Zoova ˗bha ꞊Gbɛkiö ˗nu ꞊vadhɛ ˗bɔ parɛ ˗nu ˗ta ꞊dɛɛ, ˈö waa wo ˗bha ˈkɔdhigümɛn ˗nu ɛɛnˈˈ wo ꞊dhegblü ˗nu ˈwo ˈˈdoo dɔ. ˈˈKɛɛ kletiɛn ˈö ˗ya ˗kian, ˗a dua ˈyaa ˗mü kö ˗a ˗zo ˗yö bhɔ ˗dhioo ˈö yö ˗a ˈka: «˗Gleŋmɛn ˗yö ˈwɔn ˈˈgbɩɩ˗ ˗yö mü ꞊gblɛɛn, ˈyö ö ˗blɛnŋ kpɔ. ˈˈKɛɛ ˈˈblɔɔnmɛn ˗zë, ö ˗gɔ ˗gban ˈnën˗ wo ˈö dho˗ ˈka, ˈyö˗ ˈgü ˗wɔn yaa ˗nu ꞊slɔɔ.»​—Prov. 27:12.

Kwa˗ ˈwɔn ˗dɔ ꞊dhɛ Zoova ˗ya ˈˈpiʋ̈ ˈö kwa ˗gɔ bho ˈwɔn ˈˈgbɩɩ˗ ˗gɔ. ˗A ˈwɔn ˈgü, mɛn ˗nu ˈwo ˗kankwëë ˗da, ɛɛnˈˈ ˈö ꞊waa˗ ˗an bho kwa kpö ˈgü, ɛɛnˈˈ ˈö ˈwo ꞊sua ˗wɔn ˗nu pö ˗ni bhë, ˈkwaa ꞊nënŋ ˗an ˗bha. (Wlɔ. 16:17; 1 Ko. 5:11; 2 Zn. 10, 11) Mɛn ˈbha ˗nu ˗de ˈwo kwa ˈˈpiʋ̈ ˗zlanwokɔɔdhö, ˈwaa ˈtɔŋ˗ ˗nu ˈwo Biblö ˈgü ˗an ˗ya ꞊bhlëë ˈgü. (2 Tim. 2:20, 21) ˈKwa˗ pö ˈkwa ˈˈtɔŋdhɛ ˈkun, ˗a ˈdhɛ bhë kwa ˗zo ˈyaa bhɔ ˗a ˈka. ˈˈKɛɛ ˗ya kë aplikashiɔn ˗nu ˗ta, ˈˈtɔŋdhɛ ˈkun ˗sü ˈö ö ˈsuan˗ ˈka ˗yö ꞊mɔɔn˗ ˗bha ˈö ˗kë kwa ˗gɔ ˈˈgbɩɩ˗.

˗Ya kë ꞊dhɛ mɛn ꞊va ˈwo nɔɔn˗ bɔ ˈwo ˈko ˗nu ˗dhɛ wo ˗mü, ˈkwa kë ˗an kpö ˈgü, ˗kwa ˈˈtɔŋdhɛ ˈkun kwa ˈsuan˗ ˈka. Kletiɛn ˈbha ˗nu ˈwo wo ˗de ˗da pë suu ˈö ˈˈdhʋ̈ ˗a ˈgü, ˗a ˈˈdhiʋ̈ ˗to ˗an ˗gɔ ˈya˗. Mɛn kpö ˈö˗ ˈgümɛn ˗nu ˗mɔn ꞊këŋ ɛɛnˈˈ ˈˈgblü ˗bha, Zoova ˗bha ꞊Gbɛkiö ˗ya kë ˗a ˈgü, ˗yö ꞊mɔɔn˗ ˗bha kö ˗yö ˈwɔn ˗nu kë ö ˈsuan˗ ˈka ˗ee? ˗Yö ꞊mɔɔn˗ ˗bha kö mɛn ˈwo˗ ˈka ꞊dedewo ɛɛnˈˈ ˗kɔ ˈö ˗an ˗bha ˗zoyödhe ˈdhö˗ ˈka, ˗ya dɔ ˗ee? Psaume 26:4 ˗ya ˗pö: «ˈMaan ꞊nënŋ ˈˈkpënŋ˗ ˗kë mɛn ˗gɔ ˗mɛn ˗nu ˗bha. Mɛn ˗nu ˈö ˈpë ˈwo˗ ˈka ˈwo˗ ˗bin, a ˗duëë ˗an ˗gɔ.» ˗Ya ˗zɔn ꞊dhɛ ˗yö ˗dho kë ˗së kö ˈkwa˗ pö ˈkwa ˈˈdoo dɔ mɛn ˈbha ˈˈpiʋ̈ ɛntɛnɛtö ˗ta, ˗yö kë mɛn ˈö ˈkwa˗ dɔ ˗së ˈka ˗a ˈka.

ˈKö ˗kë ꞊dhɛ ˈwaa ꞊va, kletiɛn dua ˗mü kö ˈˈtʋ̈ŋ ˈwo˗ ˗kë ˈˈdoo ˗dɔ ɛntɛnɛtö ˗ta ˗sü ˗bha, waa pë ˈwo˗ ˗wɔn ꞊blɛɛ, ˗yö ö ˗zota ˗a ˈgü. ˈYa ˗dho kë kwa ˈgü ꞊dhɛ nɔɔn˗ ˈˈpɛpɛ ˈwo˗ bɔ kwa ˗dhɛ, kwa dua ˗mü ˈkwa˗ ˗daa kë. Bɔmɛn Pɔdhö ˗ya ˗pö Timote ˗dhɛ ˗yö ö ˗de ˈkun ‹mɛ ˗nu ˈö dhiang ˈö ˈyaa˗ ˗an zë ˗dhiang ˈka ˈwo˗ zë, ˈö ˈwo wo ˗dɩ dɔ˗ ˈka mɛ ˗nu ˗bha ˈwɔn ˈgü bha, ˗an ˗nu ˗bha.› (1 Tim. 5:13) ꞊Dɛɛ, kletiɛn ˈbha ˗nu ˗wa ˗kë ˈˈdhʋ̈ ɛntɛnɛtö ˗ta.

Kletiɛn ˈö ˗ya ˗kian, ˈyaa ö ꞊dhegblü ˗nu ꞊tɔɔ kë, ɛɛnˈˈ ˗wo ˗an ꞊tɔɔ kë ˗ni, ˈyaa ö ˈˈdhi ˗da ˗a ˈgü. ˈYaa ö ꞊dhegblü ˗nu pö. (Ps. 15:3; Prov. 20:19) ˈYaa ˈwɔn ˗nu ˗gɔ ˗bhla, ɛɛnˈˈ ˈyaa ꞊sua ˗wɔn ˗nu ˗pɛn. (Efɛ. 4:25) ˈWɔn ˗së ꞊va ˈwo ˗gban Biblö ˗ta waa nɔɔn˗ ˗nu ˈö ˈkwa ꞊mɔɔn˗ ˗bha ˈkwa ˈdhaŋ˗ bho ˗an ˈˈdhiʋ̈, ˗wo kwa ˗bha ɛntɛnɛtö ˈˈnimlɔn jw.org waa Tele ˈö JW ˗ta, ˗an ˗ta.

Zoova ˗dhɔkëmɛn ˈbha ˗nu ˗wo ˗bɔ ɛntɛnɛtö ˗ta ˈwo pë dhɔ, ˈwo ˈˈdhoo dɔ, ɛɛnˈˈ ˈwo ˈˈbhala nu mɛn ˗nu ˗dhɛ. ˗A ˈdhɛ bhë ˈwëëga mɛɛnˈˈ ˗sü ˗mü, ˈyaa ˗gban Zoova ˗dhɔkësü ˗bha. Kletiɛn ˈö ˈyaa ˈˈpiʋ̈ kö ‹ˈwëëga ˗dhɔ ˗yö ö kë ˗yö ziö˗ ˈka ˗naa ˈgü›, ˗a dua ˗mü kö ˗ya kë ˈˈslö ˈka, kö ˈya ˗dho kwa ˗bha ꞊dhegblüdhɛ kë ꞊nɔɔn ˗mɛɛn ˗a ˈgü ˗pë ˈka.​—Ebl. 13:5.

Kwa dua ˗mü ˈkwa ˈwëëga ˗dhɛ ɛntɛnɛtö ˗ta, kwa ꞊dhegblü ˗nu ˈwo ˈwɔn ˈˈgbɩɩ˗ ˈgü, ˗an ˗bha ˈka ˗ee? Kwa ˗zo ˗yö kwa ꞊dhegblü ˗nu ˈˈpiʋ̈, ˗dhɔ ˈgü. ˗Wa kë ˈwɔn ˈˈgbɩɩ˗ ˗nu ˈgü kwa ˗an ˗takun, ˈö ˈkwa ˗an ꞊faanmën. (Zak. 2:15, 16) ˈˈKɛɛ ˈwëëga ˗dhɛ ˗an ˗bha ˈka ˗sü ˈö ɛntɛnɛtö ˗ta, ˗yö ꞊mɔɔn˗ ˗bha ˗ya kë kö ˗an ˗takun ˗sü ˗yö kë fidhiadhö waa ˗an ꞊dhegblü ˗nu ˈwo ˗zlanwokɔɔdhö ˗an ˗gɔ ˈˈgbɩɩ˗. (1 Tim. 5:3, 4, 9, 10, 16) ˗Ya ˈgo mü, ˈkwaa˗ ˈˈpiʋ̈ ˈkwa˗ ˗zɔn ꞊dhɛ ˗wa kwa ˗ya kö ˈkwa nu kwa ꞊dhegblü ˗nu ˗dhɛ.

Kwa˗ ˈˈpiʋ̈ kö ˈwɔn ˈˈpɛpɛ ˈkwa˗ ˗kë, ˗wo ˗Zlan ˈtɔ bhɔ. (1 Ko. 10:31) ˈDhɛ ˈˈdhʋ̈, ˈkwa˗ pö ˈkwa bɔ ɛntɛnɛtö ɛɛnˈˈ parɛ ˗nu ˗ta kö ˈkwa nɔɔn˗ bɔ mɛn ˗nu ˗dhɛ, ˗kwa kwa ˗zota ꞊köŋ ˗së ˈka.