpaparig-on ha aton kon ginkakangalasan kita han mga tawo?

⁴ Ano an makakabulig ha aton nga makapailob kon ginkakangalasan ngan gin-iinsulto kita han mga tawo? Kinahanglan magkaada kita marig-on nga pagtoo nga bubuligan kita ni Jehova. Pariho hin taming, an aton pagtoo ‘makakaparong han ngatanan nga naglalaga nga pana han usa nga maraot.’ (Efe. 6:16) Pero diri la pagtoo an aton kinahanglan. Kinahanglan liwat naton an gugma. Kay ano? Kay an gugma “diri naaaghat nga masina.” Nabulig ito nga maantos ngan mailob naton an ngatanan nga nakakasakit ha aton. (1 Cor. 13:4-7, 13) Kitaon naton yana kon paonan-o an gugma kan Jehova, ha aton kabugtoan, ngan bisan ha aton mga kaaway nabulig ha aton nga makapailob kon ginkakangalasan kita.

5. Ano an nahimo ni Jesus tungod han iya gugma ha iya Amay?

⁵ Han gab-i antes patayon hi Jesus han iya mga kaaway, nagsiring hiya ha iya maunungon nga mga sumurunod: “Nahigugma ako ha Amay, [salit] ginbubuhat ko kon ano an iginsugo ha akon han Amay nga buhaton.” (Juan 14:31) Tungod kay hinigugma ni Jesus hi Jehova, nailob niya an makuri nga mga pagsari. An aton gugma kan Jehova mabulig liwat ha aton nga makapailob.

6. Sumala ha Roma 5:3-5, ano an panhunahuna han mga surugoon ni Jehova mahitungod ha pag-ilob han kangalas han kalibotan?

⁶ An gugma ha Dios pirme nabulig ha mga surugoon ni Jehova nga mailob an pagtimaraot. Pananglitan, han an mga apostol gindid-an nga magsangyaw han gamhanan nga korte suprema han mga Judio, an gugma ha Dios nagpagios ha ira nga “sugton . . . an Dios sugad nga magmarando imbes nga an mga tawo.” (Buh. 5:29; 1 Juan 5:3) An sugad nga marig-on nga gugma nabulig liwat ha aton kabugtoan yana, diin damu ha ira an nagpapabilin nga matinumanon bisan pa han pagtimaraot han waray kalooy ngan gamhanan nga mga gobyerno. Imbes nga manluya, ginhuhunahuna lugod naton nga pribilehiyo an pag-ilob han kangalas han kalibotan.​—Buh. 5:41; basaha an Roma 5:3-5.

7. Ano an dapat naton magin reaksyon kon ginkukontra kita han aton mga kapamilya?

⁷ Posible nga an usa han pinakamakuri nga mga pagsari ha aton amo an pagkontra han aton mismo mga kapamilya. Kon nagpapakita kita hin interes ha kamatuoran, may mga kapamilya kita nga bangin maghunahuna nga nauwat kita. An iba bangin maghunahuna nga nalulurong na kita. (Ikompara an Marcos 3:21.) Bangin pasakitan pa ngani kita nira ha pisikal o ha emosyonal. Diri kita angay mahipausa hito. Hi Jesus nagsiring: “An magigin kaaway han usa nga tawo amo an mga membro han iya kalugaringon nga panimalay.” (Mat. 10:36) Syempre, anoman an pagtratar ha aton han aton mga kapamilya, diri naton hira huhunahunaon nga mga kaaway. Lugod, samtang naghihilarom an aton gugma kan Jehova, mas ginhihigugma naton an mga tawo. (Mat. 22:37-39) Pero diri gud naton tatalapason an mga balaud ngan prinsipyo ha Biblia basi la lipayon an iba nga tawo.

8-9. Ano an nakabulig ha usa nga sister nga makapabilin nga marig-on bisan pa han duro nga pagkontra?

 ⁸ Hi Georgina, nga gin-unabi kanina, nakapabilin nga marig-on bisan pa han duro nga pagkontra han iya nanay. Hi Georgina nagsaysay: “Kami ni Nanay nag-aram han Biblia kaupod han mga Saksi. Pero paglabay hin unom ka bulan han karuyag ko na umatender ha mga katirok, tigda nga ginkontra ako ni Nanay. Nahibaroan ko nga nakikigkomunikar hiya ha mga apostata ngan gin-gagamit niya an ira mga argumento kon nakikiistorya hiya ha akon. Gin-iinsulto liwat niya ako, ginrarabnotan han buhok, gintitilo, ngan ginlalabog an akon mga literatura. Pag-15 anyos ko, nagpabawtismo ako. Basi diri ako makapadayon ha pag-alagad kan Jehova, iginkadto ako ni Nanay ha usa nga institusyon para ha mga tin-edyer nga may mga problema, nga an pipira ha ira nagdroga ngan nakahimo hin mga krimen. Makuri gud ilubon an pagkontra labi na kon nagtitikang ito ha usa nga tawo nga dapat amo unta an nahigugma ngan nag-aataman ha imo.”

⁹ Ano an nakabulig kan Georgina nga makailob? Hiya nagsiring: “Ha adlaw nga nagtikang hi Nanay pagkontra ha akon, nahuhuman ko pa la basahon an bug-os nga Biblia. Kombinsido na gud ako nga nabilngan ko na an kamatuoran, ngan inabat ko nga duok gud ako kan Jehova. Pirme ako nag-aampo ha iya, ngan ginpapamatian niya ako. Han naukoy ako hito nga institusyon, gin-imbitar ako han usa nga sister ngadto ha iya balay, ngan magkaupod nga gin-adman namon an Biblia. Hito nga panahon, ginparig-on ako han mga kabugtoan ha Kingdom Hall. Gintratar nira ako sugad nga parte han ira pamilya. Nakita ko mismo nga mas makusog gud hi Jehova kay ha bisan hin-o nga nakontra ha aton.”

10. Ano an malalaoman naton nga pirme bubuhaton ha aton ni Jehova nga aton Dios?

¹⁰ Hi apostol Pablo nagsurat nga waray bisan ano nga “makakagbulag ha aton ha gugma han Dios nga aada kan Kristo Jesus nga aton Ginoo.” (Roma 8:38, 39) Bisan kon bangin mag-antos kita hin pipira ka panahon, pirme kita liliawon ngan paririg-unon ni Jehova. Ngan sugad han iginpapakita han eksperyensya ni Georgina, bubuligan liwat kita ni Jehova pinaagi han aton hinigugma nga kabugtoan ha kongregasyon.

11. Paonan-o makakabulig ha mga disipulo ni Jesus an gugma nga iya ginsiring ha Juan 15:12, 13? Paghatag hin ehemplo.

¹¹ Han gab-i antes mamatay hi Jesus, ginpahinumdoman niya an iya mga disipulo nga maghigugmaay. (Basaha an Juan 15:12, 13.) Maaram hiya nga an nagsasakripisyo nga gugma makakabulig  ha ira nga magpabilin nga nagkakaurosa ngan mailob an kangalas han kalibotan. Tagda an ehemplo han kongregasyon ha Tesalonica. Tikang han naestablisar ito, gintimaraot na an mga membro hito. Pero an mga kabugtoan didto nagin maopay nga ehemplo han pagkamatinumanon ngan han gugma. (1 Tes. 1:3, 6, 7) Gin-aghat hira ni Pablo nga padayon nga ipakita an gugma hin “labaw pa.” (1 Tes. 4:9, 10) An gugma magpapagios ha ira nga liawon an mga nadidepres ngan buligan an mga magluya. (1 Tes. 5:14) Ginsunod nira an sagdon ni Pablo kay ha iya ikaduha nga surat, nga iya ginhimo paglabay hin mga usa ka tuig, nagsiring hiya ha ira: “An gugma han kada tagsa ha iyo nagtitikahilarom para ha usa kag usa.” (2 Tes. 1:3-5) An ira gugma nakabulig ha ira nga mailob an kakurian ngan pagtimaraot.

12. Ha panahon han girra, paonan-o an kabugtoan ha usa nga nasud nagpakita hin gugma ha usa kag usa?

¹² Tagda an eksperyensya ni Danylo, nga gin-unabi kanina, ngan han iya asawa. Han an ira bungto nahiapi ha usa nga girra, padayon nga inatender hira ha mga katirok, nagsangyaw tubtob ha ira mahihimo, ngan gintagan nira an kabugtoan han anoman nga pagkaon nga may-ada hira. Katapos, usa ka adlaw, may kinadto ha balay nira Danylo nga armado nga mga sundalo. “Ginpirit nira ako nga bumaya ha pag-Saksi,” siring ni Danylo. “Han diniri ako, ira ako ginkastigo ngan ginpabuthan nira ako, pero iginpatama la nira ito ha igbaw han akon ulo. Antes hira bumaya, ira kami gintarhog nga mabalik hira basi luguson an akon asawa. Pero ginpasakay dayon kami han kabugtoan ha usa nga tren pakadto ha iba nga bungto. Diri ko gud hingangalimtan an gugma hiton minahal nga kabugtoan. Ngan pag-abot namon ha iba nga bungto, gintagan kami han kabugtoan didto hin pagkaon ngan ira ako ginbuligan nga makabiling hin trabaho ngan hin balay! Salit, nakabulig liwat kami nga makagtagana hin urukyan ha iba pa nga mga Saksi nga binaya ha lugar nga may girra.” An sugad nga mga eksperyensya nagpapakita nga an Kristiano nga gugma makakabulig ha aton nga makapailob kon ginkakangalasan kita.

13. Paonan-o an baraan nga espiritu nabulig ha aton nga makapadayon ha pag-alagad kan Jehova bisan kon ginkakangalasan kita han mga tawo?

¹³ Ginsugo ni Jesus an iya mga sumurunod nga higugmaon an ira mga kaaway. (Mat. 5:44, 45) Masayon ba ito buhaton? Diri! Pero posible ito ha bulig han baraan nga espiritu han Dios. Bahin han bunga han espiritu han Dios an gugma pati an pagin pasensyoso, pagkabuotan, pagkamalumo, ngan pagpugong ha kalugaringon. (Gal. 5:22, 23) Ito nga mga kalidad nabulig ha aton nga  makapailob kon ginkakangalasan kita. Damu nga parakontra an nagbag-o an pagtratar ha aton tungod kay iginpakita han usa nga Saksi nga bana, asawa, anak, o amyaw iton mag-opay nga kalidad. Damu nga parakontra an nagin hinigugma pa ngani naton nga kabugtoan. Salit kon nakukurian ka ha paghigugma hadton nangangalas ha imo tungod han imo pag-alagad kan Jehova, pag-ampo nga tagan ka han baraan nga espiritu. (Luc. 11:13) Ngan magin kombinsido gud nga an paagi han Dios amo pirme an pinakamaopay.​—Prob. 3:5-7.

14-15. Paonan-o nakabulig kan Yasmeen an Roma 12:17-21 nga magpakita hin gugma ha iya bana bisan pa kon ginkukontra hiya?

¹⁴ Tagda an ehemplo ni Yasmeen nga taga-Middle East. Han nagin Saksi ni Jehova hiya, naghunahuna an iya bana nga nauwat hiya ngan naniguro an iya bana nga did-an hiya ha pag-alagad ha Dios. Gin-insulto hiya han iya bana ngan gin-aghat an ira mga paryente, pati an usa nga klero ngan barangan nga tarhugon hiya ngan akusaran nga gin-guguba niya an ira pamilya. Nagsinggit pa ngani an iya bana hin mga pan-insulto ha kabugtoan durante ha usa nga katirok han kongregasyon! Haros pirme nagtatangis hi Yasmeen tungod han maraot gud nga pagtratar ha iya.

¹⁵ Ha Kingdom Hall, ginliaw ngan ginparig-on hi Yasmeen han iya espirituwal nga pamilya. Gin-aghat hiya han mga tigurang nga iaplikar an Roma 12:17-21. (Basaha.) “Makuri gud adto,” siring ni Yasmeen. “Pero naghangyo ako kan Jehova nga buligan ako, ngan ginhimo ko an akon pinakamaopay basi iaplikar an ginsisiring han Biblia. Salit kon ginhuhugawan han akon bana an kusina basi la pasinahon ako, ginlilimpyohan ko ito. Kon gin-iinsulto niya ako, nabaton ako hin malumo. Ngan kon may sakit hiya, gin-aataman ko hiya.”

16-17. Ano an imo nahibaroan ha ehemplo ni Yasmeen?

¹⁶ Maopay gud an resulta han pagpakita ni Yasmeen hin gugma ha iya bana. Hiya nagsiring: “Mas tinapod na ha akon an akon bana kay maaram hiya nga pirme ako magsusumat han kamatuoran. May respeto nga namamati na hiya ha akon kon nag-iistorya kami parte ha relihiyon, ngan nagkauyon kami nga maningkamot nga magin mamurayawon an amon panimalay. Yana, ginsisidngan na niya ako nga umatender ha mga katirok ha kongregasyon. Nagin mas malipayon ngan mamurayawon gud an amon pamilya. Hingyap ko nga unta karawaton han akon bana an kamatuoran ngan makaupod ko hiya ha pag-alagad kan Jehova.”

¹⁷ Iginpapakita han ehemplo ni Yasmeen nga an gugma “nag-aantos . . . ha ngatanan nga butang, . . . naglalaom ha ngatanan nga butang, nagpapailob ha ngatanan nga butang.” (1 Cor. 13:4, 7) An kangalas mahimo magin gamhanan ngan makasakit  gud ha aton, pero mas gamhanan gud an gugma. Nakakapahumok ito han kasingkasing. Ngan kon padayon kita nga nagpapakita hin gugma, napapalipay naton hi Jehova. Pero bisan kon padayon nga kangalasan kita han mga nakontra ha aton, puydi la gihapon kita magin malipayon. Paonan-o?

18. Kay ano nga mahimo kita magin malipayon bisan kon ginkakangalasan kita?

¹⁸ Hi Jesus nagsiring: “Malipayon kamo kon an mga tawo nangangalas ha iyo.” (Luc. 6:22) Diri naton karuyag nga kangalasan kita. Diri kita nagpapakamartir. Pero kay ano nga mahimo kita magin malipayon bisan kon ginkakangalasan kita? Tagda an tulo nga rason. Siyahan, kon nagpapailob kita, nakakarawat naton an pag-uyon han Dios. (1 Ped. 4:13, 14) Ikaduha, nagigin mas maopay an kalidad han aton pagtoo ngan nagigin mas marig-on ito. (1 Ped. 1:7) Ngan ikatulo, makakakarawat kita hin presyoso gud nga balos​—an kinabuhi nga waray kataposan.​—Roma 2:6, 7.

19. Kay ano nga nalipay an mga apostol bisan kon ginkastigo hira?

¹⁹ Waray pag-iha tikang han ginbanhaw hi Jesus, naeksperyensyahan han mga apostol an kalipay nga iya gin-unabi. Bisan kon ginkastigo hira ngan gindid-an pagsangyaw, nalipay hira. Kay ano? “Kay gintagad hira nga takos pakaalohan tungod han [kan Jesus] ngaran.” (Buh. 5:40-42) An ira gugma ha ira Agaron mas makusog gud kay han ira kahadlok ha kangalas ha ira han mga kaaway. Ngan iginpakita nira an ira gugma pinaagi ha ‘diri pag-undang’ ha pagpasamwak han maopay nga sumat. Yana, damu han aton kabugtoan an padayon nga nag-aalagad hin matinumanon bisan pa han mga kakurian. Maaram hira nga diri kakalimtan ni Jehova an ira mga buhat ngan an ira gugma para ha iya ngaran.​—Heb. 6:10.

20. Ano an aton hihisgotan ha sunod nga artikulo?

²⁰ Mangangalas ha aton an kalibotan samtang nagpapadayon ini nga sistema. (Juan 15:19) Pero diri kita angay mahadlok. Sugad han aton mahibabaroan ha sunod nga artikulo, “paririg-unon . . . ngan papanalipdan” ni Jehova an mga maunungon ha iya. (2 Tes. 3:3) Salit padayon nga higugmaon naton hi Jehova, an aton kabugtoan, ngan bisan an aton mga kaaway. Kon bubuhaton naton ito, magpapabilin kita nga nagkakaurosa ngan marig-on ha espirituwal, mapapasidunggan naton hi Jehova, ngan mapapamatud-an naton nga mas gamhanan gud an gugma kay han kangalas.