Yúsutiña hádangiñe kristiánugu teknolohía lun gayara lan hayanuhan o habürühan houn haduheñu o houn amu gefentiña. Lau sun lira, gabaroun hamuti kristiánugu ha derebuguhaña lidan hafiñen adundehani le: “Ha buídubaña ichügü, harihini denchaü aba hegeyedun luéi, ánhaña ha mabuidunbaña ichügü, ñǘdüntiña habaruaguóun aba hasufuriruni damichi” (Ari. 27:12).

Subudi wamuti busén lan Heowá lóunigiruniwa. Ligía mamadagua wabéi hama gürigia ha afanreinraguagüdübaña gürigia, ha bugawaañabaña, o ha arufudahabaña katei mama inarüniti (Rom. 16:17; 1 Ko. 5:11; 2 Huan 10, 11). Másiñati añahein lan ha adamuridagubaña wamá ha maganbadibaña lun gumadi le tídanbei Bíbülia (2 Tim. 2:20, 21). Lunti gabaroun wamani katei le dan le wadügün umadagu. Gama lumoun másiñati hénrengubei lan lun wadügüni katei le dan le wabürühan luéigiñe gágamuru.

Lúntima duari wamá dan le lídanñadiwa lan aban sétanu wéiriti le hani umadagu lidan gágamuru. Añahein amu íbirigu ha lídanbaña sétanu burí le ani wuribati lidin houn. Ida luba duari wamá dan le añahein lan saragu san o saragu milu gürigia lidan aban sétanu? Siñabei lasubudiruniwa kátañanu lan ani ida liña lan hamadagu sun hagía luma Heowá. Ariñagati Sálumu 26:4: “Maganóuntina lidan aban hama yéetiña, móundaragun nuguya hama biangua tigibu”. Ligíati warufuduña lichú aau anhein hámarügü lubéi gürigia ha wasubudirubaña wabürühan luéigiñe gágamuru.

Íbini sétanu le burí ñǘraüti, lunti duari wamá luéi wásügürün saragu dan abürüha luéigiñe gágamuru ani lunti giñe duari wamá luéi le uágubei layanuhóua ñein. Mama mosu wasaminarun mosu lan wóunabun lun sun le abürühóubei meberesenga ka lan uagu layanuhóua o íbini ánhaña asigira gürigia abürüha luagu saragu oura. Wéridi lumuti Pábulu Timotéu hawéi gürigia ha ‘marasualugubaña ani, ádaha hamuti hayuma lidoun sun katei’ (1 Tim. 5:13). Gayaraati giñe lasuseredun lira uguñe weyu lidan Internet.

Mádaraguntiña kristiánugu ha derebuguti hafiñen houngua lidoun yanu le ñein lubéi layanuhóua wuriba hawagu amu gefentiña ni lidan le ñein lubéi layanuhóua luagu katei le moun lumuti lasubudiruniwa (Sal. 15:3; Ari. 20:19). Maweiyasuntiña aganbaha o aburuchaguagüda ñunsu le wéirigüda tumutu hanigi gürigia ani machourunti (Efe. 4:25). Ibihatiwa ariñahani tídangiñeti Bíbülia luma burí ñunsu le gayaraati lafiñerúniwa luagu, lidan wani páhina lidan Internet jw.org luma lídangiñe programa le burí áfuridubei sagü hati lidan JW Broadcasting^®.

Añahein gefentiña ha burí abürühabaña luéigiñe gágamuru lun haluguraha somu katei, lun hagañeihan, o lun lasubudiruniwa luáguti aban katei le busén habéi halugurahan o lun giñe lasubudiruniwa megei hamá ayabuhatiña. Lánina burí bísinisi katei le, ani maniti ni kata luma wáhuduragun lun Heowá. Kristiánugu ha busenbaña hawinwandun aban ibagari sin híchuguni “hínsiñehabu luagun seinsu”, mayusurun hamutiña hábirigu lun háfaagun lun hagañeirun seinsu hádangiñe (Ebü. 13:5).

Lunti burí san wabürühan luéigiñe gágamuru lun wamuriahan seinsu houn wábirigu ha emegeirubalin ladüga lasuseredun somu liñawan dan? Ladüga hínsiñe hamá wábirigu woun, anihein dan busentiwa wíchugun gurasu houn luma lun wíderaguniña (Sant. 2:15, 16). Gama lumoun, ánhawa áfaagua lun wadügüni lira lau wabürühan luéigiñe gágamuru lidan aban sétanu wéiriti, másiñati weberesehabei lan tuadigimari lóundarun Heowá lun tíderaguniña íbirigu ha (1 Tim. 5:3, 4, 9, 10, 16). Ani chóuruti mabusenrunbei lan hamuga ni aban kristiánu lun larihín kamá hamuga lun lichugúa dasi le lun lóunigiruniña íbirigu ha.

Busentiwa líchugun sun le wadügübei uéiriguni lun Bungiu (1 Ko. 10:31). Ligíati, dan le wanúadirun lun wabürühan luéigiñe gágamuru o wayusurun furumiñeguarügü amu teknolohía, samina wamá luagu denchaü le gayaraabei lasuseredun ani duari wamá.