Ye kʼo jojun cristianos nkiksaj ri aplicaciones riʼ rchë yetzjon kikʼë ki-familiares o kikʼë nkʼaj chik Testigos. Ye kʼa taq nkiʼän riʼ, ri qachʼalal ri kʼuqül kikʼuʼx pa ruchʼaʼäl Dios nkismajij re naʼoj reʼ: «Ri winäq ri kʼo runaʼoj nutzʼët apü ri kʼayewal y nrewaj riʼ chwäch, ye kʼa ri majun ta kinaʼoj yebʼä apü y nkibʼewlaʼ ri kʼayewal» (Prov. 27:12).

Qataman chë Jehová nrajoʼ nqrchajij. Rma riʼ, röj ma nqayüj ta qiʼ kikʼë winäq ri xa yekijäch ri nkʼaj chik, ri yeʼelesan qa chpan ri congregación o kʼo naʼoj kikʼë ri ma ye ütz ta (Rom. 16:17; 1 Cor. 5:11; 2 Juan 10, 11). Rkʼë jbʼaʼ jojun ri nkimöl kiʼ rkʼë ri congregación ma nkismajij ta ri naʼoj ye kʼo chpan le Biblia (2 Tim. 2:20, 21). Taq kan nqatzʼët apü jun winäq, kʼo mul ma kan ta kʼayewal nuʼän chqawäch nqatzʼët we ütz o ma ütz ta ntok qachiʼil, ye kʼa chkipan ri aplicaciones ri yekitäq mensajes kan kʼayewal naʼän riʼ.

We nqajoʼ nqjeʼ chpan jun grupo ri akuchï kan ye kʼïy winäq yekitaqalaʼ mensajes chkiwäch, naʼäy tqakʼutuj qa chqawäch achkë komä chë winäq ye kʼo chpan ri grupo riʼ. Ye kʼo jojun qachʼalal ri ye oknäq chkipan grupos achiʼel riʼ, kʼo ma ütz ta kiqʼaxan. Tqaquʼ rij reʼ, ¿xtqkowin komä xtqachajij qiʼ we kan pa ciento o pa mil winäq ye kʼo chpan jun grupo? Rkʼë jbʼaʼ manä. ¿Achkë rma? Rma ma xtqkowin ta xtqatzʼët achkë winäq qäs najin yeqachbʼilaj chqä achkë rubʼanon kachbʼilanïk rkʼë Jehová. Salmo 26:4 nuʼij: «Ma nyüj ta wiʼ kikʼë ri winäq ri yeqʼolon chqä ma yenwachbʼilaj ta ri xa kaʼiʼ kipaläj». Kantzij na wä chë ri más ütz nqaʼän ya riʼ nqtzjon kikʼë winäq ri kan qataman kiwäch.

Yajün taq ma ye kʼïy ta winäq ye kʼo chpan jun grupo, nkʼatzin nqatzʼët jaruʼ tiempo najin nqaksaj chkitaqik ri mensajes chqä achkë nqatzjoj kikʼë. Xa bʼa achoq chrij na kʼa najin yetzjon wä o xa bʼa jaruʼ na kʼa nyalöj nkitaqalaʼ mensajes chkiwäch, röj kʼo ta chë ma nqanaʼ ta chë kan nkʼatzin nqaʼän äl contestar jontir mensajes yetaq pä chqë. Pablo xuʼij che rä Timoteo chë tchajij riʼ chkiwäch ri winäq ri nqä chkiwäch nkiʼän mololen taq tzij chqä ri nkitïtzʼ kiʼ chkipan ri kikʼaslemal ri nkʼaj chik (1 Tim. 5:13). Komä chqä, rkʼë jbʼaʼ nbʼanatäj riʼ chpan Internet.

Ri cristianos ri kʼuqül kikʼuʼx pa ruchʼaʼäl Dios ma xkejeʼ ta chpan tzij ri xa itzel yetzjon chkij ri nkʼaj chik o tzij ri nkesaj rutzjol jun ri kʼo ta chë ma ta ntel rutzjol (Sal. 15:3; Prov. 20:19). Ryeʼ chqä ma nkesaj ta rutzjol y ma nkiyaʼ ta kixkïn che rä jun rutzjol ri kan nqʼax ruwiʼ nkiʼij ri winäq chrij, o jun rutzjol ri ma bʼin ta chë kantzij xbʼanatäj (Efes. 4:25). Chpan ri sitio pa Internet jw.org chqä ri Broadcasting ri nyaʼöx pä ronojel ikʼ, röj nyaʼöx pä qatoʼik ri nqrtoʼ rchë más junan nuʼän qawäch rkʼë Jehová chqä nyaʼöx pä jojun rutzjol ri kan ütz nakʼuqbʼaʼ akʼuʼx chkij.

Ye kʼo jojun Testigos yekiksaj ri aplicaciones ri yeqatzjon pä rchë nkilöqʼ, nkikʼayij chqä nkitzüj kikʼayij, o rchë nkitzüj kisamaj ri nkʼaj chik. Ye kʼa ma tqamestaj ta chë ma ütz ta nqaxöl ri kʼayij rkʼë ri rubʼanik nqayaʼ ruqʼij Dios. Ri cristianos ri ma nkajoʼ ta chë xa chrij ri päq nbʼä wä kan, nkitäj kiqʼij rchë ma yebʼeyomär ta chkij ri qachʼalal pa congregación (Heb. 13:5).

¿Y ütz komä yeqaksaj ri aplicaciones riʼ rchë nqakʼutuj päq rma nqajoʼ nqatoʼ jun qachʼalal ri nkʼatzin rutoʼik o taq kʼo jun kʼayewal nbʼanatäj? Rma kowan yeqajoʼ ri qachʼalal, nqakanuj rubʼanik rchë nqakʼuqbʼaʼ kikʼuʼx chqä rchë yeqatoʼ taq nkʼatzin kitoʼik (Sant. 2:15, 16). Ye kʼa, we xa nqaʼän riʼ rkʼë jun mensaje ri nqatäq chkë ye kʼïy winäq, rkʼë jbʼaʼ xa xtqaqʼät ri samaj najin nuʼän ri sucursal o ri ukʼwäy taq bʼey pa congregación rchë yekitoʼ ri qachʼalal riʼ. Tqayaʼ chwäch qan chë ri samaj ri nkiʼän ryeʼ kan más na ütz (1 Tim. 5:3, 4, 9, 10, 16). Y majun ta jun chqë röj nrajoʼ nukʼüt chë achiʼel ta Jehová kan xa xuʼ pa qaqʼaʼ röj ruyaʼon wä qa rchë yeqachajij ri qachʼalal.

Röj nqajoʼ chë nyaʼöx ruqʼij Dios rkʼë jontir ri nqaʼän (1 Cor. 10:31). Rma riʼ, taq kʼo chë nqachaʼ we nqaksaj ri aplicaciones ri yekitäq mensajes o xa bʼa achkë na chik jun tecnología, tqaquʼ rij achkë kʼayewal rkʼë jbʼaʼ nukʼäm pä chqij, ke riʼ kan ütz ruksaxik xtqaʼän che rä.