O roma Krisciyang misaka dademakay to tingnaw a lalosidan, mararinnak to salikaka ato salawina. Kawra, o matenesay a Krisciyang miharatengay to sapatalipaˈelal no Fangcalay Cudad: “O mafanaˈay a tamdaw i, pakaˈaraw to hapades ningra i, tangsol sa a miliyas, nikawrira, o maapaay a tamdaw i, tayra a milayap to sakalatiih ningra.”—Taneng 27:12.

Mafanaˈay kita sapidipotaw ci Yihofa kitaanan, mansa cowa ko mamicawmaˈ kita to papaliwasak a tamdaw, mafalahay a tamdaw, anca miowingay to mararaway sasowalen a tamdaw. (Loma 16:17; 1 Korinto 5:11; 2 Yohani 10, 11) Roma i, o roma salikaka anca micawmaˈay to kasakopang a tamdaw cowa pitoor to safalod no Fangcalay Cudad a maˈorip. (2 Timoti 2:20, 21) Mihaenay, wa misinanot kita mipiliˈ to widang. Kawra, ano misaka dademak to tingnaw sapiremoaw tonini, cowa ko madoloay alatek.

Ano misimsim sapirienangaw to macacawmaˈay a kapot i, kakiriwiˈen a misinanot. O roma salikaka na mirienangay to mahaenay macacawmaˈay kapot mikayatay to tatiihay a teloc. Haratengen, o cecay kapo ano pinaay soˈot anca pinaay patek ko tamdaw, sasamaan misongilaˈ mipiliˈ to widang aki? Cowa ka fanaˈ kita to kahacecay a tamdaw i kapot, o tanektekay ko pakasoˈlin a Krisciyang hokira. Sowal i ˈOlic 26:4 sanay: “Caay pinaol kako to misamangahay a tamdaw, caay pikapot kako to misakaniway a tamdaw.” Mahapinangay, oyaan aca kafanaˈan a tamdaw ko cawmaˈen ita o citanengay a demak.

Soˈlin cowa ka ˈaloman ko kapot noniya micawmaˈan, o mamisimsim ko Krisciyang o milengoan a lalangian anca mapalakay a toki. Cowa ko ngangaˈay kita mirienang to masakenaay a kalalengo, anca adihay ko mapalakay a toki. Itini tikami ni Pawlo ci Timotian masowalay, o roma tamdaw “malaymay cangra a somowal to masamaamaanay to caay ko sasowalen a sowal a micara to tao.” (1 Timoti 5:13) Anini, ano caka pisinanot ko tamdaw misaka dademak to tingnaw a lalosidan, o mamalo mahaenay a tamdaw alatek.

O matenesay a Krisciyang cowa ko mamitengil anca somowal to milikafay to salikaka a sowal, cowa ko mamikilim anca pasadak tono tekedan a demak no salikaka. (ˈOlic 15:3; Taneng 20:19) Cowa ko mamitengil cangra to miyakayakay a sasowalen anca cowa ko soˈlinay a tawcikel. (Ifiso 4:25) Soˈlinay i, mikitiniay i jw.org a wangcan anca JW Tilifi a kamok, wa adihay ko malifokay ita sapahaled to paksoˈlinay falocoˈ a kakaenen, ato soˈliˈlinay a safanaˈ ato lihaf.

O roma Krisciyang misaka dademakay to tingnaw a lalosidan misasingdi, pacakay to dafong anca mitahidang to mawmahay. Ono misasingdiay a demak konini, o papafidaˈen to midokoay ci Yihofaan a tayal. Ano cowa ka ciharateng ko Krisciyang malo ‘maˈanofay to payciˈ a tamdaw, aka misaka dademak to kalalaˈed no salikaka a mietan to payci.—Hipray 13:5.

Wa ngangaˈay kita tano tingnaw a lalosidan mihoped to payci, padama to tahapadesay anca misaaliay a salikaka han? Manaokaniw ciharatengay kita to salikaka, sapadamaaw ato pakalalok cangranan. (Yakop 2:15, 16) Kawra, ano pakaynien ita i ˈalomanay macacawmaˈay a kapot misaˈopo to payci, o mamikalisanga to limasmas no Fenpo anca kasakopang alatek. (1 Timoti 5:3, 4, 9, 10, 16) Roma i, cowa ko caciharateng kita minengneng ko tao kitaanan, hato micadaay to mikiriwiˈay a sanilnil midimokos to salikaka.

Ano o mananto ko demak ita, makalimay sapaˈodingaraw ci Yihofaan. (1 Korinto 10:31) Mihaenay, itini pisaka dademak to tingnaw a lalosidan i, simsimen ko katalawan, minaˈon a midemak.