Mbôgi Yéhôva ihogi i ngwélél internet inyu yi lelaa bôt bap ba lihaa ni lôk kéé ipe i nke. Jon, nhôôlak kristen u nlama noñ maéba ma Bibel mana le: “Mut yihe a ntehe jam libe, a nsolop, ndi ditégéé di bôt di ntagbe, di nkôs nôgôs.”​—Bingéngén 27:12.

Di nyi le Yéhôva a nyéñ sôñ bés. Jon di keñgle i bana maada ni bôt ba ba nlona mbagla, bôt ba bi pémés ntôñ, ni i bet ba nhôñôs minkoda mi biniigana ikété likoda. (Rôma 16:17; 1 Korintô 5:11; 2 Yôhanes 10, 11) Ngim bikristen ikété likoda i noñ bé matiñ ma Bibel. (2 Timôtéô 2:20, 21) I ngéda di nyéñ bana mawanda, jam di nlama hoñol li yé le, hala a ta bé jam li ntomb i pohol biloñge bi mawanda i ngéda di ngwélél internet inyu om tole kôhna manwin.

Hala a nlôôha ki ba ndutu ngéda bôt bés ni bo, di héñha manwin ba nlôôha ba ngandak. Ngim bikristen i bi neebe i héñha manwin ni ngandak bôt, hala a yik lona bo bikuu. Lelaa mankéé nu muda tole nu munlôm a yé le a unda le a gwé pék, ibale nsoñgi bôt bo ni nye ba nhéñha manwin u nkahal pam mbôgôl tole dikôô di bôt? I ga bane nye jam li nlet i yi njee a yé hiki wada wap ni i yi too ba gwé hémle ngui. Kaat Tjémbi 26:4 (MN) i nkal le: “Me nkiha bé ni bôt ba malôga, me nkeñgle ki ba ba nsôô i yom ba yé toi.” Baa hala a ñunda bé le njel pék i mbat le di yi ndugi mut ilole di nhéñha nye manwin?

Yak ngéda di ta bé ngandak i héñha manwin, kristen i nlama badba le: Baa hala a nyoñ me ngandak ngéda, kii di yé di mbéna kwel? Inyule inyu yés, i ta ndik bé nso nkwel, ndi di nlama wan mam di mpôdôl ni ngéda di nlôôs mu. Ñôma Paul a bi béhe Timôtéô le a kee haa ni bôt “ba hilégé ni ba ba nha manyo map i mam ma bôt bape.” (1 Timôtéô 5:13) I len ini, di nla kwo mu hiandi hi ni njel manwin di ñep internet.

Nhôôlak kristen u nlama bé yahal mankéé numpe, u nlama bé ki to emble mankéé nu a nyahal numpe. A nlama bé ki to yelel mam lôk kéé i gwé bé kunde i yi inyu bilôk bikéé bipe. (Tjémbi 15:3; Bingéngén 20:19) A ñemble bé ki to mimbodok mi miñañ, to tôô a ntôô bé nwo. (Éfésô 4:25) Ibale di nyéñ manwin ma mondo tole biniigana bi mondo, di gwé jw.org ni JW Nkuu Biliñgeliñge a mpam hiki sôñ nu a ti bés manwin ma mondo.

Ngim lôk kéé i ngwélél internet inyu nuñul ni somb gwom, ni inyu yiñil bôt bape bôlô. Biliya ba mboñ bi yé inyu hôñôs mam ma nyuñga, he mam ma mbuu bé. Bikristen bi, bi ngwés bé bana “niñ i bôt ba ba ngwés moni,” bi mboñ biliya le bi gwélél bañ maada ba gwé ni lôk kéé yap i mbuu inyu yéñ moni.​—Lôk Héber 13:5.

Baa di nlama gwélél internet inyu bat lôk kéé moni mi mi ga hôla i nit lôk kéé ipe i i nyep tole i bikuu bi nkwél? Di mbéna nit bo i ngéda ba gwé ngôñ ni mahôla, di tinak ki bo makénd. (Yakôbô 2:15, 16) Ndi ibale di noode boñ hala ni manwin di nhéñha i internet ni mawanda més, i ga ba ndutu inyu hikuu hi loñ tole inyu likoda i lôl bo mahôla. (1 Timôtéô 5:3, 4, 9, 10, 16) Mut nye ki nye ikété yés a gwé bé ngôñ i tinde bape i hoñol le ba mbééga nye nson tôbôtôbô i hôla lôk kéé.

Di gwé ngôñ le i mam di mboñ ma ti Nyambe lipém. (1 Korintô 10:31) Jon di nlama yoñ yihe ilole di nkit ibale di ga gwélél internet inyu om tole kôs manwin.