Yaqhep jilat kullakanakajja, familiaranakapampi yaqha Testigonakamp parlañatakiw celularanaksa tabletanaksa ukat yaqha ukhamanaksa apnaqapjje. Sum amuytʼasiri cristianonakajja, Biblian aka ewjjtʼapat janiw armasipkiti: “Chʼikhi jaqejj jan waltʼaña uñjasinjja jaltjjewa; jan amuytʼasiri jaqesti mantaskakiwa, ukatsti tʼaqhesiwa” (Prov. 27:12).

Diosajj jan walinakat jarkʼaqañwa munistu. Ukatwa tʼaqa tʼaq sarnaqañ utjayapki, congregacionat jaqsutäpki, kʼari yatichäwinak yatichapki ukanakamp jan chikachasktanti (Rom. 16:17; 1 Cor. 5:11; 2 Juan 10, 11). Maysa toqetjja, yaqhep Testigonakasa jan ukajj jupanakamp tantachasipki ukanakasa, inas Biblian yatichäwinakaparjam jan sarnaqapkchiti (2 Tim. 2:20, 21). Ukhamasti ukanak amtasapuniw amigonakas ajlliñasa, ukampis Internet toqe amigonak sum ajlliñajj chʼamäspawa.

Yaqhep aplicacionanakanjja mensajenaka apayañatak gruponakaw utji. Uka gruponakar mantañ amtaskstan ukhajja, khitinakampis ukan parlañäni uk sum amuytʼasiñasawa. ¿Kunatsa? Yaqhep jilat kullakanakajja, uka gruponakar mantasajj jan walinakanwa uñjasiwayapjje. Mä grupon pataka jan ukajj waranqa jaqenakajj utjchi ukhajja, ¿kunjamatsa khitinakampis parlañäni uk sum amuytʼassna? Ukankir jaqenakajj khitinakäpjjesa Diosar serviñansa kunjamäsipkisa, ukanak yatiñajj wali chʼamaspawa. Salmo 26:4 qellqatajj akham siwa: “Janiw kʼari jaqenakampejj qontʼaskti, janirakiw [kʼari] chuyman jaqenakampis chikachaskti” sasa. Ukhamasti khitinakarutï sum uñtʼktan ukanakampikiw Internet toqe parlañasa, ukhamatwa sum amuytʼasirïtas uñachtʼaysna.

Jiskʼa gruponakansa ukhamarakiw amuyasiñasa; qhawqha tiempos mensajenak apaytan, kunanakatsa parlaraktan ukanakat sumwa amuyasiñasa. Inas mä toqet walja tiempo parlapjjchi, ukampis taqpach mensajenakar respondeñajj janiw wakiskapuniti. Pablojj aru apnaqerinakata, yaqhanakan luräwinakapar mitisirinakat amuyasiñapatakiw Timoteor ewjjtʼäna (1 Tim. 5:13). Jichhürunakan ukham jaqenakajj Internetan utjarakispawa.

Amuytʼasir cristianonakajja, yaqhanakat jan wal parlirinakampisa, jan arsusiñapäki ukanak parlirinakampis janiw chikachasipkiti (Sal. 15:3; Prov. 20:19). Janirakiw jilamp jilamp parlapki ukanaksa, kunatï jan sum yatiski ukanaksa istʼapkiti, ni ukanakatsa yaqhanakamp parlapkiti (Efes. 4:25). Jichhürunjja, Bibliat apstʼat confiykay walja suma yatiyäwinakaw utjistu, ukanak jw.org ukat JW Broadcasting^® ukanwa jikjjatsna.

Yaqhep Testigonakajja, mensaje apayañatak aplicacionanak toqew kuns aljapjje jan ukajj alapjje, trabajirinaksa thaqapjjaraki. Ukanakajj trabajo jan ukajj negocio lurañatakiwa, janiw Diosar serviñampejj juntthapiñasäkiti. ‘Jan qollqe añch munasa’ jakañ munapki uka cristianonakajja, janipuniw jilat kullakanak toqejj qollqe ganañ amtapkiti (Heb. 13:5).

Pistʼat uñjasipki jan ukajj jan walinakan uñjasipki uka jilat kullakanakar yanaptʼañatakejja, ¿mä aplicación toqe qollqe mayiñajj walikïskpachati? Cheqas jilat kullakanakasar wal munastanjja, jupanakatsa llakisiraktanwa, ukatwa yanaptʼa munapki ukhajj yanaptʼtanjja ukat chʼamañchtʼaraktanjja (Sant. 2:15, 16). Ukampis mensaje apayañatak utji uka gruponak toqe yanaptʼsna ukhajja, inas sucursalana, jilïr irpirinakan luräwipak jan waltʼayjjsna, jupanakaw jukʼamp sum yanaptʼapjjaspa (1 Tim. 5:3, 4, 9, 10, 16). Janipuniw jiwasas jilat kullakanakasar cuidañatak encargatäksna ukham khitirus amuyayañ munktanti.

Taqe kunsa Diosar jachʼañchañatakiw lurañ muntanjja (1 Cor. 10:31). Ukhamasti mensaje apayañatak aplicacionanaka, jan ukajj yaqha ukhamanak apnaqañäniti janicha uk amtkasajja, kuna jan walinakansa uñjassna uka toqetwa sum amuytʼasiñasa, wali amuyumpiw ukanak apnaqañasaraki.