1. Mwakamulana ni Mateyu 24:9, ligongo chichi ngatukusosekwa kusimonga ŵandu pa kutuŵenga?

YEHOFA ŵatupanganyisye kuti twanonyeleje ŵane soni kuti jemanjajo atunonyeleje. Tukusadandawulaga naga mundu jwine atulemwechesye soni yikusatusakalisya. Mwachisyasyo, Mlongo Georgina jwakusatama ku Europe jwatite, “Ndili ni yaka 14 mama ŵangu ŵaŵengaga mnope, ligongo lyakuti namtumichilaga Yehofa. Nalipikanaga kuti ndili jikajikape soni natandite kulikayichila naga ndili mundu jwambone.” * M’bale jwine lina lyakwe Danylo jwaŵechete kuti, “Asilikali paŵambutile, kulagasya soni kunjogoya ligongo lyakuti ndili jwa Mboni sya Yehofa, yandesisye mnope woga soni naliwonaga mpela jwakuloŵela.” Nambope ngatukusosekwa kusimonga ni yeleyi. Yesu jwasasile kuti ŵandu chachituŵenga.—Aŵalanje Mateyu 24:9.

2-3. Ligongo chichi ŵandu akusiŵaŵengaga ŵakumkuya ŵa Yesu?

² Ŵandu ŵa kuchilamboku ŵaŵengagasoni ŵakumkuya ŵa Yesu. Ana ligongo chichi ŵatendaga yeleyi? Mpela muyaŵelele ni Yesu m’weji nganituŵa mbali ja ‘chilambo chapasi.’ (Yoh. 15:17-19) Paligongo lyeleli atamose kuti tukusiŵachimbichisya ŵaboma, nambope ngatukusiŵalambila jemanjaji kapena kuchimbichisya yindu yakusayikamulichisyaga masengo yayikusiyajimilaga jemanjaji. Mmalo mwakwe tukusamlambilaga Yehofa jikape ni mtima wosope. Tukusakamuchisyaga Ulamusi wa Mlungu wele Satana pampepe ni ŵakumkuya ŵakwe akusawunyosyaga. (Gen. 3:1-5, 15) Tukusalalichilaga kuti Uchimwene wa Mlungu ni wawuli wakuŵajilwa kwalamulila ŵandu ligongo uchimasya yakusawusya yawo. Nambosoni kuti Uchimwenewu uchajonanga ŵandu ŵakusasisyana nawo. (Dan. 2:44; Chiw. 19:19-21) Ngani jeleji jili jambone kwa ŵandu ŵambone  nambo kwa ŵandu ŵakusakala uli utenga wakupweteka.—Sal. 37:10, 11.

³ Ŵandu ŵajinji kuchilamboku akusatuŵenga ligongo lyakuti tukusakuyaga malamusi ga Mlungu. Malamusiga gali gakulekangana mnope ni ndamo syakusasiwonaga ŵandu kuchilamboku kuti sili syambone. Mwachisyasyo, ŵandu ŵajinji akusajitichisya ndamo syakusakala sya chikululu syasikusalandana ni syaŵatendaga ŵandu ŵaŵajonasile Mlungu ku Sodomu ni Gomola. (Yud. 7) Myoyo, ŵandu ŵajinji akusatunyosya soni kutuwona kuti tuli ŵakusigalila. Akusatenda yeleyi ligongo lyakuti tukusakuya malamusi ga m’Baibulo gagakusasala pa ngani ja ndamo syakusakalasi. Ni ligongo lyakwe ŵandu ŵajinji akusatunyosya soni kutuwona kuti tuli ŵakusigalila.—1 Pet. 4:3, 4.

4. Ana ni ndamo syapi syampaka situlimbikasye ŵandu pakutulagasya?

⁴ Ana chichi champaka chitukamuchisye kupilila ŵandu pakutuŵenga soni kutunyosya? Tukusosekwa kola chikulupi chamachili chakuti Yehofa chachitukamuchisya. Mpela mwayikusaŵela ni chakulichinjilichisya tuchikombola “kusimisya mapanga gosope gakolela moto wa Satana.” (Aef. 6:16) Nambo kupwatika pa chikulupipa tukusosekwasoni kola chinonyelo. Tukuŵecheta myoyo ligongo “chinonyelo changatumbila,” soni mundu jwakwete chinonyelochi akusapilila atamose ŵandu ŵane amŵenjeje. (1 Akoli. 13:4-7, 13) Sambano kwende tulole kuti ana kumnonyela kwetu Yehofa, abale ni alongo kapena adani ŵetu, mpaka kutukamuchisye chamtuli kuti tupilile yakusawusya?

5. Ana Yesu jwakombwele kutenda chichi ligongo lyakwanonyela Atati ŵakwe?

⁵ Chilo chakuti malaŵi gakwe chawulajidwe, Yesu ŵasalile ŵakumkuya ŵakwe kuti, “Une ngwanonyela Atati, ni ligongo lyakwe ngasindendaga chilichose mpela mwakundamulila une kuti nachitende.” (Yoh. 14:31) Ligongo lyakuti Yesu ŵamnonyelaga mnope Yehofa, yamkamuchisye kupilila yakusawusya yaŵasimene nayo. Myoyo nombe m’we naga tukumnonyela mnope Yehofa ni kuti tuchipililasoni yakusawusya yampaka tusimane nayo.

6. Ana lilemba lya Aloma 5:3-5, likulosya kuti ŵakutumichila ŵa Yehofa akusapikana uli mumtima ŵandu kuchilamboku pakwalagasya?

⁶ Ŵakutumichila ŵa Yehofa akusakombola kupilila pakulagasidwa ligongo lyakuti akusamnonyela Mlungu. Mwachisyasyo, ŵandumetume paŵalamulidwe ni ŵakhoti ja Chiyuda kuti aleche kulalichila, chinonyelo chawo kwa Mlungu chatendekasisye kuti ‘ampikanile Mlungu kupunda kupikanila ŵandu.’ (Mase. 5:29; 1 Yoh. 5:3) Chinonyelo chelechi chikusichalimbikasyasoni abale ni alongo masiku agano, jemanjaji akusaŵape ŵakulupichika pandaŵi ja kulagasidwa ni maboma ga ngasa soni gamachili. Mmalo mwakutamila kudandawula ni yeleyi tukusawuwona kuŵa upile wetu wakulosya kupilila ŵandu ŵa kuchilamboku pakutulagasya.—Mase. 5:41; aŵalanje Aloma 5:3-5

7. Ana tukusosekwa kutenda uli ŵandu ŵamwiŵasa mwetu pakutusisya?

⁷ Ndaŵi syejinji ŵandu ŵakusatulagasya mnope akusaŵaga ŵakutyochela mwiŵasa mwetu, yeleyi yikusaŵa yakupweteka mnope. Patutandite kulijiganya usyesyene ŵandu ŵane ŵamwiŵasa mwetu mpaka atande kutuwona mpela tusokonechele. Soni ŵane mpaka aganisyeje kuti mtwe wetu ngawukamula. (Mpaka alolesoni Maliko 3:21.) Jemanjaji komboleka mpaka atusisyejesoni mwamachili. Nambotu yeleyi yikatusimonjesyaga ligongo Yesu ŵasasile kala kuti, “Achimmagongo ŵa mundu chachiŵa ŵa muliŵasa lyakwe pemo.” (Mat. 10:36) Atamose ŵachibale ŵetu ali mkutulagasya mwamtuli, nambope ngatukusitwawona kuti ali achimmagongo ŵetu. Patukumnonyela mnope Yehofa ni patukusitwanonyelasoni ŵandu ŵane. (Mat. 22:37-39) Nambo nganituŵa tulinjile kuleka kupikanila malamusi ga m’Baibulo pakusaka kuti tutende yakwamba kwasangalasya ŵandu.

8-9. Ana chichi chachamkamuchisye mlongo jwine kuŵape jwakulupichika atamose kuti ŵamsisyaga?

 ⁸ Georgina jwatumsasile kundanda kula, jwakombwele kupilila atamose kuti mamagwe ŵamsisyaga. Jwalakwe ŵatite, “Une ni mayi twatandite kulijiganya Baibulo ni ŵa Mboni sya Yehofa. Nambo pali pagambile kumala miyesi 6 une nasakaga kuti mjawule kumisongano, nambo yasimanikwe kuti mayi achenjile nganisyo mwamti ŵatandite kusisya. Kaneko nayikopochele kuti mayiŵa atandite kamulana mnope ni ŵampatuko, mwamti paŵasakaga kuŵechetana ni une ŵakamulichisyaga masengo nganisyo syaŵaŵechetaga jemanjajo. Ŵayikaga pakumbechetela maloŵe ga chipongwe, kuwuta wumbo, kumbuta soni kwasa mabuku gangu. Nambo panakwanisye yaka 15 nabatisidwe. Mayiŵa pakusaka kulekasya kumtumichila Yehofa ŵayikene pakundopola panyumba ni kuja kumbika kumalo kuŵatamaga ŵandu ŵaŵakwete ndamo syakusakala. Yikusaŵa yakupweteka mnope naga jwakukusisyajo ali jwa muliŵasa mwakwe.”

⁹ Ana Georgina jwatesile uli kuti akombole kumalana ni yeleyi? Jwalakwe jwatite, “Palisiku lyaŵandopolaga mayi panyumbali, naliji ndili ngambile kumalisya kwene kuŵalanga Baibulo josope. Pandaŵiji naliji ndili simichisye kuti nawupatile usyesyene soni nalipikanaga kuti ndili paunasi wambone ni Yehofa. Napopelaga kwa jwalakwe mwamti jwajangaga mapopelo gangu. Panatyokaga kunyumbaku, mlongo jwine ŵambilasile kuti tukalijiganyeje Baibulo yimpepe. Pandaŵi jeleji yaŵatendaga abale ni alongo patuli ku Nyumba ja Uchimwene yalimbikasyaga. Jemanjaji ŵatendaga yindu ni une mpela kuti ndili mwanache jwawo. Apa nayiweni kuti Yehofa ali jwamachili mnope kwapunda ŵandu ŵakutusisya soni yikusaŵa myi mwangasamala kandu kuti ŵakutisisyawo ali ŵani.”

10. Ana mpaka tuŵe ŵakusimichisya kuti Yehofa Mlungu jwetu chachitutendela chichi?

¹⁰ Ndumetume Paulo jwalembile kuti “pangali champaka chitulekanganye ni chinonyelo chetu” kwa Mlungu. (Alo. 8:38, 39) Atamose tuli tulasile kwa ndaŵi jelewu, Yehofa chachiŵa jwakoseka kutukamuchisya soni kutulimbikasya pandaŵi jilijose. Mpela yaŵatite Yehofa pakumkamuchisya Georgina, m’wejisoni chachitukamuchisya kupitila mwa abale ni alongo ŵetu.

11. Ana chinonyelo chiŵachisasile Yesu pa Yohane 15:12, 13 chakamuchisye chamtuli ŵakulijiganya ŵakwe? Apeleche chisyasyo.

¹¹ Pa chilo chakumalisya cha umi wa Yesu wachilambo chapasi, jwalakwe ŵasalile ŵakulijiganya ŵakwe kuti anonyelaneje. (Aŵalanje Yohane 15:12, 13.) Jwalakwe jwamanyililaga kuti naga jemanjaji  akunonyelana nikuti mpaka aŵe ŵakamulana soni kupilila pele ŵandu akwalagasya. Kwende tulole yayatendekwe ku mpingo wa ku Tesalonika. Kutyochela pawagambile kutanda mpingowo, abale ni alongo ŵalagasidwaga. Nambope, abale ni alongo ŵamumpingowu ŵaliji chisyasyo chambone pangani jakulupichika soni kunonyelana. (1 Ates. 1:3, 6, 7) Paulo jwalimbikasisye jemanjaji kuti apitilisyepe kunonyelana “kupundana” muŵatendelaga pandanda. (1 Ates. 4:9, 10) Chinonyelochi ni chikakamuchisye abale ni alongoŵa kuti ŵakamuchisyeje achimjawo ŵakulagasika nganisyo nambosoni ŵali ŵakufowoka. (1 Ates. 5:14) Jemanjaji ŵakuyaga malangiso gaŵalembele Paulo mu chikalata chakwe chaŵili gakuti “Chikulupi chenu chikwendelechela kuja msogolo ni chinonyelo chimkwete pa jwalijose pasikati penu “ (2 Ates. 1:3-5) Chikulupi chawo chakamuchisye jemanjaji kupilila yindu ya ngasa yaŵasimanaga nayo soni kulagasidwa.

12. Ana abale ni alongo mchilambo chine ŵalosisye uli kuti akusanonyelanaga pandaŵi pajatendekwe ngondo?

¹² Kwende tulole yaŵasimene nayo Danylo ni ŵamkwakwe. Ngondo jijatendekwaga mchilambo mwawo pajayiche kuŵatamaga jemanjaji nganaleka kusimanikwa pa misongano ja mpingo, kulalichila nambosoni kugaŵana ni abale ni alongo yakulya yaŵakwete. Lisiku line kumangwakwe m’baleju kwayiche asilikali ali ajigele wuti. M’baleju jwatite, “Asilikaliŵa ŵanganganichisye kuti leche umboni. Pa nagambile kukana kutenda yeleyi ŵambutile soni ŵanjogoyisye kuti changombele ni wuti mumtwe. Jemanjaji mkanatyoche, ŵasalilesoni kuti lisiku line pachachiyika chachakamulila ŵamkwangu. Abale ni alongo ŵatukamuchisye kuti tutilile ku tawuni jine mwamti twajesile pa sitima. Ngasindiŵalila chinonyelo chaŵatulosisye abale ni alongoŵa. Patwayiche kumalo kwatwatilileku, abale ni alongo ŵatukamuchisye mwakutupa yakulya soni ŵangamuchisye kuti mbate masengo soni nyumba. Yeleyi yatukamuchisyesoni m’we kuti tukombolesoni kwakamuchisya abale ni alongo ŵane ŵaŵatilaga kumalo kwajaputidwaga ngondoji.” Yindu yakusasimana nayo abale ni alongo yikulosya kuti chinonyelo chetu mpaka chitukamuchisye patukusimana ni yakusawusya.

13. Ana msimu weswela mpaka utukamuchisye chamtuli kupilila patukumtumichila Yehofa atamose ŵandu pa kutuŵenga?

¹³ Yesu ŵasalile ŵakumkuya ŵakwe kuti ŵanonyeleje achimmagongo ŵawo. (Mat. 5:44, 45) Nambo ana yeleyi yili yangasawusya? Iyayi. Nambope mpaka yikomboleche ni chikamuchisyo cha msimu weswela wa Mlungu. Sine mwa ndamo  syele msimu weswela wa Mlungu ukusamkamuchisya mundu kuti akole sili mpela chinonyelo, kuwusimana mtima, umbone, kufasa soni kulilekasya. (Agal. 5:22, 23) Ndamo syelesi sikusatukamuchisya kupilila ŵandu pakutulagasya. Ŵandu ŵane ŵaŵaliji ŵakusisya ŵachenjile umi wawo ligongo lyakuti ŵamkwawo kapena mwanache jwawo mwinesoni ŵakuŵandikana nawo nyumba ŵakwete ndamo syelesi. Soni ŵandu ŵajinji mwa ŵandu ŵaŵatusisyagaŵa sambano ali abale ni alongo. Nambo naga akuyiwona kuti nganaŵa akombwele kwanonyela ŵandu ŵakusiŵalagasya ligongo lyakuti akumtumichila Yehofa amŵendeje Yehofa kuti ŵape msimu ŵakwe weswela. (Luk. 11:13) Kupwatika pelepa aŵeje ŵakusimichisya kuti kumkulupilila Mlungu soni kumpikanila chili chindu chakusosekwa mnope.—Mis. 3:5-7.

14-15. Ana lilemba lya Aloma 12:17-21 lyamkamuchisye chamtuli mlongo jwine kuti ŵanonyelejepe ŵamkwakwe atamose kuti ŵamsisyaga?

¹⁴ Kwende tulole yaŵasimene nayo Yasmeen jwakusatama ku Middle East. Mlongoju pajwaŵele jwa Mboni sya Yehofa ŵamkwakwe ŵaganisyaga kuti pana mundu jwamlambwisye, mwamti jwalinjilelinjile kumlekasya kutumichila Mlungu. Ŵalumeŵa ŵamnyosyaga mlongoju mwamti ŵatumaga ŵachibale, abusa soni asing’anga kuti amjogoyeje jwalakwe soni amsalileje kuti akonanga ulombela wakwe. Jwamlumeju jwayikaga misongano jili mkati, ni kwanyosyaga abale. Mlongoju jwatamilaga kulila ligongo lya yindu yangali chilungamo yaŵatendaga ŵamkwakwe.

¹⁵ Abale ni alongo ŵamlimbikasyaga Yasmeen payiche ku Nyumba ja Uchimwene. Achakulungwa ŵa mumpingo ŵamkamuchisye mlongoju kuti akamulichisye masengo maloŵe gagali pa Aloma 12:17-21. (Aŵalanje.) Yasmeen jwasasile kuti, “Yaliji yakusawusya nambo namŵendile Yehofa kuti angamuchisye soni natesile yakomboleka kuti ngamulichisyeje masengo yajikusasala Baibulo. Myoyo naga ŵamkwangu anyalayisye mkichini nalinganyagamo. Soni naga akumbecheta mwawukali najangaga mwakuwusimana mtima, nambosoni naga akulwala nasamalilaga.”

16-17. Ana tukulijiganya chichi payindu yaŵasimene nayo Yesmeen?

¹⁶ Yaŵatendaga Yaseem yakwete yakuyichisya yambone. Jwalakwe jwatite, “Ŵamkwanguŵa ŵatandite kungulupilila mnope ligongo ŵamanyililaga kuti ndaŵi syosope ngusaŵechetaga yisyesyene. Jwalakwe jwayikene pakumbikanila mwawulemu panguŵecheta yakwamba dini soni jwasasilesoni kuti ngasatendasoni yakusokonasya. Mwamti apano jwasalile kuti njawuleje kumisongano ja mpingo mwa ufulu. Yindu muliŵasa lyetu yichenjile mpela yakulugono, mwamti apano pamlango pangu pana mtendele ngalambusyana. Apano yangwembecheya ni yakuti lisiku line ŵamkwanguŵa chalijiganye usyesyene ni kumtumichilaga Yehofa yimpepe.”

 ¹⁷ Chisyasyo cha Yasmeen chikulosya kuti chinonyelo “changapela pakutenda yindu, . . . Nambosoni chikusapilila ndaŵi syosope.” (1 Akoli. 13:4 ,7) Ŵandu pakutulagasya mpaka yitupweteche mnope nambo chinonyelo ni chachikwete machili mnope ligongo chikusachengaga mitima ja ŵandu. Patukwanonyela ŵane ndaŵi syosope Yehofa akusasangalala. Nambope mpaka tuŵe ŵakusangalala atamose kuti ŵakutusisya ali mkupitilisyape kutulagasya. Ana yeleyi mpaka yikomboleche chamtuli?

18. Ligongo chichi tukusosekwa kuŵa ŵakusangalala ŵane pakutuŵenga?

¹⁸ Yesu jwatite, “Ŵana upile jemanja ŵandu pakumŵenga.” (Luk. 6:22) Pangali mundu jwakusasagula kuti ŵandu amloleje ni liso lyechejewu. Soni ngatukusakunda kuti tulagasidweje ligongo lyagamba kusaka kumanyika. Ni mpaka yikomboleche uli kuŵa ŵakusangalala ŵane pakutulagasya? Kwende tulole magongo gatatu. Ligongo lyandanda, patukupilila tukusamsangalasya Mlungu. (1 Pet. 4:13,14) Ligongo lyaŵili, chikulupi chetu chikusaŵa chisyesyene soni chamachili. (1  Pet. 1:7) Ligongo lyatatu, tuchipochela mbote ja umi wangamala.—Alo. 2:6, 7.

19. Ligongo chichi ŵandumetume ŵaliji ŵakusangalala atamose kuti ŵakwapulidwe?

¹⁹ Yesu ali ajimwiche ŵandumetume ŵatandite kusangalala mpela muŵaŵechetele jwalakwe muyichiŵela. Jemanjaji ali akwapulidwe soni kwalamula kuti aleche kulalichila ŵasangalele. Jemanjaji ŵaliji ŵakusangalala ligongo lyakuti “ŵatesile kuŵa ŵakwenela kunyosyedwa, kwa ligongo kwa lina lya Yesu.” (Mase. 5: 40-42) Ŵandumetumeŵa ŵamnonyelaga mnope Yesu mmalo mwakwajogopa achimmagongoŵa. Jemanjanji ŵalosyaga chinonyelo chakwete mwakulalichila ngani syambone “lisiku lililyosye.” Abale ni alongo ŵajinji masiku agano akupitilisyape mkutumichila Yehofa mwakulupichika atamose kuti akusimana ni yakusawusya. Jemanjaji akusamanyilila kuti Yehofa ngasaliŵalila masengo gawo nambosoni chinonyelo chiŵalosisye pa lina lyakwe.—Aheb. 6:10.

20. Ana mungani jakuyichisya tuchilijiganya chichi?

²⁰ Ŵandu chapitilisyepe kutuŵenga mpaka pachichimalila chilambo chakusakalachi. (Yoh. 15:19) Nambo ngatukusosekwa kutenda woga ni yeleyi. Mpela mwatuchilijiganyichisya mungani jakuyichisya, Yehofa ‘chachalimbisya mitima nambosoni kwachinjilichisya ŵandu ŵakwe ŵakulupichika.’ (2 Ates. 3:3) Myoyo, ngatukusosekwa kuleka kumnonyela Yehofa, abale ni alongo ŵetu nambosoni adani ŵetu. Kutenda yeleyi kuchitukamuchisya kuti tuŵeje ŵakamulana ni abale ni alongo soni kuti tukole chikulupi chakulimba, yayichitendekasya kuti lina lya Yehofa lichimbichikwe. Kupwatika pelepa, tuchilosya kuti chinonyelo chili chamachili mnope kupunda ŵandu ŵakusatulagasyaga.