Ndusụk nditọete ẹsida mme n̄kpọ oro ẹsion̄ode ẹdi idahaemi ẹneme nneme ye mbon mmọ ye nditọete eken, mîdịghe ẹnọ mmọ etop. Edi Christian emi ọsọn̄de idem ke esop idifreke se Mme N̄ke 27:12 ọdọhọde ete: “Owo mbufiọk ada okụt afanikọn̄ edịbe; edi ọkọi ebe aka onyụn̄ ọkọbọ ufen.”

Imọdiọn̄ọ ke Jehovah iyomke n̄kpọ anam nnyịn. Ntre nnyịn isidụkke ndụk ye mbon emi ẹsitọde ubahade ke esop, mbon emi ẹma ẹkesio ẹfep ke esop, m̀mê mbon oro ẹsikpepde nsu. (Rome 16:17; 1 Cor. 5:11; 2 John 10, 11) Ndusụk owo ke esop ẹkeme ndinam n̄kpọ emi Bible ọdọhọde ikûnam. (2 Tim. 2:20, 21) Ima iyom ufan, nnyịn isimekke utọ mbon oro. Edi ekeme ndisọn̄ ndimek nti ufan ekpedi isịne ke otu emi ẹsidade utọ app emi ẹnọ owo etop.

Owo okpoyom ndidụk otu emi ẹsidide ẹnọnọ owo etop ẹbọbọ, ndien mme owo ẹwak etieti ke otu oro, enen̄ede ọfọn enye ekere utọ mme owo emi enye oyomde ndidụk ndụk do. Ndusụk mme Christian emi ẹkedụkde utọ otu oro ẹma ẹdụk mfịna. Nso idin̄wam eyenete ọdiọn̄ọ se enye akpanamde edieke enye oyomde ndidụk otu emi ẹwakde ẹbe owo ikie m̀mê tọsịn kiet? Enye idikemeke ndidiọn̄ọ se kpukpru owo ke otu oro ẹdide, idinyụn̄ idiọn̄ọke m̀mê mmọ ẹsọn̄ idem ke esop. Psalm 26:4 ọdọhọ ete: “Ami ntiehe ye mbon abian̄a; nnyụn̄ nsan̄ake ye mmọ eke ẹdịpde se mmọ ẹdide.” Emi owụt ke n̄kukụre mbon emi ikpesinemede nneme inyụn̄ inọde etop ẹkpedi mbon emi ima ikọdọdiọn̄ọ.

Ekpededi owo iwakke ke otu, ọfọn Christian ekpeme udomo ini emi enye esidade ọnọ owo etop ye se mbon otu oro ẹsiwakde ndineme mban̄a. Iwọrọke ke ẹma ẹnọnọ etop, ke ana itiene ibọrọ inamke n̄kpọ m̀mê aban̄a nso, inyụn̄ iwọrọke ke akpana itiene ineme n̄kpọ oro isịm utịt inamke n̄kpọ m̀mê ebịghi didie. Paul ama ọdọhọ yak Timothy ekpeme idem ye “mme etịn̄ ikọ-edem ye mme esịn idem ke mbubehe mbon en̄wen.” (1 Tim. 5:13) Mfịn, mme owo ẹkeme ndida app emi ẹsidade ẹnọ owo etop ẹtịn̄ ikọ-edem ẹnyụn̄ ẹsịn idem ke mbubehe mbon en̄wen.

Idụhe eyenete emi ọsọn̄de idem ke esop emi edisan̄ade etịn̄ idiọk ikọ aban̄a nditọete efen m̀mê nditịn̄ ikọ idịbi nditọete nnọ mbon efen, idinyụn̄ ikpan̄ke utọn̄ mbon efen ẹkpetịn̄. (Ps. 15:3; N̄ke 20:19) Enye idisuanke mbụk emi ẹtịn̄de ẹsịn usịn, m̀mê emi enye mîdiọn̄ọke m̀mê edi akpanikọ. Mbon en̄wen ẹkpenyụn̄ ẹnọ enye utọ etop oro, enye idibọrọke. (Eph. 4:25) Mme mbụk emi ẹdọn̄de ke jw.org ye mbon emi isikopde ke edinam TV nnyịn eke ọfiọn̄ ke ọfiọn̄ ẹwak etieti. Mmọ ẹto Bible, ndomokiet inyụn̄ idịghe nsu.

Ndusụk nditọete ẹsida app emi ẹsidade ẹnọ owo etop ẹnyam n̄kpọ, ẹdep n̄kpọ, ẹda ẹnam mme owo ẹdiọn̄ọ mbubehe mmọ, mîdịghe ẹda ẹdọhọ mme owo ke imenyene utom se inọde mmọ. Nnyịn ikpemenke utọ n̄kpọ oro idibuak ye se inamde inọ Jehovah. Mme Christian emi mîyomke ‘usụn̄ uwem mmọ asan̄a ye ima okụk’ isidomoke ndida nditọete mmọ n̄n̄wana okụk.—Heb. 13:5.

Ndi ọfọn ida app emi ẹsidade ẹnọ mme owo etop iben̄e okụk man ẹda ẹken̄wam nditọete emi n̄kpọ ọsọn̄de ye mmọ m̀mê emi oto-obot afanikọn̄ abiatde n̄kpọ mmọ? Imesin̄wam nditọete emi ẹyomde un̄wam inyụn̄ isọn̄ọ mmọ idem sia imama mmọ inyụn̄ iyom n̄kpọ ọfọn mmọ. (Jas. 2:15, 16) Edi ndida app emi ẹsidade ẹnọ mme owo etop nnọ ediwak owo etop ndọhọ ẹn̄wam nditọete oro ekeme nditịmede ata eti ndutịm emi n̄kọk itieutom m̀mê mbiowo ẹkenamde man ẹn̄wam nditọete oro. (1 Tim. 5:3, 4, 9, 10, 16) Imọdiọn̄ọ ke idụhe owo nnyịn ndomokiet emi okpoyomde ndinam nditọete ẹkere ke ẹsosio imọ ẹdọn̄ yak isan̄a in̄wam nditọete emi ẹnyenede mfịna.

Iyom ndinọ Abasi ubọn̄ ke kpukpru se inamde. (1 Cor. 10:31) Ntre ini oyomde ndida app emi ẹsidade ẹnọ owo etop nnọ owo etop, m̀mê ndida mme n̄kpọ eken emi ẹsion̄ode ẹdi nnam n̄kpọ, kere mme mfịna oro mme n̄kpọ oro ẹkemede ndida ndi, nyụn̄ kpeme se anamde.