Abakristo abamwe nibakoresa ebyoma by’obwenge kugira ngu bagume bari kuganira n’abanyabuzare babo n’Abakristo bagenzi babo. Konka Omukristo okuzire omu by’omwika naguma ari kwijuka obuhabuzi oburi kugira ngu: ‘Omwerinzi ku areba akabi kija, ayeshereka; konka otine bwenge akegema, kamwita.’—Enf 27:12.

Nikitushemeza kumanya ku Yehova ari kwenda kuturinda, konka tituri kwekwatanisa n’abari kututanisa, ababingirwe omu kibina n’abari kwetanisa aha nyegesa z’amazima. (Rom 16:17; 1 Kor 5:11; 2 Yoh 10, 11) Abamwe abari kwekwatanisa n’ekibina noshanga batine emitwarize mirungi. (2 Tim 2:20, 21) Eco tushemerire kuguma turi kukijuka twaba turi kutorana abanywani. Okutorana abanywani barungi nikibasa kuguma twaba turi kukoresa embuga z’okuganiriraho.

Tushemerire kwegendesereza munonga twaba turi omu mitwe y’aha mbuga z’okuganiriraho erimu abantu bingi. Abakristo abingi bakaza omuri eyo mitwe erimu abantu bingi, habarugiramu akabi kahango. Ni bata oku mwenetata ninga omunyanyazi ari kubasa kwegendesereza munonga, eyo mitwe yaba erimu abantu abari kurenga omuri igana ninga omuri rukumi? Tikiri kubasika kumanya ebiri kukwata ahari abo bantu bona n’oku bemerire omu by’omwika. Omuri Zaaburi ya 26:4 nihagira hati: ‘Tinshutama n’abantu abatine mugasho, kandi tinkwatanisa na ndyarya.’ Mbehi eco tikiri kwereka ku tushemerire kukoresa embuga z’okuganiriraho turi kuganira n’abantu abu turi kumanyakusha?

N’obu Omukristo yakuba ari omu mutwe gw’aha mbuga ogurimu abantu bace, nabwo ashemerire kushwijuma obwire obu ari kumaraho n’ebi bari kuganiriraho. Titushemerire kutekateka ngu ni ekiragiro kugarukamu buri muntu owayohereza obutumwa, ebi yakuba ari kuhandika byona ninga obwire obu yakuba ari kumaraho bwona. Pawulo akarabura Timoteyo aha bantu ‘abari kubuzya orukuru, baketasya omu bitari byabo.’ (1 Tim 5:13) Omuri obu bwire, corobi kukora ebintu nk’ebyo twaba turi aha mbuga z’okuganiriraho.

Omukristo okuzire omu by’omwika tari kugarukamu ninga shi ngu ahurikize eby’abahakani. (Zab 15:3; Enf 20:19) Nambwenu nayerinda amakuru agari kutinisa kandi agatahikire. (Efe 4:25) Ebyokurya by’omwika n’amakuru agari kwesigwa nitubyiha aha rubuga rwitu rwa jw.org n’omu biganiro bya buri kwezi ebiri kushohora ahari Tivi ya JW.^®

Abakristo abamwe nibakoresa embuga z’okuganiriraho omu kuguza, kugura, kuranga ebintu byabo n’okuha abandi emirimo. Obwo ni obushubuzi; ti entebekanisa z’ekitongore ca Yehova. Abakristo abatari kwenda kugira omutima g’okukunda esente, tibari kukoresa benetata omu kugezaho kuzironda.—Heb 13:5.

Mbwenu shi tushemerire kukoresa embuga z’okuganiriraho omu kushaba abantu esente z’okukwasa abari kwetenga obuyambi nk’abahikirweho ebihikirizi? Nitukunda kwereka ku nitukunda benetata na banyanyazi kandi ku turi kubafaho turi kubagaruramu amani. (Yak 2:15, 16) Konka ku turi kugezaho kubakwasa tukoresize emitwe y’aha mbuga z’okuganiriraho nituba turi kushisha entebekanisa eyi ofisi yitu n’abazehe b’ekibina bari kutuha. (1 Tim 5:3, 4, 9, 10, 16) Kandi mazima twena nituba tutari kwenda ngu abantu batekateke ku twine omurimo g’omutano g’okureberera entama za Ruhanga.

Nitwenda ngu tukore ebintu byona turi kuhimbisa Ruhanga. (1 Kor 10:31) Obwe rero, washaramu kukoresa embuga z’okuganiriraho ninga shi ebyoma by’obwenge, guma otekateke aha kabi akarimu kandi okerinde.