Ang pipila ka Kristohanon naggamit sa modernong teknolohiya aron makakomunikar sa ilang pamilya ug sa ubang mga Saksi. Siyempre, hinumdoman sa hamtong nga Kristohanon kining tambaga: “Ang tawong maalamon makakita sa kapeligrohan ug molikay niana, pero ang walay kasinatian moderetso ra ug mag-antos sa resulta.” —Prov. 27:12.

Nahibalo ta nga gusto tang protektahan ni Jehova. Busa, dili ta makig-uban niadtong nagpahinabog pagkabahinbahin, na-disfellowship, o nagpasiugdag sayop nga mga pagtulon-an. (Roma 16:17; 1 Cor. 5:11; 2 Juan 10, 11) Ang pipila nga nakig-uban sa kongregasyon basin wala magsunod sa mga balaod sa Bibliya. (2 Tim. 2:20, 21) Hinumdoman nato ni dihang magpilig mga higala. Pero lisod tingali ang pagpilig maayong mga higala kon himoon lang ni pinaagig messaging app.

Ilabinang importante nga mag-amping ta sa pagpilig mga higala kon daghan ang apil sa usa ka group chat. Ang pipila ka Kristohanon miapil ug dagkong group chat, ug dili maayo ang mga resulta. Maampingan kaha sa usa ka igsoon ang iyang kaugalingon kon moapil siyag group chat nga gatosan o libolibo ang membro? Imposibleng mahibaloan kon kinsa gyod silang tanan ug kon unsay ilang espirituwal nga kahimtang. Ang Salmo 26:4 nag-ingon: “Wala ko makig-uban sa mga malimbongon, ug gilikayan nako kadtong mga nagpakaaron-ingnon.” Nagpakita ni nga mas maayo gyod nga gamiton nato ang messaging app sa pagkontak niadto lang personal natong nailhan.

Bisan sa group chat nga gamay rag membro, ang usa ka Kristohanon kinahanglang mag-amping sa panahon nga iyang gigugol niini ug kon unsay ginaestoryahan sa grupo. Dili nato angayng bation nga obligado tang mo-reply sa ilang mga mensahe bisag unsa pa kana o unsa ka dugay silang nag-estorya bahin ana. Gipasidan-an ni Pablo si Timoteo bahin niadtong “mga tabian . . . ug hilabtanon sa kalihokan sa ubang tawo.” (1 Tim. 5:13) Karon, puwede pod nang himoon diha sa mga messaging app.

Ang hamtong nga Kristohanon dili mosulti o maminaw ug dili maayong komento o kompidensiyal nga impormasyon bahin sa ubang igsoon. (Sal. 15:3; Prov. 20:19) Ug likayan niya ang hinobra o dili kompirmadong mga impormasyon. (Efe. 4:25) Daghan tag makuha nga maayo, kasaligan, ug binase sa Bibliya nga mga impormasyon ug report diha sa atong website nga jw.org ug sa atong binulang mga programa sa JW Broadcasting^®.

Ang pipila ka Saksi naggamit ug mga messaging app sa pagbaligya, pagpalit, ug pag-advertise ug mga produkto o pagtanyag ug trabaho. Kana maoy mga kalihokan sa komersiyo ug walay koneksiyon sa pagsimba kang Jehova. Ang mga Kristohanon nga naningkamot nga ‘dili higugmaon ang kuwarta’ maglikay gyod nga pahimuslan ang panag-igsoonay aron makakuwarta.—Heb. 13:5.

Puwede ba natong gamiton ang mga messaging app aron mangayog hinabang para sa mga igsoon nga nanginahanglan o naapektohan sa mga katalagman? Sagad, ginapakita nato ang atong gugma pinaagi sa pagtabang ug pagdasig sa usag usa. (Sant. 2:15, 16) Pero ang paghimo niana pinaagig dagkong group chat basin makabalda hinuon sa mas maayong mga kahikayan nga gihimo sa lokal nga sangang buhatan o kongregasyon. (1 Tim. 5:3, 4, 9, 10, 16) Ug seguradong dili nato gusto nga maghunahuna ang uban nga duna tay espesyal nga asaynment sa pag-atiman sa atong mga igsoon.

Gusto natong himoon kon unsay makahatag ug himaya sa Diyos. (1 Cor. 10:31) Busa sa pagdesisyon kon mogamit ba kag messaging app o ubang teknolohiya, konsideraha ang posibleng mga kapeligrohan, ug pag-amping.