Andɛ’n, aniaan sunman be nin be osufuɛ mun nin aniaan wie’m be koko yalɛ ɛntɛnɛti su. Sanngɛ i sɔ yolɛ nun’n, ɔ fataman kɛ be wla fi afɔtuɛ nga su: “Kɛ ngwlɛlɛfuɛ’n wun ndɛ bɔ w’a wla trɔ b’ɔ́ bá’n, ɔ cuɛn i wun. Sanngɛ sran nga i bɔbɔ ɔ kwlá ukɛmɛn i wun’n, ɔ fɛ i wun ko yi nun. Ɔ maan kusu ɔ isa ndɛ sɔ’n i bo nzuɛn’n.”—Nya. 27:12.

Ndɛ sɔ’n kle kɛ Zoova kunndɛ kɛ ɔ́ sásá e, yɛ i sɔ’n yo e fɛ. I sɔ’n ti’n, ɔ fataman kɛ e nin be nga be saci sran’m be afiɛn’n nin be nga b’a tu be asɔnun’n nun’n ɔ nin be nga be kan ato ndɛ mun’n e san nun. (Rɔm. 16:17; 1 Kor. 5:11; 2 Zan 10, 11) Nán be nga be o asɔnun’n nun’n be ngba yɛ be nanti Biblu’n nun mmla’m be su-ɔ. (2 Tim. 2:20, 21) Ɔ maan sɛ e waan é trá janvuɛ’n, ɔ fataman kɛ e wla fi i sɔ liɛ’n su. Kɛ e nin sran mun e koko yalɛ ɛntɛnɛti su’n, ɔ fata kɛ e kpa be nga e tra be janvuɛ’n be nun.

I li sɛ e o sran akpasua kun mɔ i nunfuɛ’m be yia ɛntɛnɛti su be koko yalɛ’n i nun’n naan i nun sran’m be sɔnnin’n yɛ ɔ fata kɛ e nian e wun su kpa’n niɔn. Aniaan wie’m be fali be wun wlɛli i sran akpasua sɔ’m be nun wie’m be nun yɛ i bo w’a guaman kpa w’a manman be. ?Sɛ aniaan kun o sran akpasua kun mɔ i nun sran’m be tra sran ya annzɛ akpi’n, ɔ́ kwlá níɛn i wun su kpa yɛ ɔ o lɛ-ɔ? Kɛ sran’m be sɔnnin dan’n, e kwlá siman sɛ be kwlaa be nzuɛn’n ti kpa-o annzɛ sɛ be nin Ɲanmiɛn be afiɛn mantan kpa-o. Jue Mun 26 i mma 4 se kɛ: “E nin finfinfuɛ mun e tranman, e nin gblɛfuɛ mun e sanman nun.” Ndɛ sɔ’n kle kɛ be nga e si be’n be ngunmin yɛ ɔ fata kɛ e nin be koko yalɛ ɛntɛnɛti su-ɔ.

Kannzɛ be nga e nin be koko yalɛ’n b’a sɔnman bɔbɔ’n, sanngɛ ɔ fata kɛ e nian dɔ nga e fa koko yalɛ’n ɔ nin ndɛ nga e kan’n be su kpa. Ɔ fataman kɛ e bu i kɛ ɔ fata kɛ e tɛ ndɛ kwlaa nga be kɛn i lɔ’n be su. Pɔlu seli Timote kɛ ɔ niɛn i wun su ‘be nga be kan sran’m be wun ndɛ be sin’n, nin be nga ndɛ ng’ɔ timan be ndɛ’n be fa be nuan wla nun’n’ be lika. (1 Tim. 5:13) Kɛ e nin sran mun é kókó yalɛ ɛntɛnɛti su’n, sɛ e nanti ndɛ sɔ’n su’n i sɔ’n ti ngwlɛlɛ ayeliɛ.

Ɔ fataman kɛ e kan aniaan uflɛ i wun ndɛ e sin annzɛ sɛ aniaan wie kɛnnin i ndɛ wie kleli e nvialiɛ nun’n, ɔ fataman kɛ e kan kle sran. Asa kusu’n, sɛ be su kan aniaan kun i wun ndɛ ɛntɛnɛti su’n, ɔ fataman kɛ e fa e su e sie i bo. (Jue. 15:3; Nya. 20:19) Asa’n, ɔ fataman kɛ e fa e su sie i ndɛ nga sran’m be blɔ i dan’n annzɛ ndɛ nga e siman be ngbɛsungbɛsu kwlaa’n be bo. Kusu ɔ fataman kɛ e kɛn i sɔ ndɛ e kle sran. (Efɛ. 4:25) Anglo kwlaa nun’n, ninnge wie’m be fite jw.org su annzɛ JW televiziɔn nun. Yɛ e kwla lafi ninnge kwlaa sɔ’m be su.

Aniaan wie’m be sin ɛntɛnɛti lika be di aata annzɛ be to like annzɛ be kan ninnge nga be kunndɛ kɛ bé yó be atɛ’n be ndɛ. Asa kusu’n be kan junman ndɛ. Sanngɛ ɔ fataman kɛ e fa ninnge sɔ mun e sanngan Zoova i ninnge liɛ’m be nun. Sɛ aniaan kun kunndɛman kɛ ‘ɔ́ yó sika klofuɛ’n,’ ɔ fataman kɛ ɔ fa aniaan mun kunndɛ sika.—Ebr. 13:5.

?E kwla sin ɛntɛnɛti lika e srɛ sika man aniaan nga be sa w’a mian annzɛ sanvuɛsa w’a ɲan be’n? E klo e niaan mun yɛ be ndɛ lo e. Ɔ maan kɛ sa o be su’n, e kunndɛ kɛ é úka be yɛ é wlá be fanngan. (Zak. 2:15, 16) Sanngɛ sɛ e kɔ ɛntɛnɛti su e ko srɛ sika kɛ é fá úka aniaan mun’n, be ukalɛ’n yó kekle mán Betɛli’n nin asɔnun’n nunfuɛ mun. (1 Tim. 5:3, 4, 9, 10, 16) E nun wie fi kunndɛman kɛ aniaan’m be bu i kɛ be kpali e kɛ e nian be lika.

E kwlakwla e kunndɛ kɛ é yó naan Ɲanmiɛn ɲan ɲrun. (1 Kor. 10:31) Ɔ maan sɛ e waan é fá ɛntɛnɛti é yó like wie’n, ɔ fata kɛ e bu sa nga be kwla ju’n be akunndan yɛ e nian e wun su.