El cuanto Cristiano ta usa con el moderno tecnologia para comunica con el diila familia y con el maga hermano y hermana. Pero, el un mature Cristiano necesita acorda con este consejo: “El un sabio ta puede mira con el peligro y ta esconde, pero el nuay experiencia ta continua y hay sufri na mal resulta.”​—Prov. 27:12.

Sabe kita que quierre si Jehova que protege kanaton. Poreso, gendeh kita ta asocia con aquellos quien ta causa division, maga disfellow o quien ta lleva maga gendeh justo idea. (Roma 16:17; 1 Cor. 5:11; 2 Juan 10, 11) El cuanto quien ta asocia na congregacion posible gendeh ta obedece con el maga ley na Biblia. (2 Tim. 2:20, 21) Pirmi kita acorda con este si ta iscuji kita maga amigo. Posible, gendeh facil que iscuji maga buen amigo por medio na un messaging app.

Debe kita iscuji si con quien asocia especialmente si tan message kita na grande grupo de maga gente. El cuanto del maga Cristiano quien yan join na maga grande grupo, ya tiene negativo resulta. Paquemodo el un hermano o hermana tiene cuidao si el un grupo tiene cien o miles de maga miembro? Imposible sabe si quien gayot sila y el espiritualidad del todo aquellos na ese grupo. El Salmo 26:4 ta habla: “Gendeh yo tan junto con el maga gente engañador y ta evita yo con aquellos quien ta esconde si quien sila.” Gendeh ba ta anima este contigo que usa con el messaging app para comunica con aquellos con quien lang tu conoce?

Maskin na un diutay grupo, el un Cristiano necesita pensa si paquemodo de grande tiempo le ta usa y si cosa ta discuti na ese grupo. Gendeh kita debe pensa que necesita kita man reply na diila maga mensaje, maskin cosa pa sila ta discuti o si paquemodo de tarda sila tan chat. Ya dale aviso si Pablo con Timoteo acerca na maga individual quien maga “chismosa y metedora.” (1 Tim. 5:13) Ahora, posible tambien se hace maskin por medio na gadget.

Nuay mature Cristiano el quien habla o oi maga negativo comento o confidencial informacion acerca na maga hermano y hermana. (Sal. 15:3; Prov. 20:19) Y evita tambien le maga por demas o gendeh confirmao istoria. (Ef. 4:25) Por medio na diaton website, el jw.org y el programa na JW Broadcasting^® cada mes, ta ricibi kita bastante espiritual comida y maga update que puede kita confia.

El cuanto del maga Witness ta usa con el messaging app para vende, cumpra y introduci con el diila producto o ofrece trabajo. Ese maga cosas necesita queda separtao na diaton adoranza. El maga Cristiano quien ‘no quierre pone el diila pensamiento na sen’ ta resisti con el tentacion que usa con el diila hermano na comercio.​—Heb. 13:5, El Nuevo Testamento.

Quetal si acerca na usada de messaging app para man solicit sen para na maga hermano quien ta necesita o para na disaster relief? Pirmi kita ta dale mira amable interes para ayuda y anima con uno y otro. (Sant. 2:15, 16) Pero si hace kita con ese por medio de un grande grupo, posible se sangga con el arreglamiento que ya hace el local branch office o el congregacion. (1 Tim. 5:3, 4, 9, 10, 16) Y asigurao, nuay ni uno kanaton el quien quierre dale mira que tiene kita especial privilegio para cuida con el maga carnero del Dios.

Quierre kita hace maga cosas que hay lleva gloria con Dios. (1 Cor. 10:31) Poreso si decidi usa con el un messaging app o otro tecnologia, considera con el posible peligro y tiene cuidao.