Mandumbu anji kakuzachisa tecnologia hanga ahanjike ni asoko ni masepa jo. Alioze, mukwa-Kristu yoze wajama katamba kunyonga ha chiyulo chino: “Chikanyame malangikiza maswama, alioze yizuzuke masenya kulutwe mba maalamba.”—Yishi. 27:12.

Tunanyingika ngwetu, Yehova kanazange kutufunga. Kashika, kutushi kuhanjika ni atu waze akuneha vunda, waze hanasosolola mu chikungulwila ni waze akwalumuna malongeso a mu Mbimbiliya. (Roma 16:17; 1 Kori. 5:11; 2 Yoa. 10, 11) Chikwo nawa, amwe waze akuya ku kukunguluka hanji keshi kwononokena shimbi ja Yehova. (2 Timo. 2:20, 21) Muchihasa kupwa chikalu kusakula kanawa masepa, nyi mutuhanjika no wika kupalikila mu ma aplicativo akutumina mesage.

Kashika twatamba kukanyama, chipi-chipi nyi chizavu chize chinatutumina mesage chili chinene. Mandumbu amwe kalisele mu ponde ha kunjila mu yizavu yacho. Mu chizavu muze muli atu kulakaji hanji kanunu, muchihasa kupwa chikalu kunyingika kanawa chize eswe ali ku ufulielo. Shina mutu yoze uli mu chizavu cha mutapu au kanakanyama? Mbimbiliya ha Samu 26:4 yinambe ngwo: “Chatwamine hamwe ni atu amokomoko; chipwe akwa kalimbalimba chichi kulifutula no.” Chisoneko chino chinasolola ngwo, chili kusolola mana kulitumina wika mesage ni atu waze tunanyingika kanawa.

Chipwe ngwe chizavu chize nunalitumina nacho mesage chili chikehe, mukwa-Kristu katamba kulihula ngwenyi: Ha yuma yika atu waze ali mu chizavu chino anahanjika? Mashimbu angahi nakupalikisa ha kutuma mesage? Mesage jacho mujihasa kuhanjika ha yuma yinji, alioze kuwafupiwile kulivwa ngwe kanakushinjila hanga ukumbulule ha mesage jacho eswe. Paulu katowezele Timoteu hakutwala kuli atu waze a kuyengayenga akwo ni kuhanjika yuma yambala. (1 Timo. 5:13) Ni musono yino muyihasa kulingiwa ha kuzachisa ma aplicativo akutumina mesage.

Mukwa-Kristu wajama katambile kuhanjika chipi hali umwe ndumbu hanji kuhanjika yuma yize keshi ni ulite wa kuyihanjika, chipwe kupanjika yuma yacho. (Samu 15:3; Yishi. 20:19) Iye nawa katambile kuhanjika-hanjika chipwe kulumba sango jize keshi ni shindakenyo ngwo, jili jamwenemwene. (Efwe. 4:25) Tuli ni sango jinji jinakatuka mu Mbimbiliya ha site yetu jw.org, jize mutuhasa kujikijila, hali nawa programa ya JW Broadcasting^® yize yakutuhuka ha hita kakweji.

Mandumbu amwe kakuzachisa ma aplicativo a mesage, hanga ahane milimo hanji kulanjisa yuma kuli mandumbu akwo. Yino yili mingoso, kuyatalile ha uwayilo wetu kuli Yehova. Mukwa-Kristu yoze unazange kwehuka ‘zango lia mbongo,’ keshi kulanjisa mandumbu jenyi yuma hanga azukeko mbongo jinji.—Hepre. 13:5.

Shina chili chipi kuzachisa ma aplicativo a mesage hanga twichile mbongo mandumbu jetu waze anamono lamba, chipwe waze anapalika mu luyinda? Twakuzanga mandumbu jetu, kashika twakuzanga kwakwasa muze anafupiwa ukwaso. (Tia. 2:15, 16) Alioze, kufupa kwakwashila kupalikila mu ma aplicativo a mesage, muchihasa kupinjisa ukwaso uze Mbetele yinahane hanji chikungulwila. (1 Timo. 5:3, 4, 9, 10, 16) Kashika niumwe wa kuli yetu katambile kunyongesa atu ngwe kamwaha chimwe chiteli cha kufunga mandumbu.

Tunazange kulinga yize muyihalisa Yehova. (1 Kori. 10:31) Kashika, shimbu kanda tuzachisa yimwe aplicativo ya mesage hanji mutapu ukwo wa tecnologia, twatamba kukanyama ni kunyonga ha ponde yize muyihasa kwizako.