Serten Kretyen i servi teknolozi pour kominik avek bann manm fanmir ek lezot Kretyen. Byensir, en Kretyen ki matir spirityelman pou gard antet sa konsey ki dir: “Ler maler pe vini, sa enn ki pridan i al kasyet; bann inyoran i tanpi, me zot pey ser.”​—Prov. 27:12.

Nou realize ki Zeova i anvi protez nou. Alor, nou pa frekant bann ki senm divizyon, ki’n ganny ekskli dan kongregasyon ouswa ki promot bann fo lansennyman. (Rom. 16:17; 1 Kor. 5:11; 2 Zan 10, 11) Menm serten ki asosye avek kongregasyon i kapab pa pe obei bann lalwa Bondye ki dan Labib. (2 Tim. 2:20, 21) Alor ou bezwen gard sa antet, ler nou pe swazir zanmi. Me i kapab difisil pour swazir bann bon zanmi ler nou pe servi bann aplikasyon ki anvoy mesaz.

Nou devret fer atansyon lo sa bann aplikasyon sirtou si sa group ki nou ladan i en gran group. Serten Kretyen in bezwen fer fas avek bann move konsekans parski zot in zwenn sa bann kalite group. Me ki mannyer en frer ouswa en ser i kapab fer atansyon si i dan en group ki i annan san oubyen mil dimoun? I pou enposib pour konnen lekel tou sa bann dimoun dan sa group e si zot annan en bon lanmitye avek Zeova. Reflesir lo sa ki Psonm 26:4 (NWT) i dir: “Mon pa frekant bann ki anbet lezot e mon reste lwen avek bann ki kasyet sa ki zot ete.” Sa i montre ki i pli saz pour anvoy mesaz avek zis bann dimoun ki nou konnen.

Menm si en Kretyen i dan en pti group, i bezwen fer atansyon lakantite letan i pase pour anvoy mesaz e lo kwa sa bann dimoun pe koz lo la. Nou pa devret santi ki nou oblize reponn tou mesaz nenport kwa ki zot pe koz lo la ouswa nenport ki kantite letan i pran. Zapot Pol ti averti Timote konsernan bann dimoun ki “koz an bonnavini e mel dan zafer dimoun.” (1 Tim. 5:13) Ozordi, i posib pour fer sa atraver bann aplikasyon elektronik.

En Kretyen ki matir spirityelman pa pou fer ouswa ekout bann komanter ki kritik lezot. I pa pou donn ouswa ekout lenformasyon konfidansyel konsernan en lot Kretyen. (Ps. 15:3; Prov. 20:19) I pa pou repet ouswa ekout okenn lenformasyon ki egzazere ouswa ki napa laprev. (Efe. 4:25) Nou ganny en kantite lenformasyon baze lo Labib ek bann rapor ki nou kapab annan konfyans ladan lo nou sit Enternet, jw.org e dan bann progranm lo Televizyon JW tou le mwan.

Serten Temwen Zeova i servi bann aplikasyon ki anvoy mesaz pour vann, aste e promot bann prodwi ouswa pour ofer bann dimoun en plas travay. Me sa i annan pour fer avek zot biznes e i napa nanryen pour fer avek nou ladorasyon pour Zeova. Alor, bann Kretyen ki “pa kontan larzan,” pa pou zanmen servi bann frer ek ser pour esey fer larzan.​—Ebr. 13:5.

Eski nou devret servi bann aplikasyon ki anvoy mesaz pour demann larzan pour ed bann frer ek ser ki dan bezwen ouswa ki pe soufer akoz en dezas natirel? Nou kontan nou bann frer ek ser e nou ed bann ki bezwen sipor ek lankourazman. (Zak 2:15, 16) Me si nou esey ed zot atraver en aplikasyon ki anvoy mesaz, sa i kapab fer li pli difisil pour Biro Brans Temwen Zeova ouswa bann ansyen ed zot. (1 Tim. 5:3, 4, 9, 10, 16) Byensir, nou pa pou anvi fer dimoun krwar ki nou’n ganny en responsabilite spesyal pour pran swen avek mouton Bondye.

Nou anvi fer sa ki anmenn laglwar pour Bondye. (1 Kor. 10:31) Alor, ler nou pe deside si nou pou servi en aplikasyon ki anvoy mesaz, nou bezwen mazin bann danze ki sa pou annan e nou bezwen fer atansyon.