Бӱгӱнги кӱнде кезик христиандар тӧрӧӧндӧриле эмезе ака-эјелерле куучындажарга мессенджерлер тузаланат. Је кӧгӱзи тереҥ христиан мындый сӧстӧрди ундыбай јат: «Сагышту кижи керектиҥ аайын озодоҥ билип ийеле, кача берет, је сагыш јогы кӧндӱре барала, тӱбекке тӱжӱп калат» (Укаа 27:12).

Иегова бисти корулап аларга турган, оныҥ учун бис јуунда бӧлӱништер эдип турган, јууннаҥ чыгарылып калган эмезе Агару Бичиктиҥ ӱредӱлерин булгап турган улусла куучындашпай јадыс (Рим. 16:17; 1 Кор. 5:11; 2 Иоанн 10, 11). Кудайдыҥ јасагын бузып турган улустар кезикте јуунда да бар болот (2 Тим. 2:20, 21). Оныҥ учун најы бедиреген христиан мыны ундыбай јат. Айдарда, јӱк ле мессенджер ажыра најылажып турган кижини јакшы најы деп айдып болорыс па?

Анчада ла јаан группаларга кирзеес, ајарыҥкай болорго јеҥил эмес. Андый группаларда канча јӱс эмезе канча муҥ улус болот. Бу группаларда чыннаҥ ла кемдер барын эмезе олордыҥ кӧгӱс јанын кайдаҥ билетен эдис? Кезик христиандар мындый группаларда куучындажып турала јаман керектерге кирген. Сарын 26:4-тӧ мынайып айдылат: «Мен тӧгӱнчи улусла отурбагам, чын јӱзин јажыргандарла јӱрбегем». Оныҥ учун мессенджер ажыра јӱк ле јакшы билер улусла куучындашсаас, ойгор болор эмес пе?

Је слердиҥ кирип алган группагар кичинек те болзо, ондо канча кире ӧй ӧткӱрип турганаарды ла группада улус нени куучындажып турганын кӧрӱп туругар. Кажы ла келген сообщениеге кыска да болзо каруу берер керек деп сананбагар. Кезик улус мессенджерлерди Павелдиҥ Тимофейге бичиген сӧстӧрине тӱҥей тузалангылап јат. Олор «ӧскӧ улустыҥ керектерине киришкилейт, айтпасты айдып јӱргӱлейт» (1 Тим. 5:13).

Кӧгӱзи тереҥ кижи мессенджерлер ажыра ака-эјелер керегинде јаман неме айтпай јат, конфиденциальный јетирӱлер куучындабай јат. Андый сообщениелерди кычырбай да јат (Сар. 15:3; Укаа 20:19). Анайда ок јазап шиҥделбеген кӧпчидип салган јетирӱлер база аткарбай јат (Еф. 4:25). Эҥ ле бӱдӱмјилӱ ле чын јетирӱлер бистиҥ jw.org сайтта ла кажы ла ай чыгып турган JW Broadcasting^®-тиҥ программаларында бар.

Кезик ака-эјелер мессенджерлер ажыра нени-нени садып јат эмезе садып алат, анайда ок кандый бир ишти эмезе товарды рекламировать эдет. Бу дезе иш-тошло, акча-манатла колбулу сурак. Мыны Кудайга бажырарыла булгабас керек. Оныҥ учун акчаны сӱӱбеске турган христиан кижи ака-эјелер ажыра акча иштеп аларым деп сананбай јат (Евр. 13:5).

Је слер кӱч айалгада болуп калган эмезе ар-бӱткенниҥ тӱбегине тӱшкен ака-эјелерге болужарга турган болзоор, канайдараар? Бу ӧйдӧ мессенджер ажыра јаан группа тӧзӧп, акча јуур деп сананар болороор. Је мынайып этсеес, филиалдыҥ ла акалардыҥ ижине чаптык эдерис (1 Тим. 5:3, 4, 9, 10, 16). Бис ака-эјелерди сӱӱп, олорго болужарга турган эмейис (Иак. 2:15, 16). Андый да болзо, Кудайдыҥ албатызын башкаратан јаҥды бойыска аларга албаданбай јадыс.

Бис нени де этсеес, Кудай макталзын деп эдедис (1 Кор. 10:31). Оныҥ учун мессенджерлерди тузаланарында ајарыҥкай болугар.