Balima dɔw be tɛmɛ telefɔni wala tablɛti n’a ɲɔgɔnnaw fɛ ka to ka kumaɲɔgɔnya kɛ n’u somɔgɔw ani u kerecɛnɲɔgɔnw ye. Kerecɛn kolɔnbaga be ladili nin to a hakili la: “Hakilitigi mana kojugu natɔ ye, a be dogo. Nga kolɔnbali be taga tɛmɛ a kɔrɔ, a daa be to a la.”—Talenw 27:12.

An b’a lɔn ko Jehova b’a fɛ k’an latanga. O kama, mɔgɔ minw be na ni farali ye, minw gwɛnna ka bɔ kafo kɔnɔ wala minw be ngalon kumaw jɛnsɛn, an t’a fɛ ka jɛn n’olu ye (Ɔrɔm. 16:17; 1 Kor. 5:11; 2 Zan 10, 11). A be se ka kɛ ko kafoden dɔw tɛ Bibulu ka sariyaw labato (2 Tim. 2:20, 21). An b’o to an hakili la n’an b’an teriw sugandira. A be se ka gwɛlɛya an ma k’an teriw sugandi koɲuman Whatsapp, Facebook n’a ɲɔgɔnnaw kan.

Dɔw be jɛnkuluw sigi walisa ka mesaziw ci ɲɔgɔn ma rezo sosiyow kan. A kɔrɔtanin lo kosɔbɛ an k’an janto ka teri ɲumanw sugandi n’a y’a sɔrɔ ko an b’o jɛnkulu dɔ la min mɔgɔw ka ca. Kerecɛn dɔw donna jɛnkulu dɔw la minw mɔgɔw ka ca ani o laban ma ɲɛ. Kerecɛn be se k’a janto a yɛrɛ la cogo di n’a y’a sɔrɔ ko a be jɛnkulu dɔ la min mɔgɔw tɛmɛna mɔgɔ kɛmɛ wala mɔgɔ waa caaman yɛrɛ kan? O ɲɔgɔn na, i tɛ se k’a lɔn o jɛnkulumɔgɔw ye mɔgɔ tigitigi minw ye. I tɛ se k’a lɔn fana n’u ka limaniya barika ka bon wala n’a man bon. Zaburuw 26:4 b’a fɔ ko: “Ne te sigi ni namaramɔgɔw ye, n fana te to ni filankafɔw ye.” Yala o kumaw t’an jija an ka to ka baro kɛ n’an lɔnbagaw dɔrɔn lo ye Whatsapp, Facebook n’a ɲɔgɔnnaw kan wa?

Hali n’an b’o jɛnkulu dennin dɔ lo kɔnɔ, an be wagati hakɛ min kɛ n’o jɛnkulumɔgɔw ye ani u be baro kɛ koo minw kan, a ka ɲi an k’an janto o la. N’o jɛnkulumɔgɔw be baro kɛra koo o koo kan ani u be wagati hakɛ min o min kɛra o la, an kana a miiri ko waajibi lo an k’an daa don o la. Pol ye Timote lasɔmi ko a k’a yɛrɛ kɔrɔsi mɔgɔw la minw “daa ka ca, u daa be don mɔgɔ ka koow la.” (1 Tim. 5:13). Bi, o ɲɔgɔnnamɔgɔw be Whatsapp, Facebook n’a ɲɔgɔnnaw kan.

Kerecɛn kolɔnbaga tɛna sɔn k’a balimaw kɔrɔfɔ wala k’u ka gundow fɔ tɔɔw ye. Ni tɔɔw be balimaw kɔrɔfɔra a tɛna sɔn k’u lamɛn fana (Zab. 15:3; Talenw 20:19). Koo minw be mɔgɔ dabali ban wala minw tiɲɛntigiya ma lɔn, a tɛ sɔn k’olu jɛnsɛn (Efɛz. 4:25). An ka site jw.org kan ani porogramu min be bɔ kalo o kalo JW Telewisɔn na, an be kunnafoniw ani kalan caaman sɔrɔ minw basiginin lo Bibulu kan ani u tiɲɛntigiya lɔnna.

Balima dɔw be tɛmɛ Whatsapp, Facebook n’a ɲɔgɔnnaw fɛ ka feereli wala ka sanni kɛ, ka fɛɛn dɔw piblisite kɛ wala ka baara kofɔ. O ye jagokow lo ye, Alakow tɛ. Kerecɛn minw t’a fɛ ‘wari ɲiniko ka fiɲɛ don u si tagamacogo la,’ olu tɛna sɔn abada k’u balimaw jati kiliyanw ye.—Eburuw 13:5.

Tuma dɔw la, kasara be balima dɔw sɔrɔ wala fɛɛn bɛrɛ tɛ kɛ u fɛ. Yala an be se ka tɛmɛ Whatsapp, Facebook n’a ɲɔgɔnnaw fɛ ka wari deli walisa k’o balimaw dɛmɛ wa? Tuma caaman na, an b’a yira ko an b’an janto ɲɔgɔn na ni kanuya ye an kɛtɔ ka ɲɔgɔn dɛmɛ ani ka ɲɔgɔn jija (Zaki 2:15, 16). Nka, n’an be tɛmɛ jɛnkuluba dɔ fɛ Whatsapp, Facebook n’a ɲɔgɔnnaw kan k’o kɛ, o be se k’a to a be gwɛlɛya tɔnbolo wala kafo ma k’o balimaw dɛmɛ (1 Tim. 5:3, 4, 9, 10, 16). An t’a fɛ k’a to mɔgɔw k’a miiri ko kunkanbaara kɛrɛnkɛrɛnnin kalifara anw lo ma ko an k’an janto Ala ka sagakulu la.

Koo minw be nɔɔrɔ la Ala kan, an b’a fɛ k’o lo kɛ (1 Kor. 10:31). O la, n’i be jatiminɛ kɛra k’a filɛ n’i bena baara kɛ wala n’i tɛna baara kɛ ni Whatsapp, Facebook n’a ɲɔgɔnnaw ye, miiri farati minw b’o fɛɛnw na ani i janto i yɛrɛ la.