Mboṅ a Yehova iwo̱ i mabolane̱ belongisan ba we̱nge̱ o kwala na belongi babu ba mbia name̱ne̱ pe̱ na bane̱ bonasango na bonańango. Nde kriste̱n ńou e si me̱nde̱ dimbea man malea: “Nájangwa a mapomane̱ je̱ne̱ mbeu a ńolo, na mo̱ a se̱mbe̱ mo̱, nde belemā ba mala, na babo̱ ba kusa bobe.”—Min. 27:12.

Di bi ná Yehova a mapula o tata biso̱. Ońola nika nde di si malatano̱ na ba bena ba mawane̱ diwanje̱, ba pangabe̱ o bebokedi, to̱ ba malańse̱ belēdi ba mpoṅ. (Rom. 16:17; 1 Kor. 5:11; 2 Yohane 10, 11) Bato bō̱ bena ba malate̱ na mwemba be ná ba si be̱ne̱ bedangwedi ba bwam. (2 Tim. 2:20, 21) Di si dimbea so̱ nika ke̱ di mapo̱so̱ mako̱m masu. Nde ye ná e be̱ biso̱ ndutu o po̱so̱ mako̱m ma bwam tongwea na belongisan ba loma na kusa la mye̱ndi.

Ye pe̱ mweńa jita o no̱ngo̱ jangame̱ye̱ ná di bie po̱so̱ mako̱m yete̱na dibo̱to̱ la bato di kolo. Kriste̱n iwo̱ i so̱lise̱ babo̱me̱ne̱ o mabo̱to̱ mande̱ne̱, nde nika e wanedi nde babo̱ mbeu a ńolo. Ne̱ni munasango to̱ munańango eno̱ ná a no̱ngo̱ jangame̱ye̱ yete̱na dibo̱to̱ di bambe̱ bebwea to̱ mo̱me̱ne̱ lokoli la bato e? Ye ndutu o bia ba nja be o di dibo̱to̱ na bete̱medi ba mudī ba moto te̱. Kalat’a Myenge 26:4 e makwala ná: “Na si majane̱ bato ba lobango wuma iwo̱, to̱ lata na bato ba misomba.” Mo̱ nik’e si malee̱ nde ná ye dibie̱ ná di lomeye nde bato di bino̱ bwam mye̱ndi buka te̱ e?

To̱ e be̱ nde ná dibo̱to̱ di longabe̱ nde na ngus’a bato, kriste̱n ńangame̱n te̱ nde jombwea ponda e matombise̱no̱ o loma mye̱ndi, na mambo ma makwalabe̱ oten. Di s’e̱ne̱ biana je eto̱m o jalabe̱ mye̱ndi me̱se̱, e be̱ to̱ nje mi makwalano̱ to̱ mo̱me̱ne̱ ponda nika e mano̱ngo̱ne̱no̱ biso̱. Paulo ome̱le̱ Timoteo ná a no̱nge jangame̱ye̱ na ba ‘be nge̱ń na ba mape̱ye̱ o myambo ma bato bape̱pe̱.’ (1 Tim. 5:13) Nika ńe pe̱ ná e bolane̱ we̱nge̱ tongwea na belongisan ba loma na kusa la mye̱ndi.

Kriste̱n ńou to̱ po̱ e si me̱nde̱ tila mambo ma bobe te̱nge̱ne̱ bonasango to̱ langwa besoka ba longe̱ labu to̱ mo̱me̱ne̱ langa mo̱. (Mye. 15:3; Min. 20:19) E me̱nde̱ pe̱ samba myango ba kolise̱no̱ to̱ mena mi titi mbaki. (Efe. 4:25) Di be̱n da la mudī njoasoa na mibia me mbaki o mulomba masu jw.org na o mudango ma mo̱di te̱ ma JW Elimb’a Bedinge̱dinge̱.

Mboṅ a Yehova iwo̱ i mabolane̱ belongisan ba loma na kusa la mye̱ndi o jandise̱ na janda mambo, tombise̱ mibia ma ńunga to̱ kusea bato bape̱pe̱ bebolo. Nika ńe̱se̱ ńe nde ńunga, e si be̱n pe̱ to̱ mulatako to̱ mō̱ na jowe̱ la Yehova. Kriste̱n ńena ni si mapule̱ “te̱se̱ mulema o to̱ndo̱ la bema” e si me̱nde̱ bolane̱ mulatako mao na bonasango o wasa mo̱ni.—Bon. 13:5.

Nje pe̱ so̱ kwala jombwea bolane̱ la belongisan ba loma na kusa la mye̱ndi o baise̱ mo̱ni ońola kriste̱n ye o ńo̱ngi, to̱ yena mbeu a ńolo e kweledino̱ e? Di ko̱lo̱ngo̱ne̱ lee̱le̱ bonasango asu ndolo na jembe̱ pe̱ babo̱. (Yak. 2:15, 16) Nde bola la nika tongwea na belongisan ba loma na kusa la mye̱ndi le ná di bola ná e be̱ mukanjo m’ebolo to̱ mo̱me̱ne̱ mwemba ndutu o wana jongwane̱ ka nje te̱ e te̱se̱be̱no̱. (1 Tim. 5:3, 4, 9, 10, 16) Nde to̱ mō̱ ńasu pe̱ a si mapula tute̱le̱ bato o jo̱nge̱le̱ ná a te̱se̱be̱ tobotobo o jombwea mido̱ngi ma Loba.

Ńo̱ng’asu ńe nde ná di bole me̱se̱ ońola edub’a Loba. (1 Kor. 10:31) Ońola nika, di po̱si so̱ te̱ o bolane̱ to̱ njik’elongisan a loma na kusa la mye̱ndi, jombweye ndutu nika ńeno̱ ná e wana, di no̱nge pe̱ jangame̱ye̱.