Bahat do hita na manggunahon HP atap pe tablet laho manghubungi ampa mangirim SMS hubani kaluarga pakon sanina botou. Tapi sanggah manggunahon ai maningon idingat hita ma podah on, “Halak na pantas mangidah parmaraan, jadi marponop ma ia, tapi halak na oto itoruskon do langkahni, gabe manaron.”​—Pod. 27:12.

Sihol do Jahowa manlinggomi hita. Halani ai ulang ma hita marsaor pakon halak na mambahen parsalisihan, halak na ipecat, pakon halak na mamboan ajaran na lang domu pakon isi ni Bibel. (Rom 16:17; 1 Kor. 5:11; 2 Joh. 10, 11) Ra do i kuria dong halak na marparlahou na lang dear. Tontu lang ra hita marsaor pakon halak sisonai. (2 Tim. 2:20, 21) Tapi, ra do lang urah mamilih hasoman na dear marhitei media sosial.

Dong piga-piga hasomanta na mangkatahon sambor do ujungni halani dihut sidea bani grup media sosial na bahat tumang anggotani. Ra do bani sada grup dong marratus atap pe marribu anggotani. Halani ai maningon jaga ma hita anggo adong na mangarahkon hita dihut bani grup na sisonai. Mase? Halani lang mungkin ibotoh hita sonaha parlahou ni sidea ampa sonaha parhasomananni pakon Jahowa. Halani ai, dear do anggo irimangi hita podah na isurat bani Psalmen 26:4 na mangkatahon, “Seng ongga hundul ahu pakon siparladung, anjaha seng marsaor ahu pakon sipakulah-kulah.” Hunjon tangkas ma dearan do hita mangirim pesan pitah hubani halak na itanda hita.

Gari bani grup na otik halakni pe maningon jaga do homa hita. Maningon ipareksa hita do sadiha bahat bois panorangta laho mambasa atap pe mangirim pesan i grup ai. Ulang ma iahap hita maningon ibalas hita ganup pesan na dong ijai. Hinan ipasingat apostel Paulus do si Timoteus ase jaga ia bani halak na ‘hertep ampa halak na mangalop manaruhkon hata’. (1 Tim. 5:13) Sonari pe maningon sonai do homa na ibahen hita sanggah manggunahon pesan elektronik.

Tontu anggo halak Kristen, lang ra ia pabajan-bajankon halak na legan, atap pe manangar halak na margosip. Anjaha lang ra homa hita patugahkon rahasia ni halak hubani na legan, atap mansampuri na lang urusanta. (Ps. 15:3; Pod. 20:19) Lang ra homa hita pararatkon barita na lang ibotoh hita hasintonganni. (Ep. 4:25) Bahat tumang do hatorangan na ibuat humbani Bibel na boi itonggor hita i jw.org ampa i JW Broadcasting^®. Janah sintong do ganup isini ai.

Dong piga-piga sanina botou na manggunahon media sosial laho marjualan, marbalanja, manawarhon barang sijualonni, ampa na leganni. Bisnis do ganupan ai, anjaha lang dong kaitanni pakon pangidangionta. Halak Kristen na lang “mata duiton” tontu lang ra mambuat untung humbani sanina botou.​—Heb. 13:5.

Tapi, ai boi do hita manggunahon media sosial laho mangindo sumbangan laho mangurupi sanina botou na mamorluhon atap pe na hona bencana alam? Halani holong bani sanina botou sihol do uhurta mangurupi janah patoguhkon sidea. (Jak. 2:15, 16) Tapi sasintongni, domma ibahen kantor cabang atap kuria pangaturan laho mangurupi sanina botou na sisonai. Jadi anggo igunahon hita homa media sosial laho mangurupi sanina botou, holi gabe geor ma ujungni. (1 Tim. 5:3, 4, 9, 10, 16) Tontu lang ra hita pajuntul-juntulhon diri, mambahen sanina botou marpingkir hita do na ipilih kuria laho mangurus haporluan ni sidea.

Sihol do uhurta mangkorjahon aha pe na pasangapkon Naibata. (1 Kor. 10:31) Halani ai, maningon jaga ma hita sanggah manggunahon pesan elektronik atap pe media sosial. Pingkirhon ma aha do bahayani ampa pengaruhni ai hubani halak na legan.