Lucaden mogo gitiyo ki tet manyen me kubbe ki lupacogi kacel ki Lucaden mukene. Ngene kene ni, Lakricitayo muteggi wiye bipo i kom tira man: “Dano ma wiye tiyo ka oneno gin marac bino i kome, kanne woko; ento lakwiya piny medde mere ameda, ci neno can ada.”​—Car. 27:12.

Waniang ni Jehovah mito gwokowa. Pi meno, pe waribbe ki jo ma gikelo apokapoka, jo ma kiryemogi woko ki i kacokke, nyo jo ma girweyo tam ma pe tye atir. (Rom. 16:17; 1 Kor. 5:11; 2 Jon 10, 11) Jo mogo ma giribbe ki kacokke twero bedo ni gikwo kwo ma pe lubbe ki rwom me Baibul. (2 Tem. 2:20, 21) Ka watye ka yero luremwa, mitte ni wiwa opo i kom lok man. Yero lurem mabeco twero bedo tek ka wakubbe kwedgi kun watiyo ki tet me cwalo mecej.

Pire tek tutwal ni wagwokke ka odok i kom yero lurem tutwalle ka dano ma i gurup me cwalo mecej meno gipol adada. Lukricitayo mogo gudonyo i gurup ma dano pol iye dok gunongo adwogi marac. Twere nining pi omego nyo lamego mo me gwokke ka gurup meno tye ki dano miya nyo alip mapol? Tek adada me ngeyo anga kikome ma gubedo ki kit ma kwogi i yo me cwiny tye kwede. Jabuli 26:4 waco ni: “Pe abedo kacel ki jo ma lugoba, dok pe aribbe ki jo ma lubwola.” Man nyuto ni obedo me ryeko ka wacwalo mecej bot jo ma wangeyogi keken.

Kadi wa i gurup ma danone pe pol, Lakricitayo myero ogwokke ka odok i kom cawa ma en tero ka cwalo mecej kacel ki jami ma jo ma i gurup meno giloko iye. Pe myero wawiny calo mitte ni wadwok mecej ducu labongo paro pi cawa ma watero ka cwalone nyo gin ma kitye ka lok iye. Paulo ociko Temceo i kom “jo ma loko lok atata, ma giridde i gin ma pe megi.” (1 Tem. 5:13) I kare-ni bene, yot adada me poto i owic meno ka odok i kom tet manyen.

Lakricitayo muteggi pe biye winyo nyo loko lok anii nyo mung madok i kom Lukricitayo mukene. (Jab. 15:3; Car. 20:19) Dok en pe bicwalo ki jo mukene nyo ye winyo lok angeya ma gido it dano nyo ma pe kimoko ni tye ada. (Ep. 4:25) Watye ki ngec mapol ma jenge i kom Baibul kacel ki lok angeya ma watwero geno i kabedowa me Intanet me jw.org, kacel ki purogram me JW Broadcasting^® ma katti dwe ki dwe.

Lucaden mogo gitiyo ki mecej me cato, wilo, nyo rweyo pi ginacata mo, nyo bene me miyo tic bot ngat mo. Magi gubedo lok me biacara dok pe kwako worowa bot Jehovah. Lukricitayo ma pe gimito ‘bedo jo ma maro lim’ pe gitiyo ki utmegiwa me tiyo nyo nongo cente.​—Ibru 13:5.

Tika mitte ni wati ki tet me cwalo mecej me penyo pi cente pi omegiwa ma gwok gimito kony nyo jo ma gukato ki i can ma poto atura? Wamaro utmegiwa dok watye ki miti madwong i komgi, pi meno pol kare wakonyo jo ma gimito kony dok wacuko cwinygi. (Yak. 2:15, 16) Ento ka watemo timo man kun watiyo ki gurup me cwalo mecej ma dano mapol tye iye, ci man twero weko bedo tek pi jang gang kal nyo kacokke me konyogi. (1 Tem. 5:3, 4, 9, 10, 16) Dok pe tye ngat mo i kinwa ma mito ni jo mukene gutam ni en enongo mot me tic ma kite dok pat me konyo utmegiwa.

Watye ki miti me timo jami ma bikelo deyo bot Lubanga. (1 Kor. 10:31) Pi meno ka imoko tammi me tic ki tet me cwalo mecej nyo mukene, tam i kom adwogi marac ma itwero nongone, dok igwokke adada.