Мәсиһиләр аиләләри вә диндашлары илә әлагә сахламаг үчүн мүасир технолоҝијадан истифадә едир. Әлбәттә ки, јеткин мәсиһи нөвбәти мәсләһәтә әмәл етмәјин ваҹиблијини унутмајаҹаг: «Узагҝөрән бәланы дујуб ҝизләнәр, ҹаһил исә габаға ҝедиб зијан тапар» (Мәс. 27:12).

Биз билирик ки, Јеһова бизи горумаг истәјир. Буна ҝөрә дә араја нифаг салан, јығынҹагдан кәнар едилмиш вә ја јалан тәлимләр јајан инсанларла үнсијјәт етмирик (Ром. 16:17; 1 Кор. 5:11; 2 Јәһ. 10, 11). Бәзи мәсиһиләр вә ја јығынҹагдакыларла үнсијјәти олан диҝәр инсанлар Аллаһын ганунларына ујғун давранмыр (2 Тим. 2:20, 21). Дост сечими заманы биз буну нәзәрә алырыг. Амма месажлашма тәтбигләриндән истифадә едәркән јахшы достлар сечмәк чәтин ола биләр.

Хүсусилә дә бөјүк мессенҹер групларына гошулмаздан өнҹә јахшыҹа дүшүнмәлијик ки, орада кимләрлә үнсијјәтдә олаҹағыг. Бәзи мәсиһиләр бу ҹүр груплара дахил олуб вә бу, пис нәтиҹә вериб. Ахы јүзләрлә вә ја минләрлә инсанын олдуғу групларда мәсиһинин јетәринҹә еһтијатлы олмасы нә дәрәҹәдә мүмкүндүр? Групда олан һәр кәсин әслиндә ким олдуғуну вә руһани вәзијјәтинин неҹә олдуғуну билмәк гејри-мүмкүндүр. Зәбур 26:4 ајәсиндә дејилир: «Јаланчыларла отуруб-дурмурам, ич үзүнү ҝизләдәнләрә гајнајыб-гарышмырам». Мәҝәр шәхсән таныдығыныз инсанларла јазышмаг һикмәтли олмаз?

Һәтта групда адамларын сајы аз олса белә, мәсиһи диггәт јетирмәлидир ки, о, јазышмаја нә гәдәр вахт ајырыр вә групда мөвзу нәдән ҝедир. Мәсиһи елә дүшүнмәмәлидир ки, јазышмаја сәрф етдији вахтдан, јахуд да сөһбәтин нәдән ҝетмәсиндән асылы олмајараг, група јазылан месажлара ҹаваб вермәлидир. Булус Тимутини хәбәрдар етмишди ки, деди-году илә мәшғул олан, ҹамаатын ишинә гарышан кәсләрдән өзүнү горусун (1 Тим. 5:13). Биз дә месажлашма тәтбигләриндән истифадә едән заман бу хәбәрдарлығы унутмамалыјыг.

Јеткин мәсиһи диндашлары һаггында тәнгиди данышмајаҹаг вә мәхфи мәлуматлары јајмајаҹаг, һәмчинин о, бу ҹүр сөһбәтләрә гулаг асмајаҹаг (Зәб. 15:3; Мәс. 20:19). Ејнилә о, сенсасија јарадан вә доғрулуғуна әмин олмадығы мәлуматлары јајмагдан да узаг дураҹаг (Ефес. 4:25). Бизим jw.org сајтымызда вә JW телевизијасынын ајлыг програмларында кифајәт гәдәр руһани гида вә етибарлы хәбәрләр јер алыр.

Бәзи Јеһованын Шаһидләри мессенҹерләр васитәсилә нәсә алыр, сатыр, мәһсулларыны реклам едирләр вә ја иш тәклифи едирләр. Бунлар бизнес мәгсәдли ишләрдир. Јеһоваја ибадәтлә әлагәси јохдур. Һәјатында пулпәрәстлијә јер вермәк истәмәјән мәсиһиләр баҹы-гардашлардан мадди мәнфәәт үчүн истифадә етмәјәҹәк (Ибр. 13:5).

Бәс месажлашма тәтбигләри васитәсилә еһтијаҹы олан вә ја тәбии фәлакәтдән зәрәр чәкмиш диндашларымыз үчүн јардым топламаг һаггында нә демәк олар? Биз диндашларымызы севирик, онлар бизим үчүн әзиздир. Она ҝөрә дә чалышырыг ки, онлара дајаг олаг вә руһландыраг (Јаг. 2:15, 16). Амма буну бөјүк месажлашма груплары васитәсилә етмәјә чалышсаг, филиалын вә јығынҹағын даһа јахшы тәдбирләр ҝөрмәсинә чәтинлик јарада биләрик (1 Тим. 5:3, 4, 9, 10, 16). Үстәлик, һеч биримиз башгаларында елә тәәссүрат ојатмаг истәмәрик ки, санки Аллаһын сүрүсүнүн гејдинә галмаг үчүн бизә хүсуси тапшырыг верилиб.

Биз истәјирик ки, етдијимиз һәр шејдә Аллаһ шәрәфләнсин (1 Кор. 10:31). Буна ҝөрә дә месажлашма тәтбигләриндән вә диҝәр техноложи васитәләрдән истифадә едәркән тәһлүкәләри нәзәрә алын вә еһтијатлы олун.