Kristotɔ Kunuɖetɔ ɖewo zannɔ mashini ciwo yí tokɔ le mìwo hwenu yí sɔ nɔnɔ kacaca mɛ koɖo wowo xomumɛtɔwo koɖo wowo kpena Kunuɖetɔwo. Ele ahan gan, Kristotɔ ci yí shin le gbɔngbɔnmɛ lénɔ nukplamu cɛ do susumɛ: “Ŋununyatɔwo kpɔnɔ cukaɖa gbɔgbɔ yí so le mɔ ji. Vɔ, sukunu watɔ zɔnnɔ trelele yì cukaɖa lɔ mɛ yí kpefun so nu.”—Elo. 27:12.

Mìmɔŋje mɛ mɔ Yehowa ji mɔ yeaglɔn ta nɔ mì. Eyi taɖo mìdedonɔ ha koɖo mɛ ciwo yí hɛnnɔ mama va, mɛ ciwo woɖe ti le hamɛ lɔ mɛ alo mɛ ciwo yí kakanɔ nukplakpla trofitrofiwo o. (Rɔm. 16:17; 1 Kor. 5:11; 2 Ʒan 10, 11) Taŋfuin mɛɖewo ciwo yí donɔ ha koɖo hamɛ lɔ dewanɔ do ese ciwo yí le Bibla mɛ ji o. (2 Tim. 2:20, 21) Nɔ mìcankɔ mɛ ciwo mìanyi xlɔ koɖoɔ, nyɔ cɛ nɔnɔ susumɛ nɔ mì. Ecɛ atɛnŋ agbɔnnu nɔ mì nɔ mìcankɔ exlɔwo le Ɛntɛnɛti ji.

Ele veviɖe mɔ mìanya wawa nɔ mìcankɔ exlɔwo le gbɛbɔbɔ ɖe ci mɛ amɛ sugbɔ le le Ɛntɛnɛti ji. Kristotɔ ɖewo ɖo gbɛbɔbɔ ganganwo mɛ yí enumanyɔmanyɔwo to so mɛ. Lé nɔviŋsu alo nɔvinyɔnu ɖe atɛnŋ anya wawa nɔ gbɛbɔbɔ lɔ mɛ tɔwo yi sanŋdi alo kotokun nɛniɖeɔ? Nɔ ele ahan ɔ, datɛnŋ ajeshi mɛ ciŋmɛ amɛ lɔwo pleŋ nyi le gbɛbɔbɔ lɔ mɛ koɖo lé wole do le gbɔngbɔnmɛ o. Ehajiji Wema 26:4 nu mɔ: “Ŋdedonɔ ha koɖo amɛbletɔwo o, yí ŋzenɔ nɔ mɛ ciwo yí wlanɔ mɛ ciŋmɛ wonyi.” Ecɛ dasɛ mɔ nunya le mɛ sɔwu mɔ mìaŋwlɛnɔ nu ɖaɖa mɛ ciwo ɖekɛ mìjeshi ɖɛ.

Nɔ mɛ ciwo yí le gbɛbɔbɔ lɔ mɛ desugbɔ can ɔ, Kristotɔ ɖo anya wawa nɔ gamɛ nɛni ezannɔ do nu koɖo nyɔ ciwo nu woxonɔ nuxu so. Mìdamɔ mìɖo anunɔ do enyɔ ɖekpokpui ci amɛwo sɔkɔ ɖaɖa gbɛbɔbɔ lɔ mɛ nu o, nɔ wozankɔ gamɛ sugbɔ do nyɔ lɔ nu can. Pɔlu kanxle Timɔte mɔ yɛ le nya wawa nɔ mɛ ciwo yí ‘donɔ lɛgɛdɛ yí zonɔ je mɛbuwo nyɔ mɛ.’ (1 Tim. 5:13) Egbɛɔ, atɛnŋ ajɔ mɔ mìawa enu cɛ han le Ɛntɛnɛti ji.

Kristotɔ ci yí shin le gbɔngbɔnmɛ dalɔn anu ɖyikadodo nyɔ alo nyɔwlawla ɖe so yi kpena xɔsetɔ buwo nu alo aɖo to nɔ mɛbuwo nuikɔ o. (Eha. 15:3; Elo. 20:19) Yí dalɔn aɖo to enujɔjɔ ɖe ci amɛwo shi ami nɔ alo wonumɔnyɔ ɖe ci ji wodekando o. (Efe. 4:25) Mìxɔnɔ gbɔngbɔnmɛŋɖuɖu koɖo kankandojinyɔwo so mìwo siti jw.org koɖo JW Televiӡiɔn^® wlecishiawleci wanawo mɛ.

Kunuɖetɔ ɖewo zannɔ enuŋwlɛɖaɖamɛ to Ɛntɛnɛti ji yí sɔ sanɔ nu, xwlenɔ nu yí dranɔ nuwo alo edɔwo. Wodeɖo asɔ ajɔdradra mɔnuwo caka koɖo Yehowa sɛnsɛn o. Kristotɔ ciwo yí ji mɔ yewo “susuwo a vo le eho lɔnlɔn nu” datekpɔ mɔ yewoazan yewo nɔviwo asɔ ji ho gbeɖe o.—Ebre. 13:5.

Vɔ mìaŋwlɛ nu ɖaɖa asɔ biɔ ho nɔviwo nɔ woakpedo nɔvi bu ciwo le eӡan mɛ alo ciwo ji jɔjɔmɛfɔkuwo jɔ do nua? Mìlɔn mìwo nɔviwo yí sɔ ɖe le ji nɔ wo, eyi taɖo mìkpenɔdo ciwo yí le eӡan mɛ nu yí donɔ ŋsɛn wo. (Ӡaki 2:15, 16) Vɔ nɔ mìtekpɔ mɔ mìato gbɛbɔbɔ cɛwo ji le Ɛntɛnɛti jiɔ, agbɔnnu nɔ alɔjedɔwaxu lɔ alo hamɛ lɔ mɔ yɛakpedo wo nu. (1 Tim. 5:3, 4, 9, 10, 16) Yí kankandoji li mɔ mɛɖe dele mì mɛ aji mɔ, yeana amɛwo akpɔ ye mɔ wocan ye le mɔ vevi ɖe ji nɔ yeakplɔnɔ Mawu lɛngbɔwo o.

Mìji mɔ mìawa enu ci yí ahɛn kanfukanfu vɛ nɔ Mawu. (1 Kor. 10:31) Eyi taɖo nɔ mìjikɔ azan enuŋwlɛɖaɖamɛ to Ɛntɛnɛti ji ɖekpokpuiɔ, mìabu tamɛ kpɔ so afɔku ciwo yí atɛnŋ ato so mɛ nu, keŋ anya wawa.