An xñoptʼañob muʼ bʌ i cʼʌñob jiñi celular o yan tac bʌ chaʼan miʼ pejcañob i familia o yambʌ hermanojob. Pero an jumpʼejl ticʼojel yom bʌ mi lac chʼʌm ti ñuc chaʼan mi laj cʌntan lac bʌ: «Jini cʌntesʌbil bʌ miʼ ñaʼtan chuqui bʌbʌqʼuen miʼ yujtel. Miʼ chajpan i bʌ. Jini tonto bʌ maʼanic miʼ yotsan tiʼ pusicʼal. Muqʼuix i toj» (Pr. 27:12).

Jehová yomʌch i cʌntañonla. Jin chaʼan, maʼañic mi lac ñochtañob jiñi muʼ bʌ i techob tʼox bʌ, jiñi expulsadojoʼ bʌ o muʼ bʌ i yʌlob cʌntesa tac mach bʌ i sujmic (Ro. 16:17; 1 Co. 5:11; 2 Jn. 10, 11). I tajol yaʼ ti congregación an mach bʌ muqʼuic i jacʼob muʼ bʌ i yʌl jiñi Biblia (2 Ti. 2:20, 21). Cheʼ bʌ laj cʌñʌyʌch juntiquil quixtañu mach wocolic chaʼan mi lac ñaʼtan mi wem bʌ amigojʌch, pero cheʼ bʌ mi laj cʼʌn jiñi aplicación tac i chaʼan mensaje wocol chaʼan mi lac ñaʼtan mi wem bʌ amigo.

Mi woli (choncol) lac ñaʼtan ochel ti jumpʼejl grupo i chaʼan mensaje wen colem bʌ, la laj cʼajtiben lac bʌ: ¿Bajcheʼ yilal bʌ lac piʼʌlob com c ñochtañob? An hermanojob am bʌ i tajayob wocol cheʼ bʌ añob ti jumpʼejl grupo wen colem bʌ. Jin chaʼan, ñuc i cʼʌjñibal cheʼ tsajilonla cheʼ bʌ añonla ti jumpʼejl grupo bajcheʼ ili. Come wocol chaʼan mi lac ñaʼtan bajcheʼ yilalob yicʼot bajcheʼ yilal añob tiʼ chaʼan bʌ Dios. Salmo 26:4 miʼ yʌl: «Maʼanic mi cajñel yicʼot winicob yujiloʼ bʌ lot. Maʼanic mi cajñel yicʼot jini chaʼpʼejl jach bʌ i pusicʼal». Jin chaʼan, ñumen wen cheʼ jin jach mi lac chocbeñob majlel mensaje jiñi laj cʌñʌyoʼ bʌ.

Anquese mach wen colemic jiñi grupo baqui añonla, yom tsajilonla chaʼan maʼañic mi lac ñusan cabʌl hora lac choc majlel mensaje yicʼot yom tsajilonla chaʼan jiñi temaj muʼ bʌ la cʌl. Mach xicʼbiloñicla chaʼan mi lac jacʼ tiʼ pejtelel jiñi mensaje cheʼ an chuqui woli (yʌquel) i yʌlob yicʼot anquese woli i jalʼan chuqui woli i yʌlob. Pablo tiʼ sube Timoteo chaʼan yom tsajil miʼ yajñel yicʼot jiñi muʼ bʌ i ñʌmʼañob i chaʼleñob jopʼtʼan yicʼot muʼ bʌ yotsañob i bʌ baʼ mach i wentajobic (1 Ti. 5:13). Ti ili ora jiñʌch muʼ bʌ i mejlel ti ujtel jaʼel ti Internet.

Jiñi xñoptʼañob pʼʌtʌlobix bʌ tiʼ chaʼan bʌ Dios maʼañic miʼ yotsañob i bʌ cheʼ bʌ jiñi yambʌ wiñicob xʼixicob woli i yʌlob mach bʌ weñic tiʼ tojlel yambʌlob o cheʼ bʌ woli i yʌlob mach bʌ yomic miʼ ñaʼtʌntel (Sal. 15:3; Pr. 20:19). Maʼañic miʼ ñʌchʼtañob yicʼot maʼañic miʼ pucob noticia tac muʼ bʌ i yʌcʼ ti toj sajtel i pusicʼal jiñi yambʌ wiñicob xʼixicob o mach bʌ yujilobic chaʼan i sujmʌch (Ef. 4:25). Maʼañic miʼ melob bajcheʼ jiñi come yaʼ ti jw.org yicʼot ti jiñi programa i chaʼan JW Broadcasting^® mucʼʌch lac taj jiñi chʼujul bʌ bʌlñʌcʼʌl yicʼot noticia tac mucʼʌch bʌ lac ñop chaʼan i sujmʌch.

An Testigojob muʼ bʌ i cʼʌñob jiñi aplicación tac chaʼan mensaje chaʼan miʼ chaʼleñob choñoñel, mʌñoñel yicʼot chaʼan miʼ subob chaʼan yomob xyaj eʼtelob (troñelob). Jiñi muʼ bʌ i cʼʌñob ili aplicación tac miʼ cʼʌjñibʌyel chaʼan jiñi i yeʼtelob, pero mach yomic miʼ sʌclañob jiñi hermanojob chaʼan yom i tajob cabʌl taqʼuin (He. 13:5).

Mi laj cʼuxbiñob jiñi la quermañujob, jin chaʼan mi lac ñuqʼuesʌbeñob i pusicʼal yicʼot mi laj coltañob cheʼ bʌ i cʼʌjñibalob i chaʼan (Stg. 2:15, 16). Pero, ¿am ba i wocolel cheʼ bʌ mi laj cʼʌn jiñi aplicación tac i chaʼan mensaje, chaʼan mi laj cʼajtin taqʼuin chaʼan mi laj coltañob jiñi hermanojob i cʼʌjñibal bʌ i chaʼañob o chaʼan mi laj coltañob cheʼ bʌ miʼ ñusañob tsʌts bʌ icʼ jaʼal o yujquel lum? Mi cheʼ mi lac mel miʼ mejlel lac mʌctan chaʼan jiñi sucursal o jiñi ancianojob yaʼ ti congregación miʼ mejlel i melob ti wen i yeʼtel (1 Ti. 5:3, 4, 9, 10, 16). I mi juntiquilic xñoptʼan yom i yʌcʼ ti ñaʼtʌntel chaʼan i bajñel jach woli i cʌntan jiñi hermanojob.

Jin chaʼan, cheʼ bʌ mi caj laj cʼʌn jiñi aplicación tac chaʼan mensaje laʼ lac ñaʼtan chuqui ti wocol miʼ mejlel lac taj yicʼot laʼ lac pʌs chaʼan tsajilonla come pejtelel com bʌ lac mel jiñʌch muʼ bʌ i yʌqʼuen i ñuclel Jehová (1 Co. 10:31).