Abena Kristu bamo balabomfya amaprogramu ya kutumishanishishanyapo amameseji ukubomfya Intaneti pa kuti balelanshanya na balupwa lwabo e lyo na ba bwananyina. Na lyo line, Umwina Kristu umukalamba mu fya kwa Lesa alebukisha uku kufunda kwaba mu Baibolo ukutila: “Uwacenjela nga amona ububi alabelama; imbula mano shena shapitapo no kukandwa.”—Amapi. 27:12.

Twalishiba ukuti Yehova alafwaya ukutucingilila. E co tatwampana na baleta amalekano, abatamfiwa, nelyo abatungilila ifisambilisho fya bufi. (Rom. 16:17; 1 Kor. 5:11; 2 Yoh. 10, 11) Nalimo bamo ababa mu cilonganino teti balekonka amafunde ya mu Baibolo. (2 Tim. 2:20, 21) Ilyo tulepanga ifibusa tulatontonkanya pali ifi twalandapo. Nomba kuti catukosela ukusala bwino ifibusa nga ca kuti tulanshanya fye nabo ukubomfya amaprogramu ya kutumishanishishanyapo amameseji.

Taca-anguka ukusala ifibusa ifisuma, maka maka nga mwaba mwi bumba ilikalamba ilya kutumishanishishanyapo amameseji. Abena Kristu bamo bali-ilunda ku mabumba ayakalamba, lelo ifyafumamo tafyawama. Bushe munyinefwe nelyo nkashi kuti aicingilila shani pa kuti ela-ampana pamo na babipa nga ca kuti ali mwi bumba umuli abantu abengi nga nshi? Kwena te kuti twishibe bwino abantu abali muli ili ibumba kabili te kuti twishibe na bumupashi bwabo. Baibolo pa Amalumbo 26:4 itila: “Nshaikala pamo na ba bufi; kabili nshendela pamo na ba bumbimunda.” Ici cilanga fye ukutila kuti cawama sana nga ca kuti tuletumishanya fye amameseji na abantu abo twaishiba bwino.

Nangu ca kuti ibumba lya kutumishanishishanyapo amameseji linono, Umwina Kristu alingile ukubika amano ku nshita alebomfya ukutumishanya amameseji pali ili ibumba e lyo na ku fyo aba muli ili ibumba balelandapo. Tatufwile ukulamona kwati tulingile fye ukulabwesha amameseji yonse ayo aba mwi bumba baletuma te mulandu ne fyo balelandapo nelyo inshita tulepoosapo. Paulo alisokele Timote pa bantu ‘aba mulomo kabili abaibika mu milandu ya bantu bambi.’ (1 Tim. 5:13) Muno nshiku calyanguka sana ukucita umulomo no kuibika mu milandu ya bantu bambi ilyo tuletumishanya amameseji.

Umwina Kristu umukalamba mu fya kwa Lesa te kuti akutike nelyo ukulanda ifyabipa pa bantu bambi, kabili te kuti alande ifyebo fya nkama ifikumine Abena Kristu banankwe. (Amalu. 15:3; Amapi. 20:19) Na kabili, te kuti alekukumya nelyo ukulanda pa fyebo ifyo ashishininkishe. (Efes. 4:25) Tulapokelela ifya kulya fya ku mupashi ifisuma e lyo na malipoti aya cine pa webusaiti yesu iya jw.org, e lyo na mu maprogramu ya cila mweshi aya JW Broadcasting^®.

Ba Nte bamo balabomfya amaprogramu ya kutumishanishishanyapo amameseji pa kushitisha fimo, pa kushita fimo, na pa kusabankanya amakwebo nelyo pa kufwaya aba ncito. Ifi fyonse twalandapo kucita amakwebo, te milimo ya Bufumu. Abena Kristu ‘abashatemwa indalama’ tabafwaya ukubomfya bamunyinabo pa kuti fye bapange indalama.—Heb. 13:5.

Nomba bushe tulingile ukulabomfya amaprogramu ya kutumishanishishanyapo amameseji pa kuti tulelomba indalama sha kwafwilisha aba bwananyina abali mu kukabila nelyo abaponenwe na masanso ayakalamba? Twalitemwa aba bwananyina kabili twalibabikako amano. Na kabili tulafwaya ukulabafwa mu fyo balekabila no kulabakoselesha. (Yako. 2:15, 16) Lelo nga tule-esha ukucita ifi ukubomfya amabumba ayakalamba aya kutumishanishishanyapo amameseji, kuti cafulunganya imitantikile iisuma iyo iofeshi lya musambo lyabikako nelyo iyo baeluda ba pa cilonganino babikako. (1 Tim. 5:3, 4, 9, 10, 16) Kabili ukwabula no kutwishika, tapali nangu umo pali ifwe uwingafwaya abantu balamona kwati Yehova alimupeela umulimo uwaibela uwa kusakamana aba bwananyina.

Tulafwaya sana ukucita ifingacindika Lesa. (1 Kor. 10:31) Kanshi nga mulesalapo nampo nga mulingile ukubomfya programu ya kutumishanishishanyapo amameseji nelyo inshila imbi, mufwile ukutontonkanya pa mafya ayengabamo, kabili muleba abacenjela.