Ekkóch Chón Pwáraatá ra áeá ewe Internet wóón néúr kewe mechá are phone le fós me mak ngeni chón ar famili me chiechier Chón Pwáraatá. Nge emén Chón Kraist mi ásimaw epwe ekieki ei kapasen emmwen: “Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau.”​—SalF. 27:12.

Sia kilisou ren án Jiowa mochen túmúnúkich. Ina popun sise chiechi ngeni chókkewe mi efisi tipefesen, katowu, are chókkewe mi achéwú ekiek ese pwúng. (Rom 16:17; 1 Kor. 5:11; 2 Joh. 10, 11) Eli ekkóch chón ewe mwichefel rese álleasochisi án Paipel kewe allúk. (2 Tim. 2:20, 21) Lupwen sia mochen chiechi ngeni aramas, sipwe chemeni ekkena pwóróus. Nge a tongeni weires ach sipwe filiéchú chiechiach kewe ika sia fós ngeniir wóón ekkewe message app.

A ákkáeúin lamot ach sipwe túmúnú kefilin chiechiach atun sia ekiekin kapachelong lón eú chat group mi chómmóng chón lón. Ekkóch Chón Kraist ra fen chóni eú watteen chat group nge a wor efeiengawan mwirin. Ifa usun emén Chón Kraist epwe túmúnúéch ika a chóni eú chat group mi wor fitepúkú are fitengeréú lón? Epwe weires ngeniir ar repwe wesewesen silei meinisin chón lón ena group, are ika iir mi péchékkúl lón pekin ngún. Kölfel 26:4 a apasa: “Üsap nom ren aramas mi chofana, üsap pwal chiechi ngeni chon likatuputup.” Ena wokisin a pwári tipachemen ach sipwe chék chat ngeni chókkewe sia sissileer.

Inaamwo ika a chék chókúkkún chón lón eú chat group, nge a lamot án emén Chón Kraist epwe túmúnúéchú úkúkún ewe fansoun a áeá le mak me epwe túmúnú met chókkewe lón ena chat group ra fóffós usun. Esap weween pwe a lamot ach sipwe pélúweni ar mak ese lifilifil met ewe ra makkeei usun are ttamen ewe pwóróusfengen. Paulus a éúréúra Timoty usun chókkewe iir mi “luapas o fosolong lon än eman angang.” (1 Tim. 5:13) A pwal tongeni fis ena lón ei fansoun wóón néúch kewe mechá.

Emén Chón Kraist mi ásimaw esap makkeei are álleani ekkewe mak mi esiita are pwári monomonen chiener kewe chón lúkú. (Kölf. 15:3; SalF. 20:19) Me epwe túmúnú seni ekkewe sókkun pwóróus mi ámáirú me ekkewe repot rese alúkúlúk. (Ef. 4:25) A wor rech ekkewe pwóróus mi múrinné seni Paipel me ekkewe repot mi alúkúlúk wóón ach we website jw.org, me ekkewe prokram mi katowu iteiten maram wóón ewe JW Broadcasting^®.

Ekkóch Chón Pwáraatá ra áeá ekkewe app fán iten message ren ar repwe, amémé, kamé, advertise pisek are kút néúr chón angang. Ekkena sókkun mettóch, iir minen business, me a lamot repwe imu seni ach fel ngeni Jiowa. Ekkewe Chón Kraist rese mochen “manaueni eu manauen mochenian moni,” ra ú ngeni ewe mochen le néúnéú pwiir kewe Chón Kraist ren ar repwe awatteeló néúr moni.​—Ipru 13:5.

Nge ifa usun ren ach áeá ekkewe app fán iten message le fes moni fán iten pwiich kewe mi nóm lón osupwang are fán iten chókkewe mi kkúúr feiengaw watte? Fán chómmóng sia pwári ach tong ren ach álillisfengen me apéchékkúlafengenikich. (Jas. 2:15, 16) Nge ach féri ena esin kókkót lón eú chat group mi chómmóng chón lón, eli epwe osukosuka ekkewe kókkót mi fen múrinné ewe keangen ofesilap are ewe mwichefel ra fen akkóta. (1 Tim. 5:3, 4, 9, 10, 16) Me ese mwáál sise mochen ámmeef ngeni ekkewe ekkóch pwe sia kefil ach sipwe wisen túmúnú pwiich kewe.

Sia mochen féri met epwe elingaaló Kot. (1 Kor. 10:31) Ina popun atun sia filatá ika sipwe áeá ekkewe app fán iten message are minen Internet, ekieki ekkewe feiengaw a tongeni fis, me sipwe túmúnúéch.