Opol Abugbaanhaạn roḍighinhom ghan raraạr asidom akomputa r’asifon oghaaphạn ghan abuọ eghunotu abidị r’abunhọn Abugbaanhaạn. Kuolọ, ewạ ni dị aKristẹn dị mosi omhanhanhaạm kootughiạn ghan oroma phọ aḅẹm bọ mọ: “Awe olhoghi komiịn iiḅaghamhị dị retu kụ ogbọl, kụ oye dị iitughiạn u/moọgh katelhe akị asuma kụ agbi oḅẹm mọ eeghe kụ isu imhị.”—Prov. 27:12.

Yira olegheri ni mọ aZihova rawạ ghan oghoph ayira. Esi iduọn phọ, yira ro/wạ ghan ooḍikuan r’awe dị rokọm ghan madia, mophorogh, obobọ r’abudị rotughemhị yogh ghan itughemhị okpẹ. (Rom. 16:17; 1 Kọr. 5:11; 2 Jọn 10, 11) Abuniin abumor obobọ abudị rotu aani ghan ituughạ otue ni ogunhọm sinhị iilhogh aBaibul phọ. (2 Tim. 2:20, 21) Iduọn kụ iḍighi kụ, ootughiạn ghan ni iphẹn phọ mem dị yira rosaḅạr righirị. Re/dugh ghan osaḅạr arighirị ooḅughonhaan siphẹ olhoghi intanẹt phọ.

Ewạ ni mọ ophogh ghan oye kụ osaḅạr ekạr ekpaariọm mem dị yira rooḍikuan r’egu awe siphẹ intanẹt phọ. Abuniin aKristẹn moghị ni oḍighan eboom egu awe bịn ekọm iiḅaghamhị engọ bidị. Kụ ika kụ idị onyọ umor obobọ umarani kagona loor, eḍighi maạr dị egu phọ mephughạn? Lọ edugh ni, pọ wạ ni alhegheri budọ awe phọ bidị oru bọ siphẹ egu phọ, mughumọ omoọgh ni omheeraam dị akpạr. Psalm 26:4 eḅẹm mọ: “Mị raa/ḍikuan ghan we iikelheghian, ḅilhẹ mị rakel ghan ni buphẹ robooghị ghan bọ okạr oye phọ bidị oru bọ.” Iphẹn phọ re/ngọ ghan ḍiitughiạn oḍighinhom ghan raraạr asidom afon phọ mem dị nạ rakaaphạn we dị nạ alhegheri bịn ḍughụm?

Ghalhamọ r’eḅạm egu arighirị ni bịn ewạ ni dị onyọ aKristẹn kagbiighi mem mọ odị ralọgh ghan bọ ḅilhẹ r’araraạr phọ rokaạph ghan bọ. Ki/ḍighi eegharạ ayira omhegheron ghan atorobọ adom, etigheri onhụ amem mọ kesighẹ bọ. APọl aphụr ri rurụ Timoti ilọ awe “ikalaghiạn r’oḅiligha ghan adọl abunọn.” (1 Tim. 5:13) Ḍio arodon, kotue ni bịn osighẹ sifon oḍighinhom iduọn phọ.

Onyọ aKristẹn dị masi amhanhanhaạm ka/kaạph ilọ kegilaạm bunhọn, obobọ apagharanhaạn oghaạph dị arọl idiphọ, obobọ akaạph raraạr ibooghiạn abunhọn abumọr. (Ps. 15:3; Prov. 20:19) Kakel kẹn iinhaghạn dị odị u/kạr ulegheri mọ etu ni inẹ. (Efẹ. 4:25) Torobọ unwanyụ, rungọ ghan ni iyira iinhaghạn siphẹ jw.org ḅilhẹ r’aJW Broadcasting^® phọ dị ekpẹ oḍuomolhoghi ḅilhẹ kekparamhị siya phọ ayira r’aZihova.

Abuniin Abugbaanhaạn rosighẹ ghan ni raraạr asidom intanẹt phọ koghoom raraạr, aalham raraạr, oḅilhẹ ogbeelhom raraạr aal, obobọ ongoọm we eepoogh iiḍighi. Kuolọ ipẹ phọ omhuul aḍighi, ki/lọ itooghị phọ Enhaạn. Onyọ aKristẹn ka/wạ osighẹ ‘aghuḍum mọ odị oḅạm anyụ ikpoki,’ esi iduọn phọ oghel odẹgh ophogh osighẹ ookpomhoghan phọ Enhaạn oḍighinhom eten omhuulhom aḍighi.—Hib. 13:5.

Nạ ragbi mọ enighẹ ni osighẹ araraạr intanẹt phọ olhomọm awe ikpoki ilọ okori osighẹ olhoghonhaạn aḍighaạgh bumor dị osoman ekperenhom iiḅaghamhị ḍughụm? Yira rogbor ghan ni koḍeenhaan ḍiḅeraạn olhoghonhaạn aḍighaạgh ḅilhẹ r’okparamhị abunhọn. (Jems. 2:15, 16) Kuolọ osighẹ araraạr asidom intanẹt phọ kụ oḍighinhom etue ni egbaragbaramhị iikolhobian olạ agadạ phọ rapogh bọ ekpisi phọ obobọ ilọ ookpomhoghan phọ abidị. (1 Tim. 5:3, 4, 9, 10, 16) Kụ yira phọ kẹn ko/wạ oḍighi idị awe kootughiạn mọ mungọ iyira oḍighi ophogh iyool phọ Enhaạn eten dị egbatanhaạn.

Yira omoọgh ḍiḅeraạn oḍighi idị kengọ Enhaạn rughuenhian. (1 Kọr. 10:31) Esi iduọn phọ, mem dị nạ rasopha ilọ oḍighinhom araraạr asidom intanẹt phọ, obobọ inhọn araraạr olhẹm mọ, ḅeeḅeghiọn ni ooto r’osooromineen phọ odi bọ, kụ agona loor.