Ginagamit kan nagkapirang Kristiyano an modernong teknolohiya para makakomunikar an mga kapamilya saka mga kapwa ninda Saksi. Siyempre, isasaisip nin maygurang na Kristiyano an sadol na ini: “An tawong alisto an isip nahihiling an peligro asin minatago, pero an daing eksperyensiya minadiretso sana asin sinasapar an mga konsekwensiya.”—Tal. 27:12, NWT.

Aram ta na gusto kitang protektaran ni Jehova. Kaya, dai kita nakikiasosyar sa mga nagkakawsa nin pagkabaranga, sa mga tiwalag, o sa mga nagpapalakop nin salang mga katukduan. (Roma 16:17; 1 Cor. 5:11; 2 Juan 10, 11) May mga nakaasosyar sa kongregasyon na tibaad dai minagawi sa kagalang-galang na paagi. (2 Tim. 2:20, 21) Isinasaisip ta iyan pag nakikipag-amigo kita. Puwedeng magin masakit magpili nin marahay na mga amigo paagi sa mga messaging application.

Lalo nang dapat na magin mapamili kita sa mga pag-iriba pag nasa darakulang messaging group. May mga Kristiyano na nagbarali sa darakulang group, asin maraot an nagin resulta kaiyan. Paano makakapag-ingat an sarong Kristiyano kun kabali siya sa sarong group na may ginatos o ribo-ribong miyembro? Imposibleng maaraman an tunay na pagkatawo saka espirituwalidad kan gabos sa group. Sinasabi kan Salmo 26:4: “Dai ako nakikiiba-iba sa mga tawong madaya, asin linilikayan ko idtong mga itinatago kun ano talaga sinda.” (NWT) Bako daw na ipinaparisa kaiyan na mas marahay kun magamit kita nin messaging application para kontakon idto sanang mga personal tang kabisto?

Dawa sa saradit na mga messaging group, kaipuhan na pag-isipan nin sarong Kristiyano kun gurano kadakul na panahon an itinatao niya saka kun ano an mga pinag-uulayan kan mga tawo sa group. Dai man kita obligado na mag-reply ano man an pinag-uulayan ninda o gurano na man sinda kahaloy na nag-uulay manungod diyan. Pinatanidan ni Pablo si Timoteo manungod sa mga indibidwal na magigin “mga tsismosa asin mga parapakilabot sa buhay nin ibang tawo.” (1 Tim. 5:13) Puwede man mangyari iyan ngunyan paagi sa mga electronic messaging application.

An sarong maygurang na Kristiyano dai matao nin mapagkritika o kumpidensiyal na mga impormasyon manungod sa mga kapagtubod asin dai man siya makikipag-ulay manungod sa mga bagay na iyan. (Sal. 15:3; Tal. 20:19) Dai man siya ma-forward o mapasa nin ano man na eksaheradong mga istorya o nin mga impormasyon na dai pa napatunayan na totoo. (Efe. 4:25) Dakul na espirituwal na kakanon asin mapagtitiwalaan na update an itinatao sato paagi sa jw.org website asin sa bulanan na mga programa sa JW Broadcasting^®.

May mga Saksi na ginagamit an electronic messaging tanganing magpabakal, magbakal, asin mag-advertise nin mga produkto o mag-alok nin trabaho. An mga aktibidad na iyan pangnegosyo, bakong teokratiko. An mga Kristiyano na gustong “dai mahilingan nin pagkamuot sa kuwarta” lilikayan an ano man na sugot na gamiton an mga tugang sa katuyuhan na makaganar nin kuwarta.—Heb. 13:5.

Paano man an paggamit nin mga messaging application para maghagad nin pondo para tabangan an mga kapagtubod na nangangaipo o para sa pag-ayuda? Parati kitang nagpapahiling nin pagkamuot asin pagmakulog paagi sa pagtabang asin pagpakusog sa lambang saro. (Sant. 2:15, 16) Pero kun gigibuhon ta palan iyan paagi sa darakulang messaging group, tibaad makaulang pa ngani iyan sa mas marahay na mga areglo na ginigibo kan lokal na sangang opisina o kan kongregasyon. (1 Tim. 5:3, 4, 9, 10, 16) Asin siguradong habo ta man na paluwason na may espesyal na asignasyon kita sa pag-ataman sa mga karnero nin Diyos.

Gusto tang gibuhon kun ano an makakatao nin kamurawayan sa Diyos. (1 Cor. 10:31) Kaya pag nagdedesisyon kun baga magamit nin sarong messaging application o iba pang teknolohiya, pag-isipan an posibleng mga peligro, asin mag-ingat.