Kristofohi komɛ guɔ blɔ nɛ ɔmɛ a nɔ nɛ a kɛ a weku li kɛ a nyɛmimɛ nɛ a kɛ mɛ ngɛ asafo ɔ mi ɔ sɛɛɔ ní. Se ke Kristofo no nɛ e nane pi si ɔ kɛ blɔ nya tomi nɛ ɔmɛ ngɛ ní tsue ɔ, e sa nɛ e ha nɛ munyu nɛ ɔmɛ nɛ hi e yi mi: “Nɔ nɛ le ní naa yayami nɛ ma, nɛ e ya laa e he; se kuasia lɛɛ e kɛ yayami ɔ ya kpee, nɛ e naa e mi nɔ́.”​—Abɛ 27:12.

Wa bua jɔ kaa Yehowa suɔ nɛ e po wa he piɛ. Enɛ ɔ he ɔ, waa kɛ nihi nɛ a ngɔɔ mi gbami kɛ baa, nihi nɛ a fiee mɛ kɛ je asafo ɔ mi aloo nihi nɛ a tsɔɔ tsɔɔmihi nɛ kpɛ̃ ɔ bɔɛ. (Rom. 16:17; 1 Kor. 5:11; 2 Yoh. 10, 11) Eko ɔ, nihi nɛ waa kɛ mɛ ngɛ asafo ɔ mi ɔ a kpɛti ni komɛ kɛ Baiblo sisi tomi mlaahi tsu we ní. (2 Tim. 2:20, 21) Ke wa ngɛ huɛmɛ hlae ɔ, e sa nɛ wa ha nɛ enɛ ɔ nɛ hi wa yi mi. Se e he ma nyɛ maa wa kaa wa maa hla huɛmɛ kpakpahi ke waa kɛ mɛ sɛɛɔ ní kɛ gu Intanɛti blɔ nya tomihi nɛ a kɛ maneɔ sɛ gbi ɔ nɔ.

Ke wa suɔ nɛ waa piɛɛ sɛ gbi manemi kuu ngua ko he ɔ, e sa nɛ waa hyɛ saminya ngɛ nihi nɛ waa kɛ maa bɔ ɔ a he. Kristofohi komɛ kɛ a he wo kuu ngua nɛ ɔmɛ ekomɛ a mi nɛ nyagbahi je mi kɛ ba. Se kɛ nyɛmi ko ma plɛ kɛ hyɛ e he nɔ saminya ha kɛɛ ke nihi lafahi abɔ aloo akpehi abɔ nɛ a ngɛ kuu ɔ mi. E he maa wa kaa o maa le bɔ nɛ nihi nɛ a ngɛ kuu ɔ mi ɔ tsuo ngɛ ha tutuutu kɛ bɔ nɛ a mumi mi si dadɛ ngɛ ha. La 26:4 ɔ de ke: ‘I kɛ nɔ sisili bɔɛ; i kɛ osatotsɛmɛ pee we nɔ́ ko.’ Enɛ ɔ tsɔɔ kaa nile ngɛ mi kaa wa maa mane nihi nɛ wa le mɛ pɛ ɔ sɛ gbi.

Ke Kristofo no ngɛ sɛ gbi manemi kuu nyafii ko mi po ɔ, e sa nɛ e hyɛ be nɛ e puɛɔ, kɛ ní nɛ a sɛɛɔ ɔ saminya. E sɛ nɛ wa susu kaa e sa nɛ wa ha sane fɛɛ sane heto, ke e maa ngɔ wa be fuu po. Paulo bɔ Timoteo kɔkɔ ngɛ “sieku yeli kɛ nihi nɛ a ngɔɔ a he kɛ woɔ ni kpahi a sanehi nɛ kɔ we a he ɔ mi” ɔ a he. (1 Tim. 5:13) E ma nyɛ maa ba jã ngɛ wa blɔ fa mi ke wa ngɛ sɛ gbi manemi kuu ko mi.

Odasefo no nɛ e nane pi si ɔ be e nyɛmi odasefo no he munyu nyanyaanya tue, nɛ e be e laami mi sane ko hu kpo jee, nɛ ke ni kpahi hu ngɛ jã pee ɔ, e be tue bue kɔkɔɔkɔ. (La 15:3; Abɛ 20:19) Wa bɔɔ mɔde hu kaa wa ma kua munyuhi nɛ a wo he zã tsɔ, loo munyuhi nɛ wa be nɔ mi mami ngɛ mi. (Efe. 4:25) A to mumi mi ní kpakpahi a he blɔ nya ha wɔ ngɛ jw.org wɛbsaiti ɔ nɔ kɛ JW Brɔɔdkastin ní peemi ɔmɛ nɛ baa daa nyɔhiɔ ɔ mi. Wa ma nyɛ ma he munyu nɛ ɔmɛ ye.

Nyɛmimɛ komɛ guɔ Intanɛti blɔ nya tomi nɛ a kɛ maneɔ sɛ gbi nɛ ɔmɛ a nɔ kɛ heɔ ní, kɛ juaa ní, nɛ a kɛ fiaa níhi nɛ a ngɛ juae kɛ ní tsumi he adafi. Ní nɛ ɔmɛ ji jua yemi mi ní peepeehi, nɛ a kɛ Yehowa jami be tsakpa ko. Kristofohi nɛ a bɔɔ mɔde kaa a maa yu a he ngɛ “sika suɔmi” he ɔ bɔɛ mɔde kaa a maa gu a nyɛmimɛ a nɔ kɛ ná sika.​—Heb. 13:5.

Anɛ e sa nɛ waa gu blɔ nya tomi nɛ ɔmɛ a nɔ kɛ hla sika kɛ ha wa nyɛmimɛ nɛ a ngɛ ohia yee aloo adebɔ mi oslaa ko ná mɛ ɔ lo? Akɛnɛ wa suɔ wa nyɛmimɛ ɔmɛ nɛ wa susuɔ a he he je ɔ, wa bɔɔ mɔde kaa wa maa ye bua a kpɛti nihi nɛ a hia yemi kɛ buami ɔ nɛ waa wo mɛ he wami. (Yak. 2:15, 16) Se ke wa bɔ mɔde kaa wa maa gu sɛ gbi manemi kuu nguanguahi a nɔ kɛ ye bua mɛ ɔ, wa ma ha nɛ e he nɛ wa ha asafo ɔ ní tsumi kɔni ɔ loo asafo ɔ kaa a maa ye bua mɛ. (1 Tim. 5:3, 4, 9, 10, 16) Jehanɛ hu ɔ, wa sume nɛ waa pee nɔ́ ko nɛ ma ha nɛ ni kpahi nɛ a susu kaa a ha wɔ he blɔ klɛdɛɛ ko kaa waa hyɛ wa nyɛmimɛ ɔmɛ a nɔ.

Wa suɔ nɛ waa pee níhi nɛ maa wo Mawu hɛ mi nyami. (1 Kor. 10:31) Lɔ ɔ he ɔ, ke o suɔ nɛ o kɛ Intanɛti blɔ nya tomi ko nɛ a kɛ maneɔ sɛ gbi nɛ tsu ní ɔ, moo hyɛ oslaahi nɛ ngɛ he, nɛ o kɛ hɛ si kami nɛ tsu ní.